“Azərbaycan
tarixinə aid yazılan dərsliklərdə
sovet dövründəki səhvlər hələ
də təkrar olunmaqdadır”
Layihə çərçivəsində müsahibimiz Azərbaycan Turizm İnstitunun müəllimi, tarix üzrə fəlsəfə doktoru, dosent Məhərrəm Zülfüqarlıdır:
-Azərbaycanın
dövlətçilik tarixi qonşu xalqlarla müqayisədə
çox qədimdir. Məsələn, qonşu Rusiya ilə
müqayisədə Azərbaycan dövlətçiliyinin
tarixi min il daha qədimdir. Azərbaycanda ilk dövlət birləşmələri
meydana gələndə, sivilizasiya inkişaf edəndə
Avropada ibtidai icma quruluşu mövcud idi. Bundan başqa Azərbaycanda
xristianlıq da Rusiyadan 500 il əvvəl qəbul olunub. Qafqaz
Albaniyasında 498- ci ildə kollektiv şəkildə qəbul
olunmuş Aquen qanunları kimi aktuallığını hələ
də itirməyən qanunvericilik mövcud olanda Avropanın əksər
ölkələrində, o cümlədən Rusiyada qanun nə
olduğunu bilmirdilər. Aquen qanununun qəbul olunma prosedurunu
Azərbaycanda parlamentarizimin formalaşmasının ilkin
dövrü kimi də xarakterizə
etmək olar. Azərbaycan dövlətçilik tarixində fəxr
hissi yaradan, müasir dövrlə səsləşən bir
faktı da qeyd etmək yerinə düşər. Hazırda Azərbaycanla
Ermənistan arasında danışıqlara ATƏT - in Minsk
qrupuna daxil olan ABŞ, Rusiya və Fransa vasitəçilik
edirsə, VII əsrdə o zaman
dünyanın iki nəhəng imperiyaları, Ərəb xilafəti
ilə Bizans arasında danışıqlara Girdman
hökmdarı Çavanşir hər iki dövlətin
xahişi ilə vasitəçilik edib. Təkcə bu
faktın özü Azərbaycanın ilk orta əsrlərdə
dünya üçün necə böyük əhəmiyyət
daşıdığını sübut edir. Azərbaycanın
3 minillik dövlətçilik tarixi var. Bundan 2 min ili
işğallar dövrünə, min ili müstəqillik
dövrünə düşür. Manna, Atropatena, Qafqaz
Albaniyası, Şirvanşahlar, Sacilər, Rəvvadilər,
Salarilər, Şəddadilər, Atabəylər,
Hülakülər, Qaraqoyunlular, Ağqoyunlular, Səfəvilər,
Əfşarlar imperiyası, Azərbaycan Xalq Cümhuriyyəti,
Azərbaycan Respublikası və digər dövlətlər
müstəqillik dövr dövlətləridir və hər
bir azərbaycanlı bu dövlətlərlə fəxr etməlidir.
Fikrimcə, dövlətçilik
tariximizdə cənubda mərkəzləşmiş dövləti
bərpa etmiş Qacarları da yaddan çıxarmamalıyıq.
Ağa Məhəmməd şah Qacarla yanaşı I və II
Rus - İran müharibələrində ruslara qarşı
döyüşən orduya komandanlıq etmiş 17
yaşlı qəhrəman Azərbaycan oğlu Abbas Mirzəni
dövlətçilik tariximizdə qeyd etməmək
mümkün deyil. Gəncənin qəhrəman müdafiəçisi
Cavad xanın müttəfiqi
olan Abbas Mirzə unudulmuş qəhrəmanlarımızdandır.
Çox təəssüf ki, bəzi
kitablarda Cavad xan xalqımızın qəhrəman oğlu
hesab olunduğu halda onunla eyni tayfadan olan, eynu düşmənə
qarşı vuruşmuş Abbas Mirzəyə
işğalçı kimi yanaşılması hələ də
qalmaqdadır. Bu cür səhv yanaşmalardan əl çəkməyin
vaxtı çoxdan çatıb.
- Son illər dövlətçilik
tarixinin, milli adət-ənənələrin təbliği
istiqamətində həyata keçirilən tədbirləri
necə qiymətləndirirsiniz?
- Azərbaycan
dövlət müstəqilliyinin bərpasından sonra bu sahədə görülən məqsədyönlü
fəaliyyəti müsbət qiymətləndirmək olar. Prezidentin
göstərişi ilə Azərbaycan tarixi çoxcildliyinin,
Azərbaycan Ensiklopediyasının nəşr olunması, Azərbaycan
Xalq Cümhuriyyətinin tarixinin obyektiv
araşdırılması, bir sıra tarixi abidələrin bərpa
və təmir edilməsi, arxeoloji qazıntıların ildən
ilə daha da genişləndirilməsi və s. görülən
müsbət işlərə misal ola bilər. Lakin bir
sıra problemlər də var. Belə ki, Azərbaycan tarixinə
aid yazılan dərsliklərdə sovet dövründəki səhvlər
hələ də təkrar olunmaqdadır. Azərbaycan tarix
elmi mərkəzinin hələ də formalaşmaması təəssüf
doğurur. Bu da ona gətirib çıxarır ki, illərlə
obyektiv tədqiqatlar aparan şəxslər kənarda
qaldığı halda vəzifəli şəxslər, millət
vəkilləri elmi adlar, elmi dərəcələr alır və
tarix elminin inkişafında buxova çevrilirlər. Belə
bir vəziyyət akademik Ramiz Mehdiyevin haqlı olaraq tənqid
etdiyi plagiatçılığa, başqalarının əməyindən
istifadə hallarına gətirib çıxarır ki, bu da
tarix elminin inkişafı üçün yaxşı
heç nə vəd etmir.
- Bu istiqamətdə təbliğin
daha da artırılması üçün hansı təkliflər
irəli sürərdiniz?
-
Dövlətçilik tariximizin daha səmərəli təbliğinin
aparılması üçün birinci növbədə
dövlətçiliyə bağlı, nisbətən gənc
kadrların irəli çəkilməsi, onlara dövlət
qayğısının artırılmasına ehtiyac var. Elmi
institutlara rəhbərlik edən şəxslərin digər
vəzfələrdə çalışmasına
qadağaların qoyması, onların sırf elmi - tədqiqat
işləri ilə məşğul olmalarının tələb
edilməsi, professorların, akademiklərin
başqalarının əsərlərinə adlarını həmmüəllif
kimi yazdırmalarına son qoyulması və s. elmin inkişafına
müsbət təsir göstərər. Ən vacibi isə tədqiqatçıların
əməkhaqlarının Qərb standartlarına
uyğunlaşdırılması, onların mənzil şəraitinin
yaxşılaşdırılması, əsərlərin nəşri
üçün qrantların ayrılması və s. işlər
də dövlətçilik tarixinin təbliğini daha da
yaxşılaşdırar.
- Ali təhsil ocaqlarında dövlətçilik
tarixinin tədrisi ilə bağlı fikirlərinizi bilmək
istərdik. Tələbələrin bu sahədə təhsil
səviyyəsi sizi qane edirmi?
- Bir
ali məktəb müəllimi kimi tələbələrin
hazırkı səviyyəsini müsbət qiymətləndirmək
olar. Bunu dərs dediyim Azərbaycan Turizm İnstitutunun tələbələrinin
timsalında deyirəm. Obyektivlik, şəffaflıq,
açıq diskussiyalar, tələbələrin öz arzu və
təkliflərini internet vasitəsilə müəllimlərə,
rektora bildirməsi dövlətçilik
tarixinin tədrisi üçün əsas şərtlərdəndir.
Tələbələrin səviyyəsinin yüksək
olması isə 1992 - ci ildən tələbə qəbulunda
tətbiq olunan yeniliklərlə
bağlıdır. Tam məsuliyyətilə demək olar ki,
bu sahədə əldə olunmuş nəticə Azərbaycan
dövlətçiliyinin böyük nailiyyətidir. Azərbaycan
Prezidentinin sərəncamı ilə magistraturaya qəbulun ali
məktəblərdən alınıb TQDK - ya verilməsi də
bu siyasətin davamıdır.
Yeni təhsil qanunu qəbul olunarkən test
imtahanlarının mahiyyətini dəyişməyə
çoxlu cəhdlər olsa da Prezidentin bilavasitə dəstəyi
və vətəndaş cəmiyyəti nümayəndələrinin
səyi ilə bu cür cəhdlərin qarşısı
alındı.
- Hazırda bu istiqamətdə hansısa problemlər varmı?
- Dərsliklərdə olan nöqsanlar, bəzi ali məktəblərdə
hələ də mövcud olan neqativ hallar, kadrların seçilib yerləşdirilməsində proteksiya
dövlətçilik tarixinin
təbliğinə mane olur.
Fikrimcə, hər bir müəllim tələbədə
dövlətə, millətə
məhəbbət hissi
aşılamalı və
özü bu işdə nümunə göstərməlidir. Bunun üçün
birinci növbədə
müəllim tələbələr
arasında böyük
nüfuza, hörmətə
malik olmalıdır.
Deməli, bunun üçün
də yuxarıda sadalanan neqativ halların kökü birdəfəlik kəsilməlidir.
- Mövcud tədris vəsaitləri bu sahədə məlumatların dolğun
çatdırılmasına imkan verirmi?
- Son illər çoxlu sayda tədris vəsaitləri nəşr
olunur. Lakin bunların əksəriyyəti
müasir dövrün
tələblərinə cavab
vermir. Fikrimcə, bu nəşrlər
üzərində mövcud
olan inhisarçılığa
son qoymaqla problemi həll etmək olar. Yəni müasir dövrün
tələbi odur ki, Təhsil Nazirliyinin qrifi ilə nəşr olunan vəsaitlərlə
yanaşı müstəqil
ekspertlərin yazdığı
alternativ vəsaitlərdən
də geniş istifadə olunmalıdır.
Bu sahədə son illər Azərbaycan Prezidenti yanında QHT - lərə Dövlət Dəstəyi Şurasının
yardımı ilə nəşr olunan alternativ vəsaitləri misal göstərmək olar. Yəni rəsmi qurumlardan
fəqli olaraq vətəndaş cəmiyyəti
institutları nümayəndələrinin
yazdığı vəsaitlər
öz demokratikliyi, obyektivliyi ilə o birilərindən fəqlənir.
Çünki son illər
Azərbaycanda sürətlə
inkişaf edən vətəndaş cəmiyyəti
institutları inhisardan
azaddırlar və bürokratik
məngənədən, bürokratik
əngəllərdən uzaqdırlar.
Tələbələrə tədrisdə bir
neçə alternativ
vəsaitdən istifadə
etmək imkanı verilməlidir ki, nəticədə o, demokratik
müzakirələrə, debatlara
hazır olsun. Məhz bu yolla biz dövlətçilik
tariximizi ləyaqətlə
təbliğ edə bilən gənclər ordusu yarada bilərik.
Nigar Abdullayeva
Palitra.-2012.-14
avqust.-S.12.