“Kinomuzda ciddi kadr
çatışmazlığı var”
Prodüser Fehruz Şamıyev: “Kino
sahəsində ciddi layihələr ols da, bu
işin təbliğat mexanizmi
səhv qurulub”
Layihə çərçivəsində
müsahibimiz “Cinema” Gənc Kinematoqrafçılar Mərkəzinin
rəhbəri, prodüser Fehruz Şamıyevdir:
-
“Cinema” Mərkəzinin son
layihəsi Bakı Film İnstitutu və onun tərkibində
kino sahəsi ilə bağlı kursların
açılışıdır. Bakı Film İnstitutunun yaranma səbəbləri ilə bağlı nə
deyə bilərsiniz?
- Məqsəd
yüksək səviyyəli peşəkarların yetişdirilməsidir.
Bu gün
kinematoqrafiyanın Azərbaycandakı vəziyyəti haqda söz demək çox çətindir. Ötən il mətbuatda bu haqda məndən soruşanda,
bildirirdim ki, böyük işlər başlayıb və bunlar göz
qabağındadır. Amma indi bu fikri bir
az yumşaltmaq
lazımdır. Kino sahəsində müəyyən
işlər görülsə də, bundan ictimaiyyətin xəbəri olmur. Mənə
belə gəlir ki, ötən iki ildə görülən işlər böyük və kiçikliyindən
asılı olmayaraq daha
çox təbliğ olunurdu.
İndi isə
demək olar ki, ciddi layihələr gözə dəymir.
Düşünürəm ki, ciddi layihələr davam edir, sadəcə bu işin təbliğat mexanizmi
səhv qurulub. Kino
çəkən insanlara elə gəlir ki, onlar həm də
yaxşı təbliğ etməyi, reklamı bilirlər. Bu belə deyil. Dünya təcrübəsində də belədir
ki, filmin
istehsalçısı bir, reklamı ilə
məşğul olan şirkət isə
başqası olur. Hələ
üstəlik filmin yayım- distribusiya işini isə
tamamən başqa şirkət öz üzərinə götürür.
Çox heyif ki, bu məsələyə
bizdə hələ də barmaqarası baxılır. Əlavə
edim ki, bununla bağlı Mədəniyyət və Turizm Nazirliyi maraqlı layihələr
hazırlamışdı və hazırda milli filmlərin xarici festivallara göndərilməsi müstəqil
şirkətlərdən birinə həvalə olunub. Amma bu məsələnin
az bir hissəsidir. “Cinema” olaraq, belə düşünürük ki,
bu problem ilk növbədə prodüser
institutunun inkişaf
etməməsi və bəzi kino
prodüserlərin öz işlərinə
biganə yanaşmalarının nəticəsidir. Yəni, bu problem üzündən
filmlərimiz nə yerli, nə də xarici bazara çıxa bilmir. Məhz bu boşluğu aradan
qaldırmaq üçün bu layihəni hazırladıq. İlk
buraxılışımız kinoprodüserlər oldu.
-Kurslarda təhsil prosesi necə qurulub?
- Təhsil ödənişlidir
və bu o deməkdir ki, bu kurslara qatılan
şəxs verdiyi pulun qarşılığı
olaraq keyfiyyətli təhsil görmək istəyir. Üstəlik, həmin şəxs
öz layihələrini
həyata keçirməyin
yollarını öyrənmək
istəyir. Düşünürəm ki, BFİ Azərbaycan kinosunun inkişafında, gənclərin kinoya cəlb olunmasında ən böyük layihələrdən biridir.
Bizim kurslara təkcə Mədəniyyət
və İncəsənət
Universitetini bitirmiş
şəxslər deyil,
incəsənətdən kənar
olan, amma menecer, prodüser bacarığı olan şəxslər də müraciət edir. Bizim kurslarda yerli və xarici
mütəxəssislər dərs
deyir. Adətən, bizdə bütün
sahələrdə yerli
mütəxəssislərə şübhə ilə yanaşırlar. Amma
məsələ budur
ki, xarici mütəxəssislərin hərəsinin
öz proqramı olur və onlar
asanlıqla bu proqlamlardan mühazirə oxuyurlar. Biz düşünürük
ki, bu kurslarda
yerli mütəxəssislərin
olması vacibdir, çünki onlar ölkədə baş verən proseslərdən
xəbərdardırlar. Deməli, onlar bu problemin həllini
də başqalarından
yaxşı bilirlər.
Buna görə də
biz onlara üstünlük verəcəyik.
Ötən kursda Avropa Kino Akademiyasının
“Ən yaxşı kinoprodüser” mükafatını
almış, çox
maraqlı filmlərə
prodüserlik edən Zeynəb Özbatur Atakanın
master-klassları oldu.
Zeynəb xanım birbaşa
olaraq “Cinema” mərkəzinin
dəvəti ilə Bakıya gəlmişdi.
Ondan başqa bu sahəni bilən insanlara da məlumdur ki, kinoda menecerlərə
böyük ehtiyac
var. Kinomuzun ən
böyük problemlərindən
biri də kinoya menecerlərin, iqtisadçıların, reklamçıların
yaxın buraxılmamasıdır.
Mənə belə
gəlir ki, kinoda rəqabət lazımdır və bu rəqabət təkcə
rejissorlardan yox, menecerlərdən, reklamçılardan
asılıdır. Bu baxımdan
BFİ-nin kurslarında
isə təkcə kino xadimləri dərs demir. Biz mütəmadi
olaraq reklamçıları, marketoloqları
dəvət edirik. Əlavə edim ki,
BFİ-də kinorejissor
kursları da fəaliyyətə başlayıb.
Burada sənəd vermiş şəxsləri beynəlxalq
təcrübədə olduğu
kimi kurs rəhbəri özü seçir. Bir qrupda 10 nəfər
tələbə təhsil
alacaq. Yaxın gələcəkdə montaj, operator kursları da elan ediləcək.
-Son illərdə Azərbaycan
kinosunu, onun problemlərini, istehsalatın özünü
araşdıranda hansı
nəticələrə gəlmək
olar?
- Kinomuzda ciddi kadr çatışmazlığı
var. Ölkəmizdə son 5 il ərzində
30-a qədər film çəkilib,
amma onları tamaşaçılar görmür.
Kinodan başı çıxan hər kəs bilir ki, son
illər ölkədə
çəkilən filmlərin
heç birini yaymaq olmur. Kinoteatrların vəziyyəti məlumdur,
düzdür, “Nizami” kinoteatrının açılışı
olub və oradakı zalların birində son illər çəkilmiş Azərbaycan
filmləri nümayiş
olunur. Bundan başqa, respublikanın bir sıra bölgələrində-İmişlidə,
Qəbələdə, Şəkidə
və s. müasir tələblərə uyğun
kinoteatrlar istifadəyə
verilib. Deməli, işləmək zamanı gəlib. Bizdə isə çəkilən
filmlər neçə
ildir rəflərdə
yığılıb qalır.
Bu filmlərin nümayişində, onların
xarici bazara çıxmasında eləcə
də başqa dövlətlərlə müştərək
layihələrin hazırlanmasında
prodüser çox vacib faktordur. Hamı bilməlidir ki, kinoprodüser filmin sahibidir. O, filmin ideya yaranan anından
başlayaraq son anına
qədər hər şeylə maraqlanan, narahat olan bir
insandır. Film hazır
olandan sonra isə
onun yerli və xarici bazarda yayılmasına, reklam olunmasına çalışır. Prodüser istehsalçı
olmaqla yanaşı, reklamçıları da,
distrübütorları da
tanımalıdır. Bizim verdiyimiz
üç aylıq təhsil prodüser institutunun yaranması üçün baza rolunu oynaya bilər.
Belə ki, məhz bu
kurslar sayəsində
Azərbaycanda kinoprodüser
məktəbinin əsası
qoyulacaq və kadr çatışmazlığı
qismən də olsa, aradan qaldırılacaq.
Tələbələrimiz isə
müxtəlif ixtisaslara
sahib insanlar idi. Onların arasında Mədəniyyət və
İncəsənət Universitetlərində
kinoşünas, kino rejissor təhsili alan tələbələrlə
yanaşı, orada dərs deyən müəlim, eləcə
də neft şirkətinin işçisi, Londonda kino və televiziya
üzrə nəzəri
magistr təhsili alan şəxs, iqtisadçılar da var.
- Biz İran və Türkiyə kino təcrübəsindən
istifadə etməliyikmi?
Bu iki ölkənin
kino modelindən Azərbaycana uyğun hansıdır?
-Deyirik ki, dünyaya
öz mədəniyyətimizlə
çıxmalıyıq. Deməli,
birinci növbədə həmin mədəniyyəti
yaxşı bilən ssenarist
olmalıdır. Bu, İran
kinosunda da, türk kinosunda da belədir. Misalları ona
görə onlardan gətirdim ki, mədəniyyət olaraq
həm bizə yaxındırlar, həm də 1990-dan 2005-ci ilə
kimi İran kinosu dünyaya
yaxşı mənada meydan oxuyub. 2003-cü ildən sonra
Türkiyə kinematoqrafiyası Avropanı heyrətləndirməyə
başlayıb. Hər iki ölkənin
filmlərində milli adət-ənənələri
və düşüncəni görmək mümkündür.
Onların mədəniyyəti də bizim
mədəniyyətlə demək olar ki, eynidir. Bu
bizə imkan verir ki, onların kino ənənənlərindən
yararlanaq. Qeyd edim ki, İran
kinematoqrafiyası azbüdcəli filmlərə daha çox üstünlük verir.
Hazırda bizdə bir filmə 1,5 milyon dollar vəsait
ayrılırsa, İranda orta
səviyyəli bir film
500 min dollara çəkilir.
Maraqlıdır ki, filmlər dramaturgiya, estetika, rejissor yozumu
baxımından bizimkilərdən üstündür.
Deməli, bizdə çatışmayan çox
məsələlər var. Biz, ümumiyyətlə, səmimi millət deyilik. Buna görə qonşunun hasarının kərpicini sayıb
öz hasarımızı ondan
bir kərpic yuxarı etmək istəyirik
və ya qonşunun
maşınına baxıb ondan daha yaxşısını almaq
istəyirik. Bizdə insanlar ürəklərinin
səsi ilə yox, kənarda
gördükləri ilə işlərini
reallaşdırırlar. Filmlərimizdə
yaşadığımız həyat əvəzinə süni fəlsəfələri, guya qlobal məsələləri önə
çəkirik. Halbuki, “Bizim
Cəbiş müəllim”, “Şərikli çörək” rejissorun yaşadığı həyat, eşitdiyi, gördüyü
hadisələr əsasında çəkilib. Əgər rejissor kənddə doğulub
və o mədəniyyəti bilirsə,
deməli, oranın hadisəsini
ekranlaşdırmalıdır. Məsələn, gürcü filmlərini götürək. Onlar öz qəhrəmanlarını
gülməli situasiyaya salmaqdan
çəkinmirlər. Amma bizdə isə
mütləq filmin qəhrəmanı əlini
çənəsinə dayayıb filosof
pozası almalıdır. Hətta
bu qəhrəman
adi dəyirmançı
olsa belə.
-“Cinema” hələlik
bir film istehsal edib. Davamı olacaqmı?
- Biz
2011-ci ildə Mədəniyyət və Turizm Nazirliyinin
keçirdiyi “Bu meydan, bu ekran” kino müsabiqəsində qalib
gəldik. Yəni bizim layihə 55
layihə arasından seçilmiş 3
qalibdən biri oldu və şərtlərə əsasən
də nazirlik bu üç layihəyə vəsait
ayırdı. Çəkdiyimiz “Yol” bədii
filminin quruluşçu rejissoru və prodüseri mənəm. Nazirliyin
xətti ilə qalib gəlmiş 3 film Beynəlxalq Muğam Mərkəzində
tamaşaçılara təqdim olundu. Filmi izləyənlərin bildirdiyinə
görə, Qarabağ probleminə fərqli bir yanaşma var bu filmdə. Hazırda bir
neçə qısa bədii film layihəmiz də var,
sadəcə maliyyə axtarırıq. Sənədli film layihəmizi
isə başqa studiyalardan
biri bəyənib.
-
Bildiyimizə görə ermənilər sizin çəkdiyiniz
filmə oxşar film də istehsal ediblər.
- Bizim filmin ssenarisi hekayədən və ermənilərin çəkdikləri filmdən fərqlidir. Bizim filmlə cəmiyyətə ünvanlanan mesajımız başqadır. Biz Elçin Hüseynbəyli ilə məsləhətləşdik, onun razılığından sonra kiçik, mobil komandamız əsəri ssenariləşdirməyə başladı. Bir neçə əlavə hadisə artırdıq, obrazların xarakterlərində müəyyən düzəlişlər etdik və nəhayət, alındı. Dəyişikliyə Elçin Hüseynbəylinin də etirazı olmadı. Təbii ki, Elçin Hüseynbəylinin də, ssenari ilə bağlı bəzi məsləhətləri oldu. Bizim filmin belə bir şüarı var: “Doğulduğun yerdə ölməlisən”. Filmin verdiyi əsas mesaj budur. Yəni, hekayədə və ermənilərin filmlərində “sülh ağacı” bizdə başqa mesajla əvəzlənib. Biz bu filmlə Azərbaycan vətəndaşına hər dəfə xatırlatmaq istəyirik ki, “Sənin orda torpaqların var”. Hamımız bunu düşünməliyik, bilməliyik ki, bizim orda torpağımız var. Qarabağ bizim hamımızın taleyindən keçir.
Nigar Abdullayeva
Palitra.-2012.-12 dekabr.-S.11.