“Hazırda şəbəkələşmiş
qəzet köşkləri kimi kitab satışı şəbəkəsi yaratmaq olar”
Mədəniyyət
və Turizm Nazirliyinin
Nəşriyyat, reklamın təşkili və informasiya şöbəsinin müdiri
Vaqif Quliyev: “Hesab edirəm ki, belə təşəbbüslər
olsa, dövlət dərhal öz dəstəyini göstərəcək”
Layihə çərçivəsində
müsahibimiz Mədəniyyət və Turizm Nazirliyinin Nəşriyyat,
reklamın təşkili və informasiya şöbəsinin
müdiri Vaqif Quliyevdir. Vaqif müəllim
bizimlə bu dəfə müasir
ədəbi yaradıclıq prosesi, ədiblərimizin
stimullaşdırılması və kitab
satışı məsələləri barədə
danışdı:
- Mədəniyyət və
Turizm Nazirliyi ədəbiyyatı Azərbaycanın milli sərvətlərinin
son dərəcə nəhəng, önəmli bir qolu hesab
edir. Ona görə də biz çalşırıq ki,
yazıçılarla, şairlərlə, Azərbaycan
Yazıçılar Birliyi ilə sıx əlaqədə
işləyək. Buna görə də nazirliyin bu sahədə həyata keçirdiyi
tədbirlərdə Azərbaycanın yazıçı və
şairləri, ədəbiyyat insanları həqiqətən
də yaxından iştirak edirlər və
bu cür tədbirlərdən
bəhrələnirlər. Ümumiyyətlə, biz nazirlik olaraq
çalışırıq ki, ədəbiyyat
korifeylərimiz, klassiklərimizlə bağlı tədbirlərdə
də birinci növbədə,
yazıçı və şairlərin səsi daha gur eşidilsin.
Həmçinin elm adamlarının –
nizamişünasların, nəsimişünasların sözünün bu cür tədbirlərdə gur
eşidilməsinə çalışırıq. Yəni
sözə peşəkar dəyər verən insanların bu cür tədbirlərdə
önə çəkilməsi məqsədəuyğundur. Bununla bəzilərinin diletant
ədəbi özfəaliyyətindən qurtulmaq
mümkündür. Biz
də bu prinsipi əsas
götürürük. Bu
da hər hansı bir
sahə ilə bağlı tədbirlərə kompleks və bitkin
yanaşmanı əks etdirir. Bu müəlliflərlə bağlı bizim “Qızıl kəlmə” ədəbi
mükafatı adlı layihəmiz həyata keçirilir.
Bu mükafat Azərbaycan
səviyyəsində ədəbiyyat sahəsində ən
ümdə mükafat sayılır. Bu mükafat vəsaitlərin
həcminə görə də ən birinci
və mühüm sayılır. Çünki burada ədəbiyyat
üzrə bütün nominasiyalar
öz əksini tapıb. Nəsr, poeziya, tənqid-publisistika, tərcümə və
sairi bura aid etmək olar. Qeyd edim ki,
artıq bu mükafatla
bağlı iki dəfə laureatlar elan olunub. Üzümüzə gələn
2013-cü ildə isə bu silsilədən
daha bir
mükafatlandırma layihəsi həyata keçiriləcək.
Bizim ədiblərimizi,
bizim şairlərimizi
populyarlaşdırmaq, onları cəmiyyətə daha yaxından tanıtmaq və
stimullaşdırmaq indiki zamanda
daha çox məqsədəuyğundur.
Çünki bizdə hələ də bu baxımdan keçid dövrünün stereotipləri var, buna görə də indiki zamanda ədəbiyyat
insanları qayğıya ehtiyac duyurlar. Bu prosesdə bir qədər həssas, zərif sahələr
daha çox
qayğıya ehtiyac duyur.
Ona görə də nazirlik
çalışır ki, bu
məqamla bağlı da boşluqlar
yaranmasın, hər şey normal və yaxşı səviyyədə təşkil
olunsun.
“Qızıl kəlmə” mükafatının
laureatlartı da hamıya, bütün
cəmiyyətə məlumdur. Bunlar Azərbaycan
ədəbiyyatında say-seçmə insanlardır.
Yalnız ona görə yox
ki, onların adları cəmiyyətdə
tanınır. Həm də ona görə
ki, onlar bu gün ədəbi prosesi yaradan insanlardır.
Biz bütün
parametrlərinə görə laureatların seçilməsini
aparırıq.
-
Müsabiqəyə hansı və nə vaxt
yazılmış kitablar təqdim olunur?
- Mükafatla bağlı olaraq
iki il ərzində çıxan kitablar təqdim
olunmalıdır. Bu kitabların məzmunu
da yeni əsərlərdəın
ibarət olmalıdır. Bu əsərlərin
səviyyəsinə çox ciddi baxılır və qiymət verilir. Bundan başqa bir məqam da var. Belə ki, yazar kitabı yazır,
kitab çap edilir. Bəs bundan sonra həmin kitabın taleyi
nə olacaq? Bu barədə
tədbirlər görmək də bizim
şöbəmizin əsas işlərindən birini təşkil edir. Siz bilirsiniz ki, sovet dövründə
indiki kimi
yaraşıqlı, hündür binalar olmasa da, demək olar ki, hər binanın altında bir
kitab mağazası fəaliyyət
göstərirdi. Yəni o dövrdə həqiqətən
də kitab mağazası bolluğu
vardı. Bir kitab
dükanından çıxıb rahatca o birinə girirdin, kitab çeşidi ilə
bağlı seçim edirdin.
Bundan başqa o vaxt kitabların qiyməti
də çox münasib
idi. 15 qəpiyə, uzaqbaşı 80 qəpiyə,
1 manata yaxşı kitablar
almaq olurdu. Yəni ən
bahalı kitablar sovet
dövründə bir manata
satılırdı. Amma həmin mağazalar indiki dövrün tələblərinə uyğun çətin ki fəaliyyətini
normal qaydada davam etdirə biləydi. Orası da doğrudur ki, hazırda tək-tük də olsa, bu cür
özəl mağazalar fəaliyyət
göstərməyə başlayıb. Amma
sayları kifayət qədər deyil. Məsələn,
Ədəbiyyat Muzeyinin altında çox gözəl bir kitab mağazası var. Həvəsli
oxucu üçün
bu kitabxanada hər cür kitablar var. Ən çətin tapılan kitab ola bilsin
ki, orda yox, Milli Kitabxanada
tapılsın. Amma müasir
dünyanın nəşri və poeziyasına aid
bütün əsas kitablar
o mağazada
satılır. Həmçinin Prezident
Kitabxanasının nəzdində bir kitab mağazası var ki, orada çox
qiymətli kitablar var.
“Əli və Nino” sərbəst kitab satışı şəbəkəsinə
daxil olan mağazalarda da qiymətli
və çeşidli kitablar satıldığını
görmək olar. Bir
neçə başqa misal
da çəkmək mümkündür.
Yəni demək istədiyim budur ki, bu sahə də dirilir. Kitab
satışı dirçəlmək üzrədir. Amma kitab
satışının əvvəllərdə olduğu kimi kütləvi
olmasına bir şey
də mane olur. Belə ki, hazırda sürətli internet var. Elektron
mütaliə inkişaf
edib. Mətbəədə çap olunan
kitabların oxunması
artıq ikinci plana keçib. İnsanlar elektron kitablara daha çox meyil göstərirlər.
Xüsusən də gənc
nəsil elektron mütaliəyə daha çox üstünlük
verir. Bu da zamanın tələbi ilə bağlıdır. Hər halda,
bu cür hallar kitab satışının
daha da kütləviləşməsinin
qarşısını alır.
Amma buna baxmayaraq, kitab satışı sahəsi respublika səviyyəsində yenidən
canlandırılmalı və
qənaətbəxş səviyyəyə
gətirilməlidir. Bu
məsələ həm
müvafiq qurumların,
həm də bütövlükdə cəmiyyətin
özünə aid olan
məsələdir. Bu
məsələdə özümüzə
tənqidi yanaşmalıyıq.
Bu baxımdan kitab satışı ilə məşğul olan sahibkarlara da çağırış
edirəm ki, kitab satışının
daha da kütləviləşməsində
təşəbbüslər və yeni ideyalarla
çıxış etsinlər.
Müəyyən ideyalarla çıxış
etmək olar. Məsələn, hazırda şəbəkələşmiş
qəzet köşkləri
kimi kitab satışı şəbəkəsi,
şəbəkələşmiş köşklər yaratmaq olar. Bu cür
kitab şəbəkələrinin
davamlı olması üçün onları
bir neçə mənbədən əlaqələndirilmiş
bir şəkildə kitabla təmin etmək olar. Bu, çox vacib
bir məsələdir.
Onu da deyim ki,
bu məsələyə
“kitab mədəniyyət
hadisəsidir” prinsipi ilə yanaşıb, işin başına bir ədəbiyyat insanını gətirməklə
bir nailiyyət əldə etmək olmaz. Bu işin
başına əslində
yaxşı biznes təfəkkürü olan,
bu sahəni yaxşı bilən peşəkar satışçılar
cəlb olunmalıdır.
Mən belə hesab edirəm kii, belə təşəbbüslər
olsa, dövlət dərhal öz dəstəyini göstərəcək.
Əgər məktəb
kitabxanalarını saymasaq,
respublikada uzaqbaşı
10 min kitabxana var. Əvvəllər
kitabxanaalrın sayı
12 min civarında idi, amma sonradan bir
çox filiallar birləşdirildikdən sonra
onların sayı azala bilər. Beləliklə, hazırda təxminən
10 min kitabxananın 3500-4000-i Mədəniyyət və
Turizm Nazirliyinə bağlı olan kitabxanalardır. Bəlkə də
həmin kitabxanalara satış şöbəsi
yaratmaqla bağlı ixtiyar verilə bilər. Əslində bu
cür tədbir həyata keçirməklə
biz bəlkə də
ölkədə əlavə
8-10 min kitab satışı
mərkəzi qazanmış
olarıq. Bu iş də əslində təşəbbüslər və
təşkilati baxımdan
baş verməlidir. Bizim sovet dövründən qalma bir qurum
var – Respublika Kitabxana Kollektoru. Bu qurum kitabları
kitabxanalara paylamaqla məşğuldur. Hər
il də
nazirlik adından kitabxanalara bu vasitə ilə 70-80 adda kitablar hədiyyə
edilir. Bu kitabların
hamısını həmin
o kollektor yerləşdirir.
Eyni zamanda da kitabxana
texnikası da kitabxanalara verilir. Az miqdarda
digər nəşriyyatlardan
oxunaqlı kitabları
alaraq, onları da kitabxanalara bu qurum təklif
edir. Bu təcrübəni
yeniləməklə kitab
satışını genişləndirmək
olar. Düşünürəm ki, kitabların
qiymətini, qədrini
və eləcə də satışını
kitabxana sistemində çalışanlardan yaxşı
bilən olmaz.
İlkin AĞAYEV
Palitra.-2012.-19 dekabr.-S.11.