“Diaspor televiziyası yaranmalıdır”

İsmayıl Ağayev: «Avropanın aparıcı dövlətlərində bələdiyyə, yaxud digər seçkili orqanlarda azərbaycanlıların daha çox təmsil olunmasına ehtiyac var»

Ümummilli lider Heydər Əliyevin təşəbbüsü ilə təsis edilən Dünya Azərbaycanlılarının Həmrəyliyi Günü artıq ənənəvi bayramlarımızdan birinə çevrilib. Xarici ölkələrdə yaşayan azərbaycanlıların təşkilatlanması və birliyinin möhkəmlənməsi, Vətənlə əlaqələrinin güclənməsi diaspor quruculuğunun mühüm tərkib hissəsini təşkil edir. Hazırda dünyanın müxtəlif ölkələrindəki həmvətənlərimizin yaratdıqları qurumlar Azərbaycan hökumətinin də ardıcıl dəstəyi sayəsində daha mütəşəkkil fəaliyyət göstərirlər. Ölkəmizdə fəaliyyət göstərən diaspor təşkilatları da bu istiqamətdə davamlı tədbirlər həyata keçirirlər. Müsahibimiz Beynəlxalq Diaspor Mərkəzinin sədri İsmayıl Ağayevdir:

-Son illər sözün həqiqi mənasında ölkə rəhbərliyinin diaspor fəaliyyətində, quruculuğunda apardığı xətt və siyasət, dünyada fəaliyyət göstərən başqa millətlərin diaspor quruculuğuna verdiyi töhfələrdən daha böyük və genişdir. Birmənalı şəkildə gənclərə diaspor fəaliyyətində göstərilən qayğı, Gənclər Forumunun keçirilməsi, dünya azərbaycanlılarının Azərbaycançılıq ideyası ətrafında formalaşmasını ölkə başçısı aktual bir mövzu kimi daim nəzərdə saxlayır. Bütün çıxışlarında, müraciətlərində Azərbaycan diasporunun xalqın müdafiəsinə qalxması, gələcəyi düşünməsi haqqında fikirlər öz əksini tapır. Beynəlxalq Diaspor Mərkəzi olaraq bizim əsas fəaliyyətimiz Azərbaycandan kənardadır. Ancaq ölkə daxilində də QHT olaraq tədbirlər planı həyata keçiririk, mütəmadi, ardıcıl olaraq Azərbaycanın haqq səsinin dünyaya çatdırılması istiqamətində iş aparırıq. Azərbaycan diasporu ilə bağlı bu gün istədiyimiz səviyyədə, ideallaşdırdığımız, daha güclü bir formaya tam nail olmasaq da, ümumilikdə ötən illərə baxdıqda çox aktiv və fəal formada fəaliyyət göstərməsini qeyd etmək olar.

- Dünya Azərbaycanlılarının sonuncu qurultayında ölkə başçısı diaspor fəaliyyətinin daha da güclənməsi istiqamətində bir sıra tapşırıqlar verdi. Bu istiqamətdə həyata keçirilən tədbirlərlə bağlı nə deyərdiniz?

- Azərbaycan diaspor hərəkatının ölkədən kənarda fəaliyyətinə nəzər saldıqda bu istiqamətdə işlərin görüldüyünün şahidi oluruq. Məsələn, Fransadakı diasporumuzla oradakı səfirliyimizin Ermənistan səfirliyi qarşısında birgə keçirdiyi aksiyalarda 3-cü qurultaydan sonra ciddi canlanmanın şahidi oluruq. Ümumiyyətlə, istədiyimiz nəticəni əldə etmək üçün müəyyən zaman lazımdır. Əvvəllər diaspor təşkilatları ilə bəzi səfirliklərimiz arasında rəqabət olduğunu hiss etsək də, artıq bu gün birlikdə bir mübarizənin aparıldığının şahidi oluruq. Hamıya bəllidir ki, bir dövlətimiz var, Ermənistan Azərbaycan torpaqlarını işğal edib, burada həm diaspor, həm səfirliklərimiz vahid bir nöqtəyə vurmalıdırlar, mübarizəni birgə formalaşdırmalıdırlar.

- Ötən il “Xocalıya ədalət” kampaniyası daha böyük vüsət aldı. Siz bu kampaniyanın Xocalı faciəsinin dünyaya çatdırılmasında rolunu necə qiymətləndirirsiniz?

- Rusiyanı Azərbaycanlı Gənclər Təşkilatının sədri Leyla Əliyevanın başladığı "Xocalıya ədalət" kampaniyası dövlətin ən uğurlu kampaniyalarından biridir. Ötən illər ərzində apardığımız mübarizə, fərdi, yaxud təşkilat şəklində artıq bir pik nöqtəsinə gəlib çatdı. Möhtərəm Prezidentimizin rəhbərliyi altında Azərbaycanda keçirilən yürüş, eləcə də İstanbulda təşkil olunan möhtəşəm yürüş bir daha onu göstərdi ki, artıq “Xocalıya ədalət” kampaniyası vasitəsilə ölkəmizdə ciddi bir vəziyyəti dünyaya çatdırmaq istiqamətində yuxarıdan aşağıya qədər formalaşma birmənalı şəkildə öz əksini tapıb. Yəni, artıq kimsə bu prosesdən kənarda qalmaq istəmir. Ölkə başçısı bu istiqamətdə artıq konkret olaraq mövqe qoyub və bu sahədə bütün dünyaya ermənilərin Xocalıda törətdiyi soyqırımın çatdırılmasında bacarıldığı qədər ardıcıl mübarizə aparılır. Bu da Azərbaycanın haqq səsinin dünyaya çatdırılmasında bir zəmin yaradır. Ancaq təəssüf ki, bəzi ölkələr bu məsələyə hələ də laqeyd yanaşır. Bunun səbəbini isə müsəlman və türk olmağımız kimi qiymətləndirmək lazımdır.

- Lobbiçilik fəaliyyətinin daha da genişlənməsi istiqamətində hansı addımlar atılmalıdır?

- Lobbiçilik fəaliyyəti çox çətin bir sahədir. Ölkə başçısı III qurultayda diaspor fəaliyyətinin lobbiçiliyə keçməsinin istiqamətlərini müəyyənləşdirib. Ümumiyyətlə, bu istiqamətdə maliyyə xərclərinə ehtiyac var, “Azərbaycan evləri” qurulmalıdır. Artıq bir neçə ölkədə belə “Azərbaycan evi”, Mədəniyyət mərkəzləri fəaliyyət göstərir. Bunu daha da genişləndirmək, fəaliyyəti daha da gücləndirmək lazımdır. Bu gün Avropanın aparıcı dövlətlərində bələdiyyə, yaxud digər seçkili orqanlarda azərbaycanlıların daha çox təmsil olunmasına, daha güclü işlərin görülməsinə ehtiyac var. Bizim diasporumuz yeni yaranıb, çox gəncdir. Ermənilərin diasporunun bu istiqamətdə uzun müddətdir fəaliyyət göstərməsinin səbəbi onların məkanı, evi, torpaqlarının, demək olar ki, olmaması ilə bağlıdır. Ancaq biz də dayanmadan bu sahəni gücləndirməliyik. Bu gün Azərbaycan dövlətinin güclü imkanları var, maliyyə durumu yüksəkdir. Daha çox diaspor təşkilatlarına maliyyə ayrılması önəmlidir. Azərbaycandan kənarda mütəmadi olaraq tədbirlər keçirilməli, bu istiqamətdə dövlət proqramı işlənilməlidir. Düşünürəm ki, artıq bu proqram üzərində iş gedir, xaricdə yaşayan gənclərimizin, iş adamlarımızın arxasında durulmalıdır, onların yaşadıqları ölkələrdəki ali icra orqanlarına təsir etmək imkanları artırılmalıdır. O zaman bizim səsimiz daha ucadan səslənər, tərəfdarlarımız parlamentdə təmsil oluna bilər, bizim səsimizi çatdıra bilərlər.

- Qarşıdan Dünya Azərbaycanlılarının Həmrəylik Günü gəlir. Həmrəyliyimizin göstəricisi kimi bu günü necə qiymətləndirirsiniz?

- Əvvəlki illərə baxdıqda həmrəyliyimiz daha da güclənir. Daha çox bir-birimizə yaxınlaşmağımıza ehtiyac var. Dünyaya səpələnmiş soydaşlarımız artıq hamısı başa düşür ki, hamımızın bir Vətəni var, o da Azərbaycandır. Harada yaşamasından asılı olmayaraq onlar bu gün Azərbaycanı düşünməlidirlər. Artıq bir Azərbacançılıq məfkurəsi və ideologiyası platforması istiqamətində işlər gedir. Düşünürəm ki, daha da geniş təbliğata ehtiyac var. Hesab edirəm ki, diaspor televiziyası yaranmalıdır. Vətəndaşlarımızın Azərbaycanla daha geniş əlaqələrinin qurulması vacibdir. Azərbaycanda keçirilən yarışlar, beynəlxalq simpoziumlar, tədbirlər ölkəmizi dünyaya tanıdır və ölkəmizin bir müstəqil, demokratik dövlət kimi imicini formalaşdırır. Hesab edirəm ki, hər bir Azərbaycan vətəndaşı ölkəmizin çiçəklənməsi, daha da gözəl olması üçün imkanları daxilində apardığı işlə ölkəsinə xidmət etmiş olar. Bu da onların həmrəyliyinin göstəricisidir. BDM təşkilatı olaraq ölkəmizlə bağlı bütün tədbirləri qeyd etmişik. Artıq bizim Avropadakı nümayəndəliklərimiz fəaliyyət proqramları üzərində iş aparırlar. Bugünlərdə mənim Tiflisə səfərim var, orada Avropadan gələn qonaqlarla görüşlər keçirəcəyik, hazırda nümayəndə heyətimizin Belarusiya və Çexiyaya səfəri təşkil olunub. Bizim təşkilatın fəaliyyətinin əsas hissəsi odur ki, xaricdəki ölkələrin vətəndaşları ilə birlikdə iş görürük. Təşkilatımız adından bütün dünya azərbaycanlılarını Həmrəylik Günü münasibətilə təbrik edirik, yeni-yeni uğurlu fəaliyyətlər arzu edirik. Arzu edirəm ki, apardığımız mübarizə nəticəsində yeni nailiyyətlərə nail olaq, torpaqlarımız işğaldan azad olunsun.

Nigar Abdullayeva

Palitra.-2012.-28 dekabr.-S.8.