“Azərbaycanda ilk dəfə olaraq Respublika Gənclər Kitabxanasında İctimai Hüquqi İnformasiya Mərkəzi yaradılıb”

Tahir Sadıqov: “Kitabxanamız bu gün öz işini günün tələbləri səviyyəsində qurmaq üçün bütün imkanlardan bəhrələnməyə böyük səy göstərir”

Layihə çərçivəsində növbəti müsahibimiz C.Cabbarlı adına Respublika Gənclər Kitabxanasının direktoru Tahir Sadıqovdur:

- Ölkə başçısının müvafiq sərəncamlarına əsasən nəşr olunan və kitabxananın kolleksiyasına daxil edilən kitabların təsviri elektron kataloqda verilib. Ümumilikdə Prezident hədiyyəsi olan 356 adda 1424 nüsxə ədəbiyyat internetdə yerləşdirilərək oxucuların istifadəsinə verilib ki, bu istiqamətdə işlər davam etdirilir. İRBİS-64 Avtomatlaşdırılmış Kitabxana İnformasiya Sistemində elektron kartotekada Azərbaycan dilində 3068, rus dilində 706, yəni cəmi 5491 adda dövrü mətbuat təsdiq edilib. Elektron kataloqa 716 Azərbaycan, 736 rus, 22 digər dillərdə retro kitablar salınıb ki, bunlar da 1474 adda, 5479 nüsxə ədəbiyyatı əhatə edib. Azərbaycan dilində 203, rus dilində 613, digər dillərdə 43, ümumilikdə 4718 nüsxə yeni kitab elektron kataloqa salınıb ki, bunlar da cəmi 859 adda olub. Həmin kitabların “kartoçkaları” çıxarılıb kataloqa düzülüb. “Oxucu” Avtomatlaşdırılmış İşçi Yerində 1201 oxucu elektron kataloqda, həmçinin 118 oxucuya verilən 366 kitab qeydə alınıb. Yeni kitabların biblioqrafik siyahı və göstəricisi işçi vəziyyətdədir. Həmçinin yeni kitabların biblioqrafik göstəricisinin elektron forması demək olar ki, hazır vəziyyətdədir və ənənəvi şəkildə çap olunmaq üçün işlənilir. Tezliklə yeni kitabların siyahısı da sayta salınacaq. Elektron kataloqda “Ümummilli lider”, “İdman”, “Ekologiya”, “Neft strategiyası” adlı yeni məlumat bazaları yaradılıb. Bu məlumat bazalarında qəzet, jurnal və kitablar öz əksini tapıb. Kitabxanada İRBİS-64 AKİS-nin sərlövhə və sərlövhəaltı məlumatlarının Azərbaycan dilinə tərcüməsi üzərində iş davam etdirilir. Kitabxanada Rusiya Federasiyasının LİBNET Milli İnformasiya Kitabxana Mərkəzinin metodiki vasitələrində kitabxana-biblioqrafiyaya aid olan normativ sənədlərdən istifadə edilib.

Məlum olduğu kimi, ölkə başçısı tərəfindən 28 dekabr 2006-cı il tarixində “Azərbaycan Respublikasında insan hüquqlarının müdafiəsinə dair Milli Fəaliyyət Planının təsdiq edilməsinə dair” sərəncam imzalanıb. Azərbaycanın normativ hüquqi aktlarının insan hüquqlarına dair beynəlxalq standartlara tam uyğunluğunun təmin edilməsi, beynəlxalq təşkilatlarla yeni əməkdaşlıq strategiyasının hazırlanması və həyata keçirilməsi, dövlət orqanlarının fəaliyyətinin insan hüquqlarının təminatı baxımından təkmilləşdirilməsi, elmi-analitik işlərin stimullaşdırılması, hüquqi maarifləndirmə işinin genişləndirilməsi, dövlətlə vətəndaş cəmiyyəti arasında qarşılıqlı əlaqələrin inkişaf etdirilməsi və s. bu kimi məsələlər sərəncamda öz əksini tapmışdı. Bu sərəncamdan irəli gələn tədbirləri həyata keçirmək üçün mədəniyyət və turizm naziri Əbülfəs Qarayevin təşəbbüsü ilə “İnformasiya hamı üçün” YUNESKO Proqramının Rusiya komitəsi ilə əldə edilmiş razılığa əsasən Azərbaycanda ilk dəfə olaraq 27 fevral 2008-ci ildə C.Cabbarlı adına Respublika Gənclər Kitabxanasında İctimai Hüquqi İnformasiya Mərkəzi (İHİM) yaradılıb.

- Kitabxananın kompyuterləşdirilməsi işi necə həyata keçirilir?

- Bu gün kompyuter dünyada milyonlarla insanın həyatının ayrılmaz hissəsinə çevrilib. Təxmini hesablamalara görə, yaxın gələcəkdə fərdi kompyuterlərin dörddə biri kompyuter şəbəkəsi ilə əhatə olunacaq. Prezidentin 2008-ci il 6 oktyabr tarixli sərəncamı ilə təsdiq edilmiş «Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı»nın icrasını təmin etmək məqsədilə Mədəniyyət və Turizm Nazirliyi tərəfindən kitabxanaların informasiyalaşdırılması işi böyük vüsətlə ölkəmizin bütün şəhər və rayon kitabxanalarını əhatə edir. Kompyuterləşmə bütün bəşəriyyətin böyük nailiyyətinə çevrilib. Məhz bu təzahür elmi-texniki tərəqqinin müasir mərhələsinin əsasını qoyub. Kitabxanalarımızın müasir dövrdə kompyuterləşmə siyasətindən kənarda qalmaması təbii ki, çox sevindirici haldır. Müasir dövrdə demək olar ki, bir kitabxana belə tapmaq mümkün deyil ki, orada kompyuterləşmə prosesinə start verilməsin. Kompyuter şəbəkəsi, veb sayt, elektron poçt ünvanı müasir kitabxanalarımızın fəaliyyətinin ayrılmaz hissəsidir. Təbii ki, bizim kitabxanamız da istisna təşkil etmir.

C.Cabbarlı adına Respublika Gənclər Kitabxanasının veb saytı 2009-cu ildə yeniləşib və istifadəçilərin ixtiyarına verilib. Sevindirici haldır ki, kitabxanamızın veb saytının yaradılmasında birbaşa olaraq kitabxanamızın əməkdaşları iştirak ediblər. Biz öz veb saytımızda kitabxanamızın fəaliyyətindən əlavə oxucu kütləsi üçün maraqlı ola biləcək hər bir mövzuya toxunmağa çalışırıq. Veb saytımız hər gün yeni məlumatlarla yenilənir. “Aktual mövzular”, “Gənclər hərəkatı”, “Bu ay teatrlarımızda” və s. bu kimi linklər hər bir gənc oxucunun maraq dairəsindən xəbər verir. Böyük bir tarixi keçmişə malik olan Azərbaycanımızın keçmişi, bu günü, turizm gözəllikləri, 31 Mart soyqırımı, 20 Yanvar və Xocalı faciəsi və s. bu kimi movzular saytımızda çox geniş formada işıqlandırılıb.

Son illər ərzində C.Cabbarlı adına Respublika Gənclər Kitabxanasının fəaliyyəti “Mədəni-maarif” jurnalının “Şərəf” diplomuna, Ağamusa Nağıyev adına “Milli dəyərlərin qorunması” İB-nin “Ağamusa Nağıyev” diplomuna, Azərbaycan “Azad qələmlər” Cəmiyyətinin “Qızıl əllər” fəxri mükafatı laureatı diplomuna, “Qafqaz-Media” İB-nin “Cəsarətli qələm” diplomuna layiq görülüb. C.Cabbarlı adına Respublika Gənclər Kitabxanası bu gün öz işini günün tələbləri səviyyəsində qurmaq üçün bütün imkanlardan bəhrələnməyə böyük səy göstərir.

- Bu gün bir sıra kitabxanalarda müvafiq tədbirlər reallaşdırılır. Gənclər kitabxanasında hansı tədbirlər həyata keçirilir?

- C.Cabbarlı adına Respublika Gənclər Kitabxanasında davamlı olaraq tədbirlər həyata keçirilir. Son tədbirlərimizə gəldikdə isə 10 noyabr 2011-ci il tarixində Dövlət Bayraq Günü, “Dünya Azərbaycanlı Gənclərinin Beynəlxalq Həmrəyliyi” cəmiyyətinin yaranmasının 15-ci və Dünya Azərbaycanlılarının 1-ci Qurultayının keçirilməsinin 10-cu ildönümü günü münasibətilə elmi-praktik konfrans keçirilib.Kitabxanada 16 noyabr 2011-ci il tarixində Bakı Dövlət Universitetinin Kitabxanaçılıq-informasiya fakültəsinin kitabxanaşünaslıq kafedrasının müdiri, Azərbaycan Respublikasının Əməkdar elm xadimi, Əməkdar mədəniyyət işçisi, BMT yanında Beynəlxalq İnformasiyalaşdırma Akademiyasının akademiki, Prezidentin fəxri təqaüdçüsü, “Şöhrət” ordenli, tarix elmləri doktoru, professor Abuzər Xələfovun anadan olmasının 80 illik yubileyi münasibətilə görüş keçirildi. 5 dekabr 2011-ci il tarixində isə kitabxanamızda “Sürgün Həyatı Repressiya Qurbanlarına Dəstək” İctimai Birliyi ilə birlikdə görkəmli dramaturq, repressiya qurbanı Hüseyn Cavidin anım gününün 70 illiyi ilə əlaqədar tədbir keçirildi. 27 dekabr 2011-ci il tarixində 31 dekabr Dünya Azərbaycanlılarının Həmrəyliyi Günü münasibətilə “Dünya azərbaycanlılarının həmrəyliyi və faciələrimizin dünya ictimaiyyətinə çatdırılmasında xaricdəki soydaşlarımızın rolu” mövzusunda elmi-praktik konfrans keçirildi. 19 yanvar 2012-ci il tarixində 20 Yanvar - Azərbaycanın suverenliyi uğrunda həlak olanların 22-ci ildönümünə həsr olunmuş dəyirmi masa keçirildi. Tədbir boyu 20 Yanvar şəhidlərinin müsibətlərinə həsr edilmiş slaydlar nümayiş etdirildi. Tədbirin sonunda “20 Yanvar tarixi” adlı sərgiyə baxış keçirildi. Bundan sonra da kitabxanamızda yeni tədbirlər həyata keçirməyi nəzərdə tuturuq.

Nigar Abdullayeva

Palitra.-2012.- 1 fevral.- S.10.