«Eurovision» müsabiqəsi Azərbaycanın tarixini, mədəniyyətini, dəyərlərini təbliğ etmək üçün fürsətdir»

«Muzeylərimiz, kitabxanalarımız və digər mədəniyyət müəssisələrimiz mədəni dəyərlərimizin təbliği istiqamətində maarifləndirmə işləri aparmalıdırlar»

Layihə çərçivəsində müsahibimiz Samux rayon Heydər Əliyev Muzeyinin direktoru Tariel Hüseynovdur. O, müsahibəyə muzeyin fəaliyyəti haqqında məlumat verməklə başladı: - Xalqımızın ümummilli lideri Heydər Əliyevin adının əbədiləşdirilməsi, onun irsinin öyrənilməsi və geniş şəkildə təbliğ olunması sahəsində Samux rayon Heydər Əliyev Muzeyində xeyli işlər görülüb. Muzey ulu öndərin həyat və fəaliyyətini, keçirdiyi tarixi görüşləri əks etdirən fotostendlərlə, “Müstəqilliyimiz əbədidir” əsərlərinin külliyyatı ilə, onun həyat və fəaliyyətinin ayrı-ayrı sahələrini əhatə edən əsərlərlə təchiz edilib. İlk öncə onu qeyd edim ki, rayon mərkəzində inşa edilmiş, günü-gündən zənginləşən muzey ulu öndərin irsinin təbliğində öz layiqli töhfəsini verir. Böyük zal, konfrans zalı və əlavə 3 otaqdan ibarət olan muzeyin tərtibatı nəfis şəkildə işlənilib. Böyük zalda 3 dairəvi şəkildə fırlanan kitab rəfləri və 7 stend quraşdırılıb ki, stendlərdən asılmış 100-ə qədər şəkil ulu öndərin ömür yoluna işıq salır. Muzeyimizdə ulu öndərin həyat və fəaliyyətini əks etdirən kitablardan ibarət guşə yaradılıb. Konfrans zalı proyektor, dəyirmi masa ilə təchiz edilib. Ulu öndər Heydər Əliyev irsinin təbliği məqsədilə ümumtəhsil məktəblərinin müəllim və şagird kontingentinin, idarə, müəssisə və təşkilat kollektivlərinin, ictimaiyyət nümayəndələrinin muzeyin eksponatları ilə tanış edilməsinə yüksək səviyyədə şərait yaradılıb. Fotostendlər və əsərlər haqqında muzeyi ziyarət edən qonaqlara ətraflı məlumat verilir. Muzeyin konfrans zalında muzeyə gələnlərə tarixi şəxsiyyətin həyat və fəaliyyətinə həsr olunmuş “Ömür və tale, yaxud Prezidentin qeyri-rəsmi portreti”, “Müstəqillik yollarında” kinofilmləri göstərilir. Heydər Əliyev elmi irsinin gənclər tərəfindən daha yaxşı öyrənilməsini təmin etmək məqsədilə Heydər Əliyev Muzeyində xüsusi dərnəklər yaradılıb. Dərnəklərdə “Heydər Əliyev və Azərbaycan gəncliyi”, “Heydər Əliyev siyasi məktəbini öyrənirik”, “Heydər Əliyevin həyat və fəaliyyəti” mövzularında dəyirmi masalar, elmi-praktik konfranslar təşkil edilir. Rayonun idarə, müəssisə və təşkilatlarında çalışan gənclərin bu dərnəklərə cəlb edilməsi onların Heydər Əliyev ideyalarını daha dərindən öyrənməsində böyük kömək olub. 20 Yanvar faciəsi, Xocalı soyqırımı, 31 Mart soyqırımı, Beynəlxalq Muzeylər Günü, Qurtuluş Günü, Konstitusiya Günü ilə bağlı elmi-praktiki konfranslar keçiririk. Ümummilli liderimizin zəngin idarəçilik təcrübəsinin gələcək nəsillərə çatdırılması, ulu öndərin Azərbaycanımızın yeni tarixində tutduğu yer, onun həyat və fəaliyyəti ilə bağlı seminarlar, ümummilli liderin anım günü münasibətilə “Azərbaycan üçün yaşanan ömrün böyük anları” mövzusunda dəyirmi masalar, Dünya Azərbaycanlılarının Həmrəyliyi Günü münasibətilə “Ulu öndərin müstəqil Azərbaycanın dövlətçiliyinin möhkəmləndirilməsi sahəsindəki fəaliyyəti” adı altında elmi-praktik konfranslar təşkil etmişik. Yaradılmış tədqiqatçılar qrupu tərəfindən rayonda xeyli araşdırma aparılıb.

- Muzeyiniz Azərbaycan mədəniyyətinin təbliği istiqamətində hansı işlər həyata keçirir?

- Samux rayon Heydər Əliyev Muzeyi olaraq işimizi geniş müstəvi üzərində qurmuşuq. Bura Azərbaycanın zəngin mədəni irsinin, mədəniyyətinin təbliği də daxildir. Bildiyiniz kimi, mədəniyyətimizin inkişafı, mədəni dəyərlərimizin qorunması və təbliğ edilməsi daim ulu öndərin diqqətində olub. Ümumiyyətlə, ulu öndər bütün həyatı boyu Azərbaycan mədəniyyətinə çox bağlı olub. Biz də muzey olaraq Azərbaycan mədəniyyətinin təbliğində üzərimizə düşən işi canla-başla görməyə çalışırıq. Ulu öndərin milli dəyərlərimizin qorunmasındakı fəaliyyətini gənc nəslə çatdırırıq. Rayonumuzun məktəbliləri, yeniyetmələr tez-tez bizim muzeyimizdə olurlar. Bu isə bizə dəyərlərimizi onlara çatdırmaq üçün böyük fürsətdir. Keçirdiyimiz tədbirlərdə, seminarlarda daim mədəniyyətimizi təbliğ edirik. Çünki inkişafın əsası əslində mədəniyyətdən başlayır. Dilimizi, mədəniyyətimizi həmişə qorumalıyıq. Bunun üçün hər kəs çalışdığı sahədə üzərinə düşən işi məsuliyyətlə görməlidir. Torpaqlarımızı işğal edən bədnam qonşularımız həmin yerlərdəki mədəni abidələrimizi, muzeylərimizi dağıdır, onları özününküləşdirməyə çalışır. Yəni bədnam ermənilər həmişə bizim mədəniyyət nümunələrimizi oğurlamaqla məşğuldurlar. Bu məkrli siyasət indi də davam etdirilir. Müxtəlif musiqi nömrələrimizi, mətbəximizə aid olan təamları öz adlarıyla beynəlxalq tədbirlərdə təqdim etməyə çalışırlar. Onlar bunun üçün hər fürsətdən istifadə edirlər və deyim ki, çox hiyləgər olduqları üçün daima ayıq-sayıq olmalıyıq. Məktəblilərə, yeniyetmələrə Qarabağ torpağının tarixi, orada qalan mədəniyyət abidələrimiz haqqında geniş informasiyalar verməliyik. Gənc nəsli elə tərbiyə etməliyik ki, onlar gələcəkdə mədəni dəyərlərimizin nə qədər qiymətli olduğunu bilsinlər, ona sahib çıxsınlar. Muzey olaraq biz hər fürsətdən istifadə edərək ziyarətçilərimizə həm ulu öndərin irsini çatdırırıq, həm də dəyərlərimizi aşılamağa çalışırıq. Yetişən gənc nəsli bu ruhda tərbiyə etməliyik. Muzeylərimiz, kitabxanalarımız və digər mədəniyyət müəssisələrimiz bu sahədə maarifləndirmə işləri aparmalıdırlar. Bu sahədə çox işlər görülür. Amma dəyişikliyin, inkişafın belə sürətlə baş verdiyi zəmanədə yaşadığımızdan işimizi də dövrün tələblərinə uyğun qurmalıyıq. Bu gün Azərbaycan inkişafda olan dövlətdir. Hər bir sahədə olduğu kimi, mədəniyyət sahəsində də böyük inkişaf yaşanır. Demək olar ki, bütün rayonlarımızda mədəniyyət müəssisələri yenilənir. Bu gün vətəndaşlarımız müasir mədəniyyət evlərindən, klublardan, kitabxanalardan, teatrlardan istifadə edirlər. Mədəniyyət evlərinin müasir texniki vəsaitlərlə, kitabxanaların müasir kompyuter avadanlıqları ilə təmin edilməsi respublikanın bütün bölgələrini əhatə edir. Bu əslində Azərbaycan dövlətinin mədəni xəzinəsidir. Mədəniyyət müəssisələrinin yenidən qurulması bu sahədə böyük canlanma yaradıb.

- Gərək bu sahədə çalışanlar da işlərini müasir səviyyədə qursunlar.

- Elədir, amma təkcə bu sahədə çalışanlar deyil, hamımızın üzərinə məsuliyyət düşür. Düşmənə təkcə silahla qalib gəlməməliyik. Onlara həm də böyük tarixi keçmişə malik olan mədəniyyətimizlə də qalib gəlməliyik və gələcəyik. Bu gün Azərbaycan dünyanın ən nüfuzlu musiqi yarışmalarından biri olan «Eurovision» müsabiqəsini keçirməyə hazırlaşır. Bu cür böyük mədəni tədbiri qəbul etmək asan məsələ deyil. Dövlət elə inkişaf səviyyəsində olmalıdır ki, belə musiqi yarışmasını yüksək səviyyədə keçirə bilsin. Eyni zamanda bu yarışma bizim üçün həm də bir fürsətdir. Azərbaycan tarixini, mədəniyyətini, dəyərlərini təbliğ etmək üçün fürsətdir. Bu imkandan maksimum şəkildə istifadə etməliyik. Avropa mətbuatının gözü Azərbaycan dikilib, yarışma yaxınlaşdıqca diqqət daha da artacaq. Ona görə də ölkəmizi, mədəniyyətimizi təbliğ etmək üçün əlimizə düşən bu fürsətdən yaxşı istifadə etməliyik. Xüsusilə gənclərimiz bu sahədə daha aktiv olmalıdırlar. İnformasiya texnologiyalarının imkanlarından yararlanaraq böyük təbliğat işi qurmaq lazımdır ki, bütün dünya Azərbaycanı daha yaxından tanısın, onun mədəni zəngiliklərinin, dəyərlərinin şahidi olsun.

Anar Miriyev

Palitra.-2012.-1 fevral.- S.7.