«Mədəniyyət sahəsində böyük potensiala malik olan gənclər ordusu cəmləşib»

İlham Manafov: «Abşeron rayonunun mədəniyyət müəssisələrinin nümayəndələri beynəlxalq müsabiqələrdə Azərbaycan mədəniyyətini uğurla təmsil edirlər»

Layihə çərçivəsində müsahibimiz Abşeron Rayon Mədəniyyət və Turizm Şöbəsinin müdiri İlham Manafovdur. Şöbə müdiri müsahibəyə rəhbərlik etdiyi qurumun fəaliyyəti haqqında məlumat verməklə başladı:

- Rayon Mədəniyyət və Turizm Şöbəsi mədəniyyət müəssisələrində il ərzində bir sıra mədəni-kütləvi tədbirlər hazırlayaraq həyata keçirir. Məktəblilərin qış tətili günlərini daha maraqlı keçirmələri üçün yerlərdə əyləncəli proqramlar, konsertlər təşkil edirik. Rayon Mədəniyyət Evində “Yeni müjdələr gətir” adlı şənliklər və xalq teatrının hazırladığı Əli Səmədlinin “Meşədə konsert” nağıl-tamaşası izləyicilər tərəfindən maraqla qarşılandı. Ötən ay 20 Yanvar faciəsinin 22-ci ildönümünə həsr olunmuş ədəbi-bədii kompozisiya təşkil etmişdik. Qarşıdan Xocalı soyqırımının 20-ci ildönümü gəlir. Dövlət başçısı soyqırımın 20 illiyinin xüsusi şəkildə keçirilməsi ilə bağlı sərəncam imzalayıb. Hər il ermənilərin xalqımıza qarşı törətdiyi qətliamlarla bağlı tədbirlər keçiririk. Bu il isə Xocalı soyqırımının 20 ili tamam olur və dövlət başçısının sərəncamına uyğun olaraq bu il Xocalı faciəsi, ermənilərin xalqımıza qarşı törətdiyi qətliamlar, vəhşiliklər geniş tədbirlər planı ilə xatırlanacaq. Bir daha erməni vəhşilikləri ifşa olunacaq, onların iç üzü bütün dünyaya çatdırılacaq. Ermənilərin əsil mahiyyətinin ifşa olunmasının və onların gənc nəslə çatdırılmasının böyük əhəmiyyəti var. Ona görə də biz mədəniyyət işçiləri olaraq bu sahədə üzərimizə düşən işi layiqincə görməyə çalışacağıq. Müxtəlif tədbirlərdən istifadə edərək erməni vəhşiliyini məktəblilərə, yeniyetmələrə çatdıracağıq. Ötən il Xocalı soyqırımının ildönümü ilə əlaqədar Xocalı sakini, faciənin şahidi, yazıçı-publisist Səriyyə Müslüm qızının əsərləri əsasında hazırlanmış “Xocalıdan gələn var” tamaşası göstərilmişdi. Tədbirdə rayonun uşaq incəsənət məktəbləri şagirdlərinin və həvəskar rəssamların mövzu ilə əlaqədar rəsm əsərlərindən ibarət sərgilər tərtib edilərək nümayiş olunmuşdu. Bu il tədbirlərimizin miqyası bir qədər də geniş olacaq. Bu günlərdə 2 fevral Gənclər Günü rayonumuzda da geniş şəkildə qeyd edildi. Ümumiyyətlə, bu günün keçirilməsinin çox böyük əhəmiyyəti var. Cəmiyyətin əsas hərəkətverici qüvvəsi olan gənclərin inkişafı, öz potensiallarını təqdim etmələri üçün bu gün respublikamızda bütün imkanlar yaradılıb. Dövlətin siyasətində gənclər xüsusi yer tutur. Cəmiyyət həyatının bütün sahələrində, siyasi, iqtisadi, mədəni sahələrdə gənclər özlərini yüksək səviyyədə təqdim edirlər. Mədəniyyət sahəsində böyük potensiala malik olan gənclər ordusu cəmləşib. Biz çalışıb bu potensialdan maksimum şəkildə keyfiyyətlə bəhrələnməliyik. Bu gün dövlət xətti ilə yüzlərlə gəncimiz dünyanın nüfuzlu ali məktəblərində təhsil alır ki, bu da dövlətimizin bu sahəyə nə qədər böyük önəm verdiyini göstərir. Rayonumuzda da gənclərə həmişə xüsusi diqqət olur. Ona görə də 2 fevral Gənclər Günü Abşeronda həmişə yüksək səviyyədə qeyd edilir. Ümumiyyətlə, bütün əlamətdar günlər rayonumuzda yüksək səviyyədə qeyd edilir və mədəniyyət müəssisələri bu tədbirlərdə aktiv iştirak edirlər.

- Rayonun mədəniyyət müəssisələrinin təmsilçiləri respublika səviyyəli müsabiqələrdə təmsil olunurmu?

- Bəli, respublika və beynəlxalq səviyyəli müxtəlif mədəni müsabiqələrdə təmsilçiərimiz aktiv iştirak edirlər. Biz özümüz də mədəniyyət sahəsindəki təmsilçilərimizin belə müsabiqələrdə iştirakında maraqlıyıq. Belə müsabiqələr təmsilçilərin peşəkarlıq səviyyəsinin artmasına böyük təsir göstərir. Ötən il Mədəniyyət və Turizm Nazirliyinin keçirdiyi nəfəsli və zərb alətləri üzrə II respublika müsabiqəsində rayonun uşaq musiqi və incəsənət məktəblərinin şagirdləri müvəffəqiyyətlə iştirak ediblər. Eyni zamanda uşaq incəsənət məktəblərinin rəssamlıq sinfinin şagirdləri beynəlxalq rəsm müsabiqələrində müntəzəm olaraq təmsil olunurlar. Belə ki, Ceyranbatan və Saray qəsəbə uşaq incəsənət məktəbləri tərəfindən Çexiya Respublikasının Liditse şəhərində keçirilən Uşaq və Yeniyetmələrin 39-cu Beynəlxalq İncəsənət Sərgisinə 15 ədəd, Misir Ərəb Respublikasında keçirilən “Misir dünya usaqlarının gözü ilə” adlı beynəlxalq rəsm müsabiqəsinə isə 10 ədəd rəsm əsəri göndərilib. Xırdalan şəhər Uşaq Musiqi Məktəbinin şagirdi İbadlı Fərhad Oqtay oğlu xalq çalğı alətləri üzrə keçirilən II respublika müsabiqəsində III dərəcəli diploma layiq görülüb. Həmçinin qeyd edim ki, ötən il Türkiyənin İzmir şəhərində “Azərbaycan Novruz Festivalı” çərçivəsində Xalq şairi Səməd Vurğun və Şövkət Ələkbərovaya həsr olunmuş “19 Mart -Bakı gecəsi” tədbirində iştirak etmək üçün Xırdalan şəhər Uşaq Musiqi Məktəbinin bir qrup müəllim və şagird heyəti tədbirin təşkilat komitəsi tərəfindən dəvət olunaraq orada müvəffəqiyyətlə çıxış ediblər. Ötən il həmçinin Xırdalan şəhər Uşaq Musiqi Məktəbinin şagirdlərindən ibarət xalq çalğı alətləri orkestri İctimai Televiziya kanalı ilə Türkiyənin TRT-AVAZ kanalı arasında yaradılmış telekörpüdə canlı yayımlanan “Yeni gün” səhər proqramında konsert proqramı ilə çıxış ediblər. Eyni zamanda ötən il Dərbənd Dövlət Azərbaycan Dram Teatrı rayonda qastrol səfərində oldu. Teatrın ifasında C.Cabbarlının “Aydın” əsəri göstərildi və tamaşa izləyicidər tərəfindən böyük maraqla qarşılandı. Eyni zamanda Sumqayıt şəhərində uşaq xor kollektivlərinin VII respublika müsabiqəsində rayonun uşaq musiqi və incəsənət məktəblərinin xor kollektivləri müvəffəqiyyətlə çıxış ediblər. Belə ki, Qobu qəsəbə Uşaq İncəsənət Məktəbi və məktəbin xormeysteri Aysel Məmmədova, Mehdiabad qəsəbə Uşaq Musiqi Məktəbi müsabiqənin fəxri fərmanları ilə təltif olunublar. Ötən il Xırdalan şəhər Uşaq Musiqi Məktəbinin xalq çalğı alətləri orkestri dövlət müstəqilliyinin bərpasının 20-ci ildönümü münasibətilə Dövlət Filarmoniyasında geniş konsert proqramı ilə çıxış edib. Bunlardan savayı Moskvada Vladimir Spivakov Beynəlxalq Xeyriyyə Fondu tərəfindən keçirilən “Moskva dostları qarşılayır” adlı VIII Beynəlxalq Festivalda və Samara şəhərində Yuri Başmetin himayəsi altında keçirilmiş MDB ölkələri Birinci Uşaq Musiqi Akademiyasında Xırdalan şəhər Uşaq Musiqi Məktəbinin şagirdi Manafzadə Atabala müvəffəqiyyətlə çıxış edib. Uşaq musiqi məktəbinin şagirdlərinin bu cür yüksək səviyyəli beynəlxalq musiqi yarışmalarında təmsil olunmaları həm onların peşəkarlıq səviyyəsini artırır, həm də ölkəmizin adını ucaldır. Bu yolla həm də ölkə mədəniyyəti, zəngin Azərbaycan musiqisi təbliğ olunur. Ona görə də belə müsabiqələrdə təmsil olunmağa xüsusi önəm veririk. Bir məsələni də vurğulayım ki, ötən ilin son rübündə mənim rəhbərliyimlə “Abşeron” aşıqlar qrupu Əlcəzairin Telemsen şəhərində oldu. Telemsen şəhəri “2011-ci ilin İslam Mədəniyyəti Paytaxtı” elan olunmuşdu. Bununla əlaqədar keçirilən festivalda YUNESKO-nun Qeyri-Maddi Mədəni İrs üzrə Reprezentativ Siyahısına daxıl olan Azərbaycan muğamı, aşıq, xalçaçılıq sənəti, habelə Novruz bayramı ilə bağlı eksponatlar Telemsen şəhərinin incəsənət və tarix muzeyində keçirilən sərgidə nümayiş etdirildi. “Abşeron” aşıqlar qrupu geniş konsert proqramı ilə çıxış etdi. Nümayəndə heyətimizin yerli KİV-də Azərbaycan aşıq sənətinin tarixi, milli dəyərləri mövzusunda çıxışları oldu.

Anar Miriyev

Palitra.-2012.-7 fevral.-S.6.