Azərbaycan mədəniyyətinin
dünyaya töhfələri
Layihə çərçivəsində müsahibimiz AMEA Fəlsəfə, Sosiologiya və Hüquq İnstitutunun İdrak nəzəriyyəsi
və elmin fəlsəfəsi şöbəsinin
müdiri, fəlsəfə elmləri doktoru Füzuli Qurbanovdur. Füzuli müəllimlə
müsahibəmiz Azərbaycan mədəniyyətinin,
özünəməxsusluğu, dünyaya
verdiyi töhfələr barəsində oldu. Füzuli müəllim
söhbətə belə başladı:
- Azərbaycan
coğrafi olaraq elə bir məkanda yerləşib ki,
dünyanın bir neçə böyük
sivilizasiyasının ona təsiri olub. Bu barədə
tarixçilər, digər sahə alimləri və siyasətçilər
də həmişə bildirirlər. Daha doğrusu, bir az
konkretləşdirsək, Azərbaycan adətən Şərq
və Qərb sivilizasiyalarının hər ikisinin təsirinə
məruz qalıb. Özündə bu sivilizasiyaların ən
yaxşı cəhətlərini birləşdirən bir mədəniyyət,
bir həyat tərzi bizdə formalaşıb. Bu məqamlıar
tarix boyu Azərbaycanın dünya mədəniyyətinə
verdiyi incilərdə öz əksini tapıb. Məsələn,
arxeoloji materiallar da sübut edir ki, lap qədimlərdən Azərbaycanda
dulusçuluq, xalçaçılıq mövcud olub, indi məişətdə
bir çox sahələrdə istifadə olunan əşyalar
hazırlanıb. Xudu Məmmədovun “Naxışların
sirri” kitabında qədimlərdə tapılmış mədəniyyət
abidələri haqqında çox gözəl məlumatlar
var. Bundan əlavə, indiyə qədər müasir elmdə
və fəlsəfədə, tarixşünaslıqda, sosiologiyada
maraqlı tendensiyalar özünü göstərir. Yəni
keçmişə yeni və bir qədər fərqli
mövqedən yanaşmalar var. Adətən sualı tarixi
yaddaşın öyrənilməsi aspektində qoyurlar ki, indi
hər bir etnosun, hər bir cəmiyyətin keçmişini
necə öyrənmək olar. Bu
öyrənmə zamanı yaddaş fenomeninin hansı
rolu oynaya biləcəyi də araşdırılır.
Ümumiyyətlə, tarixi yaddaşın nə olduğu da bu
gün elmdə müzakirə mövzusudur. Hər bir cəmiyyətin
mədəni inkişaf tarixinin üç mərhələsi
olub: birincisi, şifahi mədəniyyət
və yaradıcılıq mərhələsi, ikincisi,
yazılı mədəniyyət mərhələsi,
üçüncüsü də müasir dövr
üçün xarakterik olan multimedia mədəniyyət
növü və yaxud elektron mədəniyyət. Kanadalı alim Mak Lüen bu mədəniyyət
növünü multimedia və ya elektron mədəniyyət
adlandırıb. Burada məsələ ondan ibarətdir ki, sən
demə, mədəniyyətin hansı növünün
insanlar arasında üstünlük təşkil etdiyi də əsasdır.
Şifahi, yazılı və ya multimedia vasitəsilə ifadə
edilən mədəniyyətin üstünlük təşkil
etdiyi bu kontekstdə araşdırılır. Fikrim ondan ibarətdir
ki, şifahi danışıq, yəni şifahi
yaradıcılıq üstünlük təşkil edən
etnoslar, xalqlar bir cür, yazılı mədəniyyətə
malik xalqlar isə ayrı cür psixologiyaya malik olurlar.
Müasir dövrdə isə tamam yeni bir fenomen ortaya
çıxıb. Azərbaycan mədəniyyətinə bu
bölgü baxımından nəzər salanda bizim xalq
yaradıcılığımızın, folklorumuzun zənginliyi
çox şeylərdən xəbər verir. Deməli, Azərbaycan
mədəniyyətində, folklorunda nələr var:
folklorumuzda çox dərin musiqi dəyərləri var.
Folklorumuzda çox dərin epos dəyəri var. Azərbaycan
folklorunda çox dərin mətbəx mədəniyyəti
var. Bizim dastanlarımızda, nağıllarda və rəvayətlərdə
bu tərəflərin hamısı bu və ya digər şəkildə
obrazlarla ifadə olunub. Sirr deyil ki, müasir Avropada və
dünyada Azərbaycan folkloru, musiqisi və mətbəxi ilə
bağlı çox yüksək fikirlər var. YUNESKO və
İSESKO-da bununla bağlı hadisələr, tədbirlər,
Azərbaycan tərəfinin qədim mədəniyyətini
müxtəlif yerlərdə nümayiş etdirməyə
başlaması bunun gözəl nümunəsidir. Məsələ
burasındadır ki, mətbəx mədəniyyəti zəif
olan xalqların ümumiyyətlə, məişət mədəniyyəti
zəif olur. Musiqi mədəniyyəti aşağı olan
xalqların isə ideya tərəfi zəif olur. Deməli, əgər
bizim lap qədimdən bəri zəngin və gözəl mətbəximiz,
mətbəx mədəniyyətimiz olubsa, qədim
sivilizasiyaya Azərbaycan bu sahədə əvəzsiz töhfələr
verib. Məsələ təkcə qidanın
hazırlanmasından getmir, əgər mətbəx mədəniyyəti
varsa, deməli, burada qidanın hazırlanmasından tutmuş,
süfrədən istifadə etmək mədəniyyətinə
qədər söhbət açmağa dəyər. Süfrə
arxasında oturmaq, qida mədəniyyəti və bunlara
uyğun olaraq mənəvi-əxlaqi məqamlar bu kontekstdə
çox vacib məsələlərdir. Musiqi mədəniyətinə
gəldikdə isə musiqimizin zənginliyi və
çoxşaxəliliyi hamıya bəllidir. Xalq
mahnılarımız bir dünya, qədim muğam isə
başqa bir dünyadır. Muğam bir çox ölkələrdə
olsa da, Azərbaycanda ifa olunan muğam tərzi dünyanın
heç birində yoxdur. Bu da sivilizasiyaların
qovşağında olan ölkəmizin, xalqımızın
geosiyasi məkan kimi özünün öz mədəniyyətini
tanıtmaq və qəbul etdirmək
üstünlüyünü göstərir. Azərbaycan elə
bir məkan olub ki, nə qədər kənardan təsirlər
olsa da, özünün milli mədəniyyətini
formalaşdıra bilib. Məsələn, dünyada indi məxsusi
Azərbaycan muğamı, xalq mahnılarımız var. Xalq
mahnılarımız türk dünyası
mahnılarının tərkib hissəsi olsa da, onun vacib
özünəməxsusluğu mövcuddur. Heç bir
türk ölkəsində bizdəki kimi xalq mahnıları
oxunmur. Çünki bu mahnılar bu mədəni mühitin
yetişdirdiyi çalarlardır və bunu hər kəs qəbul
edir. Muğam da qeyd etdiyim kimi, ölkəmizdə ayrıca bir
məcrada xüsusi və orijinal inkişaf dövrü
keçib və milli ruhumuza uyğun formalaşıb. Bu isə
Azərbaycan muğamı haqqında bir fenomen olaraq
danışmağa imkan verir. Deməli, Azərbaycan mədəniyyəti
lap qədim köklərə malikdir. Dünyanın heç
bir yerində təkrarlanmayan belə bir mədəniyyət
sistemimiz formalaşıb.
- Azərbaycan
mədəniyyətini tərkibinə görə necə
xarakterizə etmək olar?
- Azərbaycan
mədəniyyəti bütöv və vahiddir. Amma tərkibinə
görə multikulturalistdir, yəni müxtəlif fərqli
elementlərin sintezini, orqanik olaraq birliyini yarada bilib. Ən maraqlısı
və gözəl cəhəti ondan ibarətdir ki, bu fərqli
elementləri indiyə qədər mədəniyyətimiz
özündə daşıyır və onları məhv
etmir. Bu da Azərbaycan mədəniyyətinin bu gün gələcək
üçün daha böyük potensiala malik olduğunu
göstərir. Şübhə etmirəm ki, nəinki
keçmiş və indiki sivilizasiyaların, həm də gələcək
sivilizasiyaların inkişafında Azərbaycan mədəniyyət
modeli çox mühüm rol oynayıb və bundan sonra da
oynayacaq. Bəziləri bunu istəsə də, istəməsə
də, bu, baş verəcək. Çünki Allahdan və təbiətdən
belə olub ki, burada həmişə, rəngarənglik və
müxtəlifliyin birləşməsi mümkün olub və
bu, ətrafdakılar üçün bir model rolunu
oynayıb.
- Azərbaycan
mənəvi mədəniyyətinin bir hissəsi kimi Azərbaycan
fəlsəfəsi haqda bu kontekstdə nələri bildirmək
olar?
- Azərbaycan fəlsəfəsinə gəldikdə isə burada bir çox məqamları nəzərə almaq lazımdır. Azərbaycan məkanında yaşayıb-yaratmış filosofların mövcudluğu qədim dövrlərə gedib çıxır. Amma onların yaratdığı əsərlər təəssüf ki, kifayət qədər öyrənilməyib. Biz Azərbaycanda fəlsəfi fikir haqqında orta əsrlərdən olaraq daha çox danışmağa başlayırıq. Burada da Azərbaycanda fəlsəfi fikir ümumislam mədəniyyəti fəlsəfi fikrinin bir tərkib hissəsi kimi nəzərdən keçirilir. Bu, o demək deyil ki, Azərbaycan filosofları dünyada olan İslam fəlsəfi fikirlərinin surətini çıxarmaqla məşğul olublar. Qətiyyən belə olmayıb. Onlar özlərinin maraqlı fikirləri, qurduqları orijinal fəlsəfi sistemləri ilə fərqləniblər. Azərbaycan alimi Nəsrəddin Tusi misalında da bunu göstərmək olar. Nəsrəddin Tusinin fəlsəfəsi o dövrün həm qabaqcıl fəlsəfi məktəbləri ilə ayaqlaşa bilirdi, həm də daha diqqətçəkən o idi ki, Azərbaycanın mənəvi-əxlaqi dünyası üçün yararlı olan fikirlərlə zəngin idi. Yəni o, cəmiyyətdən kənar abstrakt fəlsəfi ideyalardan çox, Azərbaycanın odövrkü cəmiyyətinə və xalqına xeyir verə biləcək fəlsəfi fikirlər söyləmişdi. O, yaradıcılığında fəlsəfi fikrin verə biləcəyi töhfələri nəzərə almışdı. Cəmiyyət var ki, fəlsəfi fikirlərin süzgəcindən keçmiş ideyalar və prinsiplər əsasında yaşayır. Cəmiyyət var ki, ümumiyyətlə, adi məişət səviyyəsində olan fikirlərlə yaşayır. N.Tusinin bu addımı Azərbaycan cəmiyyətini məhz fəlsəfi ideyalar və prinsiplər nəticəsində müəyyən olunmuş həqiqətlərlə yaşamağa çağırışından ibarət idi. İkinci maraqlı fikir ondan ibarətdir ki, Azərbaycan xalqı təbiətən poetik təfəkkürə, poetik düşüncəyə dərindən sahib olub. Təsadüfi deyil ki, Nizami Gəncəvi təkcə şair və şeyx kimi yox, həm də filosof kimi qəbul olunub. Çünki o, fəlsəfi fikirlərini şeir dilində ifadə etməyi bacarıb. Məncə, bunun bir səbəbi var ki, Azərbaycan mədəniyyəti lap qədimlərdən poetik təfəkkürə və şeirə üstünlük verib. Bu ənənə orta əsrlərdə də qorunub saxlanıb. Azərbaycanda tarixən çox güclü şairlərin olması və şeiriyyətdə həmişə fəlsəfi məqamların üstünlük təşkil etməsinin səbəbi bununla bağlıdır. Burada fəlsəfi-məntiqi təfəkkürdən çox, emosional, poetik bir şüurdan danışmaq lazım gəlir. Bunun da çox üstün tərəfləri var. Üstün tərəfləri ondadır ki, mədəniyyət növü olaraq şifahi mədəniyyət xalqımızda çox yüksək səviyyədə mövcud olub.
İlkin AĞAYEV
Palitra.-2012.- 10 fevral.- S.7.