Gülyaz Məmmədova: “Eurovision” olduqca maraqlı mədəniyyət hadisəsidir”

“Hər il Avropa səhnəsində bizim çıxışlarımız onsuz da çox gözəl olub. Bu il daha da möhtəşəm olacağına əminəm”

Uzun zamandır ki respublikanın Əməkdar artisti Gulyaz Məmmədova konsert proqramı üzərində çalışırdı. Fevral ayında pərəstişkarları qarşısında konsert verən sənətçi xanım proqramın uğurlu olmasından məmnunluq bildirdi. Onu da xatırladaq ki, fevralın 1 və 2-sinə planlaşdırılan konsertin ikinci günü qarlı hava şəraitinə görə fevralın 17-nə qədər təxirə salınmışdı.

- Konsert barədə nə deyə bilərsiniz?

- Bilirsiniz ki, Gənclər Günü ilə bağlı konsertim hazırlanmışdı. Konsertdə tələbələrimlə birgə çıxışlarım vardı. Ancaq hava şəraitinə görə konsert bir qədər təxirə salındı və sonra Mahnı Teatrında baş tutdu. Çox şükür ki, olduqca uğurlu alındı. Konsertdən çox razı qaldım.

- Hazırda yaradıcılığınızda hansı yeniliklər var?

- Bildiyiniz kimi, mən Dövlət Opera və Balet Teatrının solistiyəm. Hazırda teatrda mart ayı üçün olan repertuarım üzərində çalışıram. Leyli obrazını oynayıram. Olduqca məsuliyyətli bir işdir.

- Bəs solo karyerada hansı yeniliklər var?

- Mən müsahibələrimdə adətən yaradıcılığım haqda ətraflı məlumat verirəm. Çünki sırf sənətlə məşğul oluruq. Ancaq bu aralar qabaqcadan nəsə deməyə tərəddüd edirəm. Bircə onu deyə bilərəm ki, bizim çox sevilən bəstəkarımız Tahir Əkbərin vətənə aid mahnısını ifa etmişik. Çox gözəl bir mahnıdır. Bundan əlavə qarşıdan Novruz bayramı gəlir. Xalqımızın ən əziz bayramıdır və bununla bağlı istər ölkə daxilində, istərsə də xaricdə silsilə tədbirlər keçiriləcək.

- Gülyanaq xanımın yenidən ana olmasından sonra səhnədəki duetinizə ara verdiniz. Yenə də bu dueti birlikdə görə biləcəyik, yoxsa ayrı-ayrılıqda çıxışlarınız olacaq?

- Yox, biz ayrılmamışıq, sadəcə qeyd etdiyiniz kimi, analıq qayğıları Gülyanağı bir qədər səhnədən uzaqlaşdırıb. Buna baxmayaraq Gülyanaq səhnəyə dönüşü elə mənim konsertimdə elədi. Konsertdə səhnəyə çıxdı və repertuarımızda olan ifalardan səsləndirdi. Bundan başqa Opera və Balet Teatrında “Asrşın mal alan”da səhnəyə çıxdı. Ümumiyyətlə, konsertlərə gedir və teatrdakı rollarını da həmişəki kimi, gözəl ifa edir. Buyurub gəlib baxa bilərsiniz. Yəqin ki, tezliklə efirlərdə də bizi birgə görəcəksiniz. Bunun üçün biz hər zaman öz üzərimizdə çalışırıq.

- Sizin ayrı-ayrı muğamlarımıza çəkdirdiyiniz kliplər çox maraqlı alınır. Ancaq nədənsə buna bir qədər ara verdiniz. Səbəbi nə ilə bağlıdır?

- Siz yəqin ki, “Şahnaz” klipini nəzərdə tutursunuz. Çox istərdim ki, bu bir layihə şəklində davam etsin. Bu, ANS telekanalının ideyası idi. Klip çox uğurlu alınıb və bu gündə tamaşaçılar olduqca maraqla bu klipi izləyirlər. Həm muğam yeni bir tərzdə tamaşaçıya təqdim olundu, həm də Gülyanaq və mən fərqli bir tərzdə görüntüləndik. Şəxsən mən çox istərdim ki, bu layihə davam etsin. Biz o kompozisiyanı yeddi muğam üzərində qurmuşduq. Ancaq belə bir layihənin davamı maddıyat tələb edir. Ona görə bu layihənin davamı gəlmədi. İnşallah, yəqin ki, günün birində bu səpgidə yenə də nəsə yenilik edə bilərik.

- Son zamanlar müğənnilərin çoxu işlədikləri bəstəkarların və ya mahnıların azlığından şikayət edirlər. Siz də necə, bu problem öz aktuallığını saxlayırmı?

- Bilirsiniz, bizdə mahnılar çoxdur. Yəni mahnı qıtlığından əziyyət çəkmirik. Ancaq mart ayı üçün mahnılar üzərində çalışmağa vaxt azlıq edəcək. Məlum olduğu kimi, həm mən, həm də Gülyanaq xanım Mahnı Teatrının solistləriyik. Qarşıda qeyd etdiyim kimi, Novruz bayramı ilə bağlı tədbirlərimiz var. Sonra dövlət səviyyəsində xaricdə qastrol səfərlərimiz planlaşdırılır ki, hazırda onlara çox ciddi hazırlaşırıq. Çünki biz daha çox repertuarımızda xalq musiqisinə önəm veririk və buna görə də yaxşı nəticə əldə etmək üçün öz üzərimizdə daim çalışmalıyıq.

- Hansı ölkələrdə qastrol proqramlarınız gözlənilir?

- Almaniya və Rusiyaya qastrol səfərləri təklif olundu və Rusiya üzərində qərarlaşdıq. Moskvadakı həmvətənlərimiz qarşısında çıxış edəcəyik.

- Daim xarici ölkələrdə qastrollarda, konsert proqramlarında iştirak edirsiniz. Orda albom çıxarmaq və ya hər hansı bir fərqli layihə təklifi alırsınızmı? Yəni Avropada da sizin sənətinizi tanıtmaq imkanınız var. Ancaq bunu nədənsə dəyərləndirmirsiniz.

- İngiltərədə muğamlarımızla bağlı təkliflər aldıq və bu böyük bir reklam yaratdı. Hər zaman deyirəm, bu çox çətin və olduqca gözəl sənətdir. Belə təklifləri dəyərləndirdikdə gərək bütün işlərlə özün məşğul olasan. Vətənimdə yaradıcılıq işlərim, pedaqoji fəaliyyətim, tələbələrim var. İşim həddən çoxdur və belə təkliflərə təəssüf ki, vaxt azlığından zaman ayıra bilmirəm.

- Klip çəkilişləriniz barədə nə deyə bilərsiniz?

- Klip üçün müəyyən vəsait lazımdır. Klip heç vaxt elə-belə çəkilmir. Ona görə çox klip çəkdirə bilmirik. Fevralın 1-i və 17-si konsert keçirdim. Çox şükür ki, olduqca uğurlu bir konsert proqramı oldu. Bilirsiniz, olduqca məsuliyyətlidir. Bəzən sual verirlər ki, niyə solo konsert eləmədik? Əslində tələbələrlə belə bir konsert təşkil etmək solo konserti ərsəyə gətirməkdən daha çətindir. Çünki səhnəni yenicə görən bu gənclərin hərəsi bir xarakterdədir. Düzdür, onlardan bəziləri muğam müsabiqələrinin iştirakçıları olub. Ancaq buna baxmayaraq onların bütün məsuliyyətini mən daşıyırdım. Onda hiss etdim ki, səhnəyə hazırlıq necə çətindir. Buna baxmayaraq konsert alındı. Bütün biletlər satıldı. Hətta konsertə bilet tapmayıb, ancaq gəlmək istəyənlər məndən incidilər. Bu, qürurverici bir haldır. Gördüyünüz kimi, hər bir şey zəhmət tələb edir. Kliplər də belədir. Çəkirsən və sonra onun reklamı üçün də maddiyyat sərf etməlisən.

- Bəs hansı klipdən razı qalmısınız?

- Əksərindən razı qalmışıq. Ancaq təbii ki, narazı qaldığımız kliplər də olub, bu da rejissorun zəif işindən irəli gəlir. Məsələn, indiyədək “Şahnaz” klipinə kim tamaşa edirsə, onu çox qeyri-adi, gözəl klip olaraq qiymətləndirir. Sonra Qarabağ şəhidlərinə həsr edilən “Yaralı heykəllər” klipimiz də məncə, uğurlu kliplərimizdən sayıla bilər. Sonra Şəfiqə Axundovanın “Gəl, ey səhər” mahnısına çəkdirdiyimiz klipi çox bəyənirəm. Yəni bir-birindən fərqli kliplər çəkdirmişik. Ancaq elə kliplər də olub ki onları efirə çıxarmamışıq.

- Sizin repertuarınızda xoşagələn bir məqam da odur ki, tez-tez köhnə, unudulmaqda olan mahnılara yer ayırırsınız. Həmin mahnıların musiqi mətni necə əldə olunur?

- Qeyd etdiyim kimi, bizdə heç vaxt mahnı problemi olmur. İfamızda səslənəcək mahnılar var. İndi səhhətimlə bağlı mahnılar üzərində işləyə bilmirəm. Sağalan kimi onları ifa edəcəm. Elə mahnılar tapıb ortaya çıxarmışam ki, heç vaxt eşidilməyib. Düşünürəm ki, çox maraqlı olacaq. Mənim tələbəlik dövrüm Qarabağ müharibəsinə düşdü. İndi baxıram hərdən müharibə və Xocalı faciəsi ilə bağlı kadrlara, çox pis oluram. Yəni çox ağır dövrlər yaşamışıq. O vaxtlar çətin şəraitdə də olsa, mahnıların mətnləri olan kitablar satılırdı. Onları görən kimi böyük həvəslə alırdım. İndi baxıram ki, elə kitablar satışda yoxdur. Hazırda köhnə mahnıların mətnini yaşlı sənətkarlarımız vasitəsilə əldə edirik. Kamil müəllim və tarzən Mehman Mikayıloğlu da bu işdə mənə kömək edir. Sonra özüm də çox maraqlanıram ki, belə mahnıları üzə çıxarım. Mənə elə gəlir ki, siz hələ belə mahnıları çox eşidəcəksiniz. Hətta fikrim var ki, sırf elə mahnılardan konsert proqramı da təşkil edim. Elə mahnıların mətni ilə yanaşı lent yazıları da məndə var. Ailəmizdə xanəndələr çox olduğu üçün onların dövründən də müəyyən materiallar var ki, onlardan da faydalanıram. Sonra yaşlı insanların ifalarını kasetlərə yazmışıq ki, o mahnılar unudulmasın. Bu barədə aktiv olmalıyıq ki, gələcəyimiz üçün də bu mahnılar yaşasın.

- Bu gün daha çox sizi nə narahat edir?

- Mən bir şeydən narahatam. Muğam müsabiqəsindən çox razı qaldıq. Müxtəlif müsabiqələr keçirilir. Tələbələrim gedir və belə müsabiqələrdən keçmir. Mən mat qalıram ki, bu cür gözəl oxuyan gənc telekanaldakı müsabiqələrdə yer tuta bilmir. Bu “Xalq ulduzu” və digər müsabiqələrdə istedadlı gənclər kənarda qalır. Ordakı münsiflərdə tanınmış, sevimli sənətkarlarımız əyləşir. Hamısı ilə gözəl ünsiyyətim var. Onlar da bildirirlər ki, burda telekanal özü seçim edir. Buna görə narahatam ki, niyə bu istedadlar efirə çıxa bilmir. Bu proses mənə qaranlı qalır və narahat edir.

- Müsabiqələrdən danışdıq. “Eurovision-2012” təmsilçimiz barədə nə deyə bilərsiniz?

- Bu müsabiqə bizi çox gözəl tanıtdı. Mədəniyyətimiz, musiqimiz bir daha Avropada təbliğ olundu. İnanın, bayrağımızı orda görəndə sevincimdən ağlamışdım. Gör neçə ölkə içindən seçildik? İnanıram ki, builki təmsilçimiz Səbinə də uğurlu bir nəticə göstərəcək. Hər halda biz bir dəfə qalibiyyəti daddıq. Müsabiqə zamanı Bakıda olub maraqla izləyəcəm. Bu, olduqca maraqlı mədəniyyət hadisəsidir. Səbinəyə də uğurlar arzulayıram. Hər il Avropa səhnəsində bizim çıxışlarımız onsuz da çox gözəl olub. Bu il daha da möhtəşəm olacağına əminəm.

- Həmin ərəfədə Avropa tamaşaçıları qarşısında konsert proqramı vermək niyyətiniz varmı?

- Planlaşdırıram. Çünki Bakıda olacam və bunu dəyərləndirmək lazımdır.

Nüşabə

Palitra.-2012.-28 fevral.- S.13.