2012-ci il "İdman ili”dir: fiziki və mənəvi kamilləşməyə aparan yol

Ölkəmizdə idmanın inkişafı istiqamətində həyata keçirilən işlər Azərbaycan idmanının dünyadakı nüfuzunu xeyli artırıb. Bu inkişaf və nüfuz idmançılarımızın beynəlxalq yarışlarda əldə etdiyi medalların və ölkəmizdə keçirilən beynəlxalq turnirlərin sayında əksini tapıb. Bu iki bir-birinə bağlı olan məsələnin arxasında Azərbaycan dövlətinin gördüyü nəhəng iş və əmək dayanır. Azərbaycan dövləti idmanın inkişafında nə qədər maraqlı olduğunu həyata keçirdiyi siyasət və bu sahəni prioritetlərindən biri elan etməsi ilə ortaya qoyub. Bu bir aksiomadır ki, idmanın inkişafının arxasında dayanan ən əsas amil dövlətin inkişafı, iqtisadi cəhətdən güclü olmasıdır. İqtisadi cəhətdən inkişaf etməyən dövlətin idman sahəsini bu səviyyədə inkişaf etdirməsi mümkün deyil. Çünki dövlət güclü, iqtisadiyyatı sağlam olmalıdır ki, idmanın inkişafını təmin edən infrastruktur bazasını yarada bilsin. Azərbaycan Prezidenti, Milli Olimpiya Komitəsinin (MOK) rəhbəri İlham Əliyev bu hədəfi vaxtında düzgün müəyyənləşdirərək adım-addım məqsədə çatmaq siyasəti həyata keçirdi. Hansı ki, böyük əzmlə həyata keçirilən siyasət bu gün öz bəhrəsinin verməkdədir. Nədir həmin hədəflər?

Siyasi və iqtisadi cəhətdən güclü dövlət

Əvvəla, Prezident İlham Əliyevin həyata keçirdiyi uğurlu siyasət Azərbaycanı dünyanın lider dövlətlərindən birinə çevirib. Siyasi və iqtisadi cəhətdən güclü dövlətə çevrilən Azərbaycan BMT Təhlükəsizlik Şurasının qeyri-daimi üzvü seçilməklə nə qədər böyük beynəlxalq nüfuza malik olduğunu bütün dünyaya nümayiş etdirdi. Güclənən Azərbaycanın digər sahələri kimi, idman sektoru da böyük inkişaf dövrünü yaşayır. Dövlətin inkişafı, iqtisadiyyatının daha da güclənməsi, möhkəm dayaqlara əsaslanması idmanın da inkişafında həlledci rol oynayıb. Paytaxt Bakı və bölgələrdə inşa edilərək idmançılarımızın ixtiyarına verilən müasir Olimpiya İdman kompleksləri, müxtəlif idman arenaları və bazalar ölkədə həyata keçirilən nəhəng infrastruktur bazası yaradılması siyasətinin tərkib hissəsi kimi böyük əhəmiyyət kəsb edir. Dünyada çox az rast gəlinən haldır ki, qısa müddət ərzində 30-dan çox müasir Olimpiya İdman Kompleksi inşa edilərək idmançılarımızın ixtiyarına verilib. Məntiq aydındır - idman bazası olmadan idmançı da yetişdirmək mümkün deyil. Yəni idmanı inkişaf etdirmək, dövləti beynəlxalq arenada təmsil edəcək, himnini səsləndirəcək, bayrağını ucaldacaq idmançını yetişdirmək üçün ona şərait yaradılmalı, məşq etmək üçü müasir baza ilə təmin edilməlidir. MOK və dövlət başçısı kimi İlham Əliyev bu həqiqəti yaxşı bildiyi üçün ümumi infrastruktur layihələrinin tərkib hissəsi kimi müasir idman bazasının yaradılmasına xüsusi diqqət ayırıb.

Beynəlxalq arenada ölkəmizi təmsil edən idmançılar dövlətin müsbət imicinin formalaşdırılmasını təmin edir

Dövlət başçısının bu sahədəki siyasətinin əsas hədəflərindən biri idmanı inkişaf etdirməklə beynəlxalq arenada ölkəmizi təmsil edən idmançılar yetişdirməkdir. Bu isə ölkə daxilində genişmiqyaslı işlərin həyata keçirilməsi sayəsində mümkün olmaqla yanaşı dövlətin dünyadakı müsbət imicinin formalaşdırılmasını təmin edir. Həmin işin nəticəsidir ki, bu gün Bakı Avropanın idman mərkəzlərindən biri kimi qəbul edilir. 10-15 il əvvələ diqqət etsək, bu sahədə nə qədər böyük işlər görüldüyünün mənzərəsi aydın şəkildə göz önündə canlanar. Adi beynəlxalq yarışın keçirilməsinin sahiblik hüququnu Azərbaycana vermək istəməyən beynəlxalq idman federasiyaları bu gün tamamilə əks mövqe tutaraq yarışlarının məhz Azərbaycanda, Bakıda keçirilməsini istəyirlər. Bakı dövlətin həyata keçirdiyi siyasətin nəticəsi olaraq nəhəng idman və digər infrastrukturu ilə istənilən yarışı qəbul etmək iqtidarındadır və beynəlxalq federasiyaların seçimi zamanı bir addım öndədir. Bakıda bir-birini əvəzləyən dünya və Avropa çempionatları, nüfuzlu beynəlxalq yarışlar bir daha təsdiqləyir ki, beynəlxalq qurumlar ev sahibliyini Azərbaycana etibar etdikləri turnirlərin yüksək səviyyədə keçiriləcəyinə əmindirlər. Çünki Azərbaycan siyasi sabitliyi, iqtisadi inkişafı, idman və digər infrastrukturu ilə bu sahədə artıq böyük təcrübə qazanıb. Qeyd edək ki, beynəlxalq idman federasiyaları öz bayraqları altında keçirilən yarışın ev sahibini seçərkən əsasən həmin ölkədəki siyasi sabitliyi, inkişaf səviyyəsini və müasir infrastruktur bazasının olmasını nəzərə alırlar. Müasir Azərbaycan dünya standartlarına uyğun müasir infrastruktur yaradıb və proses davamlı şəkildə davam etdirilir. Bu gün Bakıda müasir standartlara uyğun nəqliyyat infrastrukturu yaradılıb. Dövlət başçısının rəhbərliyi ilə ölkədə, xüsusilə Bakıda müasir şəhər, idman, yol, hotel infrastrukturu yaradılıb ki, bu da Azərbaycana dünyanın ən güclü idman mərkəzlərindən biri kimi böyük nüfuz qazandırıb. İdmançılarımızın müxtəlif turnirlərdə qazandığı medallar, nəhəng idman infrastrukturu, Bakının Avropanın idman mərkəzlərindən birinə çevrilməsi dövlətin həyata keçirdiyi siyasətin nə qədər doğru olduğunu ortaya qoyur. İkinci ayını yaşadığımız cari il başlayandan ölkəmizin idman həyatı zənginliyi ilə seçilir. Artıq ölkəmiz bu ay karate üzrə gənclər və yeniyetmələr arasında Avropa çempionatına ev sahibliyi edib və bədii gimnastika üzrə Avropa çempionatının da Bakıda, inşası davam edən müasir Gimnastika Olimpiya Kompleksində keçirilməsi ilə bağlı qərar qəbul edildiyi elan olunub. Dövlət başçısı tərəfindən 2012-ci ilin «İdman ili» elan olunması cəmiyyətin fiziki kamilləşməsinə istiqamətlənən bu siyasətin addım-addım hədəflənən məqsədə doğru getdiyini göstərir. Dövlət başçısının bildirdiyi kimi, artıq idman həyatımızın ayrılmaz hissəsinə çevrilib: «İdman həyatımızın ayrılmaz hissəsidir. İdmanın inkişafı hər bir ölkənin ümumi inkişafını göstərir. Bu sahədə əldə edilən uğurlar, əlbəttə ki, bizi gələcək uğurlara sövq edir. Biz əldə edilmiş nəticələrlə kifayətlənə bilmərik. Yalnız və yalnız gələcəyə baxmalıyıq ki, daha da böyük qələbələr əldə edək».

Mənfi vərdişlərdən uzaq sağlam nəsil

Dövlətin həyata keçirdiyi idman siyasətinin digər məqsədlərindən biri sağlam nəsil yetişdirməkdir. İşin fiziki tərəfi ilə yanaşı mənəvi məsələ də ön planda tutulur. Məlumdur ki, idmanla məşğul olanların böyük əksəriyyəti gənclərdir və bu sahədə böyük gənclik ordusu cəmləşib. Deməli, idman cəmiyyətin ən aktiv təbəqəsi olan gəncləri öz ətrafına cəmləməklə pis vərdişlərə meyillənməyin qarşısın alır. Müasir dövrümüzün tələbləri elədir ki, mənfi vərdişlərin qarşısını almaq çox çətinləşib. Xüsusilə gənclər arasında müxtəlif mənfi vərdişlərin yayılma arealı və təsir vasitələri çox artıb. İnternetin həyatımıza bu qədər sürətlə daxil olduğu, qloballaşmanın mənfi təsirlərindən qorunmağın bu qədər çətin olduğu bir zamanda idmanın inkişaf etdirilməsi çox aktualdır. Belə ki, idmanı kütləviləşdirməklə, bu sahəyə daha çox yeniyetmə və gənci toplamaqla həm dünyada ölkəmizi təmsil edən idmançılar ərsəyə gətirmək, həm də mənfi vərdişlərdən uzaq, sağlam gənc nəsil yetişdirmək mümkündür. Dövlət başçısı bu məsələni belə dəyərləndirib: «Azərbaycanda bu sahədə də çox böyük işlər görülür. Son illər ərzində ölkəmizdə 30-dan çox Olimpiya-İdman Mərkəzi, idman meydançaları tikilib. Ümumiyyətlə, ölkəmizdə idmanla, fiziki hazırlıqla məşğul olmaq üçün çox gözəl şərait yaradılmışdır. Biz gəncləri idmana cəlb etməklə bir neçə məqsədi güdürük. Birinci növbədə, onlar sağlam olurlar, digər tərəfdən, biz gəncləri pis vərdişlərdən də çəkindirməliyik». Göründüyü kimi, Azərbaycanda həyata keçirilən idman siyasətinin əsas məqsədlərindən biri də sağlam nəsil yetişdirmək, mənəvi kamilliyi təmin etməkdir. Dövlət başçısının paytaxt Bakı ilə yanaşı bölgələrin inkişafını daimi olaraq diqqətdə saxlaması, regionlarımızda böyük infrastruktur, o cümlədən idman bazasının yaradılmasını təmin etməsinin arxasında dayanan əsas məqsədlərdən biri də Azərbaycanın gələcəyi üçün fiziki və mənəvi cəhətdən sağlam nəsil yetişdirməkdir. Azərbaycan gəncləri müasir Olimpiya İdman Komplekslərində idmanla məşğul olaraq sağlam nəsil kimi formalaşırlar. Deməli, dövlət başçısının həyata keçirdiyi siyasət idmanın inkişafını, idman, eyni zamanda digər infrastrukturun formalaşdırılmasını, sağlam nəsil yetişdirilməsini və ümumilikdə Azərbaycanın inkişafını hədəfləyib. Bu siyasət həm də idman sahəsini hərtərəfli inkişaf etdirməklə fiziki və mənəvi kamilləşməyə aparan yoldur. Dövlət başçısı bu məsələni belə dəyərləndirib: «Mən çox şadam ki, bu komplekslərdə həm idmançılar, həm yeniyetmələr, gənclər, uşaqlar məşq edir. Uşaqlar bizim gələcəyimizdir. Azərbaycanda çox gözəl gənc nəsil yetişir. Yeniyetmələr arasında Ümumdünya Olimpiya Oyunlarında Azərbaycan çox ləyaqətlə təmsil olunmuşdur. Bu proses artıq uzun illərdir ki, aparılır. Azərbaycanda həm peşəkar idmançılar öz imkanlarını göstərirlər, Azərbaycanın idman şöhrətini yüksəklərə qaldırırlar, həm gənc idmançılar, uşaqlar yetişir. Bu sahədə kütləvilik təmin edilmişdir. Bu, çox gözəl hadisədir, bizi çox sevindirir. Bizim gənc nəsil sağlam olmalıdır. Həm fiziki cəhətdən sağlam olmalı, həm ölkə vətəndaşı kimi çox böyük mənəvi dəyərlərə malik olmalıdır». Artıq hədəf çox böyükdür - 2020-ci il Olimpiya Oyunlarını qəbul etmək. Azərbaycan inkişafına, gücünə arxalanaraq Olimpiya Oyunları kimi dünyanın ən nüfuzlu idman yarışını qəbul etmək iddiasını ortaya qoyub. Dünya, Avropa çempionatlarını, A kateqoriyalı beynəlxalq yarışları uğurla qəbul edən ölkəmiz idman sahəsində Avropanın mərkəzlərindən, iqtisadi inkişafa görə dünyanın lider dövlətlərindən biridir. Rəsmən namizədliyini irəli sürmüş Bakıda bir neçə möhtəşəm idman kompleksinin tikintisi planlaşdırılır. Olimpiya Oyunlarında bir sıra su idman növlərinə aid yarışların keçirilməsi üçün Xocasən qəsəbəsi yaxınlığında, göl kənarında bazanın tikintisi planlaşdırılır. Paytaxtda hazırda iki böyük idman qurğusunun – 65 min nəfərlik Bakı Olimpiya Stadionu və Gimnastika Kompleksinin tikintisi davam etdirilir. Hər iki obyekt metronun “Koroğlu” stansiyası yaxınlığında inşa edilir. Olimpiya Oyunlarının Bakıda keçiriləcəyinə qərar verilərsə, bir sıra iri idman qurğuları da inşa olunacaq. Həmin idman qurğuları arasında tennis üçün 22 min nəfərlik mərkəz, digər idman növləri üçün 15 min nəfərlik Bakı Çoxməqsədli Arenası, 12 min nəfərlik Milli Su İdman növləri Mərkəzinin və digər qurğuların istifadəyə verilməsi planlaşdırılır. Həmçinin «Baku Cristall Hall», «Baku Expo Center» kimi qeyri-idman qurğularının da yarışların keçirilməsi üçün idmançıların ixtiyarına verilməsi mümkündür. Həyata keçirilən və keçirilməsi nəzərdə tutulan nəhəng infrastruktur layihələri ölkəmizin Olimpiya Oyunlarını qəbul etmək iddiasını gücləndirir. Fiziki və mənəvi kamilləşməni təmin edən dövlət siyasəti ölkəmizi addım-adım bu hədəfə doğru aparır. Bunun üçün hər birimizin üzərimizə düşən iş dövlət başçısının qeyd etdiyi kimi, fəallıq, fədakarlıq, vicdan və qələbə əzmidir.

Anar Miriyev

Palitra.-2012.-29 fevral.-S.11.