«Qəbələdə müntəzəm şəkildə sərgilər təşkil edirik»

Layihə çərçviəsində müsahibmiz Qəbələ rayon Mədəniyyət və Turizm Şöbəsinin müdiri Nargilə Qafarovadır. O, qəzetimizə müsahibəsində cari ildə rayonda görülən işlər haqqında məlumat verməklə başladı:

- Qəbələ rayon Mədəniyyət və Turizm Şöbəsi üzrə ilin 6 ayı ərzində tarixi hadisələr, yubileylər və əlamətdar günlərin qeyd olunması istiqamətində məqsədyönlü işlər aparıb. İlin əvvəlində tədbirlərimiz çox zəngin olub. Belə ki, klublarda və mədəniyyət evlərində məktəblilər üçün yeni il şənlikləri təşkil edilib. Vəndam qəsəbə Mədəniyyət Evi, Nic qəsəbə Mədəniyyət Evində yerli əhali üçün yeni il tədbirləri hazırlanıb. 20 Yanvarın 22 illiyi münasibətilə bütün müəssisələrdə anım mərasimləri keçirilib, fotostendlər tərtib edilib. Xalqımızın yaddaşında qara hərflərlə yazılmış, Qarabağ torpaqlarının ermənilər tərəfindən işğalı nəticəsində hazırda erməni tapdağı altında olan rayonların hər birinin işğal günü müəssisələrdə hər il ənənəvi olaraq anılır. Eyni zamanda 26 fevral-Xocalı soyqrımının 20-ci ildönümü münasibətilə bütün mədəniyyət müəssisələrimizdə “xatirə saatları” təşkil olunub. “Xocalı harayı” adlı ədəbi-bədii kompozisiya hazırlanaraq geniş ictimaiyyət qarşısında nümayiş olunub. Mart ayı da həmişə tədbirlərlə zəngin olur. 8 Mart qadınlar bayramı münasibətilə bir çox klub müəssisələrində qadınlar üçün musiqi proqramı təşkil etmişik. Xalqımızın milli bayramı olan Novruz bayramı münasibətilə martın 20-də Atçılıq Cıdır Mərkəzində geniş tədbir keçirilib. Tədbirdə meydan tamaşaları göstərilib, rayon Mədəniyyət Evinin “Çinar” instrumental ansamblı, “Gülbuta” folklor qrupu, Hacallı kənd Mədəniyyət Evinin “Gülüstan” folklor qrupu tədbirlərdə fəallıqla çıxış ediblər. Qeyd edək ki, hər il olduğu kimi bu il də Bakıda keçirilən Novruz şənliklərində Qəbələ rayon mədəniyyət işçiləri yüksək fəallıqla təmsil olunublar. 31 Mart Azərbaycanlıların Soyqrımı Günü münasibətilə bütün müəssisələrdə anım mərasimləri keçirilib, fotostendlər, guşələr təşkil olunub.

- Rayonunuz cari il respublika müsabiqələrində təmsil olunubmu?

- Bəli olunub. Aprel ayında Bakıda keçirilən Xan Şuşinski adına II Respublika muğam müsabiqəsində rayon İncəsənət Məktəbinin şagirdi Hacıbaba Abdurahmanov I yer tutub. Həmin ay Şəkidə keçirilmiş Respublika incəsənət məktəblərinin şagirdlərinin xor müsabiqəsində rayon İncəsənət Məktəbinin xor kollektivi də uğurla çıxış edib. Mayın 8-də Masallıda keçirilmiş Respublika uşaq muğam müsabiqəsində rayonumuzun İncəsənət Məktəbinin şagirdlərindən Hacıbaba Abdurahmanov, Bağırov Fəqan da iştirak edib və diplomla təltif olunublar. Qəbələ rayon İncəsənət Məktəbinin maddi-texniki bazasının möhkəmləndirilməsi üçün müəssisəyə kitab şkafı, stul, stol, musiqi əsərlərini qoymaq üçün pult alınıb. Eyni zamanda məktəb təhsilin keyfiyyətini yüksəltmək üçün yeni dərs vəsaitləri ilə təmin olunub. Bu il məktəbi 61 nəfər şagird 6 ixtisas üzrə bitirib. Qeyd edim ki, may ayında Şuşanın işğalının 20 illiyi ilə əlaqədar şöbə tərəfindən tədbirlər planı hazırlanıb. Kənd klub müəsssisələrində və kitabxanalarda bununla əlaqədar daimi sərgilər, fotostendlər, guşələr təşkil edilib, anım mərasimləri keçirilib.

- Rayon kitabxana filiallarının birləşdirilməsi məsələsi həll edilbmi?

- Prezidentin 6 oktyabr 2008-ci il tarixli Sərəncamı ilə təsdiq olunmuş “Azərbaycan Respublikasında kitabxana-informasiya sahəsinin 2009-2013-cü illərdə inkişafı üzrə Dövlət Proqramı”nın müvafiq bəndində şəhər, rayon kitabxana filiallarının birləşdirilməsi, onların daha səmərəli fəaliyyət göstərməsi nəzərdə tutulub. Bu istiqamətdə Qəbələ rayonunda kitabxanaların müasir oxucu tələblərinə cavab verməsi istiqamətində bir çox tədbirlər həyata keçirilib. Mərkəzi Kitabxana Sistemi və filiallarında yeni avadanlıqlar alınıb, kompyuterlər verilib. Respublika kitabxana kollektorundan yeni kitablar gətirilib. Eyni zamanda, “Elektron kitabxana” yaradılması istiqamətində Mərkəzi Kitabxanada bir çox işlər görülüb. May ayında elektron kitabxananın fəaliyyət göstərməsi üçün vacib olan 1300 manat dəyərində SD formatda kitablar alınıb. 10 kəndin kitabxanası internet ilə təchiz edilib. İlin sonunadək elektron kataloqların işlənməsi üçün vacib olan yeni modulların alınması nəzərdə tutulur. 28 may Respublika Günü münasibətilə Heydər Əliyev adına Mədəniyyət və İstirahət parkında geniş bayram tədbiri keçirmişik. 1 İyun Uşaqların Beynəlxalq Müdafiə günü münasibətilə də Heydər Əliyev adına Mədəniyyət və İstirahət parkında tədbir keçirilib. Tədbirdə Qəbələ rayon İncəsənət Məktəbinin şagirdlərdən ibarət ansamblı, rayon Mədəniyyət Evinin kolllektivi və uşaq yaradıcılıq mərkəzinin rəqs qrupu fəal iştirak edib. Eyni zamanda bir çox klub müəssisələrində, o cümlədən Hacallı kənd Mədəniyyət Evi, Vəndam qəsəbə Mədəniyyət Evi, Tüntül kənd Mədəniyyət Evində uşaqlar üçün musiqili proqramlar təşkil olunub. Daha sonra 15 iyun Qurtuluş Günü münasibətilə kəndlərdə yerləşən klub müəssisələrində yerli inzibati ərazi nümayəndəlikləri ilə birgə tədbirlər təşkli olunub. Bütün mədəniyyət müəssisələrində müntəzəm şəkildə mühazirələr keçirilib, rayon Mədəniyyət Evi tərəfindən Heydər Əliyev adına Mədəniyyət və İstirahət parkında bayram konserti təşkil edilib. 26 iyun Silahlı Qüvvələr Günü münasibətilə bütün müəssisələrdə mühazirələr oxunub. Qəmərvan kənd Mədəniyyət Evi və Tikanlı kənd Mədəniyyət Evi tərəfindən sərhəd qoşunlarının hərbi zastavasında musiqili proqramlar təşkil edilib. Qəbələ rayon Mədəniyyət Evinin “Çinar” instrumental ansamblı Goranboy rayonunda yerləşən “N” saylı hərbi hissənin əsgər və zabit heyəti qarşısında geniş konsert proqramı ilə çıxış edib. Laza və Qəmərvan kəndlərində yerlşən zastavalarda əsgərlər üçün konsert proqramları keçirilib. Belə tədbirlərin keçirilməsi əsgərlərimizdə böyük ruh yüksəkliyi yaradır. Ümummilli liderin irsinin təbliği istiqamətində keçirilən tədbirlər baxımından may ayı çox zəngin olub. Heydər Əliyev Mərkəzində rayon mədəniyyət, təhsil və səhiyyə işçiləri ilə, ağsaqqal və veteranlarla, gənclərlə, məktəblilərlə keçirilən tədbirlərdə ulu öndərin xatirəsi böyük ehtiramla yad edilib, həyat və fəaliyyəti haqqında geniş məlumatlar verilib, filmlər nümayiş etdirilib. Uşaq Yaradıcılıq Mərkəzində Qəbələ Dövlət Rəsm Qalareyası tərəfindən aprel ayında Əzim Əzimzadənin yaradıcılığına həsr olunmuş mühazirələr keçirilib.

Anar Miriyev.

Palitra.-2012.- 18 iyul.- S. 4.