İstanbulda mədəniyyət bayramı

Türkcə Olimpiadalar çərçivəsində İstanbulda təşkil edilən mədəniyyət bayramına 5 qitədən 135 ölkə qatılıb. 2010-cu ildə Avropa Mədəniyyət Paytaxtı olan İstanbul bu dəfə İstanbul Sərgi Mərkəzində reallaşan mədəniyyət bayramı vəsiləsilə dünyaya paytaxtlıq etdi.

Beynəlxalq Türkcə Dərnək (TÜRKCƏDƏR) tərəfindən təşkil edilən X Beynəlxalq Türkcə Olimpiadaları çərçivəsində iyun ayının ilk günlərində reallaşan mərasimə dünyanın dörd bir yanından ziyarətçi axın edib. İstanbul Sərgi Mərkəzində baş tutan mərasimə Türkiyə daxilindən və xaricdən 600 minə yaxın ziyarətçi gəlib. Mədəniyyət bayramı üçün gələn yüz minlərlə insan adını belə eşitmədiyi ölkələrlə tanış olmaq fürsətini əldə edib, həmin ölkələrin mədəniyyətləri haqqında məlumat sahibi olub. Səhər saat 10.00-dan axşam 21.00-dək ziyarətçiləri qəbul edən mədəniyyət bayramına vətəndaşlar böyük maraq göstərib. Mərasimə çox sayda xarici ölkə səfir və konsulları, rəsmi nümayəndələr də qatılıb. Türkcə Olimpiadalar çərçivəsində təşkil edilən mədəniyyət bayramına qatılan Yaponiya, Azərbaycan, Rumıniya və Çin kimi fərqli ölkələrdən jurnalist və bürokratlar ölkə stendlərini gəzərək şagirdlərlə söhbət ediblər.

Rumıniyada fəaliyyət göstərən səfirlər də türk məktəblərinin stendlərinə və şagirdlərinə heyran qalıb. Mədəniyyət bayramında rəqs edən kiçik uşaqları görən xarici missiya rəhbərləri onlarla xatirə fotoşəkli də çəkdirib. Bu bayramda Azərbaycanı təbliğ edən stend isə hər kəsin marağına səbəb olub. “Çağ Öyrətim” Şirkətlər Qrupunun dəstəyilə Azərbaycandan da 500-ə yaxın nümayəndə heyəti bu tədbirdə iştirak etmək üçün İstanbula səfər edib. Ötən il Ankara Altınparkda yüz minlərlə insanı qonaq edən mədəniyyət bayramı bu il İstanbulu rəngləndirib. 135 ölkə qurduğu stendlərdə öz mədəniyyətini, geyimini, kulinariyasını, musiqisini tanıtma fürsəti əldə edib.

Tədbirdə iştirak edən nümayəndəmiz Namiq Əliyev tədbirlə bağlı təəssüratlarını bölüşdü: “Türkiyədə keçirilən bu tədbir doğrudan da yüksək səviyyədə təşkil olunmuşdu. Bizim üçün sevindirici hal o oldu ki, 135 ölkə stendi arasında Azərbaycanın stendi xüsusilə seçilirdi. Stend böyüklüyü, zənginliyi, dekorasiyasına görə sərgiyə gələnlərin diqqətini cəlb edirdi. Stendin qarşısında həddən ziyadə qələbəlik yaşanırdı. Eyni, yaxın xalq olduğumuz üçün insanlar doğmalıq hiss edib stendə yaxınlaşırdı. Üstəlik, təqdimatın yüksək səviyyədə olması da istər-istəməz qonaqların diqqətini cəlb edirdi. Azərbaycanın milli mədəniyyəti, kulinariyası, musiqilərimiz yüksək səviyyədə nümayiş olunmuşdu. İnsanların sıxlığından hərəkət etmək mümkün deyildi. Orada həmçinin olimpiadada iştirak edən ölkələrin musiqiçilərinin təqdimatı oldu. Azərbaycanı təmsil edən uşaqların çıxışları ayaqüstə alqışlandı. Artıq uşaqlardan biri şeir müsabiqəsində qızıl mükafat qazanmışdı. Və mən deyərdim ki, musiqi yarışmasında iştirak edən qız da əslində ən azından bu mükafata iddialı idi. Bəlkə də bir ölkənin nümayəndə heyətinin ikinci mükafatı əldə etməsi bir qədər çətin ola bilər. Ancaq onun da çıxışı olduqca maraqla qarşılandı və mükafata layiq idi. Sonda onu da qeyd etmək istərdim ki, bu cür tədbirlərin dünya xalqlarının bir-birini tanımasında, yaxınlaşmasında, bir-birinin adət-ənənələrinə bələd olmasında da böyük rolu var. Bir növ bəşəriyyətin gələcəyi əslində belə tədbirlərə yönəlməlidir. İnsanlar bu şəkildə əlaqə qurmalı və sülh şəraitində sivilizasiyalar arasında dialoq qurulmalıdır. Bu tədbirdə o da diqqətimi cəlb etdi ki, istər Avropa, istər Afrika və istərsə də Şərq ölkələrindən gələnlər arasında bir bərabərlik vardı. Hamı sanki bir-birinə qarşı bir doğmalıq hiss edirdi”.

Aylar əvvəl başlayan mədəniyyət bayramına hazırlıq həyəcanı beləcə bitdi. 600 min nəfər ziyarətçinin qatıldığı bu bayramda 135 ölkədən 1500 şagird və 500 müəllim iştirak edirdi. Tədbirdə 600 min təqdimat broşürü paylanıb. Onu da bildirək ki, “haberler.com” portalının məlumatına görə, Türkcə Olimpiadalar çərçivəsində ifaçıların mahnı ifa etmək üzrə yarışması bu gün baş tutacaq. Final həyəcanını yaşayan həmyerlimiz Səma Sultanova ifa etdiyi “Könül yarası” mahnısı ilə finalda çıxış edəcək. Türk mətbuatı onu birinci yerə iddialılar sırasında görür.

Nüşabə

Palitra.-2012.-5 iyun.-S.7.