Sevinc Tofiqqızı: “Bakıda “Eurovision-2012” peşəkarlıq, yaxşı səs, yaxşı mahnı təntənəsi kimi qeyd olundu”

Gulyaz Məmmədova: “Ən əsası Avropaya sahib olduğumuz dəyərləri nümayiş etdirməyimiz məni qürurlandırdı”

“Eurovision-2012” Mahnı Müsabiqəsi bitsə də, istər Türkiyə, istərsə də Rusiya mətbuatı hələ də Bakıda keçirilən bu müsabiqə haqqında şərhlər yazır, məşhur insanların fikirlərini gündəmə gətirir. Görünür, Azərbaycanın ev sahibliyi etdiyi bu müsabiqənin möhtəşəmliyi çoxları üçün gözlənilməz olub. Mövzunun hələ də aktual olduğunu nəzərə alıb bizim incəsənət adamlarının müsabiqə ilə bağlı fikirlərini öyrənmək qərarına gəldik. İlk həmsöhbətimiz, bəstəkar Sevinc Tofiqqızı müsabiqə ilə bağlı bunları söylədi:

“Bilirsiniz, bu yarışmada qalib olduqdan sonra yarışmaya ev sahibliyi edəcəyimizə görə çox sevinmişdim. Mətbuatdan müsabiqəyə hazırlıq mərhələsini böyük bir maraqla izləyirdim. Amma düşünmürdüm ki, biz belə bir müsabiqəni lazımi səviyyədə hazırlaya bilərik. “Eurovision” maraqlı bir yarışmadır və gözlənilməz olaylarla yadda qalır. İstər yarımfinallar, istərsə də final gecəsi çox zövqlə hazırlanmışdı. Bir çox sosial şəbəkələrdə avropalılar həmin görüntüləri hələ də paylaşırlar. “Eurovision” elə bir yarışmadır ki, burda müxtəlif ölkə musiqiləri bir-biri ilə yarışır. Məncə, hamı bir-birindən, həmin ölkələrin musiqisindən nəsə öyrənir. Biz finalda və yarımfinallarda intervallar üçün çox uğurlu və maraqlı musiqi nömrələri hazırladıq. Milli musiqi alətlərimizlə Dima Bilan, Lena Mayer, Aleksandr Rıbakın ifa etdikləri mahnıların müşayiəti, milli rəqqasların heyrətamiz rəqsləri həqiqətən gözəl seçim idi. Natiq Şirinovun qavaldaşda ifası da yəqin ki, uzun müddət avropalıların yaddaşında qalacaq. Xüsusilə mənim üçün Emin Ağalarovun çıxışı maraqlı və yaddaqalan oldu. Gənc olmasına baxmayaraq səhnədə olduqca rəngarəng şou və təkrarolunmaz performans nümayiş etdirdi. Builki təmsilçimiz Səbinə Babayevanın Alim Qasımovla bir səhnəni paylaşması isə məncə, hamının ürəyindən oldu. Azərbaycan mötəbər bir müsabiqəyə öz musiqi töhfəsini verdi. Məncə, biz Avropaya göstərdik ki, əsl şou belə olmalıdır. İnanırsınız, hər il bu yarışmaya tamaşa edənlərin çoxu intervalları izləmirdi. Ancaq Azərbaycan hər şeyi elə gözəl hazırladı ki, hamı intervalları izləməyə böyük maraq göstərirdi. Məncə, artıq sözə ehtiyac yoxdur. Biz “Eurovision” tarixinə maraqlı çıxışlarla öz möhürümüzü vurduq. Səbinə Babayeva və Alim Qasımovun ifası bir çox böyük sənətçilərin ifasını geridə qoydu. Bu da onu sübut etdi ki, Avropanın dinlədiyi 5 mahnı sırasında Azərbaycanın da adı var. Bu müsabiqədə səhnə performansına, səhnədə qurulan tamaşaya həmişə önəm verilirdi. Bu il çox ağır mübarizə gedirdi, böyük bir rəqabət var idi. Lorinə rəqib olacaq iştirakçılardan biri də Səbinə idi. Bakıda “Eurovision-2012” peşəkarlıq, yaxşı səs, yaxşı mahnı təntənəsi kimi qeyd olundu. Münsiflərlə tamaşaçıların rəyi üst-üstə düşdü”

Əməkdar artist Gülyaz Məmmədova da “Eurovision” yarışmasından böyük zövq aldığını bildirdi: “Düzünü deyim, orda İsveç təmsilçisindən daha güclü ifalar vardı. İndi qismət elə gətirdi ki, səsvermələrə görə Lorin qalib oldu. Ancaq mənim fikrimcə, ondan daha güclü səs və gözəl ifalar vardı. Elə bizim təmsilçimiz Səbinə Babayevanın ifası çox gözəl idi. Ancaq yəqin ki, dalbadal iki dəfə qalib olmaq şansı çətin olduğu üçün bu il qalib ola bilmədik. Ancaq yenə də ilk beşlikdə olduq. Bu da əla nəticədir. Müsabiqəyə olduqca tanınan müğənnilər gəlmişdi. Mən şəxsən olduqca böyük zövq aldım. İndi müsahibə verirəm deyə bu fikirləri səsləndirmirəm. Mən həqiqətən bu müsabiqəni izləyəndə böyük zövq aldım. Evdə əyləşib böyük bir konserti izlədik. Ən əsası Avropaya sahib olduğumuz dəyərləri nümayiş etdirməyimiz məni qürurlandırdı.

Biz hər il başqa dövlətlərdə keçirilən yarışmaları izləyirik. Vətənimizdə keçirildiyi üçün demirəm, ancaq həqiqətən bu il Bakıda keçirilən “Eurovision” çox möhtəşəm idi. Hər şey yüksək səviyyədə hazırlanmışdı. Başqa dövlətlərdə yaşayan həmyerlilərimiz zəng vurub bildirirdilər ki, Azərbaycan necə də gözəlləşib. Xüsusilə reklam çarxlarını izləyənlər heyranlıqlarını gizlədə bilmirdilər. Hər halda yarış günü və sonrakı günlər müsabiqə ilə bağlı mənə çoxlu zənglər gəldi. Məncə, bu, Azərbaycanın mədəniyyət sahəsindəki böyük qələbəsi idi. Bizim müsuqi alətlərimizin müşayiəti ilə “Eurovision” qaliblərinin səhnədəki çıxışları olduqca maraqlı oldu. Çox gözəl idi. Alim Qasımovun, elə böyük bir sənətkarın səhnədəki çıxışı zala xüsusi bir rəng qatdı. Yəni Azərbaycanın tanıtımı üçün bu çox gözəl bir tədbir idi. Biz müxtəlif sahələrlə dünyada tanınırıq. Ancaq bu tədbir bizə böyük bir şans verdi. Mən televiziyadan izlədim. Çünki məncə, evdə izlədikdə daha diqqətlə hər bir anı izləmək olur. Bir daha qeyd edim, biz Avropaya möhtəşəm musiqimizlə yanaşı qonaqpərvərliyimizi, millətimizə xas olan müsbət keyfiyyətlərimizi nümayiş etdirdik. Azərbaycanı hər cəhətdən sevdilər”

Bəstəkar Nailə Mirməmmədli: “Mən nadir hallarda belə fikirlər səsləndirirəm və məncə, yarışmadan sonra səslənən bütün müsbət fikirlər heç də boğazdan yuxarı deyilməyib. Bu, patriotik sözlər də deyil. Həqiqətən hər şey gözəl alınmışdı. Bilirsiniz, elə qüvvələr var idi ki, gözləmirdilər belə bir şey olsun. Ola bilməz balaca bir dövlət, müharibə bölgəsi belə bir müsabiqəyə ciddi hazırlaşsın. Həm də varlığımızla belələrinə göz dağıyıq. Buna görə fəxr edirəm. Bilirsiniz, evə qonaq gələndə qonağın rahatlığı üçün ev sahibi olaraq azuqəmizin ən yaxşısın qonaq üçün saxlayırıq. Dövlətimiz qonaqları yüksək səviyyədə qarşıladı. Yenə də deyirəm ki, bizim dövlətimiz kiməsə nəyisə sübut etmək üçün deyil, sadəcə belə bir dövlətin mövcud olduğunu göstərdi. Müsabiqəyə gəlincə, bu il layiqli iştirakçılar da çox idi. Lorin birinciliyə layiq idi. Onun ifası mənim çox xoşuma gəldi. Səbinə Babayeva da çox yaxşı ifa nümayiş etdirdi. Ancaq daha çox Albaniya təmsilçisinin ifasını bəyəndim. Mənim balaca oğlum isə Can Bonomonun ifa etdiyi mahnını çox bəyənib. İndi də bütün günü həmin mahnını pianinoda ifa edir. Mən deyim ki, Albaniyanın mahnısına mənim 6 yaşlı oglum diqqətlə qulaq asır və ifasını təkrarlayır. Bizim sənət dostlarımızın bir çoxu deyirdi ki, Albaniya təmsilçisi nə oxudu, o ki qışqırırdı. Ancaq olduqca maraqlı ifa idi. Albaniya təmsilçisi Rona müxtəlif səslərlə ifa nümayiş etdirdi. Ancaq qalibin, Lorinin qələbəni çox qəribə tərzdə qarşılamasını anlaya bilmədim. Bilmirəm, bəlkə şok keçirdiyi üçün, bəlkə də qalib olacağını əvvəlcədən bildiyi üçün onun belə qəribə reaksiyası məni çox təəccübləndirdi”.

Nüşabə

Palitra.-2012.-6 iyun.-S.6.