Gənclər xaricdə ümumi maraqlar naminə yaxşı konsolidasiya olunurlar

Rüfət Əzizov: “Bu sahədə proseslərin sürətlə inkişafı ilk olaraq gənclərimizin dövlətimizə, dövlətimizin də gənclərimizə olan güvənindən irəli gəlir

Müsahibimiz Xəzər Mühəndisləri İctimai Birliyinin həmtəsisçisi, Azəri Metal Şirkətinin icraçı sədri və London Materiallar İnstitutunun peşəkar üzvü Rüfət Əzizovdur. İctimai aktiv və qabaqcıl bir gənc olan Rufət Əzizov müsahibəsində son dövrlərdə Azərbaycan gəncliyinin inkişafı, onların xarici ölkələrdə ölkəmizi daha layiqincə təmsil etməsi məsələlərindən danışdı.

- Azərbaycan gəncləri son zamanlar xarici ölkələrdə ölkəmizi daha layiqincə təmsil edirlər. Onlar bu məqsədlə daha yaxşı təşkilatlanıblar. Bu barədə dövlət səviyyəsində siyasət yürüdülür ki, gənclər xaricdə ümumi maraqlar naminə yaxşı konsolidasiya olunsunlar. Bu barədə fikriniz nədir?

- Bəli, bu gün demək olar ki, xaricdə olan gənclərimiz hər zamankından daha aktivdirlər. Əlbəttə ki, bu sahədə proseslərin sürətlə inkişafı ilk olaraq gənclərimizin dövlətimizə, dövlətimizin də gənclərimizə olan güvənindən irəli gəlir. Dövlətimiz xaricə təhsil almaq üçün çox sayda tələbə göndərir, onlara hər zaman sahib çıxır, qaldıqları yerlərdə, təhsil aldıqları universitetlərdə heç kimdən əskik olmamaları üçün daim addımlar atılır. Bu isə öz növbəsində keyfiyyətli təhsil almağa böyük təsir göstərir. Bundan əlavə yenə də dövlətimizin dəstəyi ilə xaricdə gənclərimizin şəbəkələşməsi üçün hər cür şərait yaradılır. Bu gün gənclərimizin şəbəkələşməsini, diaspor və lobbi fəaliyyətlərinin inkişaf etməsini sürətləndirən ən uğurlu və alternativi olmayan platforma xaricdə təhsil alan azərbaycanlı tələbələri birləşdirən forum olan ASAİF-dir (Azerbaijan Students & Alumni International Forum). ASAİF-in ideyalarının və konkret gördüyü işlərin dövlətimiz, millətimiz, vətənimiz, ümummilli məsələlərimiz üçün böyük əhəmiyyəti var, məhz bunun üçün də ASAİF-in irəli sürdüyü təklif və təşəbbüslərin əksəriyyəti dövlət səviyyəsində dəstəyini tapmaqdadır. ASAİF uzun illərdən bəri fəaliyyət göstərməsinə baxmayaraq son 2 ildə özünün ən aktiv və faydalı dövrünü yaşayıb. Bakıda, Strasburqda, Macarıstanda keçirilən forumlar, Türkiyədə “Hamımız Xocalılıyıq” aksiyası, ABŞ, Böyük Britaniya, Fransa, Çin, Kanada və digər ölkələrdə aktiv fəaliyyət, yeni gənc simaların yetişməsi ASAİF-in əldə etdiyi çox dəyərli uğurlardır. Əlbəttə, bu uğurların əldə olunmasında müstəsna xidmətləri olan ASAİF sədri Orxan Əkbərovun dinamik fəaliyyətini vurğulmaq çox vacibdir, məhz onun aktiv və səmimi fəaliyyəti gənclərimizdə ASAİF-ə qarşı güvən yarada bilib. ASAİF-in təsisçilərindən olan millət vəkilimiz Ceyhun Osmanlı daim təşkilatın inkişafı üçün əlində olan bütün imkanları səfərbər edib və etməkdədir.Dövlət rəsmilərinin, gənclər və idman naziri Azad Rəhimovun digər rəsmilərin ASAİF tədbirlərində iştirakı, həmin tədbirlərə dəstəyi də gənclərimizin qısa zamanda uğurlu fəaliyyət üçün şəbəkələşməsində böyük əhəmiyyətə sahib olub. Bütün bunlar dövlətimizin bu sahəyə olan dəstəyinin göstəricisidir.

- Hazırkı situasiyada Azərbaycan gənclərinin, xaricdəki gənclər təşkilatları və diasporun Azərbaycan həqiqətlərini yayması və ölkəmizi təbliğ etməsi daha çox aktualdır. Xüsusən də bəzi xarici qərəzli media orqanlarının Azərbaycanın müstəqil inkişafı və tərəqqisinə qısqanclıqla yanaşdığı, qərəzli kampaniya apardıqları bir vaxtda. Siz bu məqamla bağlı nə düşünürsünüz?

- Müxtəlif xarici informasiya vasitələrinin Azərbaycana qarşı qərəzli mövqe tutmaları yenilik deyil və biz demək olar ki, buna alışmışıq, heç onlara əhəmiyyət verməyə belə dəyməz. Hər zaman nədənsə xaricinin dediyini, xaricinin özünü, xaricinin əməlini özümüzə üstün tuturuq. Məsələn, hələ də bəzi sektorlarda elə fikirləşirlər ki, xarici işçi “akademikdir”, lakin tam əminliklə deyə bilərəm ki, bizim gənc mütəxəssislər heç kimdən geri qalmır. Türklərin çox yaxşı bir sözü var “özgüvən”, yəni özünə güvənmək. İnsanlarımız özünəgüvənlərini artırmalıdır, digərlərinə deyil, məhz özümüzə güvənməliyik. Ölkəmizin inkişafı bizdən başqa heç kimə lazım deyil və çoxlarına da sərfəli deyil. Bu prizmadan baxsaq, bu gün xarici mediada fürsətcil səs-küy salan azərbaycanlılarımızın atdıqları addımlar heç cür xalq dəstəyi qazana bilməz, heç cür düzgün qəbul edilə bilməz. Əlbəttə, heç kim deyə bilməz ki, ölkəmiz nöqsansız işləyir, heç bir sahədə problem yoxdur. Əksinə, diqqət tələb edən problemlər çoxdur, lakin bu problemlərin həllinə başlanılıb və hər gün inkişaf baş verdiyi danılmazdır. Dövlətin bütün sahələrə diqqəti göz qabağındadır. Xaricdə təhsil alan gənclərimizin fəaliyyəti daim yüksələn xətt üzrə inkişaf etməlidir, yəni hər hansı bir vaxtda, hər hansı bir məsələyə reaksiyadan asılı olmayaraq, biz daim aktiv olmalıyıq, rekaktiv deyil, proaktiv olmalıyıq. Aktivləşməyimiz üçün nələrinsə olmasını gözləməməliyik.

- Azərbaycan gənclərinin, xaricdə təhsil alan azərbaycanlıların, diasporun və tez-tez xarici səfərlərdə, konfranslarda olan gənclərin Azərbaycanla bağlı yalan informasiyaların qarşısını almaqda,Azərbaycanın əleyhinə olan bəzi xarici mediaları və onların zərərli informasiyalarını neytrallaşdırmaqda rolunu necə görürsünüz? Sizin bir qabaqcıl gənc və təşkilat rəhbəri, eyni zamanda tez-tez xarici səfərlərdə olan gənc kimi bu sahədə hansı təklifləriniz, iradlarınız ola bilər?

- Bu suala artıq cavab verdim yuxarıda. Lakin bir daha vurğulamaq istərdim ki, bizim öz yolumuz, gənclərimizin davamlı aktiv fəaliyyəti üçün özümüzün strategiyamız olmalıdır və var. Biz öz mədəni, yüksək intellektə və faktlara, peşəkar yanaşmaya əsaslanan yolumuza davam etməliyik. Nöqtəvari həmlələr deyil, daim hücümda olmalıyıq. Bəzən vurulan zərbələrdən sarsılmamalıyıq, yolumuzdan çəkilməməliyik və hətta bəzən fikrimizi belə yayındırmamalıyıq. Bu yolu davam etdirən və etdirəcək kifayət qədər yeni simalarımız var, onların zəkaları, vətənpərvərlikləri, insani dəyəri yaxın gələcəkdə xaricdə gənclərimizin sürətli hücum taktikasının daha da inkişaf edəcəyinə əminlik yaradır.

İlkin AĞAYEV

Palitra.-2012.-8 iyun.-S.11.