«Dubayda yaşayan insanların böyük əksəriyyəti “Eurovision”u izləyərək paytaxt Bakının gözəlliyinin şahidi oldular»

Samir İmanov: “Son aylar Azərbaycana turist kimi və digər məqsədlərlə gəlmiş insanlar artıq özləri həmkarlarına oraya səfər etməyi tövsiyə edir, Azərbaycanda harada və necə gözəl vaxt keçirmək haqda məsləhətlər verirlər”

Xaricdə fəaliyyət göstərən diaspor təşkilatlarımız müxtəlif istiqamətlərdə həyata keçirdikləri tədbirlərlə ölkəmizin təbliği istiqamətində mühüm addımlar atırlar. Bu gün öz fəallığı ilə seçilən diaspor təşkilatlarımızdan biri Birləşmiş Ərəb Əmirliklərində fəaliyyət göstərən “Azərbaycan” Cəmiyyətidir. Müsahibimiz cəmiyyətin sədri Samir İmanovdur:

- Azərbaycan xalqı öz vətənini çox sevən xalqdır, xüsusən də insan vətənindən kənarda yaşayanda bu hisslər bir qədər də artıq olur. Tədbirlərin keçirilməsi ilə bağlı onu deyərdim ki, fəal təbliğat işləri və keçirilən tədbirlər vasitəsilə Azərbaycan haqqında dünya ictimaiyyətinə məlumat vermək mümkündür. Bu ölkədə cəmiyyətimiz tərəfindən hərtərəfli təbliğati işlər aparılır. Hər il 50-dən artıq yerli nazirlik və komitələrdə rəhbərlərlə görüşlər keçirilərək onlara Prezident İlham Əliyevin rəhbərliyi altında Azərbaycanda gedən inkişaf, bütün sahələrdə əldə edilən uğurlar haqda məlumatlar verilir. Nəzərə alsaq ki, hər göruşdə 10-a yaxın dövlət rəsmisi iştirak edir, bu, il ərzində tərəfimizdən neçə dövlət rəsmisinin şəxsən məlumatlandırılmasının göstəricisidir. Bildiyiniz kimi, Azərbaycanın uğurları, tərəqqisi və Qarabağ problemi ilə bağlı müsahibələrim və məqalələr davamlı olaraq yerli dövlət və qeyri-dövlət qəzetlərində dərc edilir. Bu qəzetləri təkcə BƏƏ deyil, ümumiyyətlə, milyonlarla insan oxuyur. Ən əsası isə odur ki, burada yaşayan həmvətənlərimiz çox vətənpərvər və fəaldırlar. İşlədikləri, təhsil aldıqları yerdə Azərbaycan həqiqətlərini maksimum dərəcədə ətraflarında olan müxtəlif xalqların nümayəndələrinə çatdıraraq ölkəmizi təbliğ edirlər. Bu tədbirlərin və təbliğat fəaliyyətinin daha da güclü və yüksək müstəvidə aparılması üçün cəmiyyətimizin dövlətin hər cür dəstəyinə ehtiyacı var.

- Orada bu gün həm cəmiyyət, həm dövlət səviyyəsində Azərbaycana münasibət necədir?

- Azərbaycana münasibət ümumilikdə yaxşıdır. Qeyd etdiyim kimi, aparılan işlər nəticəsində istər burada yaşayan çoxmillətli cəmiyyətin, istərsə dövlət rəsmilərinin Azərbaycana münasibətini düzgün istiqamətləndirə bilmişik. Dövlət qurumlarında çalışan yerli vətəndaşların Azərbaycana turist qismində gəlmə sayına nəzər salsaq, bunun necə inkişaf etdiyinin şahidi olarsınız. Ümumiyyətlə, çoxsaylı görüşlərdə təbliğat işləri ilə bərabər qarşı tərəfə Azərbaycana səfər edilməsi də təklif edilir və növbəti təkrar görüşlərdə o insanlar Azərbaycanda olduqlarını böyük sevinc hissi ilə qeyd edərək gəzdikləri yerlərin, daddıqları milli təamlarımızın adlarını tam dəqiqliklə deyirlər. Bu cür təbliğat işlərimizlə sevinməyə bilmərik. Son aylar Azərbaycana turist kimi və digər məqsədlərlə gəlmiş insanlar artıq özləri həmkarlarına oraya səfər etməyi tövsiyə edir, Azərbaycanda harada və necə gözəl vaxt keçirmək haqda məsləhətlər verirlər. Tam əminliklə qeyd etmək istəyirəm ki, Dubayın Milli, Dini və Xeyriyyə Nazirliyi ilə etdiyimiz mütəmadi əməkdaşlıq və qurduğumuz isti münasibətlərin nəticəsi olaraq son bir il ərzində Azərbaycanın məcburi qaçqın və köçkünlərinə Dubayda qeydiyyatdan keçmiş cəmiyyətlər tərəfindən bir milyon dollardan artıq yardım edilib. Öncəki illərin rəqəmlərini yoxlasaq, bunun ildə 3 min dollardan artıq olmadığının şahidi olarıq. Cəmiyyətimiz Azərbaycan-BƏƏ əlaqələrinin bütün sahələrdə ugurla inkişaf etməsi sahəsində çoxlu işlər görür. Mən görüşlərdə və tədbirlərdə yerli dövlət rəsmilərinə çoxlu sayda kitablar və broşürlər təqdim edirəm. Bu kitabların çoxu Diasporla İş üzrə Dövlət Komitəsi tərəfindən göndərilib. Xahiş edirəm ki, digər dövlət qurumları da mütəmadi olaraq hazırladıqları ədəbiyyatları cəmiyyətimizə göndərsinlər. Dövlətin dəstəyi olmadan dünya azərbaycanlıları güclü ola bilməz.

- Bakıda təşkil olunan “Eurovision-2012” artıq başa çatıb. Bu musiqi yarışması orada necə qarşılandı?

- Cəmiyyətimiz müsabiqə öncəsi 2 tədbir keçirmişdi, ərəb və ingilis dillərində bu mövzuda 2 səhifədən ibarət illüstrasiyalı məqalələr dərc etdirmişdi. Burada yaşayan əhalinin təxminən 20 faizinin Qərb ölkələrindən olduğunu nəzərə alsaq, müsabiqəyə marağın yüksək olduğunu deyə bilərik. Onların nümayəndələri ilə danışıqlarım zamanı aydın oldu ki, burada yaşayan insanların böyük əksəriyyəti müsabiqəni izləyib, Azərbaycanın və paytaxt Bakının gözəlliyinin şahidi olublar. Müsabiqə öncəsi də qeyd etdiyim kimi, burada yaşayan həmvətənlərimizlə yanaşı yerli ərəblər də müsabiqəni izləmək üçün Azərbaycana səfər etmişdilər.

- Qarşıdan 15 İyun Milli Qurtuluş Günü gəlir. Bununla bağlı indiyədək cəmiyyətiniz tərəfindən hansı tədbirlər təşkil olunub?

- Bildiyiniz kimi, 15 iyun 1997-ci ildən rəsmi bayram kimi qeyd edilir. Bu gün həqiqətən də Azərbaycan xalqı üçün böyük bayramdır. 1993-cü ildə Azərbaycanın düşdüyü ağır vəziyyətdə, dövlətçiliyimizin təhlükə qarşısında qaldığı bir dövrdə ulu öndər Heydər Əliyev xalqın arzusu ilə Bakıya gələrək vətəndaş qarşıdurmasını aradan qaldırmasaydı, müstəqilliyimiz möhkəmlənməz və bu gün əldə edilmiş uğurlar olmazdı. 19 il əvvəl daxili və xarici qüvvələr Azərbaycan dövlətçiliyini məhv etmək, ölkənin ərazi bütövlüyünü parçalamaq, vətəndaş qarşıdurması yaratmaq istəsələr də, ulu öndər Heydər Əliyev xalqa arxalanaraq xarici düşmənlərin və onların daxildəki əlaltılarının planlarını puça çıxardı. Ulu öndərin hakimiyyətə qayıdışından sonra Azərbaycan Respublikasının istər siyasi, istərsə də ictimai, iqtisadi və mədəni həyatında dönüş başlandı, bir-birinin ardınca həyata keçirilən genişmiqyaslı layihələr müstəqil Azərbaycanın inkişafına və möhkəmlənməsinə zəmin yaratdı. Heydər Əliyevin ən böyük nailiyyətlərindən biri də “Azərbaycan” və “azərbaycanlı” sözlərinin əhəmiyyətinin, dəyərinin və mahiyyətinin dünyada artırılması, dünyaya səpələnmiş soydaşlarımızın “azərbaycançılıq” adı altında birləşməsidir. Ulu öndər olduqca mürəkkəb bir dövrdə bir çox siyasi xadimin edə bilmədiyini və edə bilməyəcəyini gerçəkləşdirib, müasir dünyanın ən aktual çağırışlarına cavab vermək bacarığı ilə XX və XXI əsrlərin tanınmış siyasi xadimləri sırasında həmişəlik öz layiqli yerini tutub. Azərbaycan Prezidenti kimi Heydər Əliyevin çoxəsrlik dövlətçiliyimiz tarixində müstəsna yeri var. Heydər Əliyevin fəaliyyəti öz əhəmiyyəti baxımından Azərbaycanın hüdudlarından çox-çox kənarlara çıxır. Müasir dövrdə nəinki Azərbaycanda, hətta bütün postsovet məkanında, eləcə də dünya miqyasında gedən prosesləri Heydər Əliyev şəxsiyyətindən və fəaliyyətindən kənarda təsəvvür etmək mümkün deyildi. Heydər Əliyev zəmanəmizin böyük filosofu və mütəfəkkiri idi. Onun formalaşdırdığı və inkişaf etdirdiyi azərbaycançılıq fəlsəfəsi Azərbaycanın müasir dünyada xüsusi yerini müəyyən edib, milli dövlətçiliyimizin bünövrəsini təşkil edərək dünya azərbaycanlılarının həmrəyliyi üçün möhkəm zəmin yaradıb. Heydər Əliyev eyni zamanda taleyin xalqımıza bəxş etdiyi böyük tarixi şəxsiyyətdir. O, Azərbaycanın tarixi inkişaf prosesinə təkan verib. Müstəqil Azərbaycan dövlətinin qurucusu kimi milli dövlətçiliyimizin ideya əsasını məhz Heydər Əliyev yaradıb. Çox sevindirici haldir ki, bu gün Heydər Əliyevin planlarını və məfkurəsini Prezident İlham Əliyev böyük məharətlə həyata keçirir və nailiyyətlərimiz də göz qarşısındadır. Məhz bütün bunları nəzərə alaraq 15 İyun Qurtuluş Günü kimi nəinki Azərbaycanda, ondan kənarda yaşayan hər bir soydaşımız üçün də çox önəmlidir.

Nigar Abdullayeva

Palitra.-2012.-12 iyun.-S.7.