Balakəndə keçirilən tədbirlərdə milli adət-ənənələr və mədəniyyət təbliğ olunur

Mədəni-maarif müəssisələrində bədii özfəaliyyət kollektivləri üçün musiqi alətləri və geyimlərə, rəqs kollektivləri üçün milli geyimlərə ehtiyac var

Layihə çərçivəsində müsahibimiz Balakən Mədəniyyət və Turizm Şöbəsinin müdiri Ruqiyyət Seyidovadır:

- Rayonda xalq yaradıcılığı və bədii özfəaliyyət sahəsində hansı işlər görülür?

- Şöbənin nəzdində fəaliyyət göstərən 34 klub tipli mədəniyyət müəssisəsində mahnı, rəqs, bədii qiraət, musiqi, dram, Bacarıqlı əllər, Biçmə-tikmə, Gənc təbiətçilər, idman oyunları və s. dərnək və Qanun, Şən və hazırcavablar maraq klubları və A.Şaiq adına Uşaq Kitabxanasında Eko klubları fəaliyyət göstərir. Dərnək və maraq klublarına əsasən uşaq və yeniyetmələr cəlb olunub. Mədəniyyət müəssisələrində Əks-səda, Şimşək, Gənclik, Könül, Xəyal, Ümid, Tamburçalanlar, Ülvi, Balakən, Nihat, Səma xalq çalğı alətləri və instrumental ansamblları, Cahan folklor ansamblı (Qabaqçöl qəsəbə Mədəniyyət Evi), Qızlar (Şambul kənd Mədəniyyət Evi), Şəlalə (İtitala kənd Mədəniyyət Evi), Təbəssüm (Mahamalar kənd Mədəniyyət Evi) rəqs qrupları fəaliyyət göstərir. Rayon Mədəniyyət və Turizm Şöbəsi Mədəniyyət və Turizm Nazirliyi tərəfindən təşkil edilən bütün müsabiqə və festivallarda kollektivlərin, yaradıcı gənclərin və ayrı-ayrı ifaçıların iştirakını təmin edir. Uşaq İncəsənət Məktəbinin xor kollektivi ötən il Şəki şəhərində keçirilən VI Respublika müsabiqəsində iştirak edib. Bundan savayı Bakı şəhərində keçirilən milli azlıqların incəsənəti III Respublika festivalında Qaysa kənd Mədəniyyət Evinin Cahan folklor kollektivi müvəffəqiyyətlə çıxış edərək diplomla təltif olunubXalq kollektivi adına layiq görülüb. İncəsənət məktəbinin Xoreoqrafiya şöbəsinin Şənlik rəqs qrupu II Respublika rəqs festivalında iştirak edərək Mədəniyyət və Turizm Nazirliyinin fəxri fərmanına layiq görülüb. Qaliblər Bakıda Azərbaycan Respublikasının müstəqilliyinin 20 illiyinə həsr edilmiş tədbirdə də iştirak ediblər. Fortepiano şöbəsinin III sinif şagirdi Əhmədova Dünya Vaqif qızı istedadlı uşaqların arasında Pöhrə müsabiqəsinin televiziya layihəsinin qalibi olub. Şəki şəhəri Respublika Atçılıq Turizm Mərkəzində keçirilən və artıq ənənə şəklini almış VI Milli Atüstü Oyunlar Festivalında rayonun komandası da iştirak edir. Maydekabr ayında keçirilən yarışda rayonun komandası Çövkən oyunu üzrə III yerə çıxaraq Mədəniyyət və Turizm Nazirliyinin diplompul mükafatına layiq görülüb. Rayonumuzda 24 millətin nümayəndəsi yaşayır. Keçirilən bütün tədbirlərdə onların milli adət-ənənələri və mədəniyyəti təbliğ olunur. Bunun nəticəsidir ki, şöbənin nəzdində milli azlıqlardan üstünlük təşkil edən avarlara məxsus Cahan folklor ansamblı və Təbəssüm rəqs qrupu, ingiloylara məxsus Şəlalə rəqs qrupu yaradılıb ki, onların tərkibi 60 nəfərə yaxındır. Şöbənin nəzdində olan Əks-səda instrumental ansamblının bədii rəhbəri, rayonun Şambul kənd Mədəniyyət Evində bədii rəhbər işləyən avar xalqının nümayəndəsi Bəxtiyar Kantayev 2008-ci ildə Dağıstanın Əməkdar artisti adına layiq görülüb.

- Gənclərin vətənpərvərlik ruhunda tərbiyəsi ilə bağlı hansı işlərin görülməsi daha məqsədəuyğundur?

- Çox vacib və aktual olan bu məsələ ilə bağlı hər birimiz üzərimizə düşən işi məsuliyyətlə görməliyik. Gənclərimizi vətənpərvərlik ruhunda tərbiyə etməliyik. Onlara milli-mənəvi dəyərlərimizi, qədim və zəngin mədəniyyətimizi çatdırmalıyıq və bunun üçün bütün mümkün vasitələrdən istifadə etmək vacibdir. Mədəniyyət və Turizm Şöbəsi olaraq bizbu istiqamətdə çalışırıq. Rayonumuzda yerləşən N saylı hərbi hissə və 11 sərhəd zastavasını hamiliyə götürmüşük. Tərtib olunmuş qrafikə əsasən mədəni-maarif müəssisələri vaxtaşırı və bayram ərəfəsində sərhəd zastavalarında olaraq onlara maddi və mənəvi yardım göstərir. Belə ki, bayram tədbirləri rayonda yerləşən hərbi hissələrdə geniş şəkildə qeyd edilir, müəssisələrdə keçirilən kütləvi tədbirlərə əsgər və zabitlər dəvət olunur. Şöbəmiz ildə 4 dəfə gənclərin həqiqi hərbi xidmətə çağırışının yüksək səviyyədə təşkilinə nail olur, çağırışçı gənclərin hərbi xidmətə yola salınmasını daim diqqət mərkəzində saxlayır, rəngarəng konsert proqramları təşkil edilir. Əks-səda, Şimşək, Gənclik, Ümid, Ulduz, Sevinc, Nihat və Balakən instrumentalxalq çalğı alətləri ansambllarının çağırışçılar qarşısında çıxışları təmin olunur. Odur ki, həmişə hərbi xidmətə çağrılan gənclər yüksək əhval-ruhiyyə ilə hərbi xidmətə yola salınırlar. Vətənpərvərlik və hərbi-hamilik sahəsində şöbə tərəfindən keçirilən bütün tədbirlərə hərbi komissarlıq, ehtiyatda olan zabitlər və hərbi hissədən nümayəndələr dəvət edilir, mədəniyyət müəssisələri hərbçilərə göstərilən mədəni-xidmət işinə görə hərbi hissənin rəhbərliyi tərəfindən təşəkkür məktubları və fəxri fərmanlar alıb.

- Rayon ərazisində nə qədər tarixi abidə var?

- Rayon ərazisində 100-ə yaxın tarix və mədəniyyət abidələri aşkar edilib, bu abidələrdən 43-ü dövlət qeydiyyatına alınıb və həmin abidələr 4 tarixi abidə mühafizəçiləri arasında bölünüb. Onların rəhbərliyi ilə bütün memarlıq və arxeoloji abidələrə qoruyucu lövhələr vurulub. Dövlət qeydiyyatına alınmış abidələrdən 2-si ölkə əhəmiyyətli memarlıq, 7-si arxeoloji, 23-ü yerli əhəmiyyətli, 11-i momimental xatirə abidələridir. 29 abidə isə dövlət qeydiyyatına alınmayıb. Yeni aşkar olunmuş abidələr və rayonda mövcud olan heykəllər, büstlər, monumental abidələr haqqında məlumat və fotoşəkillər Mədəniyyət və Turizm Nazirliyinin Mədəni irs şöbəsinə, Balakən rayonuna məxsus Azərbaycan Turizm Məlumat Portalı işlənərək nazirliyin Turizm şöbəsinə göndərilib. Bu abidələr içərisində yalnız Minarəli məsciddə nazirlik tərəfindən təmir və bərpa işləri aparılıb, yerdə qalanların təmir və bərpa işlərinin aparılmasına böyük ehtiyac var. Yerli özünüidarə orqanı olan bələdiyyələrlə əməkdaşlıq edir, tədbirlərində yaxından iştirak edirik. Rayon ərazisində yerləşən tarix və mədəniyyət abidələrinə gedən yolların abadlaşdırılmasında və abidə ətrafında təmizlik işlərinin aparılmasında bələdiyyələrin gücündən istifadə edilir.

- Hansı problemləriniz var?

- Problemlərə gəldikdə isə onu deyə bilərəm ki, rayonun mədəni-maarif müəssisələrinin maddi-texniki bazası günün tələblərinə cavab vermir və musiqi alətlərinə, səsgücləndirici aparatlara böyük ehtiyac var. Şöbənin nəzdində olan nəqliyyat vasitələri istifadəyə yararsız olduğundan balansdan çıxarılıb. Odur ki, şöbənin, MKS, rayon Mədəniyyət Evi və muzeylərin normal fəaliyyəti üçün mikroavtobusla təmin olunması yaxşı olardı. Rayonda qəza vəziyyətində olan Gərəkli, Talalar, Meşəşambul, Katex-kombinat, Xalatala kənd mədəniyyət obyektlərinin yenidən tikilməsinə və Kortala, Qaravəli, Hənifə, Qazma, Tü, Qullar, Mahamalar, Yeni Şərif, Şərif, Sarıbulaq kənd mədəniyyət evlərinin əsaslı təmirə ehtiyacı var. Ötən ilin smetası əsasında şöbəmiz tərəfindən rayonun Hənifə kənd Mədəniyyət Evi və kitabxanasında, MKS-də, Tarix-Diyarşünaslıq Muzeyində cari təmir işləri aparılıb. Bunlarla yanaşı Uşaq incəsənət və Qabaqçöl qəsəbə musiqi məktəbləri üçün yeni binaların inşasına böyük ehtiyac var. Klub tipli mədəniyyət müəssisələrinin mərkəzləşdirilmiş qaydada şöbədə maliyyələşdirilməsi, bu müəssisələrin kateqoriyaları və ştat cədvəllərinin yenidən işlənməsi məqsədəuyğundur. Mədəniyyət müəssisələrində geniş islahatların aparılması, yararsız müəssisələrin bağlanması və onların hesabına klub müəssisələrinə əlavə ştatların alınması da yaxşı olardı. Rayonda turizmi inkişaf etdirmək məqsədilə Turizm İnformasiya Mərkəzinin yaradılması, ölkə əhəmiyyətli tarix və mədəniyyət abidələrinin bərpası və təmirinə, tarix və mədəniyyət abidələrinin mühafizəçilərinin sayının artırılmasına ehtiyac var. Balakən-Zaqatala qoruğunun böyük bir hissəsi Balakən ərazisinə düşdüyündən və həmin ərazidə çox sayda abidələrin, təbiət mənzərələrinin və şəlalərin olduğunu və turistlərin bu istiqamətdə marağını nəzərə alaraq Balakən qoruğunun yaradılması üçün Ekologiya və Təbii Sərvətlər Nazirliyi ilə razılığın əldə olunmasına çalışırıq. Mədəni-maarif müəssisələrində bədii özfəaliyyət kollektivləri üçün musiqi alətləri və geyimlər, rəqs kollektivləri üçün milli geyimlər lazımdır. Rayon Mədəniyyət Evi üçün yeni binanın tikilməsi və avadanlıqlarla təchizinə, kənd bələdiyyələri və icra nümayəndəliklərinin balansında olan mədəniyyət müəssisələrinin təmiri və yanacaqla təminatına ehtiyac var. Bütün bunların 2012-ci il ərzində öz müsbət həllini tapacağına böyük ümüd bəsləyirik.

 

Anar Miriyev

Palitra.-2012.-13 mart.- S.11.