«Azərbaycanlıların
soyqırımı: tarixin qanlı salnaməsi»
kitabının təqdimatı keçirilib
Dünən Beynəlxalq Mətbuat
Mərkəzində (BMM) “Azərbaycanlıların soyqırımı:
tarixin qanlı salnaməsi”
kitabının təqdimatı keçirilib.
Ümummilli lider Heydər
Əliyevin xatirəsinə həsr edilən kitabın ideya rəhbəri Prezident
Administrasiyasının rəhbəri, həqiqi dövlət müşaviri, akademik
Ramiz Mehdiyev, redaktoru Prezident Administrasiyasının
İctimai-siyasi məsələlər
şöbəsinin müdiri, tarix elmləri doktoru, professor Əli Həsənov,
buraxılışa məsul Milli Məclisin
deputatı, “Azərbaycan” qəzetinin baş
redaktoru Bəxtiyar Sadıqovdur. Azərbaycan
Dövlət Teleqraf Agentliyinin
(“AzərTAc”) baş direktoru
Aslan Aslanov kitabın əhəmiyyətindən
danışıb.
«Çox
təəssüf ki, biz tariximizin ayrı-ayrı məqamlarını
çox tez unuduruq» Prezident
Administrasiyası İctimai-siyasi məsələlər
şöbəsinin müdiri Əli Həsənov isə
çıxışında xalqlar üçün milli yaddaşın
əhəmiyyətini vurğulayıb: “Çox təəssüf
ki, biz tariximizin ayrı-ayrı məqamlarını çox
tez unuduruq. Bu unutqanlıq da gətirib ona
çıxarır ki, ermənilər təkcə
son 200 illik tarixdə bizim başımıza beş
dəfə – hər biri milli
faciə kimi dünya
tarixinə yazılmalı olan işlər
gətiriblər. Azərbaycanlıların soyqırımı
məsələsi dünya tarixində əks
olunmur, dünya
parlamentlərinin qərarlarına düşməyib,
dünyanın böyük
ensiklopediyalarında əksini tapmayıb. Bunlar
yalnız bizim qəlbimizdədir və qəlbimizi
göynədir. Heç yaddaşımıza
da əməlli-başlı həkk
olunmayıb. Ermənilər olmayan hadisələri
dünyanın bəlli informasiya mərkəzlərinə,
siyasət mərkəzlərinə, ictimai
rəyi formalaşdırma mərkəzlərinə yerləşdirə
biliblər. Amma biz
olanımızı edə bilməmişik. Ona
görə də bu tipli
cəhdləri dəstəkləməliyik”.
«…heç bir ictimai yükü
olmayan kitablar yazmaqdansa, Qarabağın, Naxçıvanın
tarixi ilə əlaqədar, ermənilərin azərbaycanlılara
qarşı törətdiyi soyqırımı barədə
salnamələr yazmaq lazımdır»
Əli
Həsənov çıxışında bildirib ki, bəzən
ulu öndər Heydər Əliyev haqqında kitab yazıb,
sonra da bunu spekulyasiyaya çevirənlər var: «“Bəzən
yanıma gəlib deyirlər ki, Heydər Əliyev, yaxud
İlham Əliyev haqqında kitab yazmışam, amma icazə
vermirsiniz ki, çap etdirək. Bizim
istəyimiz budur ki,
Heydər Əliyev haqqında məhz belə kitablar
yazılsın. Heydər Əliyev haqqında kitab
yazıb, sonra da bunu spekulyasiyaya çevirənlər
var. Bəzən bu
işə çox hörmətli
adamlarımız da qoşulur.
Cildlərlə kitablar
yazırlar və həmin kitablar yalnız
onu yazanın kitabxanasında özünə
yer tapır. Əslində heç
bir ictimai yükü olmayan kitablar yazmaqdansa,
Qarabağın, Naxçıvanın tarixi
ilə əlaqədar, ermənilərin azərbaycanlılara
qarşı törətdiyi soyqırımı barədə
salnamələr yazmaq lazımdır.
Mən məmnuniyyətlə bir
gəncin adını çəkmək istəyirəm, Avropa Azərbaycanlıları Cəmiyyətinin
sədri Tale Heydərovun dəstəyi ilə
salnamələrin Rusiyanın, dünyanın müxtəlif
ölkələrinin arxivlərindən toplanıb Azərbaycanda
dərc olunması əslində Azərbaycanın ümummilli lideri
haqqında əsl kitabdır”.
«Soyqırıma həsr olunmuş
abidə və ya muzey kompleksinin yaradılması məsələsi
müzakirə olunur»
Şöbə
müdiri qeyd edib ki, azərbaycanlıların
soyqırımını xatırladan ümumi abidə və
ya muzey kompleksinin yaradılması təşəbbüsü
var: «Bunlar hazırda Prezident Administrasiyasında öyrənilir,
müvafiq qurumlar tərəfindən dəyərləndirilir».
Ə. Həsənov abidə kompleksi
və ya muzeyin harada, hansı şəkildə olması məsələlərinin
öyrənildiyini və müsabiqə elan
edilməsinin müzakirə olunduğunu bildirib: “Bu məsələlər
gündəmdədir. Lakin hələlik qərar
verilməyib. Düşünürük ki, milli yaddaşın
formalaşdırılması, tarixi keçmiş, bu gün və gələcək arasında əlaqə
yaratmaq, bu
soyqırımı haqqında ictimai fikir formalaşması kontekstində belə bir muzey yaradılması vacibdir”.
Erməniilər arxiv və sənədli materiallarla ifşa olunur
Təqdimat mərasimində çıxış edən Milli Məclisin deputatı, “Azərbaycan” qəzetinin baş redaktoru Bəxtiyar Sadıqov, AMEA Tarix İnstitutunun direktoru, professor Yaqub Mahmudov, millət vəkili Aydın Mirzəzadə və digərləri kitabın əhəmiyyəti, ermənilərin zaman-zaman azərbaycanlılara qarşı tətbiq etdikləri təcavüz və soyqırımı aktları, onların qanlı nəticələri və digər məsələlərdən bəhs ediblər. Həmçinin bildirilib ki, bu kimi kitablar bir neçə dillərə tərcümə olunaraq yayılmalı, həmin əsərlərin elektron versiyaları hazırlanmalıdır. Qeyd edək ki, Azərbaycanlıların soyqırımı haqqında Prezident fərmanının yer aldığı kitabın I cildində ermənilərin Azərbaycana köçürülməsi və məskunlaşması, ermənilərin Osmanlı imperiyasında türklərə qarşı törətdikləri soyqırımı, 1905-1907-ci illər soyqırımları, 1948-1953-cü illərdə azərbaycanlıların Ermənistandan kütləvi deportasiyası, sonuncu deportasiyanın qanlı olayları, ermənilərin Sumqayıt təxribatı, ermənilərin Qarabağ savaşı, onun qanlı salnaməsi, Azərbaycanın işğal olunan ərazilərində ermənilərin qanunsuz fəaliyyəti, Qarabağ münaqişəsi dövründə əsir, girov və itkin düşənlər, 20 Yanvar faciəsi, Xocalı soyqırımı, toponimlər, maddi-mənəvi sərvətlərin dağıdılması, talan edilməsi və digər hadisələr yer alıb. Kitabın II cildində isə əsasən arxiv və sənədli materiallar əks edilib. Bunlar arasında ermənilərin İrandan köçürülüb gətirilməsi haqqında A.S.Qriboyedovun məktubu, Türkmənçay müqaviləsi, Şamaxıda 1918-ci ildə ermənilər tərəfindən qarət edilən və dağıdılan kəndlərin siyahısı, 1948-1953-cü və 1988-1989-cu illərdə Ermənistandan deportasiya edilən azərbaycanlı yaşayış məntəqələrinin siyahısı və digər zəruri materiallar əks edilib. Kitabda dünya ictimaiyyətinin ermənilər haqqındakı fikirləri də yer alıb.
Anar
Palitra.-2012.-30 mart.- S.4.