“Əzizə Mustafazadə ilə Azərbaycanı tanıdım, Bülbüllə sevdim”

Rona Nişliu: “İnsanlarınız pozitivdir, burada hamını sevirəm”

“Azadinform”un suallarını Albaniyanın “Eurovision-2012” təmsilçisi Rona Nişliu cavablandırıb.

- Türk dilində sərbəst danışırsınız. Bu dili necə öyrənmisiniz?

- Mən türk deyiləm. Lakin kiçik yaşlarımdan türk dilini çox sevmişəm və televiziyaya baxaraq öyrənmişəm. Hələ mən kiçik qız olanda türk filmlərinə çox baxırdım və beləcə öyrənməyə başladım.

- Siz Bakıya gələndə ilk məşqdən sonra Azərbaycan mahnısı “Bana-bana gəl”i ifa etdiniz. Bu mahnıya məhəbbətiniz necə yaranıb?

- Sizin ölkəni Əzizə Mustafazadənin sayəsində tanımışam. Musiqinizə məhəbbətim onun sayəsində yarandı. İlk dəfə “Bana-bana gəl” mahnısını onun ifasında eşitdim və çox bəyəndim. Bu mahnı haqqında maraqlandım və bildim ki, qədim Azərbaycan mahnısıdır. Sonra Əzizə Mustafazadənin disklərini aldım, qulaq asıb onun ifasına vuruldum. Bundan sonra isə internetə girib Azərbaycan, onun musiqi mədəniyyəti haqqında informasiya topladım, muğam barədə öyrəndim. Bakıda olduğum müddətdə muğam barədə kitab alıb oxumaq istərdim, çünki musiqidə improvizə üçün bu lazımdır. Qismət elə gətirdi ki, “Eurovision-2012” Azərbaycanda keçirildi və bura gəlməyimə çox şadam. Oxuduqlarım qədər çox gözəl ölkədir, bəyəndim buranı. Əsasən Xəzər dənizinin sahilində gəzməyi, Qız qalasını çox sevdim. Ümumiyyətlə, axşamlar Bakını çox sevirəm. İnsanlarınız pozitivdir, burada hamını sevirəm.

- Başqa hansı Azərbaycan mahnılarını öyrənmək istərdiniz və gələcəkdə hər hansı mahnını albomunuza daxil etmək niyyətiniz varmı?

- Azərbaycan musiqisi haqqında informasiya toplayanda Bülbül haqqında çox oxudum. Onun yaradıcılığı ilə yaxından maraqlandım və disklərini tapıb aldım. Əslində, mən hər müğənninin diskini almıram. Amma Bülbülün bütün diskləri məndə var. Musiqidə vacib olan emosiyaları digərləri ilə bölüşməkdir. Bülbül nadir müğənnilərdən biridir ki, bunu bacarır. Böyük məmnuniyyətlə Azərbaycan mahnılarını oxumaq istərdim. “Bana-bana gəl” mahnısını öz versiyamda oxuyacağam.

- “Bakı Kristal Zalı”na girəndə hansı hissləri keçirdiniz, bu səhnədə ifa etmək sizə hansı əhval-ruhiyyə yaşatdı?

- Gəldiyimiz gün səhər sürücü bizi şəhərin içindən gətirdi və nümayəndə heyətimizin rəhbəri uzaqdan mənə “Bakı Kristal Zalı”nı göstərib: “Sən bax orada oxuyacaqsan” - dedi. Şoka düşdüm və “mən orada səhnəyə çıxacağam?” sualını verdim. Ora qıraqdan məni heyrətləndirdi, çox böyük və işıqlı görünürdü. Sonra zala daxil olanda çaşıb qaldım. Sizi belə bir uğura nail olduğunuza görə təbrik edirəm, bizləri yaxşı mənada təəccübləndirdiniz. Bu sizin dövlətiniz üçün də müsbət imicdir.

- Musiqidən başqa hansı sahə ilə maraqlanırsınız?

- Bir çox ictimai işlə məşğul oluram. Kosovo Gənclərinin Davamlı İnkişaf İnstitutunun rəhbəriyəm. Təkcə öz ölkəmdə deyil, xaricdə də cəmiyyətlə, insanlarla işləməyi sevirəm. Mən hələ tələbəykən bir çox layihədə iştirak edirdim, Kosovoda humanitar konsertlər təşkil edirdim. 2009-cu ildə Vuştridə BMT-nin İnkişaf Proqramı çərçivəsində məktəblilərə könüllülük işinin əhəmiyyəti barədə mühazirə oxumuşam. Autizm xəstəliyindən əziyyət çəkənlərə fəal dəstək göstərənlərdənəm. O cümlədən kasıblar, xəstələr üçün işlər görürdük, yardım edirdik. Onlarla birbaşa ünsiyyətdə olduğuma görə xoşbəxtəm, onlara baş çəkməyi sevirəm. Mən yalnız kiməsə yardım edəndə özümdən razı qalıram. Biz məhz bunun üçün dünyaya gəlmişik, bu, hər birimizin borcudur.

- Sizcə digər iştirakçılardan hansı fərqliliyinizlə yadda qalacaqsınız?

- Çox şadam ki, Albaniyada “Eurovision-2012” üçün milli seçimlər keçirildi və mən qalib gələrək ölkəmi təmsil etmək şansını qazandım. Müsabiqədə ifa etdiyim “Suus” mahnısı da bir növ məşğul olduğum ictimai işlərlə bağlıdır. İlk növbədə mahnım mövzu baxımından fərqlidir, insan həyatının çətin anlarından bəhs edir. “Suus” bir növ həyatda inamlarını itirən insanlara həsr edilib. Lakin onlar bilməlidirlər ki, ancaq inamla bütün çətinliklərin öhdəsindən gəlmək olar. Bu səhnədə hər kəsin bir özünəməxsusluğu var və bilirəm ki, mənim də digərlərindən fərqliliklərim var.

Palitra.-2012.-22 may.-S.15.