“Mən Azərbaycan kinosunu Hollivuda aparacam”

Ramilya Əliyeva: “Eurovision”un ölkəmizdə keçirilməsi Azərbaycanın tanınması, mədəniyyətinin Avropada təbliğ olunması, eyni zamanda turizm infrastrukturunun inkişafı baxımından böyük əhəmiyyətə malikdir”

Layihə çərçivəsində növbəti müsahibimiz Gürcüstanda fəaliyyət göstərən Dialoq və İnkişaf Fondunun prezidenti Ramilya Əliyevadır:

- Gürcüstanda rəsmi göstəricilərə əsasən 400 min nəfər azərbaycanlı yaşayır, qeyri-rəsmi göstəricilərə əsasən isə bu rəqəm yarım milyondan çoxdur. Azərbaycanlılar Gürcüstanın ən böyük sayda olan milli azlıqlar tərkibini təşkil edir. Demokratiyanın əsas özəlliklərindən biri də dövlətdə yaşayan milli azlıqların hüquqlarının tam şəkildə müdafiə olunmasıdır. Gürcüstanda azərbaycanlılarla əlaqəli bir çox layihə və tədbirlər həyata keçirilir. Bu tədbirlər sırasında əlbəttə Gürcüstan dövləti tərəfindən həyata keçirilən tədbirləri də qeyd etmək lazımdır. Bu layihələrin başlandığı ilk gündən Gürcüstan azərbaycanlılarının bir çox sahələrdə inkişaf etməsi diqqəti cəlb edir. Əlbəttə, bu məsələlər öncə Gürcüstanda yaşayan azərbaycanlıların gürcü ictimaiyyətinə inteqrasiyasına ciddi şəkildə yardımçı oldu. Azərbaycan Respublikasının birbaşa dəstəyi ilə Gürcüstanda bir sıra mühüm layihələr həyata keçirildi. Mədəni, sosial sahələrdə də bu gün Gürcüstan azərbaycanlılarının həyatında bir çox dəyişikliklər var. Ötən illərə nisbətən inkişaf açıq-aydın görünür. Azərbaycanın Gürcüstana etdiyi iqtisadi yatırımların da Gürcüstan azərbaycanlılarının sosial rifahının yaxşılaşmasında önəmli yeri oldu. Ulu öndər Heydər Əliyev Bakı-Tbilisi-Ceyhan layihəsinə start verəndə bu kimi layihələrin Gürcüstan azərbaycanlılarının həyatında mühüm rol oynayacağını qeyd etmişdi. Sevindirici haldır ki, bu gün Bakı-Tbilisi-Ceyhan, Bakı-Supsa, Bakı-Axalkalaki-Qars kimi irimiqyaslı layihələr var. Bu gün Gürcüstanın ən iri vergi ödəyən şirkəti Azərbaycan sərmayəsi olan SOCAR Georgia şirkətidir. Gürcüstanda 40-a yaxın Azərbaycan biznes şirkəti fəaliyyət göstərir. Bütün bunlar biz Gürcüstan azərbaycanlılarını çox sevindirir. Nəticədə Gürcüstan azərbaycanlıları bu iki dövlət arasında canlı körpüdür. Əlbəttə həll ediləsi məsələlər, burada yaşayan azərbaycanlılar üçün problemli olan müəyyən sahələr hələ də var. Amma bunların üzərində də iş aparılır. Həyata keçirilən layihələrin bu məsələləri də aradan qaldırılacağına inanırıq.

-Orada yaşayan gənclərin fəaliyyətini necə qiymətləndirirsiniz? Bu gün onların təhsilə marağı, cəmiyyətdə təmsil olunma bacarığı barədə nə deyərdiniz?

-Gənclərimizin son illərdə gürcü cəmiyyətinə inteqrasiya səviyyəsi artıb. Əgər 4-5 il bundan əvvəl gürcü dilini bilən gənclərimiz demək olar ki, yox idisə, bu gün gənclərimiz Gürcüstanın aparıcı ali təhsil ocaqlarında təhsil alırlar. Cəmiyyətdə təmsil olunma bacarığına gəldikdə isə zənnimcə, gənclərimiz hələ gürcü cəmiyyətində yetərincə təmsil olunmurlar. Onların daha fəal olması, gürcü ictimaiyyətində öz layiqli yerlərini tutması önəmli məsələdir. Bu sahədə müxtəlif layihələr reallaşdırılır. Artıq bir çox gənclər təşkilatları mövcuddur və onlar fəal iş görürlər. Onların hər birinə uğurlar arzulayıram. Nəticədə bizim hər birimizin amalı eynidir.

- Sizin rəhbərlik etdiyiniz Dialoq və İnkişaf Fondu hansı zərurətdən yarandı? Digər bir qurum olan Gənc Jurnalistlər Şəbəkəsinin fəaliyyəti ilə bağlı nə deyərdiniz?

- Dialoq və İnkişaf Fondunun qarşısında çox böyük məsuliyyət durur. İnanıram ki, bu qurum tək Gürcüstanda yaşayan Azərbaycan türkləri üçün deyil, Azərbaycan və ümumilikdə türk dünyası üçün gərəkli və faydalı fəaliyyətə dəfələrlə imza atmağı bacaracaq. Bir neçə layihəmizi artıq həyata keçirmişik, bu əsasən Azərbaycanın tanıtımı, mədəniyyəti ilə əlaqəli layihələr olub. Gürcüstanın Ədliyyə Nazirliyi ilə 3 layihəni həyata keçirməyə başlayacağıq. İnkişafa aparan yol dialoqdan keçir. Fərqli və lazımlı işlər görməliyik. Görüləsi işlər isə hələ çoxdur. Gənc Jurnalistlər Şəbəkəsinin əsas yaranma səbəbi, gürcüdilli mediada azərbaycanlıların məsələlərinin gündəmə gətirilməsi, gürcü jurnalistlərinin Gürcüstanda azərbaycanlıların sıx yaşadıqları bölgələrdən reportajların hazırlanması, eləcə də Gürcüstanda gənc azərbaycandilli jurnalistlərin yetişdirilməsi idi. Düşünürəm ki, təşkilat öz öhdəsinə götürdüyü cavabdehliyi yerinə yetirə bildi. 2009-cu ildə Gürcüstanın Bolnisi rayonunun Faxralı kəndində (hazırda Talaveri adlanır) qədim məscidin restavrasiyası ilə əlaqəli problemlər yaranmışdı. Bir qrup radikal gürcü provoslav birləşmələri restavrasiyaya zidd gedirdilər. O zaman jurnalistlər şəbəkəsi olaraq məsələnin mediada işıqlandırılması, gürcü və Avropa mediasının diqqətinin bu məsələyə yönəlməsini tam üzərimizə götürmüşdük. Bu gün Faxralı məscidində kəndin əhalisi rahat, bir problem olmadan ibadət edə bilirsə, deməli, missiyamızı az da olsa yerinə yetirmişik.

- Gürcüstan azərbaycanlıları haqda yazdığınız kitabla bağlı fikirlərinizi bilmək istərdik...

- Gürcüstan azərbaycanlıları haqqında yazmağa başladığım kitaba gəldikdə isə bu kitabın sovet hakimiyyətinin dağılmasından bu günə qədər olan xronoloğiyanı əks etdirəcəyini deyə bilərəm. O dövrdə olan məsələlər, Zviad Qamsaxurdia dövründə xalqımızda yaranan psixoloji stresler, 90-cı illədə boş qalan kəndlərimiz, dəyişilən toponimlərimiz, o dövrdən bu günə kimi yaranan təşkilatlarımız və onların fəaliyyəti yer alacaq. Ayrılıqda bu dövr ərzində Gürüstanda yaşayan xalqımız üçün önəmli, mühüm rol oynamış şəxsiyyətlərə də yer verəcəyimi düşünürəm. Gürcüstanda yaşayan bizlərə, Borçalı türklərinin tarixinə gəldikdə isə hörmətli professorumuz Kərəm Buntürkün çox gözəl araşdırmaları, məqalələri, kitabları var. Şəxsən mən də onlardan tez-tez bəhrələnirəm. Tariximizi, əzəlimizi bilməliyik ki, bu gündən sonra olacaq tarixi yaza bilək.

- Sizin eyni zamanda rejissor fəaliyyətiniz də var. Bununla bağlı nə deyərdiniz?

- Qısaca desəm, mən Azərbaycan kinosunu Hollivuda aparacam. Bəlkə də bu kimin üçünsə utopiya kimi səslənə bilər. Amma bütün reallıqlar təfəkkürümüzdə yaranan utopiyalardan bəhrələnir. Rejissorluq mənim üçün ən sevdiyim hobbimdir. Bir sənədli filmim “Unudulmuş Miras” Bakıda Gənc Rejissorların Beynəlxalq Kino Festivalında 2010-cu ildə araşdırma sahəsində birinci yerə layiq görüldü, sonra Borçalı türklərinin layiqli övladı olan Aşıq Əmrah haqqında bir sənədli film çəkdim. Hazırda isə Axıska türklərinə aid olan bir filmin çəkilişlərinə başlamaq üzrəyik. Həyatda hər şey istəklərdən başlayır. Bütün dünyada yaşayan xalqımın bir yumruq kimi birləşəcəyini, dünyanın aparıcı qüvvəsi olmasını istəyirəm. İnanıram, bu belə də olacaq. Azərbaycanın inkişafı, rifahı isə hər birimiz üçün ən önəmli məsələlərdəndir. Harada yaşamağımızdan aslı olmayaraq hər bir azərbaycanlı üçün and yeri məhz Azərbaycandır.

- Bakıda keçiriləcək “Eurovision”a münasibətiniz necədir?

- Ötən il Gürcüstanda Azərbaycanın “Eurovision” mahnı yarışmasında qalib gəlməsini böyuk sevinclə qarşıladıq. İlk yarımfinalı Moskvada izlədim. Rusiyada yaşayan soydaşlarımızın sevincini görüb, sonra qalibiyyəti Gürcüstanda soydaşlarımızla qeyd etmək çox fərəhli oldu. Bu yarışma Azərbaycan üçün önəmli idi. “Eurovision”un ölkəmizdə keçirilməsi Azərbaycanın tanınması, mədəniyyətinin Avropada təbliğ olunması, eyni zamanda turizm infrastrukturunun inkişafı baxımından böyük əhəmiyyətə malikdir. Azərbaycana qalibiyyət, Azərbaycan bayrağına ucalıqda olmaq yaraşır. Gürcüstanda yarışmaya xüsusi hazırlaşırıq. Yarışmanın finalını məhz Gürcüstandan izləyəcəyik və canımız Azərbaycana dəstək olacagıq.

Nigar Abdullayeva

Palitra.-2012.-2 may.-S.12.