Pakistanın “Liberty” jurnalı: «Olimpiya Oyunlarının Azərbaycanda keçirilməsi təşəbbüsü hökumət və xalq tərəfindən dəstəklənir»

Pakistanın nüfuzlu “Liberty” jurnalında tanınmış alim, şair və publisist, professor Casim Takinin müəllifi olduğu “Mehriban Əliyeva və 2020-ci il Olimpiya Oyunları” sərlövhəli məqalə dərc edilib.AzərTAc xəbər verir ki, məqalədə Moskvada keçirilmiş Milli Olimpiya Komitələri Assosiasiyasının XVIII Baş Assambleyasında 2020-ci il Olimpiya Oyunlarının Bakıda təşkil olunması üçün Azərbaycanın öz namizədliyini irəli sürdüyünü qeyd edən müəllif ölkənin birinci xanımı Mehriban Əliyevanın namizədliyinin irəli sürülməsində və hazırlıq-təbliğat işlərinin aparılmasında böyük rol oynadığını vurğulayıb. Müəllif yazır ki, tədbirdə Azərbaycanın birinci xanımı Mehriban Əliyeva bu mövzuda danışarkən 2020-ci il Olimpiya Oyunlarının Azərbaycanda keçirilməsi təşəbbüsünün hökumət və xalq tərəfindən dəstəkləndiyini qeyd edib. Heydər Əliyev Fondunun prezidenti Mehriban xanım Əliyeva qeyd edib ki, qədim tarixi irsə malik olan Bakı Şərqin və Qərbin qovuşduğu məkanda yerləşir: «Olimpiya Oyunlarında Azərbaycanın bir müstəqil ölkə kimi nisbətən yaxın zamanlardan bəri iştirak etdiyinə baxmayaraq, biz idman infrastrukturunun inkişafına böyük investisiyalar qoyuruq. Biz doğrudan da Olimpiya Oyunlarını ölkəmizdə keçirmək əzmindəyik və bu işə siyasi və maddi dəstək verməyə hazırıq». Professor C.Taki Mehriban Əliyevanın dünyanın birinci xanımları sırasında ən yüksək pillələrdən birini tutduğunu vurğulayaraq onun təşəbbüsünün uğur qazanacağına inandığını bildirib. Məqalədə, həmçinin Mehriban xanım Əliyevanın rəhbərlik etdiyi Heydər Əliyev Fondunun Azərbaycanda və xaricdə həyata keçirdiyi genişmiqyaslı humanitar və sosial layihələr barədə ətraflı məlumat verilib. Müəllif yazır ki, Azərbaycanın birinci xanımı Mehriban Əliyeva xeyriyyəçilik fəaliyyətinə, dünya mədəniyyəti irsinin qorunub saxlanmasına görə UNESCO-nun xoşməramlı səfiri seçilmiş, bir neçə inkişaf etmiş ölkənin medal və ordenləri ilə təltif olunub. C.Taki məqaləsinin sonunda Mehriban xanım Əliyevaya həsr etdiyi şeirini yerləşdirib

Palitra.-2012.-9 may.-S.3.