“Regionlarda
həyata keçirilən infrastruktur layihələri
səmərəli nəticələr verməkdədir”
Allahyar Muradov: “2020-ci ilə qədər
Azərbaycan iqtisadiyyatının neft və qaz sektorundan
asılılığı aradan qaldırılacaq və yeni
keyfiyyət dəyişikliklərinə əsaslanan bilik
iqtisadiyyatının formalaşmasına nail olunacaq”
Son
illər iqtisadiyyatın sürətli inkişafı Azərbaycanda
həyata keçirilən müasir inkişaf
strategiyasının təkzibolunmaz faktıdır. Bütün
sahələrdə olduğu kimi, iqtisadiyyat sahəsində də
dinamik inkişaf yolunu tutan ölkəmiz bu istiqamətdə
davamlı tədbirlər həyata keçirir. Müsahibimiz
AMEA İqtisadiyyat İnstitutu, elmi işlər üzrə
direktor müavini, iqtisad üzrə fəlsəfə doktoru,
dosent Allahyar Muradovdur:
- Son zamanlar ölkə
iqtisadiyyatının inkişafını necə qiymətləndirirsiniz?
- Sözsüz ki, son illərdə Azərbaycan iqtisadiyyatında sürətli inkişaf baş verir. Həyata keçirilən sosial-iqtisadi islahatlar ölkənin yaxın gələcəkdə perspektiv inkişafına geniş imkanlar yaradıb. Belə ki, hazırda ölkənin bütün regionlarında həyata keçirilən infrastruktur layihələri səmərəli nəticələr verməkdədir. Ümumiyyətlə, Azərbaycanda gedən inkişaf prosesi özünü bir çox makroiqtisadi göstəricilərdə göstərir. Bunlara ÜDM-nin artımını, əhalinin gəlirlərini, sənaye məhsullarının istehsalını, qeyd etdiyim kimi, infrastruktur sahələrinin yenidən qurulmasını, məşğulluğun təmin edilməsini, əhaliyə göstərilən kommunal xidmətlərin yaxşılaşdırılmasını, sosial müdafiə sisteminin gücləndirilməsini, ölkə iqtisadiyyatına investisiya qoyuluşunu və s. aid etmək olar. Bunlar arasında iqtisadi və sosial tərəqqinin əsas göstəricisi kimi Ümumi Daxili Məhsul istehsalı çıxış edir. Qeyd edim ki, 2011-ci ildə ÜDM istehsalı 50,1 milyard manata çatıb, adambaşına düşən həcm 5530,6 manat (7003,4 ABŞ dolları) olub. Sevindirici haldır ki, qeyri-neft sektorunda ÜDM istehsalı 9,4 faiz artıb, neft sektorunda isə 9,3 faiz azalıb. Bu o deməkdir ki, Azərbaycan iqtisadiyyatının neftdən asılılığı tədricən azalır. Hesab edirəm ki, 2020-ci ilə qədər Azərbaycan iqtisadiyyatının neft və qaz sektorundan asılılığı aradan qaldırılacaq və yeni keyfiyyət dəyişikliklərinə əsaslanan bilik iqtisadiyyatının formalaşmasına nail olunacaq.Son illərdə əhali gəlirlərində də dinamik artım müşahidə edilir. Belə ki, 2011-ci ildə əhalinin gəlirləri 19,6 faiz artaraq 30,6 milyard manata, hər nəfərə düşən məbləği isə 18,1 faiz çoxalaraq 3383,8 manata çatıb. Bu dövrdə əməkhaqqında da artım olub. 2011-ci ildə də əməkhaqları təqribən 8,3 faiz artaraq 356,6 manata çatıb. Bu artımlar ölkə əhalisinin sosial vəziyyətinin getdikcə yaxşılaşmasına və yoxsulluğun azaldılmasına öz təsirini göstərib. 2010-cu illə müqayisədə 2011-ci ildə yoxsulluq səviyyəsi 1,5 faiz bəndi azalaraq 7,6 faizə enib. Ümumilikdə son səkkiz ildə yoxsul əhalinin sayı 5,2 dəfə azalıb. Ölkə başçısının sərəncamına əsasən, minimum aylıq əməkhaqqının məbləği 2011-ci il dekabrın 1-dən 10 faiz artırılaraq 93,5 manat müəyyənləşdirilib. 2011-ci ildə dövlət büdcəsindən maliyyələşən təhsil, səhiyyə, mədəniyyət, gənclər və idman, elm və bir sıra digər sahələrdə əməkhaqqı artırılıb, qaçqın və məcburi köçkünlərin sosial vəziyyəti yaxşılaşdırılıb. Bu fakt deməyə əsas verir ki, ölkəmizin iqtisadi imkanları artdıqca sosial müdafiəyə ehtiyacı olan insanlara daha diqqətlə yanaşılır, həmin insanların sosial tələbatının ödənilməsi bir növ cəmiyyətin mənəvi göstəricisinə çevrilir. 2011-ci ildə 94 min yeni iş yeri açılıb ki, onun da 73 mini daimi iş yeridir. Bütövlükdə 2003-2011-ci illərdə 1 milyondan artıq iş yeri açılıb. Son 10 ildə ölkənin sosial-iqtisadi həyatında mühüm əhəmiyyətə malik olan yüzlərlə yeni tikili və obyektlər istifadəyə verilib. Statistika Komitəsinin məlumatlarına istinadən deyə bilərik ki, təkcə 2011-ci ildə ölkədə 15 sənaye müəssisəsi, ümumi sahəsi 1,9 milyon kvadratmetr olan yaşayış evləri, 12,6 min şagirdlik ümumtəhsil məktəbi, 310 yerlik məktəbəqədər uşaq müəssisəsi, 11 səhiyyə müəssisəsi (xəstəxana, ambulatoriya, poliklinika, diaqnostika və tibb mərkəzləri) əhalinin istifadəsinə verilib.
- Kənd təsərrüfatındakı
vəziyyətlə bağlı nə deyə bilərsiniz?
- Son
illərdə kənd təsərrüfatı məhsullarının
istehsalında da artım müşahidə edilib. 2011-ci ildə
kənd məhsullarının istehsalı 2010-cu ilə nisbətən
5,8 faiz, o cümlədən bitkiçilik məhsulları 8
faiz, heyvandarlıq məhsulları isə 3,5 faiz artıb. Kənd
təsərrüfatı məhsullarının
istehsalçılarını stimullaşdırmaq məqsədilə
dövlət büdcəsi tərəfindən ümumilikdə
aqrar sahəyə bir neçə istiqamətdə subsidiyalar
ayrılmaqdadır. Belə ki, Prezidentin 23 yanvar 2007-ci il tarixli
“Kənd təsərrüfatı məhsulları istehsalçılarına
dövlət dəstəyi haqqında” sərəncamına
uyğun olaraq
istehsalçılara hər hektar əkin sahəsinin və
çoxillik əkmələrin (növündən
asılı olmayaraq) becərilməsində sərf olunan
yanacaq və motor yağlarına görə 40 manat, habelə
hər hektar buğda və çəltik səpininə
görə dövlət büdcəsinin vəsaiti hesabına
əlavə olaraq 40 manat məbləğində
yardımın verilməsi 2007-ci ildən başlayaraq indiyədək
davam etdirilir. Ümumilikdə 2007-2010-cu illər ərzində
kənd təsərrüfatı məhsullarının
istehsalçılarına əkin sahəsinin və
çoxillik əkmələrin becərilməsində sərf
olunan yanacaq və motor yağlarına, habelə buğda və
çəltik səpininə görə dövlət büdcəsinin
vəsaiti hesabına 307,5 milyon manat məbləğində
subsidiya verilib. Lakin kənd təsərrüfatının
inkişafı ilə bağlı problemlər də var.
Hazırda texnikanın çatışmazlığı
(xüsusilə taxıl məhsullarının biçini
dövründə), yeni texnologiyalardan istifadə səviyyəsinin
aşağı olması, torpağa və məhsullara
aqrotexniki qulluğun zəif olması halları var ki, bu da kənd
təsərrüfatında məhsuldarlığın
aşağı düşməsinə, məhsul itkisinə səbəb
olur. Bu sahədə daha çox işlərin görülməsinə
ehtiyac var.
- Ölkəmizin beynəlxalq ticari
iqtisadi əlaqələri ilə bağlı nə deyə
bilərsiniz?
- Azərbaycan
beynəlxalq ticari əlaqələr sahəsində də
sürətlə irəliləyir. Təkcə 2011-ci ildə
Azərbaycanın hüquqi və fiziki şəxsləri
dünyanın 150-yə yaxın ölkəsində tərəfdaşları
ilə ticarət əməliyyatları aparıb. Bunun nəticəsi
olaraq 2011-ci ildə xarici ticarət dövriyyəsinin həcmi
33,2 milyard ABŞ dollarına çatıb. Düzdür, neft
və qaz ixracı hesabına ixrac idxalı 2,9 dəfə
üstələyib. Hazırda Azərbaycan bir sıra beynəlxalq
layihələrdə iştirak edir. Bu layihələrdən
Bakı-Tbilisi-Ceyhan (BTC), Bakı-Tbilisi-Ərzurum (BTƏ),
“Nabukko”, Bakı-Tbilisi-Qars (BTQ) və s. layihələrin
adlarını çəkmək olar. Bilirsiniz ki, artıq BTC
və BTƏ öz iqtisadi bəhrəsini verməkdədir.
Digər layihələr də Azərbaycanın dünya
ölkələri arasında mövqeyini möhkəmləndirir.
- Ölkə iqtisadiyyatının
inkişafı investisiyaların artımına nail olmağa
imkan verirmi?
- Yaradılımış əlverişli
investisiya mühiti 2011-ci ildə ölkə iqtisadiyyatına
yatırılan investisiyaların artımını təmin
edib. 13 milyard dollar daxili və 7 milyard dollar xarici olmaqla ölkə iqtisadiyyatına
20 milyard dollar investisiya
yatırılıb. İnvestisiyaların
15,7 milyard dolları qeyri-neft sektorunun, 4,3 milyard dolları isə neft sektorunun
payına düşüb.
Dövlət əsaslı
vəsait qoyuluşu hesabına ötən il nəqliyyat, İKT, turizm, kommunal, irriqasiya, energetika, ekologiya və digər sahələrin inkişafına 5,9 milyard,
o cümlədən sosialyönümlü
layihələrə 1,7 milyard
manat investisiya qoyulub. 2005-2010-cu illərdə
iqtisadiyyata kredit qoyuluşlarının həcmi
6,5 dəfə artaraq
1440,9 milyon manatdan
9163,4 milyon manata çatıb. Onu da qeyd edək
ki, bu dövrdə
qısamüddətli kreditlərin
həcmi 2,8 dəfə,
uzunmüddətli kreditlərin
həcmi 12,5 dəfə
artıb. Əgər
2005-ci ildə iqtisadiyyata
qoyulan kreditlərin
63,4%-ni qısamüddətli
kreditlər təşkil
edirdisə, 2010-cu ildə
bu, 28%-ə düşüb,
uzunmüddətli kreditlərin
xüsusi çəkisi
isə 36,6%-dən
72%-ə yüksəlib. Aparılan islahatlar nəticəsində
əhalinin banklara olan inamı artıb və əhali əmanətlərinin
cəlb olunmasında xeyli irəliləyiş olub. 2010-cu il tarixinə əhalinin banklardakı əmanətləri
3 mlrd. manat təşkil edir ki, bu da
2005-ci illə müqayisədə
6,1 dəfə çoxdur.
Cəlb olunmuş əmanətlərin 46,5%-i
milli valyuta ilə, 53,5%-i xarici valyuta ilə olub. Təhlil göstərir ki, respublikamızda əhalidən cəlb olunmuş əmanətlərin
ÜDM-də xüsusi
çəkisi 7%-ə çatsa
da, bu, inkişaf
etmiş dövlətlərdəki
müvafiq göstəricidən
(20-50%) xeyli
aşağıdır.2012-2013-cü illərdə
ölkənin mühüm
infrastruktur obyektlərinin,
o cümlədən beynəlxalq
magistral və daxili əhəmiyyətli
yolların yenidən qurulması, içməli
su və suvarma sistemlərinin bərpası və genişləndirilməsi, regionların
qazla təminatı, kanalizasiya sistemlərinin bərpası üzrə investisiyaların həyata
keçirilməsi nəzərdə
tutulur. Dövlət əsaslı vəsait qoyuluşu xərclərinin
strukturunu təkmilləşdirmək,
həmin vəsaitdən
səmərəli istifadəyə
nəzarəti gücləndirmək,
dövlət zəmanəti
ilə iqtisadiyyata cəlb olunan, habelə dövlət büdcəsində dövlət
investisiya xərclərini
nəzərdə tutulan
istiqamətlər üzrə
düzgün yönəltmək
qarşıdakı il
üçün prioritet
məqsədlər sırasındadır.
Proqnozlara görə,
2012-ci ildə ölkə
iqtisadiyyatına 13,5 mlrd.
manat məbləğində
investisiya yönəldiləcək.
Bunun 70,3%-ni daxili investisiyalar, 29,7%-ni isə xarici
investisiyaların təşkil
edəcəyi gözlənilir.
Cəlb edilən investisiyaların 68,4%-nin qeyri-neft sektoruna yönəldilməsi proqnozlaşdırılır.
Azərbaycan iqtisadiyyatının
yeni inkişaf mərhələsində gəldikdə,
hesab edirik ki, bu gün
Azərbaycanda əsas
prioritet məsələ
iqtisadiyyatın rəqabət
qabiliyyətinin yüksəldilməsi
olmalıdır. Rəqabət
qabiliyyətinin yüksəldilməsinin
ilk və ən zəruri amili elmin və təhsilin
inkişaf etdirilməsidir.
Bununla paralel olaraq elm tutumlu sənaye sahələrinin
də inkişafı labüddür. Hazırda Azərbaycanın bu istiqamətdə uğurlu
addımlar atması üçün real imkanlar
var.
Nigar
Palitra.-2012.-9 may.-S.7.