“Eurovision”un Azərbaycan üçün əhəmiyyəti böyükdür

Saleh Bağırov: “Müsabiqəyə hazırlıq yüksək səviyyədə təşkil olunub”

Bildiyimiz kimi, bu il “Eurovision” paytaxt Bakıda keçiriləcək. İstər Bakı sakinləri, istərsə də müsabiqəni izləməyə gələn əcnəbi qonaqlar həmin günləri həyəcanla gözləyir. Müsabiqənin Azərbaycan üçün necə əhəmiyyətli olması danılmaz faktdır. Avropadan uzaqda - Qafqazda yerləşən və ərazisinin 20 faizini itirən Azərbaycan üçün bu müsabiqə özünü təsdiqləmək baxımından böyük bir şansdır. Avropalılar işğala məruz qalan, müharibə şəraitində yaşayan, lakin böyük bir əzmlə mövcudluğunu sürdürən bu ölkəni yaxından tanıyaraq onun həqiqətlərini öz gözləri ilə görməlidirlər. İndi cəmiyyətdə bu müsabiqə ətrafında mübahisəli fikirlər yürüdülür. Hətta Azərbaycanın xaricində bu müsabiqəni boykot etmək üçün “dəridən-qabıqdan çıxan” azərbaycanlıları görəndə onların bu xalqa mənsub olmasını şübhə ilə qarşılayıram. Axı bu müsabiqənin nəyi pisdir? Bu günə qədər Azərbaycan haqqında çox az sayda ölkə məlumatlıdırsa, bu gün Eldar və Nigar dueti sayəsində bütün Avropanın diqqəti bizə yönəlib. Ölkə daxilində də bəzi müxalif qüvvələr bu nüfuzlu yarışmanı kölgələmyə cəhd edirlər. Hətta artıq turistlərin ölkəyə cəm olduğu bir vaxtda Azərbaycanın siyasi imicini sarsıtmaq üçün müxtəlif gülünc aksiyalar keçirməyə cəhd edirlər. Gülünc deyirəm, çünki həqiqətən istər Bakı sakinləri, istərsə də xaricilər bu cür aksiyalara və onların iştirakçılarına sadəcə gülümsəyirlər. Və düşünürəm ki, yüzlərlə insanın gecə-gündüz çalışması sayəsində əldə edilən qalibiyyətimizə özümüzünkülər niyə belə aqressiv yanaşır?

Azərbaycan teleməkanında “Eurovision” Mahnı Müsabiqəsi ilk dəfə 2006-cı ildə yayımlanıb. İctimai Televiziya və Radio Yayımları Şirkətinin efir fəaliyyətinin bir ili tamam olmamış onlar bu müsabiqənin yayımçısı hüququnu aldılar. Həmin ərəfədə xatırladığım bir məqamı xüsusi qeyd etmək istəyirəm. Hər kəs bu müsabiqədə Ermənistanın iştirak etməsini, bizim isə kənarda qalmağımızı tənqid edirdi. Hətta bəziləri bu yarışmaya ölkəmizin qatılmamasında dövləti günahlandırırdılar. Məhz bu fikirlərə aydınlıq gətirmək üçün müsabiqə tarixinə və ona qatılma şərtlərinə aydınlıq gətirim. Qeyd edək ki, ilk baxışda qeyri-real olan bu layihə Avropa Yayımları İttifaqı ilə qurulan sıx əlaqələr nəticəsində reallaşdı. Həm də heç bir ili tamam olmayan teleşirkətin buna nail olması sözügedən qurumun fəaliyyəti ərzində ilk istisna hal idi. Çox keçmədən İctimai Televiziya həmin qurumun üzvünə çevrildi. Qeyd edək ki, bundan əvvəl ittifaqa üzv seçilən televiziyaların ən azı bir ili tamam olmalı idi.. Qeyd edək ki, 2008-ci ildə müsabiqəyə ölkəmiz “Day after day” adlı kompozisiya ilə qatıldı. Yenə də bir çoxları Azərbaycanın bu ilk addımını dəyərləndirmədi. Əslində bu müsabiqəyə illərlə qatılan və heç onluğa belə düşməyən ölkələr olduğu halda Azərbaycan bu onluqda qərarlaşdı. Növbəti ildə isə Aysel və Araş cütlüyünün uğurlu ifası bizi Avropada üçüncü etdi. Müsabiqəyə qatıldığı dördüncü ildə isə Azərbaycan Eldar və Nigar sayəsində qalib oldu. Və budur, bir həftə sonra bu möhtəşəm müsabiqə ölkəmizdə keçiriləcək. Müsabiqənin Azərbaycanda keçirilməsi Azərbaycanın dünyada tanınmasına bərabərdir. Çünki bu müsabiqə yalnız Avropada deyil, həmçinin iştirakçı olmayan Avstraliyada, Kanadada, Misirdə, Honqkonqda, Hindistanda, İordaniyada, Koreyada, Yeni Zellandiyada və ABŞ-da yayımlanır.

İçərişəhərdə günün ayrı-ayrı hissələrində “Eurovision” fanları gəzintilər keçirir

Etiraf etməliyik ki, ölkəmiz indiyə qədər müxtəlif idman və ya musiqi yarışmalarında təmsil olunsa da, ilk dəfədir ki, belə mötəbər müsabiqəyə ev sahibliyi edir. Bu müsabiqəyə dövlətin külli miqdarda vəsait xərclədiyini qeyd edən yazıları oxuduqda isə insanların primitiv düşüncələrinə təəccüblənirəm. Aydın məsələdir ki, təbliğat üçün pul xərclənməlidir. Hətta ölkəmizin turizm sektoru bu müsabiqə sayəsində qoyulan puldan dəfələrlə çox qazanacaq. İllərlə turist üzü görməyən otellərimizin “bəxti açılacaq”. Əcnəbilərə xaricdə erməni milli mətbəx nümunələri olaraq tanıdılan milli təamlarımız, mineral sularımız, nəhayət ki, bizə aid olduqlarını Bakıda “sübut edəcəklər”. Əcnəbi Şəki kimi qədim bir məkanı gəlib Azərbaycanda görəcək, İçərişəhərdə gəzib xalqımızın tarixi haqqında məlumat alacaq. Və ən nəhayət, Qarabağ həqiqətlərini öz gözləri ilə görəcək. İndi şəhərimizə turistlərin olduqca güclü bir axını var. Xüsusilə İçərişəhərdə günün ayrı-ayrı hissələrində “Eurovision” fanları gəzintilər keçirir. Turistlər burdan alış-veriş edirlər. Otellərlə yanaşı restoran və kafelərin də işində aktivlik yaranıb. Hətta yaşadığım Sahil qəsəbəsinin dənizkənarı restoranlarına xaricilərin hər gün gəlişinin şahidi oluram. Hətta bir nəfər ticarətçi deyirdi ki, Binədə ölkəmizlə bağlı olan aksessuarların satışından təkcə bir gündə 1600 manat gəlir əldə edib. Göründüyü kimi, müsabiqə sadə vətəndaşlar üçün də real gəlir mənbəyi yaradıb. Müsabiqə Bakı sakinlərinin əhval-ruhiyyəsinə də təsir göstərib. Şəhərdə hamı bayram əhval-ruhiyyəsindədir. Hamı turistlərə qarşı qonaqpərvərlik nümayiş etdirir, onlarla münasibət saxlamağa çalışır, ölkəmiz haqqında onlarda xoş təəssüratlar yaratmağa səy göstərirlər.

“Bu müsabiqənin bizim ölkəmizin incəsənəti və mədəniyyətinin təbliği üçün əhəmiyyəti böyükdür”

Müsabiqənin Azərbaycan üçün nə kimi önəm daşıması ilə bağlı ilk olaraq “Palitra”ya uzun müddət Rusiyada yaşayan həmyerlimiz, bəstəkar Sevinc Tofiqqızı danışdı: “Əvvəllər bütün dövlətlər bu müsabiqədə iştirak edirdi. Bir Azərbaycanın belə bir mötəbər yarışmada adı hallanmırdı. Bilirsiniz ki, orda ilk mahnımız həmkarım Gövhər Həsənzadəyə aid olub. Artıq onda biz tanınmağa başladıq. Sonra Aysel və Araşla üçüncülük əldə etdik. Bunun nəyi pisdir axı? Mən uzun müddət Moskvada olmuşam və hara gedirdimsə, ancaq ermənilər haqqında danışırdılar. Azərbaycan haqqında onların məlumatları az idi. İndi isə bizim musiqimiz bütün dünyada tanındı. Bizim mahnılarımız muğam üzərində qurulur. Muğamımız bir vaxtlar laqeydlik ucbatından kənarda qalmışdı. Sağ olsun Mehriban xanım ki, muğama belə önəm verdi. İlk dəfə biz muğamı Avropa səhnəsinə daşıdıq. Bu, dövlət qayğısının sayəsində oldu. İndi adi rus mahnılarında belə mən balaban ifasının, muğam elementlərinin səslənməsinin şahidi oluram. Bu artıq bzim üçün olduqca müsbət bir haldır. Bizim musiqidən artıq digər xalqlar da yararlanırlar. Səbinə Babayevanın bu il ifa etdiyi mahnı da bizim istedadlı oranjemançı Yaşar Baxış sayəsində olduqca milli kaloritdədir. Hətta fonda Alim Qasımovun səsi mahnıya özünəməxsus bir rəng qatır. Çox vaxt deyirlər ki, guya biz Avropaya milli kaloritdə mahnı aparmırıq. Ancaq bu xırdalıqlara fikir vermək lazımdır. Elə Aysel və Araşın da ifa etdikləri mahnıda tar alətindən istifadə buna bir nümunədir. Mən incəsənət sahəsinin bir nümayəndəsi kimi deyirəm ki, bu müsabiqənin bizim ölkəmizin incəsənəti və mədəniyyətinin təbliği üçün əhəmiyyəti böyükdür. Hətta düşünürəm ki, gələcəkdə avropalı müğənnilər bizim bəstəkarlardan mahnılar götürüb ifa edəcəklər. Bütün dünyadan hamı Azərbaycana axışıb gəlib və bizim mədəniyyətimizlə maraqlanırlar. Bizim müğənnilər məhz bundan istifadə edib konsert proqramları hazırlaya bilərlər. Latviya təmsilçisi “Sarı gəlin”i ifa etdi və bizim dilimizdə. Artıq dünya bu xalq mahnısının ermənilərə məxsus olmadığını nəhayət ki anlayıb. Yəni bu yarışmanın keçirilməsi bizim dövlətçiliyimiz üçün də önəmli bir şeydir. Çox maraqlı bir müsabiqədir. Mən də, uşaqlarım da müsabiqəni hər il maraqla izləyirik. Dördüncü dəfədən qalib olmuşuq. Kiçik bir dövlət üçün bu böyük bir uğurdur. Hətta baxın, ermənilər belə bu uğura dözməyib yarışmaya qatılmadı. Mənə elə gəlir ki, Ermənistan bu müsabiqədə iştirak edə bilməzdi. Bilirsiniz, Qarabağ həqiqətlərini Avropadaan gələn qonaqlar burda daha yaxşı anlayacaqlar. Şəhid düşənlər, əsirlikdə olanlar barədə məlumat alacaqlar. Və bütün bunlardan sonra həmin avropalılar qarşısında ermənilərin səhnəyə çıxması olduqca gülünc idi. Yəqin buna görə də gəlməkdən boyun qaçırdılar”.

Saleh Bağırov: “Final gecə səsvermədə Azərbaycandan verilən xalları mən elan edəcəm”

“Eurovision” həyəcanını səhnədə yaşayacaq İctimai Televiziyanın aparıcı simalarından Saleh Bağırov isə müsabiqəyə hazırlıqlardan danışdı: “Mənə elə gəlir ki, buna ancaq sevinmək lazımdır ki, ölkəmizdə mühüm bir hadisə baş verir. Bu müsabiqəni canla-başla qəbul edib yüksək səviyyədə keçirmək lazımdır. Müsabiqəyə hazırlıq yüksək səviyyədə təşkil olunub. “Kristal Hall”, məşqlər, iştirakçıların məşqləri, sonra müsabiqənin jurnalistlər tərəfindən işıqlandırılması, hər bir şey yüksək səviyyədə hazırlanıb. Yəni burda heç bir maneə törədən qüvvə yoxdur və ola da bilməz. Mühafizə yüksək səviyyədə təşkil olunub. Bir məlumat da verim ki, mayın 22-si və 24-ü yarımfinal mərhələləridir. Orda iki şərhçi var. Biri mənəm, digəri isə Könül Arifqızıdır. Final gecəsi bildiyiniz kimi, ayın 26-sı baş tutacaq, onu Könül xanım tək şərh edəcək. Çünki həmin gecə səsvermədə Azərbaycandan verilən xalları mən elan edəcəm. Hazırda müsabiqə gecəsi üçün hazırlaşırıq. Müsabiqədə təmsil olunan ölkələrin iştirakçılarını da hər gün efirə qonaq edirik. Həftə boyu da bütün müxtəlif ölkə təmsilçiləri efirimizə qonaq olacaqlar. Onlar xüsusi vurğulayırlar ki, dənizin qoynunda belə bir arenanın qurulması olduqca gözəldir. Ölkəmiz haqda gözəl təəssüratları var. Onlar boş vaxlarında İçərişəhəri gəzirlər. Yəni Bakı və onun sakinlərindən ağızdolusu danışırlar”.

Nüşabə

Palitra.-2012.-16 may.-S.7.