«Bütün tədbirlərimizin sonunda sərgilər təşkil edirik»

Saməddin Nəsirov: «Üçrəngli bayrığımız, konstitusiyamızla bağlı keçirilən tədbirlərə gənc nəsli cəlb etmək çox vacibdir»

Layihə çərçivəsində müsahibimiz Quba rayon Mərkəzləşdirilmiş Kitabxana Sisteminin direktoru Saməddin Nəsirovdur. O, rayon kitabxanalarında keçirilən son tədbirlərlə bağlı qəzetimizə məlumat verdi:

- Quba rayon rayon Mərkəzləşdirilmiş Kitabxana Sisteminin Mərkəzi Kitabxanasının Uşaq şöbəsinin “Oxu zalında” 9 - noyabr Dövlət Bayrağı Gününə həsr olunmuş “Bir kərə yüksələn bayraq bir daha enməz” mövzusunda tədbir keçirdik. Tədbirdə bildirdildi ki, Azərbaycanın üçrəngli dövlət bayrağı 1918-ci ilin noyabr ayının 9-da Azərbaycan Xalq Cümhuriyyəti hökümətinin qərarı ilə qəbul edilib. 1991-ci ilin fevral ayının 5-də Azərbaycan Respublikası Ali Soveti Naxçıvan Muxtar Respublikası Ali Məclisinin vəsadətinə baxmış və üçrəngli bayrağın Azərbaycanın dövlət bayrağı kimi qeyd edilməsi haqqında qərar vermişdir. Daha sonra Rayon İcra Hakimiyyəti başçısı aparatının məsul işçisi Bəhruz Əfəndiyev, rayon Mədəniyyət və Turizm Şöbəsinin baş məsləhətçisi Söhrab Əmrahov, Mərkəzi Kitabxananın işçisi Nigar Nadirova və başqaları çıxış etdilər. Çıxışlardan sonra şəhər 1, 2, 3, 4 saylı məktəblərin şagirdləri bayraq, Vətən haqqında şeirlər söylədilər. Azərbaycan Yazıçılar Birliyinin Quba rayon bölməsinin sədri, Rayon İcra Hakimiyyəti başçısı aparatının məsul işçisi, şair Ramiz Qusarçaylı özünün “Azərbaycan Bayrağı” şeirini söylədi. Tədbirin sonunda kitabxananın kiçik yaşlı şeir söyləyən fəal oxucularına hədiyyələr təqdim olundu. Ümumiyyətlə Dövlət Bayrağı Günü kimi bayramların keçrilməsinin əhəmiyyəti böyükdür. Xüsusilə belə günlərlə bağlı tədbirlərldə gəncs nəslin, yeniyetmələrin, məktəblilərin iştirakı vacibdir. Biz keçirdiyimiz tədbirlərə gənc nəsli cəlb etməyə xüsusi diqqət ayırırıq. Onlara üçrəngli bayrağımızın müqəddəsliyi, ucalığı, əzəməti müxtəlif şəkildə başa salınır, dövlətə, Vətənə sevgi hissləri aşılanır. Hesab edirəm ki, bu tipli tədbirlər onların əsl vətəndaş kimi böyüməsində mühüm rol oynayır. Elə Bayraq Günü münasibətilə təşkil etdiyimiz tədbirdə çoxlu sayda məktəbli iştirak edirdi. Onlara bu yaşda bayrağımızın, müstəqilliyimizin nə qədər böyük nemət olmasının əhəmiyyətinin anladılmasının əvəzini heç nə verə bilməz. Məktəblilərin tədbirlərimizdə fəal iştirakı, müstəqilliyimiz, bayrağımızla bağlı ürəkdən səsləndirdikləri şeirlər onların gələcək üçün əsil vətəndaş kimi yetişməsinin sübutudur. İki gün əvvəl Mərkəzi Kitabxanada Konstitusiya günü ilə əlaqədar “Müstəqil Azərbaycan Respublikasının Konstitusiyasının yaradılmasında xalqımızın ümummilli lideri Heydər Əliyevin əvəzsiz xidmətləri olmuşdur” adlı dəyirmi masa keçirildi. Tədbirdəi müstəqil Azərbaycan Respublikasının ilk konstitusiyasının qəbul olunmasının ölkəmizin tarixində çox mühüm yer tutmasından, konstitusiyanın hər bir dövlətin ali hüquqi qüvvəyə malik olan əsas qanunu olmasından söhbət açıldı. Sonra Mərkəzi Kitabxananın işçisi Sultanova Hüriyyə çıxış edərək bildirdi ki, yeni konstitusiya Azərbaycan Respublikasının tarixində ilk dəfə olaraq Azərbaycan dövlətinin müstəqilliyi, suverenliyi və ərazi bütövlüyünü qorumaq əzmini, Azərbaycan xalqının öz müqəddəratını sərbəst, müstəqil olaraq həll etmək və öz idarəetmə formasını müəyyən etmək hüququnu təntənəli sürətdə bəyan edib. Daha sonra isə Azərbaycan Müəllimlər İnstitutunun Quba filialının tələbələri Abdullayeva Nərmin və Eyvazova Ülkər konstitutsiyanın bir dövlətin gələcək taleyində rolunu, ümumiyyətlə, dövlətçiliyin inkişafındakı əhəmiyyətini dəqiq qiymətləndirən ümummilli liderin bu prosesə həddindən artıq məsuliyyətlə yanaşmasından söhbət açdılar. Tədbirin sonunda Konstitutsiya Gününə həsr olunmuş sərgi nümayiş olundu.

- Kitabxanada mədəniyyətimizin təbliği istiqamətində hansı yeni tədbirlər keçirilib?

- Mədəniyyətimizin təbliği gündəlik işimizin tərkib hissəsini təşkil edir. Xüsusilə, yubileylərin keçirilməsini daimi olaraq diqqətdə saxlayırıq. Təxminən bir həftə əvvəl Təngəaltı kənd tam orta məktəbində rayon MKS-nin Təngəaltı Kənd kitabxanasının və məktəb kollektivinin təşkilatçılığı ilə dahi mütəfəkkir, milli dramaturgiyamızın banisi, ictimai xadim və maarifçi M.F.Axundzadənin 200 illik yubileyinə həsr olunmuş tədbir keçirdik. Kənd tam orta məktəbin müəllimləri Vüqar Hüseynov və Alik Məmmədov dramaturqun həyat və yaradıcılığı haqqında tədbir iştirakçılarına geniş məlumat verdilər. Tədbirdə böyük dramaturqun Azərbaycan dilinin qorunub saxlanması, ümumiyyətlə dilimizin saflığı və çoxşaxəli olması baxımından Axundzadənin əvəzsiz xidmətlərindən söhbət açıldı. Daha sonra isə kənd tam orta məktəbin şagirdləri Günel Orucova “Təcnuş”, Şəhla Mustafayeva “Zakirə məktub” və başqaları dramaturqun ədəbi yaradıcılıq nümunələrindən parçalar söylədilər. Sonda kitabxananın filial müdiri Məsumə Əhmədova tədbir iştirakçılarını “M.F.Axundzadə-200” başlıqlı sərgi ilə tanış etdi və dramaturqun əsərlərinə tez-tez müraciət edilməsini tövsiyə etdi. Çalışırıq ki, bütün tədbirlərimizin sonunda sərgilər təşkil edək. Mərkəzi KitabxanadaAzərbaycan ədəbiyyatının görkəmli nümayəndəsi Hüseyn Cavidin anadan olmasının 130 illiyi ilə əlaqədar yaradıcılıq gecəsi keçirildi. Bildirildi ki, şair dərin fəlsəfi – estetik məzmuna malik yaradıcılığı ilə ədəbiyyatımızda yeni bir mərhələnin başlanğıcını qoyub. MKS-nin direktor müavini İlhamə Qasımova ölkəmizdə teatr mədəniyyətinin yüksək nailiyyətlər qazanmasında Cavid dramaturgiyasının mühüm rol oynamasından və onun mənzum faciə və tarixi dramlarının söz inciləri kimi xalqımızın zəngin bədii fikir xəzinəsində mühüm rol oynamasından danışdı. Daha sonra H.Cavidin həyat və yaradıcılığı haqqında geniş və ətraflı məruzələr təqdim edildi. Fəal oxuculardan Ülvü Mikayılov, Gültəkin Qasımova, Aynaxanım Baharova, Turac Hacıbalayeva və başqaları şairin əsərlərindən parçalar söylədilər. Sonda tədbir iştirakçıları “H.Cavid – 130” adlı sərgi ilə tanış oldular. İsnov kənd tam orta məktəbində rayon MKS – nin İsnov Kənd kitabxanasının təşkilatçılığı ilə yazıçı-dramaturq, filosof, ictimai xadim, Azərbaycan dramaturgiyasının banisi Mirzə Fətəli Axundzadənin anadan olmasının 200 illik yubileyinə həsr olunmuş tədbir də keçirilib. Burada da tədbir iştirakçıları M.F.Axundzadənin əsərlərindən ibarət sərgi ilə tanış oldular. Zərqova Kənd kitabxanasında isə poeziyamızın görkəmli nümayəndəsi Xurşidbanu Natəvanın anadan olmasının 180 illik yubileyi ilə əlaqədar tədbir keçirmişik.

- Rayonda sənətkarlığın inkişafı ilə bağlı hansı işlər görülür?

- Bəşir Səfəroğlu adına Quba Mədəniyyət Evində sənətkarlığın inkişafına dəstək məqsədilə Mədəniyyət və Turizm Nazirliyinin təşəbbüsü ilə “Azərbaycan xalq yaradıcılığının inkişafında Quba sənətkarlıq məktəbinin yeri” mövzusunda dəyirmi masa keçirildi, müzakirələr aparıldı. Tədbirdə qubalı sənətkarlar, rayon ziyalıları, B.Səfəroğlu adına Quba Mədəniyyət Evinin və Quba Rayon Mərkəzləşdirilmiş Kitabxana Sisteminin əməkdaşları, KİV nümayəndələri iştirak edirdilər. Quba rayon Mədəniyyət və Tuzim Şöbəsinin müdiri Elxan Məhərrəmov Qubada sənətkarlığın inkişafı haqqında məlumat verdi. Daha sonra Mədəniyyət və Turizm Nazirliyinin Mədəniyyətşunaslıq üzrə Elmi Metodiki Mərkəzinin direktor müavini Polad Zeynalov, AMEA-nın Folklor şöbəsinin elmi işçisi Atəş Əhmədli, Elmi Metodiki Mərkəzin şöbə müdiri Cabbar Süleymanov və başqaları Quba sənətkarlıq məktəbinin tarixi ənənələri barəsində ətraflı məlumat verdilər. Qubalı sənətkarlardan Fatimat Ağamirzəyeva, Kamilə Quliyeva unudulmaqda olan sənət növlərinin müasir inkişaf meyillərindən söz açdılar. Sonda yerli sənətkarlar fəxri fərmanlarla təltif olundu.

Anar Miriyev

Palitra.-2012.-14 noyabr.-S.12.