“Rayonumuzda bədii özfəaliyyət kollektivlərinin işi xeyli yaxşılaşıb”

Elnur Əmiraslanov: “Hər ayın sonuncu həftəsinin şənbə günü mədəniyyət işçilərinin ümumi yığıncağını keçirir və mədəniyyət müəssisələrində görülən işlər və mövcud nöqsanları müzakirə edirik”

Layihə çərçivəsində müsahibmiz Hacıqabul rayon Mədəniyyət və Turizm Şöbəsinin müdiri Elnur Əmiraslanovdur:

- Əvvəla onu qeyd edim ki, Mədəniyyət və Turizm Nazirliyinin 2012-ci il üçün təsdiq olunmuş şəbəkə göstəricisinə uyğun olaraq rayon Mədəniyyət və Turizm Şöbəsində 21 klub müəssisəsi, o cümlədən, 1 rayon, 7 kənd Mədəniyyət Evi , 2 şəhər, 11 kənd klubu, MKS-i üzrə 27 müstəqil dövlət kitabxanası, o cümlədən, 1 rayon Mərkəzi Kitabxanası, 6 şəhər və qəsəbə kitabxanası, 20 kənd kitabxana filialı, 7 illik şəhər Uşaq Musiqi Məktəbi, «Pir Hüseyn Xanəgahı» Tarix Memarlıq Qoruğu, Tarix-Diyarşünaslıq Muzeyi, Heydər Əliyev Mərkəzi, 14 arxeoloji tarixi abidə fəaliyyət göstərir. Hacıqabul rayon Mədəniyyət və Turizm Şöbəsi dövlət başçısının fərman və sərəncamlarını, Nazirlər Kabinetinin sərəncamlarını, Mədəniyyət və Turizm Nazirinin əmr və göstərişlərini, rayon İcra Hakimiyyəti başçısının əmr və sərəncamlarını icra etmək məqsədi ilə 2012-ci il üçün geniş perspektiv planı hazırlayaraq təsdiq edib. Rayon Mədəniyyət və Turizm Şöbəsi təsdiq olunmuş tədbirlər planına uyğun olaraq işlərini günün tələbləri səviyyəsinda qurmağa çalışıb və bir sıra müxtəlif səpkili tədbirlər həyata keçirib. 2012-ci ilin əvvəlində rayon mədəniyyət işçilərinin geniş hesabat yığıncağını keçirmişik. MKS-nin, Uşaq Musiqi Məktəbinin, rayon və kənd klub müəssisələrinin, Tarix-Diyarşünaslıq muzeyinin, Heydər Əliyev Mərkəzinin rəhbərlərinin gördüyü işlər barədə hesabatları dinlənilib, 2012-ci il üçün tədbirlər planı təsdiq olunub.Tədbirlər planına uyğun olaraq cari ildə keçiriləcək ümumrayon səviyyəli tədbirlərin yüksək səviyyədə keçirilməsi üçün mədəniyyət işçilərinə tapşırıqlar verilmişdi. Cari ilin mart ayından etibarən rayon Mədəniyyət və Turizm Şöbəsi müdiri yanında 11 nəfərdən ibarət şura yaradılıb, şuranın illik iş planı təsdiq olunub. Məlumat üçün bildirim ki, hər ayın sonuncu həftəsinin şənbə günü mədəniyyət işçilərinin ümumi yığıncağı keçirilir və şuranın iş planına uyğun yoxlamalar aparılan mədəniyyət müəssisələrində görülən işlər və mövcud nöqsanlar müzakirə olunur. Cari ilin ilk günlərindən başlayaraq rayonun mədəniyyət müəssisələrində müxtəlif səpkili tədbirlər həyata keçirilib. 2012-ci ilin geridə qalan ayları ərzində təsdiq olunmuş tədbirlər planına uyğun olaraq rayon Mərkəzi Kitabxanasında, şəhər Uşaq Musiqi Məktəbində, Tarix-Diyarşünaslıq Muzeyində, Heydər Əliyev Mərkəzində müxtəlif kitab və foto sərgilər təşkil olunub. Rayonun bütün mədəniyyət müəssisələrində 20 Yanvar şəhidlərinin, 26 fevral Xocalı soyqırımı, 31 mart Azərbaycanlıların Soyqırımı Günü münasibəti ilə müxtəlif səpkili tədbirlər, foto stendlər təşkil olunub, mühazirələr oxunub, sənədli flimlər nümayiş etdirilib. Gənclər Günü, 8 mart Beynəlxalq Qadınlar Günü, Novruz bayramı günlərində rayon Mədəniyyət Evinin musiqi kollektivləri rayonda keçirilən tədbirlərdə yaxından iştirak ediblər.

- Rayonun mədəniyyət müəssisələrinin fəaliyyəti haqqında nə deyə bilərsiniz?

- Məlumat üçün bildirim ki, Mədəniyyət və Turizm Nazirliyinin qərarı ilə təsdiq olunmuş əsasnaməyə əsasən Hacıqabul rayon Heydər Əliyev Muzeyi, Heydər Əliyev Mərkəzi adlandırılıb və hazırda mərkəz adı ilə fəaliyyət göstərir. İlin geridə qalan ayları ərzində Heydər Əliyev Mərkəzi təsdiq olunmuş tədbirlər planına uyğun olaraq bir sıra tədbirlər həyata keçirib. Rayon Tarix-Diyarşünaslıq Muzeyində 46 qrup tərkibində 900 nəfər ekskursiyaçı qəbul edilib. 18 aprel Beynəlxalq Abidələr Günü “Pir Hüseyn” xanəgahı Tarix-Memarlıq Qoruğunda geniş qeyd edilib, “Muzeylər gecəsi” aksiyası , “Açıq qapılar” tədbiri təşkil edilib. Ulu öndərin doğum günü münasibətilə “Ürəklərdə yaşayan dahi şəxsiyyət” mövzusunda söhbətlər, foto stendlər və geniş konsert proqramı hazırlanıb həyata keçirmişik. Rayonun Atbulaq, Rəncbər və Kolanı kənd Mədəniyyət Evlərində tədbirlər həyata keçirilib, musiqiçilərimiz kənd əhalisi qarşısında geniş konsert proqramı ilə çıxış edib, yekun olaraq rayon Mədəniyyət Evində muğam teatrı kollektivinin iştirakı ilə konsert proqramı təşkil olunub. Şuşa şəhərinin işğalının iyirmi illiyinə həsr olunmuş “İşğala məruz qalan Şuşam”, Laçının işğalının ildönümünə həsr olunmuş “Sinəsi dağlı dağlar oy” adlı ədəbi-bədii kompozisiya, 15 İyun Beynəlxalq Uşaqların Müdafiəsi Günü, 15 iyun Qurtuluş Günü, 1 iyul polislərin peşə bayramı, 19 avqust Ramazan bayramı, 15 sentyabr yeni dərs ilinin başlanması, Milli Musiqi Günü münasibətilə konsert proqramları təşkil olunub. Hər rübdə çağırışçı gənclərin hərbi vətənpərvərlik hisslərinin yüksəldilməsi məqsədi ilə “Vətən bizi səsləyir” adlı tədbirlər həyata keçiririk.

- Rayon kollektivləri respublika müsabiqələrinə qatılırmı?

- Bəli, rayon kollektivlərinin respublika müsabiqələrində iştirakını təmin etməyə çalışırıq. Cari ilin mart ayında Mədəniyyət və Turizm Nazirliyi tərəfindən keçirilən xalq çalğı alətləri ifaçılığı üzrə Respublika müsabiqəsində şagirdlərimizdən Ağamalıyev Elşən qalib olub və yekun konsertində çıxış edərək diplom, fəxri fərman və hədiyyələrlə təltif edilib. Xan Şuşinski adına Respublika müsabiqəsində məktəbin muğam üçlüyü yüksək səviyyədə çıxış edib. Hacıqabul şəhər Uşaq Musiqi məktəbi Qobustan rayon Təklə kənd Uşaq Musiqi Məktəbində “Mədəniyyət sahəsində dostluq görüşləri” adlı konsert proqramı ilə qonaq olub. Salyan rayonunda keçirilən gənc pianoçuların II Respublika baxış müsabiqəsində məktəbin IV sinif şagirdi Babayeva Gövhər uğurla çıxış edib və münsiflər tərəfindən bəyənilib. Musiqi məktəbinin müəllim və şagirdləri Üzeyir Hacıbəyovun anadan olmasına həsr olunmuş Milli Musiqi Günü və Müəllimlər Günü münasibəti ilə geniş konsert proqramı ilə çıxış ediblər. Sevindirici haldır ki, 2011-2012-ci tədris ilində Musiqi məktəbinin 6 məzunu respublikamızın müxtəlif musiqi texnikumlarına və kolleclərinə qəbul olunublar. Cari ilin geridə qalan ayları ərzində rayonun bədii özfəaliyyət kollektivlərinin işi xeyli yaxşılaşıb və genişlənib. Musiqi kollektivləri rayonda və yerlərdə, dövlət tədbirlərində, peşə bayramlarında, əhali qarşısında daima uğurlu çıxışlar ediblər. Xüsusi ilə qeyd etmək istəyirəm ki, rayon Mədəniyyət Evi və şəhər klubunun musiqi kollektivləri, şəhər Uşaq Musiqi Məktəbinin müəllim və şagird kollektivləri ilboyu rayonda yerləşən “N” saylı hərbi hissədə geniş konsert proqramları ilə çıxışlar edir, gənc əsgərlərin andiçmə mərasimlərində yaxından iştirak edirlər. Rayon Mədəniyyət Evinin, Muğan qəsəbə və şəhər klubunun kollektivləri, “Nur” insturumental ansamblı, ümumrayon tədbirlərində iştirak edirlər.

Anar Miriyev

Palitra.-2012.-20 noyabr.-S.11.