“Uşaq ədəbiyyatı
üçün yazıları müsabiqə
ilə seçmək olar”
Gülzar
İbrahimova: “Uşaq kitabxanalarında hansı müəllifin
kitabı oxucular tərəfindən daha çox bəyənilib,
oxunubsa, həmin kitabların kütləvi şəkildə nəşrinə
köməklik göstərilə bilər”
Layihə
çərçivəsində müsahibimiz “Kiçik
dünya” Uşaqların Maarifləndirilməsinə Kömək İctimai Birliyinin rəhbəri,
“Sehrli dünya” uşaq jurnalının rəhbəri,
yazıçı Gülzar İbrahimovadır:
- Uşaqlar üçün yazmağın
çətinliyi nədədir?
- O
sual məni də həmişə
düşündürür: “Görəsən, niyə deyirlər
ki, uşaqlar üçün yazmaq çətindir?” Amma bəzi
uşaq nağıl və hekayələrini
oxuyanda görürəm ki,
doğrudan da, bəziləri
üçün çox
çətindir. Çünki həmin
yazıları uşaq oxusa,
başa düşməyəcək. İnsan yaza bildiyini yazmalıdır. Onda
daha mənalı, daha
oxunaqlı, yazılanlar daha qiymətli ola bilər. Uşağın dilini,
zövqünü bilmədən, onu sevmədən, nazını çəkməyə
səbri çatmadan, daxilən uşaq olmadan, əlbəttə
ki, uşaqlar üçün yazmaq olar, amma həmin yazı uşaqlara xoş gələ
biləcəkmi? Uşaqlar
çox həssas olur.
Uşağa öz məhəbbətini
bildirmədən, sadəcə ona
baxdıqda o, sənin
baxışlarından ona münasibətini,
ona olan sevgini hiss edib
özü sənə yaxınlaşacaq, eyni qarşılıqlı məhəbbətlə
sənə baxacaq. Baxışları ilə
“Gəl, mənimlə oynayaq!” deyəcək. Hər kəs gərək
yaza bildiyini yazsın.
Məncə, hər kəs ürəyinin səsinə diqqət
ayırsa və onu qələmə
almağı bacarsa, mənsur şeir, miniatür yaza bilər. Biz bəzən sadəliyi bəyənməyib
mürəkkəb yollar axtarırıq, həmin
yolda da azıb, özümüzü də itiririk.
Bir kəs
şeir yazmaq, ürəyini
ağ vərəqə boşaltmaq
istəyir. Çox vaxt
şeirin texnikasına, yazılış
qaydasına, qafiyəsinə o qədər diqqət ayırır ki, əsl məqsəddən uzaqlaşır, hissiz, dəyərsiz bir şeir ortaya
çıxır. Mən mənsur şeir
yazmışam deyəndə,
sadəcə ürəyimdə olanları
yazmışam, yazıçı dostlarım,
yazıçı Əlibala Hacızadənin, qəzəl
ustası Ənvər Nəzərlinin, şair
Şahin Fazilin xahişi və təkidi ilə onları çap elətdirmişəm. “Səndən yoxmuş” mənsur şeirlər kitabım da belə yaranıb.
“Telehəftə” qəzetinə dərc olunmaq
üçün bəzən materiallar verirdim. Bir gün
yazılarımı oxuyandan sonra baş redaktorun müavini İmran müəllim mənə məsləhət
verdi: “Səndən yaxşı
nağılçı çıxar!”. Səbəbini soruşanda dedi ki, sən adi yazını
o qədər bəzəyib, ona fantaziya qatırsan ki, yazı adamın düz
ürəyinə girir. Həmin
yazdığım yazı dənizdə işləyən
xilasedicilərə, onların xeyirxahlığına, şərəfli
işinə aid idi. İmran müəllimin sözü
məni düşündürdü və
ilk hekayəmi yazıb “Günəş” uşaq jurnalına verdim. Vasif müəllim
onu oxuyub bəyəndi,
jurnalında dərc elətdirdi. Hekayələrimə ilk dəfə illüstrasiyaları neçə
illərdi “Nəşriyyat”da rəssam işləyən Bulud çəkdi. Onu
hamı imzası ilə rəssam Bulud kimi tanıyır. Rəssam Bulud
nağıllarımı bəyəndi, adımı da özü qoydu “Gülzar nənə!”. Nənə sevinci
yaşamaq qismətimdə olmasa
da, artıq 38 yaşımdan özümün də
xoşladığım bu ad
üstümdədi.
- Bir yazıçı kimi ölkədə
uşaq ədəbiyyatının, uşaq mətbuatının
vəziyyətini necə qiymətləndirirsiniz?
-
Respublikamızda bu sahə inkişaf edir, amma elə bir səviyyədə
inkişaf edir ki, bu inkişaf irəliyə deyil, geriyə səsləyir.
Çünki iş görənlərdən çox, iş
haqda danışanlar var. Ümumiyyətlə,
uşaq ədəbiyyatının
inkişafından 20-30 səhifəlik, yarım saatlarla danışa bilən natiqlərimiz
var. Amma həmin natiqdən
soruşsan ki, sən konkret nə iş
görmüsən, cavab tapa
bilməz. Kitablar buraxılır, çoxunda uşaqların anlayacaqları çox az şey
var. Bəzən
də tərbiyəedici bir nağıl və
hekayə yazılır. Həmin yazıda uşaqlara
tamam yad olan elə kəlmələrdən istifadə
edilir ki, yazı uşağa yadlaşır. Onu
kitabdan uzaqlaşdırır. Mən şeir sevən bir adam kimi sevdiyim
bir qəzetdə bircə mənasız
şeirə rast gəlməklə həmin
qəzetdən üz çevirmişəm.
Hələ indiyə qədər həmin şeir
mənimlə həmin qəzet arasına düşmənçilik
salıb. Məncə, balalarımızı da kitablardan küsdürməməliyik. Çox vaxt isə böyüklərin dili
ilə yazılmış hər hansı materialı sadələşdirmədən
uşaq jurnalına verirlər ki, nəticədə uşaqlar
jurnaldan, onu oxumaqdan uzaqlaşırlar. Əlbəttə ki, mütaliə etmədən biliyə çatmaq mümkün deyil. O, hardasa qırılmalıdır. Hazırda uşaq ədəbiyyatını qazanc yoluna çevirənlər
də var. Onlar cildlərlə
“Nağıllar” kitabı buraxır, qazanc
götürürlər. Bu bir tərəfdən yaxşıdı ki, nağıllar yenidən dərc edilir. Amma həmin
naşirlər tərəfindən nağıllar uşaq yazılarından başı
çıxan redaktorlar tərəfindən
seçilsə, düzəlişlər edilsə, daha yaxşı olar.
- Sizcə, bu sahənin gələcək
inkişafı üçün nələr etmək
lazımdır?
-
Mütləq bu sahəyə ciddi diqqət ayrılmalı,
uşaq ədəbiyyatı haqda çox danışanlar yox,
həqiqi uşaqlar üçün ürəyi yananlar
dövlət səviyyəsində bu işə cəlb
olunmalıdırlar. İnkişaf eləmiş ölkələrin metodlarından
istifadə etməklə uşaq ədəbiyyatını
inkişaf etdirmək olar.
Yazıçıların yazıları müsabiqədən
keçəndən sonra onların nəşr
edilməsinə dövlət dəstək verərsə, uşaq ədəbiyyatı inkişaf
edər. Mən təklif edərdim ki,
müsabiqəyə təqdim edilmiş
materialları həm də uşaqlar qiymətləndirsin.
Yuxarı sinif şagirdləri bunu bacarar. Ən düzgün qərarı beyni
təmiz, hər bir təmənnadan uzaq, qərəzsiz düşüncəli uşaqlar verə bilər. Bunun
başqa bir yolu da var.
Uşaq kitabxanalarında hansı müəllifin
kitabı oxucular tərəfindən daha çox bəyənilib,
oxunubsa, həmin kitabların kütləvi
şəkildə nəşrinə köməklik göstərilsə,
yaxşı olar. Yollar
çoxdur, əsası odur
ki, istək olsun.
- Artıq jurnalınızın bir
neçə sayı çapdan çıxıb. Necə
fikirləşirsiniz, Azərbaycanda uşaq
jurnalı nəşr etmək özünü
doğruldurmu?
- Azərbaycanda uşaq jurnalı dərc elətdirmək, satışını təşkil eləmək, təbliğatını aparmaq çox çətindir. Televiziyaya yaxın düşmək olmur, reklam dəqiqəsi çox bahadır. Məktəblərdə satış olmaz. Bütün bunlar jurnalın yayımlanmasına maneçilik törədir. Alıcılıq qabiliyyəti aşağı səviyyədədir. Oxumaq istəyənlər çox, amma jurnal alanlar azdır. Bu da onu göstərir ki, uşaqlara lazım olan jurnalın ona çatdırılması yolları düzgün qurulmayıb.
- Siz həm də “Kiçik
dünya” Uşaqların Maarifləndirilməsinə Kömək İctimai Birliyini
yaratmısınız. Birlik çərçivəsində
hansı işləri görməyi
planlaşdırırsınız?
“Kiçik dünya” Uşaqların Maarifləndirilməsinə Kömək İctimai Birliyini yaratmaqda məqsədimiz adımızdan göründüyü kimi, azərbaycanlı balalarımızın maarifləndirilməsidir. Layihələr hazırlamışıq. Arzu varsa, bir gün məqsədə də çatırsan.
Nigar Abdullayeva
Palitra.-2012.-27 noyabr.-S.11.