İstanbul Kitab Sərgisində imza günü

Professor Əli Həsənovun «Geopolitika» kitabı sərgi ziyarətçiləri tərəfindən böyük maraqla qarşılanıb

TÜYAP Sərgi Mərkəzində keçirilən XXXI İstanbul Kitab Sərgisində Prezident Administrasiyasının İctimai-siyasi məsələlər şöbəsinin müdiri, professor Əli Həsənovun “Geopolitika” kitabının imza günü olub. Türkiyənin “Bab-ı Ali” nəşriyyatında türkcə çapdan çıxmış kitabın imza mərasimində qardaş ölkənin Mərmərə Qrupu Strateji və Sosial Araşdırmalar Vəqfinin sədri, professor Akkan Suver, burada səfərdə olan azərbaycanlı jurnalistlər, sərgiyə gəlmiş yerli və əcnəbi yazıçılar iştirak ediblər. Doqquz fəsil, 460 səhifədən ibarət kitabda dünyanın əsas güc mərkəzlərinin, Azərbaycanın da daxil olduğu Avrasiya coğrafiyasında siyasəti, bunun Xəzər hövzəsi və Cənubi Qafqazdakı proseslərə təsiri ətraflı təhlil edilib. Mərasim iştirakçıları nəşrin əhəmiyyətini yüksək qiymətləndirərək kitabın universitet tələbələri, siyasətçilər üçün qiymətli mənbə olduğunu bildiriblər. Müəllif, professor Əli Həsənov mərasimə qatılan yerli və əcnəbi oxucular üçün “Geopolitika” kitabını imzalayıb və onlara hədiyyə edib. Qeyd edək ki, Prezident yanında Kütləvi İnformasiya Vasitələrinin İnkişafına Dövlət Dəstəyi Fondunun rəhbəri Vüqar Səfərlinin rəhbərliyi altında İstanbulda səfərdə olan ölkə mediasının nümayəndələri də tədbirə qatılıb. Tədbirə qatılan mətbuat nümayəndələrimizin bildirdiyinə görə, belə nəhəng və nüfuzlu kitab sərgisində Azərbaycandan olan müəlliflərin imza günü mərasiminin keçirilməsi ölkəmizin tanınması, təbliğatı və müsbət mənada imic formalaşdırılması baxımından böyük əhəmiyyət daşıyır. Türk oxucularının da mərasimə göstərdiyi böyük maraq gələcəkdə bu sayaq tədbirlərin daha tez-tez təkrarlanmasını vacib edir.

Anar

Palitra.-2012.-27 noyabr.-S.4.