Dünyayerli muzeylər haqqında məlumat xarakterli sərgilər təşkil edirik

 

Layihə çərçivəsində müsahibimiz Balakən Rayon Mədəniyyət və Turizm Şöbəsinin müdiri Ruqiyyə Seyidovadır:

- Rayon Mədəniyyət və Turizm Şöbəsi 2012-ci ildə Heydər Əliyev Mərkəzi, Tarix-Diyarşünaslıq Muzeyi, Bülbül adına Uşaq İncəsənət Məktəbi, Qabaqçöl qəsəbə musiqi məktəbi, MKS və onun 29 kənd kitabxanası, 34 klub tipli mədəniyyət müəssisəsi ilə fəaliyyətini davam etdirib. Rayonun mədəni-maarif müəssisələri şöbənin təsdiq etdiyi iş planlarına uyğun işlərini günün tələbləri səviyyəsində qurmağa çalışır, Mədəniyyət və Turizm Nazirliyi və Rayon İcra Hakimiyyəti tərəfindən verilən tapşırıqların yerinə yetirilməsinə nail olurlar. Odur ki, şöbə 9 ay ərzində bütün mədəni-maarif müəssisələrində əlamətdar, tarixi günlərin, milli və dövlət bayramlarının, yubiley tədbirlərinin yüksək səviyyədə qeyd edilməsinə dair lazımı tövsiyyə və göstərişlərini verib, tədbirlərin daha məzmunlu və rəngarəng keçirilməsinə nail olub. Belə ki, rayonun Heydər Əliyev Mərkəzində 20 Yanvar faciəsinin 22-ci ildönümü münasibətilə tədbir keçirilib və faciə həqiqətlərini əks etdirən rəsm əsərlərindən ibarət sərgi, fevralın 2-də isə Gənclər Gününə həsr edilmiş tədbir keçirilib. Fevralın 24-də Xocalı faciəsinin 20 illiyinə həsr edilmiş tədbirdə çıxış edənlər ermənilər tərəfindən günahsız insanlara - qocalara, qadınlara, uşaqlara verilən dözülməz əziyyətlər, dəhşətli işgəncələrdən danışıb, faciənin ildönümü ərəfəsində həm də mərkəzdə bu soyqırım həqiqətlərini əks etdirən rəsm əsərlərindən ibarət sərgi təşkil edilib. Martın 29-da Təhsil Nazirliyinin xətti ilə uşaq və yeniyetmələrin elmi-texniki yaradıcılığına dair respublika müsabiqəsinin zona mərhələsi Heydər Əliyev Mərkəzində keçirilib və tədbirdə Balakən, Zaqatala, Qax, Oğuz, Şəki, Qəbələ, İsmayıllı rayonlarından nümayəndələr iştirak ediblər.Aprelin 26-da görkəmli alim, akademik Zərifə Əliyevanın anadan olmasının 89-cu ildönümü  münasibətilə Heydər Əliyev Mərkəzində tədbir keçirilib. Mayın 6-da ulu öndər Heydər Əliyevin anadan olmasının 89-cu ildönümü münasibətilə “Dahi lider” adlı dəyirmi masa təşkil olunub. Dəyirmi masada çıxış edən ziyalılar ulu öndərin Azərbaycanın inkişafı üçün göstərdiyi xidmətlərdən, fədakar əməyindən danışıblar. Həmçinin rayon İcra Hakimiyyətinin  təşkilatçılığı ilə mayın 10-da Heydər Əliyev adına mədəniyyət və istirahət parkında ulu öndərin anadan olmasının ildönümü və “Gül bayramı”na həsr olunmuş böyük tədbir keçirilib, təhsil müəssisələri, körpələr evi və uşaq bağçalarının əl işlərindən ibarət sərgi təşkil edilib və Heydər Əliyev  Mərkəzi gecə saatlarınadək ziyarətçilər üçün açıq olub. Mayın 18-də Beynəlxalq Muzeylər Günü münasibətilə Azərbaycan və dünyanın müxtəlif muzeyləri haqqında məlumat xarakterli sərgi təşkil olunub və film nümayiş etdirilib. Heydər Əliyev Mərkəzinə təhsil müəssisələrinin kollektivlərinin gəlişi təşkil edilib.Mayın 22-də isə “Muzeylər dəyişən dünyada: yeni çağırış - yeni ilham” devizi altında Heydər Əliyev Mərkəzində tədbir keçirilib. Respublika Günü, Qurtuluş Günü, Silahlı Qüvvələr Günü münasibətilə mərkəzdə tədbirlər keçirilib və filmlərə baxılıb. İyun ayında Heydər Əliyev Mərkəzinin elmi işçisi Bakiya ezam olunaraq Mədəniyyət və Turizm Nazirliyindən Heydər Əliyev Mərkəzinə  hədiyyə olaraq verilmiş eksponatları gətirib. Dövlət başçısının sərəncamı ilə Daanov Canpolad Alı oğluna “Vətən uğrunda” medalı, Atayev Soltan Həmid oğluna Əməkdar rəssam fəxri adı verilib. Onlarla muzeydə görüşlər keçirilib və vəsiqələrinin sürəti muzeyə təqdim olunub. Ümumiyyətlə, 2012-ci ilin 9 ayı ərzində Heydər Əliyev Mərkəzinə gələnlərin sayı 4110 nəfər olub. 9 ay ərzində 36 ədəd eksponat əldə edilərək eksponatların sayı 783-ə çatdırılıb.

- Digər mədəniyyət müəssisələrində hansı yeniliklər olub?

- İlin geridə qalan 9 ayı ərzində rayonumuzun Tarix-Diyarşünaslıq Muzeyində “Müqəddəs məbədlər diyarı olan torpağımızın şərəfli tarixini öyrənək, tarixi abidələrimizi tanıyaq və onlara sahib çıxaq” mövzusunda geniş elmi-praktik konfrans keçirilib. Muzeydə 31 Mart soyqırımı yad edilib, Şuşa şəhərinin işğalı ilə bağlı “Şuşasız 20 il” adı altında dəyirmi masa keçirilib, rayonda yaşayan 1941-45-ci illərdə Böyük Vətən müharibəsində iştirak etmiş müharibə veteranları ilə görüşlər təşkil edilib. Tarix-Diyarşünaslıq Muzeyində nümayiş olunan eksponatların sayı 4400 ədədə çatdırılıb. Eyni zamanda muzeyə gələn ziyarətçilərin sayı 2012-ci ilin 9 ayı ərzində 4880 nəfər olub. Mərkəzləşdirilmiş Kitabxana Sistemində ilin 9 ayı ərzində xeyli iş görülüb, yeni şöbələr yaradılıb, kitabxananın iş fəaliyyəti yeniləşdirilib. MKS-nin Xidmət şöbəsində, Uşaq şöbəsində, kənd kitabxanalarında yubiley və bayramlarla əlaqədar bir sıra tədbirlər keçirilib, kitablarla oxuculara xidmət edilib, məktəb kitabxanaları ilə əlaqə genişləndirilib. 2012-ci il ölkəmizdə dövlət başçısının sərəncamı ilə “İdman ili” elan edilib.  “İdman ili” ilə əlaqədar MKS-də tədbirlər planı tutulub və bu plan seminar müşavirədə müzakirə olunub. Şöbə və kitabxanalarda idmana dair sərgilər təşkil edilib və idmançılarla görüşlər keçirilir. MKS-də Novruz bayramı ilə əlaqədar “Novruz Ensiklopediyası” kitabının təqdimat mərasimi keçirilib. 2012-ci ilin 9 ayı ərzində MKS-də V.Babanlının anadan olmasının 85 illik yubileyi ilə əlaqədar “Vicdan susanda” kitabının təqdimat mərasimi, 20 Yanvar faciəsinin 22-ci ildönümü ilə əlaqədar “Əgər şəhid varsa, demək, vətən var”, 2 fevral Gənclər Günü ilə əlaqədar “Azərbaycanın gələcəyi gənclərə məxsusdur” adlı dəyirmi masa, Xocalı faciəsinin 20-ci ildönümü ilə əlaqədar Uşaq şöbəsində “Qan gölündə çalxalanan Xocalım” adlı ədəbi-bədii kompozisiya, 8 Mart Qadınlar Günü ilə əlaqədar “Dünyanın ən gözəl sözüdür - Ana” adlı poeziya gecəsi, Novruz bayramına hazırlıqla əlaqədar “Novruz  bayramı ensiklopediyası” kitabının təqdimat mərasimi, 31 Mart soyqırımı ilə əlaqədar “31 Mart Azərbaycanlılarının Soyqırımı Günüdür” adlı məruzə, H.Cavidin 130 illik yubileyi ilə əlaqədar “H.Cavidin həyat və yaradıcılığı” haqqında məruzə, M.Ə.Sabirin 150 illik yubileyi ilə əlaqədar “İnqilabi satirik şeirimizin banisi” adlı məruzə və “Gülən, güldürən şair” adlı poeziya gecəsi, Azərbaycan əlifbası və Ana dili Günü ilə əlaqədar “Dilim mənim qürurumdur” adlı poeziya gecəsi, M.S.Ordubadinin “Qılınc və qələm” adlı poeziya gecəsi, Ə.Cavadın 120 illiyi ilə əlaqədar “Mən çeynənən bir ölkənin haqq bağıran səsiyəm” başlıqlı məruzə, şairə X.Nətəvanın 180 illik yubileyi ilə əlaqədar sərgilər təşkil edilib. MKS-in şöbə və filiallarında ”Hüquq ədəbiyyatı”, ”Azərbaycan folkloru”, ”Xarici ölkə ədəbiyyatı”, ”Azərbaycan klassiklərinin əsərləri”, ”Mənim doğma Balakənim”, “Kitaba-Kitabxanaya dövlət qayğısı”, ”M.F.Axundov – 200”, ”M.Ə.Sabir – 150”, ”2012-ci ili idman ilidir”, ”Narkomaniyaya yox deyək”, ”Müasir Azərbaycanımızın 21 yaşı mübarək” və sair başlıqlar altında sərgilər təşkil edilib. Heydər Əliyev Mərkəzində Mərkəzi Kitabxana və filiallarının birgə təşkil etdiyi M.F.Axundovun 200 illik yubileyinə həsr olunmuş “M.F.Axundzadə Azərbaycan dramaturgiyasının banisidir” adlı ədəbi-bədii gecə keçirilib. Gecədə dramaturqun əsərlərindən ibarət şeirlər söylənilib, səhnəciklər göstərilib. X.R.Ulutürkün 80 illik yubileyi ilə əlaqədar 19 saylı Yeni Şərif, 10 saylı Qaysa, 13 saylı Xalatala kənd kitabxanalarında “Azərbaycan qeyrətli, cahan qüdrətli şeirim” adlı poeziya gecəsi keçirilib. Uşaq şöbəsində Azərbaycan əlifbası və Ana dili Günü ilə əlaqədar “Mənim ana dilim” poeziya gecəsi, Ə.Cavadın 120 illiyi ilə əlaqədar “Yurdumun haqq səsi”, H.Cavidin 130 illiyi ilə əlaqədar “Yerə enməm də, səma şairiyəm”, H.Zərdabinin 170 illiyi ilə əlaqədar “Zəmanəmizin böyük əkinçisi” başlığı altında sərgilər, kartotekalar təşkil edilib. Cari ilin 9 ayı ərzində MKS-ə kitabxana kollektorundan, M.F.Axundov adına Milli Kitabxanadan və yerli mənbələrdən 544 kitab və nüsxə alınıb. MKS-nin 9 ayı ərzində 9353 nəfər oxucu, 97112 kitab verilişi olub. 

 

 

Anar Miriyev

 

Palitra.-2012.-16 oktyabr.-S.11.