Balakəndə «Sənətkarlar evi» yaradılıb

Ruqiyyət Seyidova: «Bu mərkəzdə milli adət-ənənələrə uyğun mövcud sənətkarlıq nümunələrinin nümayişi və satışı təşkil edilir»

Layihə çərçivəsində müsahibimiz Balakən Rayon Mədəniyyət və Turizm Şöbəsinin müdiri Ruqiyyət Seyidovadır:

- Rayonumuzun mədəniyyət müəssisələrində il ərzində müxtəlif tədbirlər keçirilir. Uşaq İncəsənət və Qabaqçöl qəsəbə məktəbində də dövlət tədbirləri yüksək səviyyədə qeyd olunur. Məktəbin Fortepiano şöbəsinin III sinif şagirdi Əhmədova Dünya Vaqif qızı istedadlı uşaqlar arasında “Pöhrə” müsabiqəsinin iştirakçısı olub. Dünya Əhmədova Mədəniyyət və Turizm Nzirliyinin I dərəcəli laureat diplomuna, ən çox tamaşaçı rəyi qazandığı üçün İTV-nin I dərəcəli diplomuna ,”Pöhrə-2012” istedad müsabiqəsinin I dərəcəli laureat diplomuna layiq görülüb. Onun müəllimi Arifə Tağıyeva “Sehrli aləm” cəmiyyətinin Fəxri fərmanına layiq görülüb. Məktəbin Səs şöbəsinin III və V sinif şagirdləri Bodurova Vüsalə Kamran qızı və Abbasov İsfəndiyar Telman oğlu Bakı şəhərində keçirilən Xan Şuşinski adına Muğam Festivalında fəal iştirak ediblər. Xarici İşlər Nazirliyinin məktubuna əsasən, cari ilin 21-27 may tarixləri YUNESKO tərəfindən Beynəlxalq Bədii Təhsil Həftəsi kimi qeyd olunub. Bu məqsədlə İncəsənət Məktəbi və Qabaqçöl qəsəbə uşaq musiqi məktəbi Şəki Şəhər 4 nömrəli Uşaq Musiqi Məktəbi ilə dostluq və yaradıcılıq əlaqələri quraraq birgə konsert proqramı ilə təşkil ediblər. Konsert proqramları videolentə çəkilib və Mədəniyyət və Turizm Nazirliyinə göndərilib. İncəsənət Məktəbində yeni Sintezator şöbəsi açılaraq qəbul planına daxil edilib. Dərs ilinin sonunda yekun akademik konsertləri, sinifdən-sinfə keçmə və buraxılış imtahanları keçirilib. 43 nəfər məzundan 37 nəfəri buraxılış imtahanlarını müvəffəqiyyətlə başa vurub. Respublikada keçirilən müxtəlif musiqi müsabiqələrinin laureatı K.Bayramovun solo konserti keçirilib və Azərbaycan, rus və Avropa bəstəkarlarının əsərləri səsləndirilib. 18 sentyabr Milli Musiqi Günü münasibətilə məktəbdə geniş konsert proqramı təşkil edilib, görkəmli bəstəkar Fikrət Əmirovun 90 illik yubileyi ilə əlaqədar tədbirin keçirilməsinə hazırlıq işləri görülür.

- Rayonun klub tipli mədəniyyət müəssisələrinin fəaliyyəti haqqında nə deyə bilərsiniz?

- Klub tipli mədəniyyət müəssisələrində ilin geridə qalan 9 ayı ərzində bir sıra tədbirlər həyata keçirilib. 20 Yanvar faciəsi və Xocalı soyqırımı ilə əlaqədar klub müəssisələrində “Tarixin qanlı günü”, “Şəhidlər bizim fəxrimizdir”, “Xocalı yaran sağalan deyil”, “Kim deyir ki, yanıb-yanıb söndün sən, alovlanar, odu sönməz Xocalım”, “Bəşər tarixinin dəhşətli faciəsi” ədəbi-bədii kompozisiyaları, sərgilər, fotostendlər hazırlanıb və dəyirmi masalar keçirilib. Klub müəssisələri Novruz bayramı münasibətilə Heydər Əliyev adına mədəniyyət və istirahət parkında yüksək səviyyədə şənliyin keçirilməsinə nail olublar. Mart ayında tədbirlər planında nəzərdə tutulmuş gənclərin və yeniyetmələrin pis vərdişlərdən uzaqlaşdırılması, istedadların üzə çıxarılması üçün “İstedad - 2012” müsabiqəsi keçirilib. Eyni zamanda həmin müsabiqənin qaliblərinin Heydər Əliyev adına mədəniyyət və istirahət parkında keçirilən “Tanıdım Səni” layihəsində iştirak etməsinə nail olunub. Şöbə tərəfindən klub müəssisələrində 9 ay ərzində “Narkomaniya sosial bəladır”, “Narkomaniyaya qarşı mübariz olaq”, “Əsrin bəlası”, “Sağlam bədəndə sağlam ruh olar” və s. başlıqları altında sərgilər təşkil edilib, dəyirmi masa keçirilib. Prezidentin məlum sərəncamlarına əsasən yubileyləri qeyd olunan yazıçı və şairlərimizdən M.F.Axundovun - 200, M.Ə.Sabirin - 150, N.Gəncəvinin - 870 illiyi klub müəssisələrində geniş şəkildə qeyd olunaraq silsilə tədbirlər həyata keçirilir. Yay mövsümü ilə əlaqədar rayon əhalisinin və gənclərin asudə vaxtlarının səmərəli təşkili məqsədilə şöbə tərəfindən tutulmuş qrafik əsasında klub tipli mədəniyyət müəssisələrinin Heydər Əliyev adına mədəniyyət və istirahət parkında iyun ayından başlayaraq həftənin altıncı və bazar günləri konsert proqramları təşkil edilib. Rayonda turizmi inkişaf etdirmək sahəsində Mədəniyyət və Turizm Şöbəsi öz öhdəsinə düşən işləri görmək üçün əzmlə çalışır. Belə ki, kənd yaşıl turizmi inkişaf etdirmək məqsədilə mədəniyyət işçilərinin seminar-müşavirəsində turistlərin qala və dincələ biləcəyi müasir tələblərə uyğun kənd evlərinin müəyyənləşdirilməsi kimi tapşırıqlar verilib və müəyyən evlərin siyahısı əldə edilib. Turistlərin marağına səbəb olan xalq yaradıcılıq və sənətkarlıq nümunələrinin hazırlanması və toplanması işi sahəsində işçilər təlimatlandırılıb. Şöbə tərəfindən Tarix-Diyarşünaslıq Muzeyinin və tarixi abidələrin bukletləri hazırlanıb.

- Rayonda yaradılan “Sənətkarlar evi” hansı məqsədə xidmət edir?

- Rayon icra başçısının təşəbbüsü ilə Heydər Əliyev Mərkəzinin nəzdində rayonun milli adət-ənənələrinə uyğun mövcud sənətkarlıq nümunələrini nümayiş etdirən və satışını təşkil edən “Sənətkarlar evi” yaradılıb. Bu “Sənətkarlar evi”ndə rəssamlar, rəqs, fotostudiya, gənc dizaynerlər, toxuculuq, kulinariya məktəbi və s. dərnəkləri fəaliyyət göstərir. 27 sentyabr Dünya Turizm Günü münasibətilə “Sənətkarlar evi”nin qarşısında tədbir keçirilib. Tədbirdə rayon rəsmiləri, xalq tətbiqi sənəti ilə məşğul olan sənətkarlar və digər qonaqlar iştirak edib. Tədbirdə rayonun turizm potensialını əks etdirən filmin nümayişi turizm sərgisi iştirakçılarının marağına səbəb olub. 9 ay ərzində rayona gələn turistlərin sayı 14650 nəfər olub və bunların da 427 nəfərini xarici turistlər təşkil edib. Mədəniyyət və Turizm Nazirliyinin Kollegiyasının qərarı ilə Balakən rayonu 4 nömrəli turizm marşrutuna daxil edilib. 18 aprel Tarixi Abidə və Yer Günü münasibətilə abidələr ətrafında şöbə tərəfindən təmizlik, abadlıq işləri aparılıb, silsilə tədbirlər keçirilib. Tədbirlərin yekunu olaraq Heydər Əliyev Mərkəzində elmi-praktik konfrans keçirilib. Məruzə ilə çıxış edən tarixçi-etnoqraf A.Məmmədli müqəddəs məbədlər diyarı olan torpağımızın tarixinə, mədəniyyətinə sahib çıxmalı, onu gələcək nəsillərə çatdırmalı olduğumuzu qeyd edib. Tədbirin sonunda ”Məbədlər diyarı Balakən” sənədli filmi nümayiş olunub. Şöbə tərəfindən Heydər Əliyev Mərkəzində “Tariximizin öyrənilməsində muzeylərin rolu” adı altında elmi-praktik konfrans da təşkil edilib. Gənclərin həqiqi hərbi xidmətə təntənəli yola salınması təşkil edilib, 26 iyun Silahlı Qüvvələr Günü münasibətilə şöbə rayonda yerləşən “N” saylı hərbi hissədə olub, əsgərlər qarşısında geniş konsert proqramı ilə çıxış edib və onlara bayram sovqatı aparıb. Şöbə ixtisaslı kadrların işə cəlb olunması və kadrların ixtisasının artırılmasını daim diqqət mərkəzində saxlayır. Bu baxımdan şöbə 9 ay ərzində 10 nəfər mədəniyyət işçisinin ixtisasartırma kursundan keçməsini təmin edib.

Anar Miriyev

Palitra.-2012.-17 oktyabr.-S.11.