«Gənc nəsli Vətənə, torpağa, dövlətçiliyə bağlı vətəndaş kimi yetişdirməliyik»

Layihə çərçivəsində müsahibimiz Saatlı Rayon Mədəniyyət və Turizm Şöbəsinin müdiri Şərqiyyə Şahpələngovadır. O, «Palitra»ya müsahibəsinə rayonun mədəniyyət müəssisələri haqqında məlumat verməklə başladı:

- Əvvəla qeyd edim ki, Saatlı Rayon Mədəniyyət və Turizm Şöbəsinin tabeliyində rayon Mədəniyyət Evi, Tarix-Diyarşünaslıq Muzeyi, Bülbül adına 7 illik Uşaq Musiqi Məktəbi, rayon Mərkəzi Kitabxanası və onun 57 kənd kitabxana filialı, 13 kənd mədəniyyət evi, 10 kənd klubu, 3 şəhər klubu fəaliyyət göstərir. Adlarını qeyd etdiyim müəssisələrdə işləyənlərin ümumi sayı 325 nəfərdir. Onlardan 17 nəfəri ali ixtisas təhsilli, 20 nəfər qeyri-ali ixtisas təhsilli, 30 nəfəri orta ixtisas təhsilli, 40 nəfəri qeyri-orta ixtisas təhsilli, 218 nəfəri isə ümumi orta təhsilli işçilərdir. Müəssisələr üzrə işləyən qadınların sayı 145 nəfərdir. Bülbül adına Uşaq Musiqi Məktəbində 23 nəfər, rayon Mərkəzləşdirilmiş Kitabxana Sistemində 102 nəfər, Tarix-Diyarşünaslıq Muzeyində 4 nəfər, Heydər Əliyev Muzeyində 2 nəfər, Dövlət Rəsm Qalereyasında 3 nəfər, rayonun klub müəssisələrində isə 35 nəfər qadın işləyir. Saatlı Rayon Mədəniyyət və Turizm Şöbəsi 2012-ci il başlayandan müntəzəm şəkildə bir çox yaddaqalan mədəni-kütləvi tədbirlər keçirir. Xülasə şəklində qeyd edim ki, ilin əvvəlində 20 Yanvar faciəsi ilə bağlı Mədəniyyət və Turizm Şöbəsində, onun ayrı-ayrı müəssisələrində bir sıra silsilə tədbirlər keçirilib. Rayon Tarix-Diyarşünaslıq Muzeyində Dövlət Rəsm Qalereyası ilə birlikdə sərgi təşkil olunub. Sərgidə Tarix-Diyarşünaslıq Muzeyinin direktoru Sürəyya Zeynalovanın çəkdiyi Saatlı şəhidlərinin şəkilləri nümayiş etdirilib. Bundan əlavə Dövlət Rəsm Qalereyasında Azərbaycanın suverenliyi, istiqlaliyyəti və ərazi bütövlüyü uğrunda şəhid olmuş həmyerlilərimiz barədə silsilə mühazirələr təşkil edilib. Muzeydə 20 Yanvar faciəsinə həsr olunmuş «Türk qanı ilə yazılmış tarix» sənədli filminin nümayişi də təşkil edilib. Bu dövr ərzində muzeyin eksponatlarını zənginləşdirmək məqsədilə Nazirlər Kabinetinin qərarı ilə qoruq elan edilmiş kəndlərdə, arxeoloji abidələrin yerləşdiyi kəndlərdə müəyyən yerlərə baxış keçirilərək kənd sakinləri ilə aparılan fərdi söhbətlər nəticəsində arxeoloji əşyaların toplanaraq Tarix-Diyarşünaslıq Muzeyinə təhvil verilməsinə nail olunub. Hər ayın sonuncu günü muzeydə mühafizə edilən eksponatların gigiyenik-profilaktik mühafizəsi üçün mühüm tədbirlər həyata keçirilir. Mərkəzi Kitabxanada, Heydər Əliyev Mərkəzində Xocalı faciəsinin ildönümünə həsr olunmuş silsilə tədbirlər keçirilib, sərgilər təşkil edilib. Yeri gəlmişkən qeyd edim ki, YAP Saatlı rayon təşkilatında «20 Yanvar - nəsillərdən-nəsillərə qəhrəmanlıq örnəyi» adlı dəyirmi masa da keçirilib. Tədbirdə rayonun müxtəlif sahələrdə işləyən ziyalıları və gənclər iştirak ediblər. Eyni zamanda tədbirdə Ailə, Qadın və Uşaq Problemləri üzrə Dövlət Komitəsinin sədr müavini S.Qəhrəmanova da iştirak edib. Keçirilən tədbirdə natiqlər müasir gənclərlə bağlı problemli məsələlər, gəncləri düşündürən və narahat edən aspektlər haqqında müzakirələr aparıb, gənc nəslin doğru yolda hərəkət etməsi istiqamətində tövsiyələr veriblər. Ümumiyyətlə, gənclərlə iş gündəlik işimizin tərkib hissəsidir. Heydər Əliyev Mərkəzinin təşkil etdiyi «Milli ruh və vətəndaşlıq tərbiyəsi» adlı dəyirmi masa rayon ziyalıları, gənclər tərəfindən çox maraqla qarşılandı. Gənc nəslin siyasi elminin inkişafında, dünyagörüşünün formalaşmasında Heydər Əliyev məktəbinin rolu mövzusunda dəyirmi masa da keçirilib. 20 Yanvar və Xocalı faciəsinin ildönümləri ilə bağlı Mədəniyyət və Turizm Şöbəsinin bütün müəssisələrində fotosərgilər, mühazirələr təşkil olunub. Rayonun Şəhidlər xiyabanında rayon sakinlərinin bilavasitə kütləvi yığıncağı keçirilib, ədəbi-bədii kompozisiya göstərilib, şəhidlərin ruhuna ehtiram əlaməti olaraq müxtəlif yazıçı və şairlər tərəfindən yazılmış şeirlər səsləndirilib. Bu mövzuda tədbirlər həmçinin rayonun Şirinbəy, Fətəlikənd, Cəfərxan, Dədə Qorqud, Qıraqlı, mədəniyyət evlərində, Fətəlikənd, Adıgün, Sarıcalar, Varxankənd, Azadakənd, Məzrəli, Nərimankənd kitabxanalarında, Qaracalar, Çolpu, Varxankənd, Axundov klublarında da keçirilib, xalqımıza qarşı aparılan bu faciəvi siyasət açıqlığı ilə əhaliyə çatdırılıb.

- Rayonun digər mədəniyyət müəssisələrinin fəaliyyəti haqqında nə deyə bilərsiniz?

- Mərkəzləşdirilmiş Kitabxana Sistemində keçirilən tədbirlərin sayı-hesabı yoxdur. Burda ən müxtəlif tədbirlər, şair və yazıçıların əsərlərinin sərgisi, yubiley tədbirləri təşkil edilir. «Gənclər bizim gələcəyimizdir», «Biz sizdən öyrəndik qəhrəmanlığı», «Gənclər, sözüm sizədir», «Novruz gəldi, yaz gəldi» adlı tədbirlər, Yazıçı-dramaturq Mirzə Fətəli Axundzadənin anadan olmasının 200 illiyi, Mirzə Ələkbər Sabirin 150 illiyi, yazıçı Əlfi Qasımovun 85, Vidadi Babanlının 85 illiyi, türk dünyasının böyük oğlu Nazim Hikmətin 110 illiyi, İsmayıl Şıxlının anadan olmasının 90, Məmməd Səid Ordubadinin anadan olmasının 140 illiyi ilə bağlı müxtəlif tədbirlər, ədəbi- bədii gecələr, disput, oxucu konfransları, sərgilər təşkil etmişik. Mədəniyyət İşçiləri Həmkarlar İttifaqı Rayon Komitəsinin xətti ilə kollektivdə işləyən bütün qadınların toplantısı keçirilib. Milli bayramımız olan Novruz bayramı da mədəniyyət müəssisələrimizdə yüksək səviyyədə qeyd olunub. Xüsusilə H. Eynullayev adına Rayon Mərkəzi Kitabxanasında, Bülbül adına Uşaq Musiqi Məktəbində, Şirinbəy, Adıgün, Sarıcalar, Qara Nuru, Nəsimikənd Mədəniyyət evlərində, Tarix-Diyarşünaslıq Muzeyində, Dövlət Rəsm Qalereyasında, Qırağı, Varxankənd, Adıgün, Cəfərxan, Şirinbəy, Sarıcalar kitabxanalarında da bu el şənliyi yerli sakinlərin yüksək fəallığı şəraitində keçirilib. Erməni qəsbkarları tərəfindən işğal olunmuş Şuşa şəhərinin 20 illiyi ilə bağlı Mərkəzi Kitabxanada, Tarix-Diyarşünaslıq Muzeyində, rayon Mədəniyyət Evində, Dövlət Rəsm Qalereyasında və əksər kənd mədəniyyət müəssisələrində mühazirələr edilib, sərgilər, fotostendlər nümayiş etdirilib, film göstərilib. Belə tədbirlərin keçirilməsində əsas məqsəd gənc nəslə, yeniyetmələrə torpaqlarımızın işğalı ilə bağlı məlumat vermək, onları Vətən, torpaq sevgisi ilə böyütmək, dövlətçiliyə bağlı ruhda, əsl vətəndaş kimi yetişdirməkdir. Demək olar ki, keçirdiyimiz hər bir tədbirdə bu məsələni diqqətdə saxlayırıq. Mədəniyyət müəssisələrimizdə Beynəlxalq Ailə Günü münasibətilə müxtəlifyönümlü tədbirlər həyata keçirilib, konsertlər təşkil olunub. Bundan başqa mədəniyyət işçilərinin may ayında keçirilən Respublika 2-ci Dekorativ Tətbiqi Sənət Festivalında iştirakı təmin olunub. Bakıda «Mədəniyyət abidələrimiz» adlı respublika müsabiqəsi keçirildi və rayonumuzun muzey işçiləri həmin müsabiqədə uğurla iştirak etdilər.

- Festivallara qatılırsınızmı?

- Bu il artıq bir festivalda iştirak etmişik. Belə ki, 17-24 iyun tarixində Türkiyə Respublikasında Gəbzə Anibal-Mədəniyyət, Sənət və Folklor Qruplarının 1 Festivalında rayonun Adıgün kənd Mədəniyyət Evinin nəzdində fəaliyyət göstərən türk folklor kollektivi uğurla çıxış edərək milli musiqimizi təbliğ edib, dövlət rəmzimiz olan bayrağımızı dalğalandıraraq mədəniyyətimizi uğurla təbliğ edib. Qeyd etmək lazımdır ki, kollektivimizin hər bir çıxışı iştirakçılar tərəfindən böyük marağa səbəb olub. Bu tədbir dünyanın bir çox televiziya kanalları ilə nümayiş etdirilib.

Anar Miriyev

Palitra.-2012.-5 sentyabr.-S.12.