2012-ci il Quba rayonunda «Kitabxanalar ili»dir

Layihə çərçivəsində müsahibimiz Quba Rayon Mərkəzləşdirilmiş Kitabxana Sisteminin direktoru Saməddin Nəsirovdur:

- Öncə qeyd edim ki, Quba Rayon Mərkəzi Kitabxanası 1932-ci ildə yaradılıb. Bu dövrədək müxtəlif formalarda- qiraətxanalar, kitabxanalar kimi fəaliyyət göstərib. 1978-ci ildə Quba Rayon Mərkəzləşdirilmiş Kitabxana Sistemi yaradılıb. Mərkəzi kitabxanada 6 şöbə fəaliyyət göstərir. Məlumat üçün bildirim ki, rayon İcra Hakimiyyəti başçısının müvafiq sərəncamı ilə 2012-ci il Quba rayonunda “Kitabxanalar ili“ elan edilib. Bu isə biz kitabxanaçıların məsuliyyətini bir qədər də artırıb. Bəşir Səfəroğlu adına rayon Mədəniyyət Evinin qarşısında Mərkəzləşdirilmiş Kitabxana Sisteminin təşkilatçılığı ilə 2012-ci ilin Quba rayonunda “Kitabxanalar ili“ elan edilməsi ilə əlaqədar geniş ictimaiyyətin, mədəniyyət işçilərinin və KİV nümayəndələrinin birgə iştirakı ilə tədbir keçirilib. Tədbirdə nümayiş etdirilən “Ulu öndərimiz Heydər Əliyevin layiqli davamçısı”, “Tarix yaradan şəxsiyyət”, “Qubalı yazarlar”, “Qubanın görməli, gəzməli yerləri”, “Azərbaycan folkloru”, “Xarici ədəbiyyat”, “Bədii ədəbiyyat”, “Azərbaycan incəsənəti”, “Musiqi ruhun qidasıdır”, “2012-ci il idman ilidir”, “Uşaqların sevimli yazıçıları”, “Uşaqların nağıl dünyası”, “Bunları bilmək maraqlıdır”, “Dünya dillərini öyrənək”, “Müəlliflərin hədiyyəsi”, “Gündəlik mətbuat”, “Rus ədəbiyyatı”, ”Azərbaycan tarixi”, “Məlumat ədəbiyyatı”, “Tarix uşaqların gözü ilə” və s. başlıqlı sərgilər rayon ictimaiyyətinin böyük marağına səbəb olub. Tədbirə 600-ə yaxın latın qrafikalı Azərbaycan ədəbiyyatı, 18 adda qəzet, jurnal və xeyli sayda müxtəlif dillərdə çap məhsulları çıxarılıb, oxucuların mütaliə etməsi üçün "Mütaliə stolu" təşkil edilib, yeni oxucuların kitabxanaya üzv olması üçün isə şərait yaradılıb. Tədbirdə çıxış edənlər 2012-ci ilin Quba rayonunda “Kitabxanalar ili“ elan edilməsi ilə əlaqədar keçirilən tədbirlər haqqında məlumat veriblər. Tədbir zamanı ən sevindirici məqam çoxsaylı oxucuların kitabxanaya üzv olması idi. Tədbir rayon Mədəniyyət Evinin kollektivi tərəfindən səsləndirilmiş musiqi sədaları altında başa çatıb.

- Kitaba olan marağı artırmaq üçün hansı tədbirlər həyata keçirirsiniz?

- «Kitabxanalar ili»ndə kitaba olan marağı artırmaq qarşıya qoyulmuş ən prioritet vəzifədir. Bunun üçün ən müxtəlif tədbirlər təşkil edirik. Yay boyu Mərkəzləşdirilmiş Kitabxana Sisteminin təşkilatçılığı ilə Bəşir Səfəroğlu adına rayon Mədəniyyət Evinin qarşısında oxucuların kitaba və kitabxanaya olan maraqlarını daha da artırmaq məqsədilə “Mütaliə həftəsi” adlı aksiya keçirilir. Aksiyada “Tarix yaradan şəxsiyyət”, “Heydər Əliyevin layiqli davamçısı”, “Doğma Qarabağım”, “2012-ci il idman ilidir”, “Kitabxanalarımız bu gün”, “Müasir Quba yazarları”, “Azərbaycan folkloru”, “Dünyanı dolaşan mədəniyyətimiz”, “Uşaqların nağıl dünyası”, “Uşaqların sevimli yazıçıları”, “Bacarıqlı əllər” və s. başlıqlı sərgilər nümayiş etdirilir. Həmçinin aksiyada Prezident tərəfindən yubileylərinin keçirilməsi üçün sərəncam verilmiş şair və yazıçıların əsərlərindən ibarət sərgilər də nümayiş olunur. Buna misal olaraq M.F.Axundzadə - 200, M.Ə.Sabir - 150, M.S.Ordubadi - 140, M.Dilbazi - 100, X.R.Ulutürk - 80 və.s sərgiləri göstərmək olar. Ümumilikdə aksiyaya 1000-dən artıq latın qrafikalı Azərbaycan ədəbiyyatı, 22 adda qəzet, jurnal və xeyli sayda müxtəlif xarici dillərdə çap məhsulları çıxarılıb. Sərgilərlə yanaşı burada "Mütaliə stolu" təşkil edilir və yeni oxucuların kitabxanaya üzv olması üçün şərait yaradılır. “Mütaliə həftəsi” adlı aksiyada çıxış edənlər cəmiyyətdə mütaliənin qlobal problem olduğu bir dövrdə bu kimi tədbirlərin keçirilməsinin vacibliyini qeyd edirlər. Tədbirlərimizdə mədəniyyət işçiləri, qubalı şair və yazıçılar, rayon ağsaqqalları, ziyalılar, yeniyetmələr, gənclər və kiçik yaşlı oxucular da iştirak edirlər. Aksiya musiqi sədaları altında həftənin sonunadək davam etdirilir. Aksiyanın keçirilməsində əsas məqsəd oxucuların kitabla canlı ünsiyyətdə olması, bədii ədəbiyyata və kitabxanaya olan maraqlarını daha da artırmaqdır.

- Tədbirləriniz rayon filiallarında da keçirilirmi?

- Bəli, bu tədbirləri müntəzə şəkildə rayon filiallarında da təşkil edirik. Belə ki, avqust ayından etibarən MKS-in Qəcər-Zeyid, Aşağı-Xuc, Xaltan kənd kitabxana filiallarında da “Mütaliə həftəsi” adlı aksiyanın keçirilməsinə start vermişik. Aksiyanın keçirilməsində məqsəd kəndlərdə əhalinin mütaliə və kitaba olan marağını daha da artırmaqdır. Kitabxanaların qarşısında açıq səma altında baş tutan tədbir kənd əhalisi tərəfindən müsbət qarşılanır. Tədbirdə ulu öndər və Prezidentin həyat, dövlətçilik fəaliyyətini əks etdirən fotoşəkillər, kitablar, qəzetlər, jurnallar, “Müasir Quba yazarları”, “Müstəqilliyimiz əbədidir”, “2012-ci il kitabxanalar ilidir”, “Musiqi ruhun qidasıdır”, “Uşaqların nağıl dünyası” və s. başlıqlı sərgilər nümayiş etdirilir. Oxucuların daha səmərəli mütaliə etməsi üçün aksiyada “Mütaliə stolu” və “Qeydiyyat stolu” təşkil olunur. Bu aksiyalar rayonun növbəti on bir kənd-qəsəbə kitabxana filialında da davam etdirilib. “Mütaliə həftəsi” adlı aksiya Zərdabi qəsəbəsində, Alekseyevka, Bağçaəli, Güləzi, İspik, Qımıl, Qorxmazoba, Zərqova, Zizik, Paşaoba, Amsar kənd kitabxanalarında açıq səma altında təşkil olunub. Aksiyada “Əsrə bərabər ömür. Heydər Əliyev”, "Qubalı yazıçılar, şairlər və alimlər”, “Mirzə Fətəli Axundzadə-200”, “Mirvarid Dilbazi-100”, “Vidadi Babanlı-85”, “Əhməd Cavad-120”, “Hüseyn Cavid-130”, “Yusif Vəzir Çəmənzəminli-125”, “Azərbaycan folkloru, incəsənəti”, “Uşaqların nağıl dünyası”, “2012-ci il kitabxanalar ilidir”, “Quba sənətkarlıq paytaxtıdır” və s. başlıqlı sərgilər nümayiş etdirilib. Aksiya kitab və kitabxanaya olan marağı artırmaqla yanaşı kənd əhalisinin asudə vaxtlarının səmərəli təşkilinə də xidmət edir. “Mütaliə həftəsi” adlı aksiyaya Qırmızı qəsəbə, Qonaqkənd qəsəbə, Vladimirovka, Əliməmmədoba, II Nügədi, İsnov, Dağlı, Təngəaltı, Digah, Hacıhüseynli kənd kitabxanalarında da təşkil edilib.

Anar Miriyev

Palitra.- 2012.- 18 sentyabr.- S.12.