Puneet Chhatval: “Azərbaycan turizm bazarının artım potensialı üzrə dünyanın ən perspektivli ölkələrindən biridir”

Bakıda «JW Marriott Absheron Baku» hotelində Qonaqpərvərlik üzrə Beynəlxalq Konsaltinq Təşkilatının (HVS) təşkilatçılığı, Azərbaycan Turizm Assosiasiyasının dəstəyi ilə MDB ölkələri və Gürcüstan üzrə birinci mehmanxana investisiya konfransı (İCON-2012) öz işinə başladı. MDB və Gürcüstan mütəxəssisləri üçün nəzərdə tutulan konfrans regionda qonaqpərvərlik sektorunun və investisiya mühitinin inkişafına nail olmaq məqsədilə reallaşdırılır.

«HVS Global Hospitality Services - Moscow»un direktoru Tatyana Beller tədbiri açaraq bildirdi ki, bu, təmsil etdiyi təşkilatın ilk tədbiridir. Tədbiri təşkil etməkdə məqsəd MDB və Gürcüstanda qonaqpərvərlik biznesində olan problemləri müzakirə etməkdir: «Əgər müsbət nəticələr əldə etsək, bunu ənənə şəklində davam etdirəcəyik. İlk tədbirimizi Bakıda təşkil etməyimizin səbəbi isə Azərbaycanın paytaxtında qonaqpərvərlik biznesi sahəsində olduqca böyük potensialın olmasıdır. Amma problemlər də var. Bunlardan ən birincisi ölkədə aşağı ulduzlu hotellərin sayının çox az olmasıdır. Düzdür, 4 ulduzlu, 5 ulduzlu brend hotellər beynəlxalq tədbirlərin keçirilməsi üçün çox əlverişlidir. Lakin qonaqpərvərlik biznesinin inkişafı üçün 1, 2, və 3 ulduzlu hotellərin olması da vacib şərtdir. Sahibkarları bu istiqamətdə investisiya yatırmağa cəlb etməyin yollarını aramaq lazımdır. Bu sahədə mövcud olan problemlərdən biri də viza qaydalarının sadələşdirilməsi ilə bağlıdır».

«Carlson Rezidor Hotel Group»un baş meneceri Puneet Chhatval bildirdi ki, Azərbaycan turizm bazarının uzunmüddətli artım potensialı üzrə dünyanın ən perspektivli ölkələrindən biridir: «Regionun hər bir ölkəsi üçün turizmin artım potensialının təhlili zamanı biz gördük ki, 2012-ci ilin proqnozları nikbin olduğu halda, uzunmüddətli artım məhduddur. Azərbaycan nəinki MDB ölkələri arasında liderdir, həm də şübhəsiz, bazarın uzunmüddətli potensialından danışarkən dünyada ən perspektivlilərdən biridir». Puneet Chhatval qeyd etdi ki, HVS şirkəti 2012-ci il üçün «Rusiya, MDB və Gürcüstanın mehmanxana bazarları. Tendensiyalar və perspektivlər» adlı hesabat hazırlayıb. Sənədə görə, MDB ölkələrinin ÜDM-də turizm sənayesinin ümumi payı 5-8 faiz təşkil etdiyi halda, dünyada orta göstərici 14 faizdir: «Bir çox MDB ölkələrinin iqtisadiyyatları əhəmiyyətli dərəcədə neftdən və emal sənayesindən asılıdır. Dünyanın digər ölkələri ilə müqayisədə ÜDM-də turizm sənayesinin payının az olması da buradan irəli gəlir. Digər tərəfdən, ÜDM-də mütləq pay daha çox pozitiv görünür. Bu cür ümumi tendensiyalar belə bir fakt təsdiqləyir ki, MDB ölkələrində turizm sənayesi inkişaf etdiyi halda hər bir ayrıca ölkənin iqtisadiyyatında onun payı hələ də kifayət qədər aşağı olaraq qalır». Onun fikrincə, turistlərin realizə olunan alıcılıq qabiliyyəti baxılması tələb olunan daha bir mühüm aspektlərdən biridir: «Rusiyada, Azərbaycanda və Qazaxıstanda turizmdən gəlirlərin böyük bir hissəsi (65-77 faiz) daxili sərnişin axını ilə bağlıdır. Ukraynada demək olar yarıbayarıdır: daxili gəlirlərin 47 faizi və xarici gəlirlərin 53 faizi».

“Qonaqpərvərlik təhsili: qlobal tələbata qarşı yerli təchizat” mövzusunda məruzə edən Azərbaycan Turizm İnstitutunun rektoru, professor Cəfər Cəfərov bildirdi ki, belə bir konfransın Bakıda təşkili bir daha paytaxtımızın turizm sahəsində mərkəzi yer tutduğunun göstəricilərindən biridir. O, son illərdə Azərbaycanda yüksək standartlara cavab verən mehmanxanaların sayının artdığını, dünyada ən nüfuzlu şəbəkəsi olan brendlərin ölkəmizdə otellər açdığını vurğuladı. C.Cəfərov rəhbərlik etdiyi ali təhsil ocağı, burada kadr hazırlığı zamanı diqqət yetirilən məqamlar, tədris prosesi, institutun xarici əlaqələri barədə tədbir iştirakçılarına ətraflı məlumat verdi. İnstitutun beynəlxalq əlaqələrinin genişləndiyini qeyd edən natiq tələbələrin Yunanıstan, Türkiyə, İsrail, Şimali Kipr, Qazaxıstan, Ukrayna, Rusiya və digər yerlərdə təcrübə keçdiklərini diqqətə çatdırdı. Çıxışının sonunda rektor bildirdi ki, iCON MDB-də mehmanxana sektorunun problemlərinin və perspektivlərinin müzakirəsi üçün beynəlxalq investorları və operatorları, həmçinin nüfuzlu regional ekspertləri və hakimiyyətin nümayəndələrini birləşdirərək, nümayəndələrə regionda turizm və mehmanxana sektorlarının inkişaf strategiyalarına dair fikir mübadiləsi aparmaq üçün əla platforma verəcək.

Azərbaycan Turizm Assosiasiyasının sədri Nahid Bağırov isə məruzəsini Azərbaycan dövlətinin mehmanxana biznesinin inkişafında sahibkarlara yaratdığı müsbət şərait üzərində qurdu. Qurum rəhbəri bildirdi ki, dünyanın heç bir ölkəsində Azərbaycanda olduğu səviyyədə dövlət turizmin inkişafına diqqət və qayğı göstərmir: «Azərbaycan Mədəniyyət və Turizm Nazirliyi artıq neçə illərdir ki, beynəlxalq turizm sərgilərində öz hesabına sahə icarəyə götürüb orada hotellərin və turizm şirkətlərinin öz məhsullarını nümayiş etdirməsi üçün şərait yaradır. Problemlər yoxdur demirik. Amma bu problemlərin həlli istiqamətində işlər görülür və müsbət nəticə də var».Konfransda həmçinin “Luxure” seqmentində layihələr: “Nə qədər kifayətdir”, “Regionda “qaynar nöqtələrin” inkişafı”, “Mehmanxanaların hüquqi aspektləri - sahibkar münasibətləri”, “Turizmin inkişafına dövlət dəstəyi” mövzularında panel iclasları keçirildi.Qeyd edək ki, Qonaqpərvərlik üzrə Beynəlxalq Konsaltinq Təşkilatı (HVS) uzun illərdir ki, öz tədqiqat və analizlərinə əsasən, mehmanxana sektorunun dünyada qarşılaşdığı problemlərin həllinə nail olur, MDB ölkələrinin bu sahədə yüksək nailiyyətlər əldə etməsinə yardım edir. 1980-ci ildən fəaliyyət göstərən təşkilat təmsil etdiyi sahə üzrə ildə 2000-dən çox layihə həyata keçirir. Qonaqpərvərlik sferasının ən tanınmış təmsilçiləri bu təşkilatın müştəriləridir. Təşkilatın beynəlxalq şəbəkəsində 32 ofisi mövcuddur ki, burada da 350 nəfərdən artıq peşəkar çalışır. HVS getdikcə öz fəaliyyət dairəsini genişləndirir.

iCON isə beynəlxalq investor və operatorları, nüfuzlu regional ekspertləri, eyni zamanda MDB ölkələrində qonaqpərvərlik sahəsində söz sahiblərini birləşdirir. Təşkilat region mütəxəssislərinin turizm və mehmanxana sahəsinin inkişafına dair bilik və təcrübələrini bölüşə bilməsi üçün mövcud olan bir qurum kimi tanınır.

Qurumun Bakı konfransı öz işini sentyabrın 19-da yekunlaşdıracaq.

Nigar Abdullayeva

Palitra.- 2012.- 19 sentyabr.- S.10.