“Səbail rayonunun sosial-iqtisadi inkişafı: real vəziyyət və perspektivlər"

“Təhsil hər bir dövlətin, ölkənin, cəmiyyətin həyatının, fəaliyyətinin mühüm bir sahəsidir” deyən ulu öndər Heydər Əliyev təhsili millətin gələcəyi kimi dəyərləndirirdi. İnkişafın innovasiya mərhələsinə keçilməsi, rəqabətədavamlı milli iqtisadiyyatın formalaşdırılması və inkişaf dinamikasının sürətləndirilməsi başlıca olaraq insan kapitalı ilə bağlı bir çox məsələlərin öz həllini tapmasını, o cümlədən təhsilin dünya standartlarına cavab verməsini tələb edir. Bu gün təhsil sistemində islahatların aparılması, istedadlı gənclərimizin dünyada ən məşhur ali təhsil müəssisələrinə göndərilməsi, tədrisdə ən mütərəqqi texnologiyaların tətbiqi, təhsil müəssisələrinin maddi-texniki bazasının gücləndirilməsi birbaşa olaraq Prezident İlham Əliyevin qayğısının nəticəsidir. Bir çox sahələrdə olduğu kimi, təhsil sahəsində də fəaliyyəti ilə seçilən Səbail rayonunda da təhsil müəssisələrinin müasir tələblərə cavab verən təhsil ocaqları səviyyəsinə çatdırılması prosesi uğurla həyata keçirilir.

Ölkə başçısı rayonun tədris ocaqlarında görülən işlərin keyfiyyətindən razıdır Səbail rayonu ərazisindəki məktəblərdə təhsilin səviyyəsi, burada şagirdlərin biliklərə yiyələnməsi üçün yaradılan şərait hər zaman rayon İcra Hakimiyyətinin diqqət mərkəzində olub və bunun daha da yaxşılaşdırılması istiqamətində mütəmadi olaraq işlər görülür. Görülən işlərin nəticəsidir ki, rayon təhsil müəssisələrinin uğurları artır, məzunların ali məktəblərə daxil olma göstəriciləri ilbəil çoxalır. Bakı şəhərinin mərkəzi rayonu olan Səbail rayonunda 5 ali, 18 orta və 18 məktəbəqədər təhsil müəssisəsi mövcuddur ki, onların yeni dərs ilinə hazırlığı və yay mövsumu ərzində məktəblərdə aparılan təmir işlərinə RİH tərəfindən nəzarət daha ciddi olub. Səbail Rayon İcra Hakimiyyəti başçısı yanında Şuranın geniş tərkibli iclasında çıxışı zamanı da Səbail Rayon İcra Hakimiyyətinin başçısı Asif Əsgərov ölkədə təhsil məsələləri ilə bağlı görülən işlər, Prezident İlham Əliyev və Heydər Əliyev Fondunun prezidenti, millət vəkili Mehriban xanım Əliyeva tərəfindən təhsilə olan diqqət və qayğıdan danışaraq rayonda təhsilin səviyyəsi və təhsil müəssisələrinin vəziyyətinə RİH tərəfindən ciddi fikir verildiyini bildirib. Yay aylarında təhsil müəssisələrində əsaslı və cari təmir aparılıb, məktəblər lazımi avadanlıq və vəsaitlərlə təmin olunub.

Qeyd olunub ki, Prezident İlham Əliyev 2011-ci ilin aprel ayının 20-də Səbail rayonunun Badamdar qəsəbəsində olarkən qəsəbə sakinləri ilə keçirdiyi görüş zamanı sakinlərin xahişini nəzərə alaraq Badamdar qəsəbəsində yeni 120 yerlik uşaq bağçası və 880 şagird yerlik ümumtəhsil məktəbinin tikintisi üçün maliyyə vəsaitinin ayrılmasına dair sərəncam imzalayıb. Sərəncamın icrası ilə bağlı RİH tərəfindən müvafiq işlər həyata keçirilib, Badamdar qəsəbəsində müasir tələblərə tam cavab verən məktəb və uşaq bağçası tikilərək ətraf yollar və kommunikasiya xətləri yenilənib, məktəb və bağça avadanlıq və bütün ləvazimatlarla tam təmin olunub. Qeyd edək ki, ölkə başçısının «2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı»nın Əlavə Tədbirlər Planına Səbail rayonunda təhsil sahəsi üzrə 6 bənd salınıb ki, bir il ərzində 7 və 163 saylı məktəblərin, 157 saylı və «Turac» uşaq bağçalarının binalarının, 190 saylı məktəbin akt və idman zalının əsaslı təmiri, 70 saylı uşaq bağçasının isə əsaslı təmiri və əlavə musiqi zalı və 3 otağının tikintisi nəzərdə tutulub. Əlavə Tədbirlər Planının həyata keçirilməsi üçün artıq işlərə başlanılıb. 2012-ci il ərzində rayonda «2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı»nın icrasının davamı olaraq 49 saylı orta məktəb üçün yeni 660 şagird yerlik əlavə korpusun, 7 saylı orta məktəb üçün yeni idman, akt zalları və 8 sinif otaqları olan yeni korpusun tikintisi, 49, 50 və 203 saylı orta məktəblərin korpuslarının əsaslı təmiri başa çatıb.

Təhsil müəssisələrində həyata keçirilən işlərlə yaxından tanış olmaq üçün sentyabr ayının 4-də ölkə başçısı İlham Əliyev Badamdar qəsəbəsinə gələrək yeni tikilmiş 329 saylı orta məktəbin və uşaq bağçasının, sentyabrın 5-də isə 49 saylı “İntellekt» Liseyinin yeni tədris korpusunun və əsaslı təmirdən sonra liseyin köhnə binasının açılış mərasimlərində iştirak edib və görülən işlərin keyfiyyətindən razı qalıb.

Təhsil uğurlarının məkanı

Rayonun ötən tədris ilində təhsil müəssisələrinin qazandığı uğurlara gəldikdə isə 2011-2012-cu tədris ilində rayonun orta məktəblərini 1448 nəfər bitirib ki, onlardan 915 nəfəri tələbə adını qazanıb. Qəbul imtahanlarında abituriyentlərdən 173 nəfəri 500-dən yuxarı, 41 nəfəri 600-dən, 8 nəfəri isə 650-dən çox bal toplayıb. 87 məzun xarici ölkələrin ali məktəblərinə daxil olub. 2011-2012-ci təhsil ilinin yekununa görə, 11 məzun qızıl medal alıb, məzunlardan 2 nəfəri Prezident təqaüdünə layiq görülüb. İlin əvvəlindən etibarən rayonun orta məktəblərinin şagirdləri məktəblilərin respublika miqyaslı fənn olimpiadalarının fəal iştirakçılarından olublar. Sevindirici haldır ki, şagirdlər bu olimpiadalarda yüksək nəticələr əldə ediblər. Həmin bilik yarışmalarında 7, 91 və 190 saylı məktəblərdən – 1 nəfər, 236 saylı orta məktəbdən – 2 nəfər, 239 saylı orta məktəb, 160 saylı Klassik Gimnaziya və 132-134 saylı Təhsil Kompleksinin hər birindən 3 nəfər şagird mükafata layiq yerlərə çıxaraq diplom və qiymətli hədiyyələrlə təltif olunublar. Ümumilikdə rayon üzrə 14 nəfər şagird respublika miqyaslı müxtəlif fənn olimpiadalarının qaliblərindən olublar. Xəzər Universiteti ilə Səbail rayonu arasında mövcud olan dostluq əlaqələrinin nümunəsi kimi fevral ayında rayonun 400 nəfər IX sinif şagirdi üçün universitetdə sınaq imtahanları təşkil olunub. Bu ali təhsil müəssisəsi tərəfindən təşkil olunan respublikanın tam orta məktəblərinin XI sinif şagirdləri arasında I – II – III – IV qruplara daxil olan fənlər əsasında ənənəvi bilik olimpiadalarında rayonun şagirdləri yaxından iştirak ediblər. Aprelin 28-29-da universitetdə keçirilən bilik olimpiadasında I qrup üzrə 160 saylı Klassik Gimnaziyanın şagirdi K.Sərkarova I yerə, II qrup üzrə 189 saylı orta məktəbin şagirdi T.Əsədli III yerə, həmin qrup üzrə 236 saylı orta məktəbin şagirdi R.Məmmədzadə diploma layiq görülüb. Sevindirici haldır ki, keçən il rayon məktəblərinin 6 məzunu qızıl, bir məzunu isə gümüş medala layiq görülmüşdüsə, hazırkı təhsil ilinin yekununa görə, rayonun orta məktəblərinin 12 nəfər məzunu qızıl medala layiq görülüblər. Prezident İlham Əliyevin 28 iyun 2012-ci il tarixində imzaladığı «2011/2012-ci tədris ilində keçirilmiş «Ən yaxşı ümumtəhsil müəssisəsi» müsabiqəsinin qaliblərinin mükafatlandırılması haqqında» sərəncamına görə, Bakı şəhəri, Səbail rayonu 189 saylı orta məktəb qaliblər sırasında olub, qeyd olunan müsabiqədə müvəffəqiyyət qazandıqlarına görə məktəb birdəfəlik pul mükafatı ilə mükafatlandırılıb. Qeyd edək ki, artıq 5-ci ildir ki, keçirilən bu müsabiqədə rayonun 18 orta məktəbinin 12-si qaliblər sırasında olub. Prezidentin 28 iyun 2012-ci il tarixində imzaladığı «2011/2012-ci tədris ilində keçirilmiş «Ən yaxşı müəllim» müsabiqəsinin qaliblərinin mükafatlandırılması haqqında» sərəncamına görə, Bakı şəhəri, Səbail rayonundan 11 müəllim - 6 saylı tam orta məktəbin ibtidai sinif müəllimi E.Xəlilova, 49 saylı «İntellekt» Liseyinin ibtidai sinif müəllimi T.Əsədova, kimya müəllimi S.Axundova, Azərbaycan dili-ədəbiyyat müəllimi X.Qəmbərova, 132-134 saylı Təhsil Kompleksinin ingilis dili müəllimi S.Abbasova, biologiya müəllimi X.Muradova, 160 saylı Klassik Gimnaziyanın biologiya müəllimi N.Əliyeva, 189 saylı orta məktəbin rus dili müəllimi M.Mustafayeva, 190 saylı orta məktəbin ibtidai sinif müəllimi S.İbrahimli, musiqi müəllimi R.Hacızadə, 236 saylı orta məktəbin informatika müəllimi Ş.Əhmədova qaliblər sırasina çıxıb və birdəfəlik pul mükafatı ilə mükafatlandırılıblar. Müsabiqənin keçirildiyi 5 il ərzində Səbail rayon məktəblərinində çalışan müəllimlərdən 46 nəfər «Ən yaxşı müəllim» adına layiq görülüb.

“Bilik günü”ündən yeni uğurlara

Aprelin 27-də rayonun 6 saylı tam orta məktəbində Azərbaycanın Əməkdar elm xadimi, tibb elmləri doktoru, oftalmoloq alim, akademik Zərifə xanım Əliyevanın anadan olmasının 89-cu ildönümü ilə əlaqədar Səbail Rayon İcra Hakimiyyəti və Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə keçirilən «Zərifə Əliyeva – Ana, Qadın və Alim» mövzusunda inşa yazı müsabiqəsinin yekun tədbiri olub. Müsabiqədə rayonun orta məktəblərinin hər birindən 1 ən yaxşı inşa yazı olmaqla 19 inşa yazı seçilərək münsiflər heyətinə təqdim olunub. Tədbirin sonunda münsiflər heyətinə təqdim edilən inşalar içərisindən seçilən 16 inşa müəllifinə həvəsləndirici mükafatlar təqdim olunub, 1 nəfər 3-cü yer, 2 nəfər 2-ci yer tutub və həmçinin müsabiqənin qalibi elan olunmuş Bakı Oksford Məktəbinin 10-cu sinif şagirdi İ.Əsgərli Səbail Rayon İcra Hakimiyyəti tərəfindən qiymətli hədiyyələrlə mükafatlandırılıb. May ayının 2-də Azərbaycan xalqının ümummilli lideri Heydər Əliyevin anadan olmasının 87 illiyi ilə əlaqədar Səbail rayonunda keçirilən ənənəvi «Gül bayramı» ilə əlaqədar rayonun orta və orta ixtisas məktəblərinin, Uşaq Yaradıcılıq Mərkəzinin şagirdlərinin müxtəlif çiçək və güllərdən, bitkilərdən, yarpaqlardan hazırladıqları rəngarəng tablolar, aplikasiyalar, gül kompozisiyaları öz görünüşü və gözəlliyi ilə seçilib, şagirdlərin fantaziyaları və imkanları nümayiş etdirilib, bütün bunlar isə bayramda iştirak edən Bakı sakinlərinin və şəhərimizin çoxsaylı qonaqlarının diqqətini cəlb edib. Bakı Şəhər İcra Hakimiyyətinin müsabiqə komissiyası tərəfindən «Gül bayramı»nda nümayiş etdirdikləri əl işlərinə görə 236 saylı orta məktəbin şagirdi Ü.Əhmədova, 239 saylı orta məktəbin şagirdi E.Mürsəlova, 35 saylı Texniki Yaradıcılıq Mərkəzinin şagirdi G.Abbasova, Azərbaycan Dövlət Pedaqoji Universitetinin tələbələri Ə.Cəfərova və A.Dadaşova Bakı Şəhər İcra Hakimiyyəti tərəfindən Fəxri Fərman və pul mükafatı ilə mükafatlandırılıb. Həmçinin Bakı Oksford Məktəbinin və 91 saylı orta məktəbin gül geyimli uşaqları, 136 saylı uşaq bağçası və Cövdət Hacıyev adına 3 saylı musiqi məktəbi Bakı Şəhər İcra Hakimiyyəti tərəfindən Fəxri Fərmanla mükafatlandırılıb. Onu da qeyd edək ki, yeniyetmə və gənclərin yay istirahətinin səmərəli və yaddaqalan təşkili hər zaman Səbail Rayon İcra Hakimiyyətinin diqqət mərkəzində olub. Cari ilin yay aylarında bu istiqamətdə bir sıra tədbirlər hazırlanıb həyata keçirilib. Səbail Rayon İcra Hakimiyyətinin təşəbbüsü, Quba Rayon İcra Hakimiyyəti, DİN Daxili Qoşunlar Komandanlığı və “Çağ” Öyrətim Şirkətinin birgə layihəsi əsasında ənənəvi təşkil olunan «Şahinlər» yay istirahət düşərgəsi yaradılıb və rayonun aztəminatlı ailələrinin, Qarabağ müharibəsi veteranlarının övladları və orta məktəblərin 150 nəfərə yaxın şagirdi üçün 2 həftəlik pulsuz kompyuter və xarici dil kursları təşkil olunub. Qeyd edək ki, belə düşərgə artıq 7-ci dəfədir ki, təşkil olunur və məktəblilər bu yay mövsümünü də şən, əyləncəli başa vurdular. Beləliklə, bugünlərdə Səbail rayondakı ali tədris ocaqlarının tələbələri, eləcə də məktəblilər yeni təmir olunmuş təhsil müəssisələrində “Bilik günü”nü qeyd etdilər. Yəqin ki, cari tədris ilində də Səbail tədris müəssisələri çoxsaylı uğurlara imza atacaqlar.

Nigar Abdullayeva

Palitra.- 2012.- 25 sentyabr.- S.12.

Səbail Rayon İcra Hakimiyyəti və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim etmək üçün