Turizmin mədəniyyətlərarası dialoqda yeri və rolu»

Azərbaycan Turizm İnstitutu (ATİ) Turizm Peşə Məktəbində 2013-cü ilin mayında Bakıda keçiriləcək Dünya Mədəniyyətlərarası Dialoq Forumuna hazırlıq və Dünya Turizm Günü münasibətilə «Turizmin mədəniyyətlərarası dialoqda yeri və rolu» mövzusunda konfrans keçirildi.

ATİ-nin və Dialoq Avrasiya Platformunun (DAP) birgə təşkilatçılığı ilə baş tutan tədbiri giriş sözü ilə Turizm İnstitutunun rektoru, professor Cəfər Cəfərov açaraq bildirdi ki, konfransın keçirilməsində əsas məqsəd turizmin xalqlar və insanlar arasında ünsiyyətin çoxalmasında hansı rolu olduğunu araşdırmaq və bu mövzu ətrafında fikir mübadiləsi aparmaqdır: “Turizm Azərbaycan iqtisadiyyatının əhəmiyyətli bir hissəsi inkişaf etməkdədir. Yeni tikilən hotellər, infrastruktur layihələri, peşəkar kadrların hazırlanıb sənayeyə buraxılması və s. Azərbaycanın turizm potensialını daha yaxşı formada ortaya qoymağa şərait yaradır. Artıq ölkəmiz dünyanın nəhəng turizm xəritəsində vacib bir turizm destinasiyası kimi qeyd olunur. Azərbaycan nüfuzlu tədbirlərin, konfransların, beynəlxalq idman yarışlarının keçirildiyi bir məkana çevrilib. Bütün bunlar «Azərbaycan haradır», «Azərbaycanlılar kimdirlər» deyə maraqlanan insanların fikir və təsəvvürlərini dəyişir. Şəxsən mən öz şahidi olduğum hadisələrə görə deyə bilərəm ki, ölkəmizə gələn insanların bizim haqqımızda fikirləri çox yüksəkdir. Onlarda «Gəldik və sözün yaxşı mənasında şoka düşdük» təəssüratları formalaşır. Amma hazırda etiraf etməli bir faktor da var ki, mövcud potensialımızı daha yaxşı formada təqdim etməyimiz üçün peşəkar kadrlara ehtiyac var. Bu da tədricən həll olunur. Dövlət başçısının sərəncamı ilə yaradılan Turizm İnstitutu artıq 500 kadr hazırlayıb istehsalata təhvil verib. Bu kadrlar ölkənin ən samballı hotellərində çalışırlar. Bu ildən ATİ-nin nəzdində Bakı Turizm Peşə Məktəbi də fəaliyyətə başlayıb. Turizm təhsilinin bütün pilləri üzrə Mədəniyyət və Turizm Nazirliyinin çərçivəsində artıq bir şəbəkə formalaşıb. Vaxt gələcək Azərbaycanda turizm təhsili almaq uğrunda bir rəqabət yaranacaq. Bu dünyanın bütün ölkələrində belədir. İnsanlar gələcəyi, perspektivi olan sahələrdə çalışmaq istəyirlər”. Bildirildi ki, Azərbaycan mədəniyyələrarası dialoqu öz üzərinə götürüb. Bununla bağlı artıq böyük bir forum Bakıda 2011-ci ildə baş tutub. Növbəti tədbirin keçirilməsi üçün də hazırlıqlar gedir. Hazırkı konfrans da həmin prosesə hazırlığın tərkib hissəsidir.

Rektor Cəfər Cəfərov çıxışında ATİ-nin 7 illik fəaliyyəti dövründə ölkə ali təhsil ocaqları sırasında bir sıra yeniliklərə ilk imza atdığını dedi. O bildirdi ki, hazırda ATİ-də təhsilin bütün səviyyələrində 2000-dən çox gəncin turizm sahəsi üzrə kadr hazırlığını həyata keçirilir.

Dialoq Avrasiya Platformunun (DAP) Azərbaycan üzrə koordinatoru Mustafa Saatçı bildirdi ki, bu gün insanlar arasında nifaq salmağa, onların bir-biri ilə düşmənçilik etməsinə çalışan qüvvələr var: “Mədəniyyət xalqlar arasında mehriban münasibətlərin formalaşmasında böyük rol oynayır. Bu tədbirin məqsədi isə turizmin mədəniyyətlərarası dialoqda rolunu müzakirə etməkdir”. BMT-nin İctimai İnformasiya Departamentinin Azərbaycan üzrə nümayəndəsinin müavini Vəfa Səfərli bildirdi ki, BMT-nin baş katibi Pan Gi Mun 27 Sentyabr - Dünya Turizm Günü münasibətilə dünya ictimaiyyətinə müraciət edib. Onun sözlərinə görə, baş katib bildirib ki, 2012-ci ilin mövzusu «Turizm və davamlı enerji: davamlı inkişafı gücləndirərək»dir. BMT nümayəndəsi qeyd etdi ki, davamlı turizmdə hər kəsin bir öhdəliyi var: «Bunun təhsil müəssisələrinə birbaşa aidiyyəti var. «Çağ Öyrətim İşlətmələri» şirkətinin İdarə Heyətinin sədri Ənvər Özerin çıxışını «Turizm və dialoqda təhsilin önəmi» üzərində qurdu. O bildirdi ki, Azərbaycan minilliklər boyu Şərqlə Qərbin qovuşuğunda yerləşdiyindən burada fərqli mədəniyyətlərin müxtəlif dinlərin nümayəndələrinin bir-biri ilə ünsiyyət qura bilməsi normaldır. Ənvər Özerin rəhbərlik etdiyi təhsil qurumunun proqramları ilə Azərbaycanın turizm potensailının xarici ölkələrdə tanıdılmasından və eyni zamanda burada keçirilən tədbirlərdə bu istiqamətlərdə müxtəlif işlərin aparılmasından danışdı. Türkiyənin ölkəmizdəki səfirliyinin mədəniyyət və təbliğat müşaviri Seyit Ahmet Arslan isə dünyada turizm sahəsində son 5-6 il ərzində əldə edilən nəticələr, Türkiyənin dünya turizm bazarında yeri və rolu barədə məlumat verdi.

ATİ-nin dekanı Nəsrulla Nəsirli və institutun dosenti Minaxanım Əsədovanın məruzələri də tədbir iştirakçıları tərəfindən maraqla qarşılandı.

Nigar Abdullayeva

Palitra.- 2012.- 28 sentyabr.- S.7.