“Eurovision 2012” mahnı müsabiqəsi və QHT-lər

Artıq hər kəsə məlumdur ki, “Eurovision-2012” yarışması paytaxtımız Bakı şəhərində keçiriləcək. Deməli Bakı bu il “Eurovision” paytaxtı olmaqla bərabər bütün dünyanın diqqətini özünə cəlb edəcək. Hökumət tərəfindən “Eurovision-2012” mahnı müsabiqəsinin təşkili ilə bağlı komitə yaradılıb və dövlət səviyyəsində müəyyən işlər aparılır. Bu məqsədlə Bakı şəhərində musiqi yarışmasının yüksək standartlara uyğun təşkili və bütün dünyada Azərbaycanın təbliği üçün dövlət tərəfindən böyük yenidənqurma və bərpa işləri görülməkdədir. Bununla bərabər hökumətin müxtəlif strukturları kompleks layihələr həyata keçirməkdədirlər.

Yaxud ictimai təhlükəsizliyin qorunmasına cavabdeh olan polis işçiləri ingilis dili kurslarına cəlb olunublar. Həmçinin əhalinin yüksək keyfiyyətli internetlə təmin olunması məqsədilə bir sıra layihələr həyata keçirilir və sair. Bəs gəlin baxaq, ictimai səviyyədə bu sahədə görülən işlərə hansı dəstək var? İctimai mühit, cəmiyyət, vətəndaş cəmiyyəti strukturları bu məsələlərə necə yanaşır və hansı töhfələr verməyə qabildir?Layihə çərçivəsində mövzu ilə bağlı bizə fikirlərini bildirən Vətəndaş Cəmiyyəti Problemlərinin Tədqiqi Mərkəzinin sədri Elməddin Hacılı deyir ki, ictimai mühit bu barədə lazımi tələblərə cavab verməlidir: “Qeyd etmək lazımdır ki, kifayət qədər mötəbər, dünya səviyyəli musiqi yarışmasına ölkəmizin ev sahibliyi etməsi Azərbaycan üçün ictimai, siyasi, mədəni cəhətdən böyük əhəmiyyət kəsb edir. Dövlətin etdiyi işlərlə yanaşı musuqi yarışmasının daha effektiv təşkili və beynəlxalq aləmdə Azərbaycanın müsbət imici üçün ictimai dəstəyi olması ən vacib amillərdən biridir. Bu baxımdan cəmiyyəti, ictimai mühiti hazırlmaq üçün vətəndaş cəmiyyətinin əsas strukturlarından olan qeyri-hökumət təşkilatları da bu fəaliyyətdə daha yaxından iştirak etməlidirlər və onların üzərinə böyük məsuliyyət, yük düşür. Ona görə ki, bu möhtəşəm tədbiri layiqincə həyata keçirmək və Azərbaycanın bütün müsbət tərəflərini üzə çıxarmaq, bu xüsusiyyətləri təbliğ etmək hər bir vətəndaşın borcudur. Bu məqsədlə dövlət və digər ictimai institutlarla bərabər QHT-lərin də müəyyən təşəbbüslər göstərməsinə və ciddi layihələr icra etməsinə, həyata keçirməsinə böyük ehiyac duyulur”. Tədqirəlayiq haldır ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən elan edilən son müsabiqədə “Eurovision-2012” musiqi yarışması ilə bağlı QHT-lərin təşəbbüslərini və layihələrini həyata keçirmək üçün xüsusi istiqamət ayrılıb. Bu məqamla bağlı E.Hacılı belə qeyd edir: “Məlumat üçün bildirmək istərdim ki, şura dekabrın 9-da 2012-ci il üçün QHT layihələrinin maliyyələşdirilməsi ilə bağlı müsabiqədə 4-cü istiqamət olan, “Eurovision- 2012” mahnı müsabiqəsilə bağlı keçirilən tədbirlərə ictimai dəstək üçün - 10 min, ümumi fond 80 min manat məbləğındədir. Onu da qeyd etmək yerinə düşərdi ki, buna qədər də şuranın dəstəyi ilə bir neçə QHT tərəfindən göstərilən istiqamətdə layihələr həyata keçirilib. Bu məqsədlə icra olunan layihələrdə “Eurovision-2012” öncəsi mövcud olan problemlər təhlil olunub və bununla bağlı araşdırma yazıları çap olunub, mütəxəssislərlə müsahibələr hazırlanıb, paytaxtımızın ictimai-mənəvi mühitinin əsas cəhətlər qeyd olunub və bir sıra maarifləndirici çağırışlar edilib. Əhali qrupları üçün hazırlanmış maarifləndirici, təbliğat vasitələrində ictimai-mədəni davranış qaydaları nəzərə çatdırılıb”. Bununla belə, bir sıra problemlər hələ də aktuallığını saxlayır: “Amma bu gün hər birimizi narahat edən ictmai,mədəni davranış qaydalarında problemlərin mövcudluğu - bəzi vətəndaşlar tərəfindən ictimai yerlərdə, küçə və parklarda məişət tullantılarının təyin olunmayan yerlərə atılması, sərnişin nəqliyyatlarında təmizliyə riayət olunmaması, eyni zamanda sərnişinlərin, sürücülərin davranış qaydalarına əməl etməmələri və sair aradan qaldırılmalı olan məqamlar ölkəmizin imici üçün mənfi xüsusiyyətlər kimi diqqəti cəlb edə bilər. Düşünürük ki, bu gün göstərilən problemlərin həll olunmaması və “Eurovision 2012” günlərində də özünü büruzə verməsi ölkəmizə gələcək minlərlə xarici qonağın, icimaiyyət nümayəndələrinin Azərbaycanla bağlı təsəvvürlərində mənfi təəssürat oyada bilər. Onu da qeyd etməliyəm ki, sözsüz ki,müsabiqənin gedişi zamanı Azərbaycana düşmən münasibətdə olan xarici media nümayəndələri daha çox mənfi məqamların işıqlandırılmasına çalışacaqlar. Bu, gözləniləndir. Buna görə də göstərilən problemlər qısa zamanda öz həllini tapmalıdır. Əlbəttə aidiyyəti qurumların və vətəndaş cəmiyyətinin birgə səyi ilə. Artıq QHT-lərə Dövlət Dəstəyi Şurası rəsmilərinin bildirdiyinə görə də 2012-ci il üçün I qrant müsabiqəsi ötən ilin dekabrın 30-da başa çatıb və “Eurovision-2012” ilə bağlı xeyli təkliflər alıblar. Lakin yenə də müsabiqədənkənar şəkildə təklifləri dəyərləndirməyə hazır olduqlarını bildirirlər. Verilən informasiyalardan aydın olur ki, şuraya təqdim olunan layihə və təkilflər daha çox əhalinin ictimai maarifləndirilməsi, ictimai davranış qaydalarının təkmilləşdirilməsi, sürücülərin və digər ictimai xidmət sahəsində çalışanların məlumatlandırılması, vətəndaş mədəniyyətinin inkişafı, təmizlik psixologiyasının formalaşması, eləcə də milli suvenirlərin hazırlanması və sair mövzulardadır. Bundan başqa QHT-lər xarici qonaqlarla iş aparılması istiqamətində müəyyən fəaliyyət proqramları da hazırlamalıdır”.Amma bu gün QHT-lərin “Eurovision 2012” ilə bağlı fəaliyyətlərində çatışmayan məqamlar da hiss olunmaqdadır: “Gəlin baxaq, QHT-lər əvvəlki illərdə digər ölkələrdə keçrilən bu musiqi yarışmasında həmin ölkələrin QHT-lərinin yarışma öncəsi fəaliyyətini, təcrübəsini nə dərəcədə öyrənib araşdırıb, təhlil edib və bizim cəmiyyətə çatdırıblar? Fikrimizcə, QHT-lər bu istiqamətə ciddi fikir verməlidir. Daha bir məsələ QHT-lərlə biznes qurumları, özəl sektor arasında və əməkdaşlığı sayəsində “Eurovision-2012” bağlı birgə layihələrin icrası ola bilər. Əlbəttə, bu məsələdə QHT-lərlə bərabər özəl sektorun da üzərinə böyük məsuliyyət düşür. QHT-lər müəyyən təşəbbüs və layihələrlə biznes qurumları qarşısında çıxış etməli, layihələrinin dəstək qazanmasına çalışmalıdırlar. Eyni zamanda biznes qurumları da QHT-lərin təşəbbüslərini dəyərləndirməli, uğurlu sayıla biləcək layihəyə dəstək verməlidirlər. Bu kampaniyanın yüksək səviyyədə, ölkəmizə layiq, dünyaya müsbət mənada səs sala biləcək səviyyədə keçirilməsi üçün özəl sektorun QHT-lərin təkilflərini də dəstəkləyəcəyinə ümid edirik. Üçüncü bir məqam da QHT-lərin “Eurovision-2012” ilə bağlı layihələrinin icrası zamanı mövzunun ictimai əhəmiyyətini nəzərə alaraq KİV-in, sosial şəbəkələrin imkanlarından maksimum şəkildə istifadə etməsidir. Bu məqsədlə QHT-lər hər bir fəaliyyətləri haqqında KİV-ə məlumat verməli və keçirilən layihələr haqqında cəmiyyətə yüksək səviyyədə informasiya çatdırmağı bacarmalıdırlar”.Sonda qeyd etmək lazımdır ki, bütün bunlar “Eurovision 2012” yarışmasının daha effektiv həyata keçirilməsi və yüksək səviyyədə təşkili üçün vacib amillər hesab olunmalıdır: “Əvvəla, həmin günlər Azərbaycan bütün dünyanın diqqət mərkəzində olacaq. Eyni zamanda musiqi yarışmasının gedişini izləmək üçün ölkəmizə gələcək minlərlə xarici qonağın təsəvvüründə Azərbaycan haqqında, onun tarixi, maddi və mənəvi mədəniyyəti, şəhərimizin müasir gözəlliyi, möhtəşəmliyi haqqında müsbət hisslər yaradacaq . Və ümid edirik ki, həm dövlət, həm biznes qurumları və QHT-lər, eyni zamanda digər ictimai institutlar tərəfindən icra olunacaq layihələr zamanı hər bir tərəf öz üzərinə düşən məsuliyyəti dərk edərək müsabiqənin möhtəşəm keçirilməsinə çalışacaq. Əlbəttə, qeyd olunan bütün məsələlərin həllinin paytaxtımızın qarşıdakı “Eurovision” günlərində hər bir kəsin yaddaşında müsbət mənada təəssürat oyadacağına əmin ola bilərik”.

İlkin AĞAYEV

Palitra.- 2012.- 11 yanvar.- S. 6.