«Hacıqabulda müasir mədəniyyət müəssisələrinin inşasına ehtiyac var»

Mehdi Fərəcov: «Rayonun mədəniyyət müəssisələrində xalq yaradıcılığı, bədii özfəaliyyət kollektivlərinin işi xeyli yaxşılaşıb və genişlənib»

Layihə çərçivəsində müsahibimiz Hacıqabul rayon Mədəniyyət və Turizm Şöbəsinin müdir əvəzi Mehdi Fərəcovdur: - İlk öncə onu qeyd edim ki, hər il tarixi hadisələr və bayramlar habelə yubileylərlə bağlı rayon Mədəniyyət və Turizm Şöbəsində geniş tədbirlər planı hazırlanaraq həyata keçirilir. Yeni başlayan 2012-ci illə bağlı da tədbirlər planı tərtib etmişik. Artıq 20 Yanvar faciəsi ilə bağlı rayonda geniş tədbirlər həyata keçirilib. Şöbəmiz bu faciənin xalqımızın yaddaşında daimi olaraq həkk olunması, azadlıq, müstəqillik uğrunda müqəddəs mübarizənin gənclərə aşılanması üçün belə tədbirlərdən geniş şəkildə istifadə edir. Gələn ay Xocalı soyqırımının 20 ili tamam olacaq. Bu faciənin 20-ci ildöünümü ilə bağlı rayonumuzda müxtəlif tədbirlərin keçirilməsi nəzərdə tutulub. Rayonun mədəniyyət müəssisələri Xocalı soyqırımının yad olunması üçün hər il tədbirlər keçirir, bu il isə tədbirlərimiz daha geniş olacaq. 31 Mart Azərbaycanlıların Soyqırımı Günü ilə bağlı da tədbirlər həyata keçirməyi planlaşdırmışıq. Ümumiyyətlə il ərzində əlamətdar günlər və bayramlarla yanaşı, rayonun mədəniyyət müəssisələrində elm və ədəbiyyat, mədəniyyət xadimlərinin yubileylərinə, xatirə günlərinə həsr edilmiş tədbirlər hazırlanaraq həyata keçirilir. Ötən il yazıçılar Aslan Aslanovun 85, Zaman Qarayevin 80, şairə Əminə Gülgünün 85, Nəsrəddin Tusinin 810, Əli Vəliyevin 110 , Xalq şairi Süleyman Rustəmin 105, Nahid Hacızadənin 75, Əli Kərimin 75, Xalq şairi Səməd Vurğunun 105, şair Ənvər Əlibəylinin 95 , ümummilli lider Heydər Əliyevin 88, Nizami Gəncəvinin 870, yazıçı Ələviyyə Babayevanın, şair Novruz Gəncəlinin 90, Xalq şairi Mirzə İbrahimovun 100, yazıçı Çingiz Əkbərzadənin 75, aşıq Pənahın 85, şair Şahmar Əkbərzadənin 70, Nüsrət Kəsəmənlinin 6 5, Ə.Cəfərzadənin 90 illiyinə aid tədbirlər hazırlanaraq həyata keçirilib. Bildiyiniz kimi ötən il ölkəmizdə dövlət müstəqilliyinin bərpasının iyirminci ildönümü yüksək səviyyədə qeyd edildi. Rayon Mədəniyyət və Turizm Şöbəsi olaraq biz də müstəqilliyin ildönümü ilə bağlı tədbirlər həyata keçirdik. Tədbirlər planına əsasən Hacıqabul rayon Mədəniyyət Evində, kənd mədəniyyət evləri və klublarında, rayon Mərkəzi Kitabxanası və onun filiallarında, şəhər 7 illik Uşaq Musiqi Məktəbində, Heydər Əliyev Mərkəzində, rayon Tarix-Diyarşünaslıq Muzeyində “Müstəqilliyimiz əbədidir, dönməzdir, daimidir”, “Müstəqilliyimiz əbədidir”, «Heydər Əliyev və müstəqil Azərbaycan», «Qoy Azərbaycan xalqının müstəqilliyi əbədi yaşasın”, “Heydər Əliyev və Azərbaycanda milli siyasət”, “Heydər Əliyev və Azərbaycan mədəniyyəti” mövzularında tədbirlər hazırlanaraq həyata keçirilib. Tədbirlərimizdə rayonun geniş ictimaiyyəti, idarə və müəssisələrin işçiləri, məktəblilər yaxından iştirak edirlər. Dövlət başçısı tərəfindən təsdiq edilmiş “Azərbaycan gəncliyi 2011-2015-ci illərdə Dövlət Proqramı»nın icrası ilə bağlı Hacıqabul rayon Gənclər və İdman İdarəsi ilə birlikdə rayonun mədəniyyət müəssisələrdə “Azərbaycan gəncliyi bu gün”, “Gənclər bizim gələcəyimizdir”, “Azərbaycanın milli qəhrəmanları”, “Vətəni qorumaq hamının müqəddəs borcudur”, “Vətən üçün alışıb, vətən üçün yanaq”, ”Azərbaycanının oğul və qızları Qarabağ döyüşlərində”adlı foto stendentlər təşkil olunub, söhbətlər keçirilib, məruzə və mühazirələr oxunub. Eyni zamanda rayon Gənclər və İdman İdarəsi ilə birlikdə gənclər arasında idman yarışları keçirilib, əl işlərindən ibarət sərgilər təşkil edilib, yarışlarda və müsabiqələrdə qalib gələnlər mükafatlandırılıb. “Dövlət orqanlarında elektron xidmətlər göstərilməsinin təşkili sahəsində bəzi tədbirlər haqqında” fərmanının icrası ilə əlaqədar olaraq Hacıqabul rayon Mərkəzi Kitabxanasının saytı yaradılıb, Hacıqabul rayon Mədəniyyət vəTurizm Şöbəsinin internetə çıxışı var, saytın yaradılması istiqamətində işlər davam etdirilir.

- Mədəniyyətimizin təbliğ olunması istiqamətində hansı işlər həyata keçirirsiz?

- Mədəniyyət və Turizm Nazirliyi tərəfindən Şirvan şəhərində keçirilən “Xor kollektivlərinin respublika baxış müsabiqəsində” və 2011-ci ilin dekabr ayında Şirvan şəhərində keçirilən “Xalq Musiqi İfaçılığı”, Bakı şəhərində keçirilən “Xalq Musiqi Alətləri İfaçılığı” üzrə respublika müsabiqəsində rayon kollektivlərinin, yaradıcı gənclərin iştirakı təmin olunb. Həmin müsabiqələrdə qaboy ixtisası üzrə Əliyev Natiq Rüfət oğlu, tar ixtisası üzrə Atamoğlanov Elşən Həmid oğlu, İbrahimov Həbib Elçin oğlu, qarmon ixtisası üzrə Hüseynov Samir Mətləb oğlu qalib gəlib, Mədəniyyət və Turizm Nazirliyi tərəfindən Fəxri fərmanla təltif olunublar. Hərbi vətənpərvərlik və mədəni hamilik işi sahəsində rayon Mədəniyyət və Turizm Şöbəsinin tədbirlər planına uyğun olaraq hərbi vətənpərvərlik və mədəni hamilik üzrə müxtəlif məzmunlu tədbirlər həyata keçirilib. Rayon ərazisində yerləşən “N” saylı hərbi hissədə andiçmə mərasimlərində, Hərbi Komissarlıqda Azərbaycan ordusu sıralarına çağrışla əlaqədar çağırışçı gənclərin hərbi xidmətə yola salınma mərasimlərində şəhər Uşaq Musiqi Məktəbinin müəllim və şagird kollektivi, rayon Mədəniyyət Evinin, şəhər klubunun özfəaliyyət kollektivləri konsert proqramları ilə çıxış edirlər. Rayon Mərkəzi Kitabxanası və şəhər Uşaq Musiqi Məktəbi “N” saylı Hərbi hissədə “Azərbaycan Ordusu milli qürur mənbəyimizdir” adlı musiqili ədəbi-bədii kompozissiyalar nümayiş etdirib. Keçirilən tədbirlər barədə Mədəniyyət və Turizm Nazirliyinə hər rüb məlumat verilir. Hacıqabul rayon Mədəniyyət və Turizm Şöbəsi rayon ərazisində yerləşən “N” saylı hərbi hissəni hamiliyə götürüb. Rayonun mədəniyyət müəssisələrində xalq yaradıcılığı, bədii özfəaliyyət kollektivlərinin işi xeyli yaxşılaşıb və genişlənib. İl ərzində rayon Mədəniyyət Evinin, Muğan qəsəbə klubunun musiqi kollektivləri, Mədəniyyət Evinin muğam üçlüyü, rəqs qrupları, rayonda və yerlərdə keçirilən tədbirlərdə, peşə bayramlarında, əhali qarşısında daima çıxışlar edirlər. Xüsusilə qeyd etmək lazımdır ki, rayon Mədəniyyət Evinin və şəhər klubunun musiqi kollektivləri, şəhər Uşaq Musiqi Məktəbinin müəllim və şagird kollektivi ilboyu “N” saylı hərbi hissədə geniş konsert proqramları ilə çıxışlar edirlər.

- Hansı problemlərlə qarşılaşırsınız?

- Qeyd edim ki, rayon ərazisində 14 yerli və ölkə əhəmiyyətli tarix-memarlıq və arxeoloji abidələr var. Ötən dövr ərzində 18 yeni abidə aşkar olunub.

Şəhər 7 illik Uşaq Musiqi Məktəbində, rayon Mərkəzi Kitabxanasında, rayon Tarix-Diyarşünaslıq muzeyində, Atbulaq, Meynəman, Navahı kənd mədəniyyət evlərində, Qarasu, Pirsaatçay, Atbulaq, Qubalı -Balaoğlan kənd klublarında əsaslı və cari təmir işləri aparılıb. Rayon Mədəniyyət və Turizm Şöbəsində və onun tabeliyində olan mədəniyyət müəssisələrində görülmüş işlərlə yanaşı bir sıra problemlər də mövcuddur. Belə ki, rayon Tarix-Diyarşünaslıq Muzeyi «Azərxalça» Elmi Yaradıcılıq İstehsalat Birliyinin balansında olan uyğunlaşdırılmış binada yerləşir və yeni müasir tələblərə cavab verən Tarix-Diyarşünaslıq Muzeyinin inşa edilməsinə ehtiyac var. Bundan əlavə rayon Mərkəzi Kitabxanası, rayon Uşaq Kitabxanası, şəhər 7 illik Uşaq Musiqi Məktəbi, icra nümayəndəlikləri ərazisində yerləşən kitabxana və klublar uyğunlaşdırılmış binalarda yerləşir. Bu isə əhaliyyə yüksək səviyyədə mədəni xidmət göstərilməsinə öz təsirini göstərir. Rayonda müasir tələblərə cavab verən mədəniyyət müəssisələrinin inşa edilməsinə və əsaslı təmirinə, musiqi alətlərinə, klub müəssisələrinin tamaşa zalı üçün oturacaqlara böyük ehtiyac var. Kənd mədəniyyət müəssisələri rayon ərazisindən xeyli aralıda yerləşdiyi üçün mədəniyyət müəssisələrinə vaxtaşırı gedişlərin təşkili problemlər yaradır. Bunun üçün nəqliyyat vasitəsinə, həmiçinin mədəniyyət müəssisələrində, xüsusən klub müəssisələrində və kitabxanalarda ixtisaslı kadrlara böyük ehtiyac var. Bu da işlərimizdə müəyyən çətinlik və problemlər yaradır. Ötən il qəza vəziyyətində olan 2 kənd Mədəniyyət Evi yeni binaya köçürülüb, əsaslı və cari təmir işləri görülərək istifadəyə verilib. 2 kitabxana filialı münasib binaya köçürülüb, 9 kənd klubu, 24 kənd kitabxana filialının , 4 Mədəniyyət Evinin əsaslı təmirə ehtiyacı var. Amma bu problemlər bizə işimizi yüksək səviyyədə qurmaqda bizə mane olmur. Əminik ki, sadaladığım problemlər ən qısa zamanda həllini tapacaq və mədəniyyət müəssisələrimiz işini müasir dövrün tələblərinə uyğun quracaqlar.

Anar Miriyev

Palitra.-2012.-27 yanvar.-S.7.