Gələcəkdə sənəd qəbulu
komissiyalarına ehtiyac olmayacaq
Ali və orta
ixtisas təhsili müəssisələrinə
ərizə qəbulu aprelin 9-dan etibarən
başlayır
Tələbə
Qəbulu üzrə Dövlət Komissiyasının (TQDK) sədri
Məleykə Abbaszadə dünən keçirdiyi mətbuat
konfransında bildirdi ki, Azərbaycanda 2013/2014-cü tədris
ili üzrə ali və orta ixtisas təhsili müəssisələrinə
ərizə qəbuluna aprelin 9-dan etibarən başlanacaq.
Ərizələrin qəbulu mayın 17-dək davam edəcək. TQDK sədrinin sözlərinə görə, abituriyentlər aprelin 15-dən mayın 17-dək təqdim etdikləri ərizəni təsdiq etdirməlidirlər: “Ali və orta ixtisas təhsili müəssisələrinə qəbul imtahanında iştirak etmək üçün abituriyentlər internet vasitəsilə TQDK-nın rəsmi saytında “Abituriyentin elektron ərizəsi”ni doldurmalı və lazımi sənədləri TQDK tərəfindən yaradılmış Sənəd Qəbulu Komissiyalarına şəxsən təqdim etməklə ərizələrini təsdiq etdirməlidirlər. Xüsusi təyinatlı təhsil müəssisələrinə qəbul olmaq istəyənlər müvafiq təhsil müəssisəsində yaradılmış Sənəd Qəbulu Komissiyasına lazımi sənədlərlə yanaşı sağlamlıq və fiziki vəziyyətləri haqqında arayış və özləri haqqında məlumat təqdim etməlidirlər.
Ali və orta ixtisas təhsili müəssisələrinin xüsusi qabiliyyət tələb edən ixtisasları üzrə təhsil almaq istəyən abituriyentlər elektron ərizələrini rəsmiləşdirdikdən sonra, TQDK tərəfindən yaradılmış müvafiq Qabiliyyət İmtahanı Komissiyalarına tələb olunan sənədləri və yaradıcılıq fəaliyyətinə dair işlərini təqdim etməklə seçmə turda iştirak edirlər. Qabiliyyət İmtahanı Komissiyalarında abituriyentlərin seçdikləri xüsusi qabiliyyət tələb edən ixtisaslara yararlılığı yoxlanılır və yoxlamadan müvəffəqiyyətlə keçənlər qeydiyyata alınırlar. Qeydiyyata alınmış abituriyentlər TQDK tərəfindən mərkəzləşdirilmiş qaydada keçirilən test imtahanlarında iştirak edir və test imtahanlarında topladıqları ümumi balları TQDK tərəfindən müəyyən edilən müsabiqə şərtlərinə uyğun olduqda qabiliyyət imtahanlarına buraxılırlar. Qabiliyyət imtahanlarının keçirilməsi TQDK tərəfindən müəyyən edilən qaydalarla tənzimlənir”.
Abituriyentlərin böyük
hissəsi ərizəsini özü təsdiqləyəcək
TQDK sədri bildirdi ki, builki qəbul imtahanlarında iştirakı gözlənilən abituriyentlərin böyük hissəsi ərizəsini özü təsdiqləyəcək: “Onların bunun üçün sənəd qəbulu komissiyalarına müraciət etməsinə ehtiyac qalmayacaq”. O qeyd etdi ki, həmin abituriyentlər ümumi təhsil müəssisələrini 2012/2013-cü tədris ilində bitirən, ilk-peşə ixtisas təhsili müəssisələrini 2012/2013-cü tədris ilində bitirən qız abituriyentlər, 2011/2012-ci və 2012/2013-cü tədris illəri üçün Azərbaycanın ali təhsil müəssisələrinin bakalavriat səviyyəsinə və tam orta təhsil bazasında orta ixtisas təhsili müəssisələrinə qəbul imtahanlarında iştirak etmək üçün ərizə verib onu təsdiq etdirmiş qız abituriyentlərdir. M. Abbaszadənin sözlərinə görə, bu məsələdə qızlar və oğlanlar arasında bərabərlik pozulub. O vurğulayıb ki, bu da oğlan abituriyentlərin hərbi xidmət məsələsi ilə əlaqədardır: “Əvvəlki illərin oğlan məzunlarının hərbi xidmətdən möhlət hüququ olmalıdır ki, onlar öz ərizələrini təsdiq etdirə bilsinlər. Lakin abituriyentlərin hərbi xidmətdən möhlət hüququnun olmasının elektron formada təsdiqlənməsini hələ ki, həyata keçirə bilmirik. Bununla əlaqədar müvafiq qurumlarla əlaqə saxlanılıb. Onlar söz veriblər ki, bu məlumatlar elektron bazada hazır olacaq. Kim hərbi xidmətdən möhlət hüququ alacaqsa, bu barədə məlumat dərhal elektron bazaya daxil ediləcək. Bununla da ali məktəblərə sənəd verən və hərbi xidmətdən möhlət hüququ alan oğlan abituriyentlərin öz ərizələrini təsdiq etdirmələri üçün sənəd qəbulu komissiyalarına getməsinə ehtiyac qalmayacaq”. TQDK sədri vurğuladı ki, bütün bunları həyata keçirəndən sonra gələcəkdə Azərbaycanda sənəd qəbulu komissiyaları lazım olmayacaq. Bunun gələn ildən mümkün ola biləcəyini deyən M.Abbaszadə qeyd etdi ki, bundan sonra sənəd qəbulu komissiyaları abituriyentlərin sənədlərinin təsdiqlənməsi üçün yox, yalnız vətəndaşlığı olmayan və xarici dövlətdən Azərbaycana gələn insanların sənədlərinin yoxlanılması üçün lazım olacaq.
Orta məktəblərdə keçiriləcək ilk monitorinq imtahanlarının vaxtı
açıqlandı
Bu il prezident İlham Əliyevin sərəncamına əsasən, Tələbə Qəbulu üzrə Dövlət Komissiyası (TQDK) tərəfindən Azərbaycanın orta məktəblərində ilk olaraq keçiriləcək monitorinq imtahanlarının vaxtı açıqlandı. TQDK sədri Məleykə bildirdi ki, monitorinq imtahanlarına aprelin 20-dən sonra başlanacaq. Onun sözlərinə görə, monitorinq imtahanlarının V və XI siniflərdə keçirilməsi qərara alınıb. Monitorinqlər XI siniflərdə “Azərbaycan dili”, “Riyaziyyat” və “Fizika, V siniflərdə “Azərbaycan dili” və “Riyaziyyat”, rus bölməsində isə “Rus dili” və “Riyaziyyat” fənnindən keçiriləcək. Bu imtahanlar Bakı şəhərində aprelin 23, 24, 25-də, bölgələrdə isə mayın 6, 7, 8-də keçiriləcək. Monitorinq imtahanları respublika üzrə 29 bölgədə 595 məktəbdə təşkil ediləcək.
Magistraturaya daxil olmaq istəyənlər üçün bəzi
ixtisaslar üzrə ixtisaslaşma və proqram seçimi
genişləndirilib
M.Abbaszadə bildirdi ki, 2013/2014-cü tədris ili üçün ali təhsil müəssisələrinin magistraturalarına daxil olmaq istəyən bakalavrlar üçün bəzi ixtisaslar üzrə ixtisaslaşma və proqram seçimi genişləndirilib. TQDK sədri qeyd etdi ki, iqtisadiyyat və idarəetmə ixtisaslar qrupunu bitirən bakalavrların, elektrik mühəndisliyi, elektroenergetika mühəndisliyi, enerji maşınqayırması, maşın mühəndisliyi, mexanika mühəndisliyi, texnoloji maşın və avadanlıqlar mühəndisliyi, təkrar emal və bərpa texnologiyaları ixtisaslarını bitirən bakalavrların proqram daxilində ixtisaslaşma seçimi genişləndirilib: “Bundan əlavə, proseslərin avtomatlaşdırılması mühəndisliyi, mexatronika və robototexnika mühəndisliyi ixtisaslarını bitirən bakalavrların biologiya müəllimliyi, biologiya, tərcümə və tarix ixtisaslarını bitirən bakalavrların ixtisaslaşma və proqram seçimi də genişləndirilib. Bitirdikləri ixtisasdan asılı olmayaraq, bütün bakalavrlar 56 nömrəli proqrama aid olan MBA üzrə ixtisaslaşmaları və ya 22 nömrəli proqrama aid olan Turizm işi ixtisaslaşmasını seçə bilər. Təhsil və humanitar ixtisas qruplarından başqa bütün ixtisasları bitirən bakalavrlar 19 nömrəli proqrama aid olan TEMPUS layihəsi üzrə ixtisaslaşmanı seçə bilər”. Onun sözlərinə görə, cari tədris ili üçün ali təhsil müəssisələrinin magistraturalarına qəbul imtahanının birinci mərhələsi martın 3-də keçirilib və bakalavrların məntiq, informatika və xarici dil bilikləri test üsulu ilə yoxlanılıb: “İmtahanda iştirak etmək üçün 21 min 623 bakalavr qeydiyyatdan keçib. Onlardan 526 nəfər imtahana gəlməyib, 20 nəfər isə qaydalara zidd hərəkətlərə yol verdikləri üçün imtahandan xaric edilib. İmtahanda 21 077 nəfər iştirak edib və ən yüksək nəticə 97 bal olub”.
Peşə məktəblərində
buraxılış imtahanlarında
iştirak edən şagirdlərin 70 faizi “3” qiyməti alıb
Peşə liseylərinin məzunları üçün keçirilən buraxılış imtahanlarının nəticələrini qiymətləndirən TQDK sədri bildirdi ki, peşə məktəblərində buraxılış imtahanları ilk dəfə keçirildiyindən kontingent elə də çox olmayıb: “İmtahanda cəmi 4 min nəfərdən çox şagird iştirak edib. Onların 70 faizi “3” qiyməti alıb. Bu nəticə bizi elə də qane etmir. Təbii ki, bundan yüksək nəticə gözləmək mümkün deyildi. Çünki orta məktəb proqramları çətin olduğuna görə, vaxtilə həmin şagirdlər peşə məktəblərinə üz tutublar. Biz bu nəticəni gözləyirdik. Həmin şagirdlər orta məktəbdə oxusaydılar, ötən il buraxılış imtahanı verəcəkdilər. Ancaq həmin şagirdlər peşə məktəblərində oxuduqları üçün onların təhsil müddəti yarım il də uzanıb. Biz ötənilki səviyyəni bilirdik deyə, peşə liseylərində təhsil alan şagirdlərdən builki nəticəni gözləyirdik”.
TQDK sədri dərsliklərin monitorinqinin
nəticələri ilə razılaşmayan müəlliflərə
də cavab verdi: “Azərbaycanda
təhsil siyasətini həyata keçirən bir
qurum var və o da Təhsil Nazirliyidir. Tələbə Qəbulu üzrə
Dövlət Komissiyası isə yalnız Prezidentin
tapşırığı əsasında orta
məktəblərdə istifadə edilən dərsliklərin
monitorinqini həyata keçirir”.
O bildirdi ki, monitorinqin nəticələri daimi
olaraq ictimaiyyətə və ölkə
rəhbərliyinə çatdırılır. TQDK sədri qeyd etdi ki,
bu vaxta kimi I, III və IV sinif dərsliklərinin
monitorinqi başa
çatdırılıb və rəylər Təhsil
Nazirliyinə göndərilib: “II sinif dərsliklərinin
monitorinqi isə bu həftə
başa çatır və onun nəticələri gələn həftə
Təhsil Nazirliyinə göndəriləcək. Təhsil Nazirliyi tərəfindən komissiyaya
yalnız I və III dərslikləri ilə bağlı cavab verilib”. M.Abbaszadə aparılan monitorinqlər nəticəsində
dərslikləri tədrisdə uyğun hesab edilməyən müəlliflərin
onların rəyləri ilə razılaşmaması ilə
bağlı məsələyə də münasibət bildirərək
qeyd etdi ki, monitorinqin nəticələri
ilə bağlı dərslik müəlliflərinin obyektiv və ya subyektiv fikirləri ola bilər:
“Riyaziyyat” ümumbəşəri elmdir və I, IV siniflərdə
"Riyaziyyat"ın qanunları eynidir.
Dərsliyin müəllifi bununla razı
deyilsə, bu, onun öz problemidir. Doğma və
dövlət dilimiz olan
Azərbaycan dili ilə əlaqədar dərsliyin
monitorinqi prosesində iştirak
edən alimlər, mütəxəssislər bu
iradları tuturlarsa, bircə müəllif
bununla razı deyilsə, hesab
edirəm ki, Təhsil Nazirliyi
düzgün siyasət həyata
keçirəcək. Təhsil Nazirliyi
yalnız müəllifin hüquqlarını müdafiə etmir, təhsilimizin hüquqlarını
müdafiə edir. Ona
görə də hesab edirəm ki, onlar bizi
düzgün müdafiə edəcəklər”.
Nigar ABDULLAYEVA
Palitra.-2013.-5 aprel.-S.12.