Sahibkarlıq iqtisadiyyatımızda aparıcı
mövqeyə yüksəlir
Ümummilli lider Heydər
Əliyev 1993-cü ildə hakimiyyətə qayıdandan sonra yox
olmaq təhlükəsi ilə üzləşən
Azərbaycanı yenidən qurmağa başladı.
H.Əliyevin dövlət quruculuğu siyasəti modern iqtisadi baza
əsasında həyata keçirilirdi. Burada isə
sahibkarlığın formalaşdırılması və
inkişafı başlıca prioritetlərdən biri idi. Sovet
ölkələri ilə eyni sistemdə yaşamalarına baxmayaraq,
Azərbaycan müstəqillik qazanandan sonra həmin
ölkələrdən fərqli iqtisadi inkişaf və
sahibkarlığın formalaşması yolunu tutmuşdu.
Heydər Əliyevin sayəsində Azərbaycan
yerləşdiyi üstün coğrafi-geostrateji
mövqedən çox əlverişli şəkildə
istifadə edə bildi. Müstəqilliyin ilk illərindən bazar
iqtisadiyyatı yolunu tutmaqla yanaşı Avropaya inteqrasiya yolunda
ciddi işlər aparıldı. Sahibkarlığın
inkişafında qabaqcıl modellərin öyrənilməsi
və tətbiqinə bu baxımdan ciddi önəm verilirdi.
Müqayisə etsək, postsovet ölkələrinin
əksəriyyəti dünyaya iqtisadi açılım,
sahibkarlığın inkişafında modern və mobil
üsulları tətbiq etməkdən kənarda qaldılar.
Amma Azərbaycan
məhsullarının Avropa və dünya bazarlarına
çıxarılması məsələsi reallığa
çevrilməyə başladı. Bunların
sayəsində bu gün məhsullarımızda beynəlxalq
standartların tətbiqi, bu baxımdan müvafiq beynəlxalq institutlarla
yaxın əməkdaşlığın qurulması,
Azərbaycanda sahibkarlıq sahəsində
standartlaşdırma sisteminin formalaşmasına nail
olunması kimi nailiyyətlər xüsusilə
önəmlidir.
Uğurlu
bazar iqtisadiyyatı
strategiyası
H.Əliyev
ölkədə bazar iqtisadiyyatının inkişafı
strategiyasını formalaşdırdı və əsas
oriyentirləri müəyyənləşdirdi. Bazar
iqtisadiyyatı azad rəqabət, tələb və təklif
mexanizmləri üzərində qurulmağa başladı. Burada
özəl sektorun inkişafı çox mühüm
əhəmiyyət kəsb edirdi. Sovet dövründə
Azərbaycan 70 ildən artıq planlı iqtisadiyyat və inzibati
amirlik metodları ilə idarə olunan iqtisadi sistemdə
təmsil olunmuşdu. Bu dövrdə mülkiyyət
əsasən dövlətə məxsus idi. Özəl
mülkiyyət isə sadəcə kiçik
kooperativlərdən ibarət ola bilərdi...
Müstəqilliyin
ilk dövrləri isə onunla xarakterik idi ki, Azərbaycan
Ermənistanla müharibə ilə paralel şəkildə bu
islahatları davam etdirirdi. Bu da ölkə
iqtisadiyyatını böyük bir potensialdan istifadə
etməkdən məhrum edirdi. Digər tərəfdən
Sovetlər Birliyinin dağılması ilə bağlı olaraq
Azərbaycanın postsovet respublikaları ilə bütün iqtisadi
əlaqələri kəsilmişdi ki, bunun da
nəticəsində iqtisadiyyatımız 95 faizlik bir
səviyyədə iflic vəziyyətinə düşmüşdü.
Müəssisə və şirkətlərin hamısı
demək olar ki, fəaliyyətini dayandırmışdı.
Belə vəziyyətdə sahibkarlığın
inkişafı və formalaşdırılması çox mühüm
önəm kəsb edirdi. Ona görə də
müstəqillik dönəmində sahibkarlığın
inkişafı iqtisadi dirçəlişdə başlıca
məqsədlərdən biri kimi qarşıya qoyulmuşdu. Bu
da ondan ibarət idi ki, artıq bazar iqtisadiyyatı yolu
seçən ölkədə dövlət mülkiyyəti
özəlləşdirilməli idi. Torpaq sahələri
müstəqil fermer təsərrüfatları üçün
kəndlilərə verilməli idi. Bununla bağlı olaraq
müstəqilliyin ilk illərində bu işlər həyata
keçirilməyə başladı. Xüsusən,
qarşıda duran məsələ ondan ibarət idi ki, bir yandan
dövlət mülkiyyətində olan sahibkarlıq
subyektlərini dirçəltmək, digər yandan da
onları özəlləşdirmək lazım idi. Bu
özəlləşdirmə ilə bağlı olaraq
Azərbaycanda silsilə dövlət proqramları qəbul olundu.
Kiçik müəssisələrin və orta tipli
müəssisələrin, eləcə də iri
müəssisələrin özəlləşdirilməsi prosesi
başladı. Bu proqramların reallaşdırılması çox
önəmli idi. Çünki özəlləşdirmə prosesi
nəticəsində əsasən dövlət
mülkiyyəti olan kiçik şirkətlərin
hamısı özəlləşdirilərək
sahibkarlıq mülkiyyətinə verildi.
Sahibkarlıq vərdişlərinin
oturuşması
O zaman
sahibkarlığın inkişafına aid bir sıra
məsələlər, sahibkarlıq düşüncəsi
və fəaliyyəti Azərbaycan üçün yeni
olduğuna görə bu sahədə idarəetmə və
işin təşkili məsələsi çətin idi. Həm
də yeni subyektlərin idarə olunması mexanizmi bu
baxımdan yenidən qurulurdu. Bu baxımdan bütün institusional
mexanizmlər yenidən formalaşırdı. Bu uyğunlaşmalar
kəskin islahatların həyata keçirilməsini
tələb edirdi. Bu baxımdan həmin dövr üçün
sahibkarlığın inkişafında bir neçə
əsas mərhələ vardı. Bu dövrdə xarakterik
xüsusiyyətlərdən biri də qiymətlərin
liberallaşması məsələsi idi. Artıq
əvvəlki sovet sistemindən fərqli olaraq
qiymətlərin dövlət tərəfindən
müəyyənləşdirilməsi yox, əksər
sahələrdə qiymətlərin
liberallaşdırılması, özəl sektorun azad
rəqabət fəaliyyəti nəticəsində
formalaşması prosesi istiqamət götürmüşdü.
Bu da xüsusi əhəmiyyət kəsb edirdi. Bazarda
fəaliyyət göstərən subyektlərin azad
rəqabət şəraitində sərbəst
şəkildə öz məhsullarına qiymət qoya
bilməsi təmin edilmişdi. Digər tərəfdən
sahibkarlığın inkişafı qarşısında inflyasiya
məsələsi dayanırdı. Yəni həmin
dövrdə Azərbaycanda inflyasiya hətta
dördrəqəmli həddə çatmışdı.
Belə bir şəraitdə sahibkarlıq fəaliyyəti
ilə məşğul olmaqda, investisiya təminatını
həyata keçirməkdə, əldə olunan vəsaitin
idarə olunmasında böyük problemlərlə
qarşılaşılırdı. Təbii ki, belə bir
vəziyyətdə inflyasiyanın cilovlanması olduqca vacib idi.
Bu, sahibkarlığın etibarlı bir şəkildə
fəaliyyəti üçün imkan yaratmalı idi. Bu
qarşıya qoyulmuş vəzifəyə Heydər
Əliyevin yürütdüyü korrekt iqtisadi siyasət
nəticəsində nail olundu və inflyasiyanın
qarşısı alınmaqla yanaşı,
sahibkarlığın inkişafına stimul verən bazar
iqtisadiyyatına uyğun qiymət siyasəti
yürüdülməyə başladı.
Sahibkarlıq
sferasında inkişafı davam etdirmək üçün bir
sıra qanunlar da qəbul olundu. Sahibkarlıq fəaliyyəti
haqqında, antiinhisar fəaliyyəti haqqında,
istehlakçıların hüquqlarının
müdafiəsi haqqında, maliyyə-sənaye qrupları
haqqında qanunları göstərmək olar ki, bunlar
sahibkarlıq mühitinin daha da inkişafına gətirib
çıxardı.
Xüsusən
də bu dövrdə investisiyaların ölkəyə
cəlb olunması çox önəm
daşıyırdı...
Neft gəlirləri
sahibkarlığın
inkişafında önəmli faktora
çevrildi
Bu
dövrdə sahibkarlığın inkişafı ilə
bərabər, Azərbaycanda neft sənayesinin inkişaf
etdirilməsi və neft sənayesinə xarici investisiyaların
cəlb olunması da sözügedən sahədə olduqca
həlledici önəm kəsb edirdi. Neft yataqlarının istismar
olunmasına dünyanın inkişaf etmiş
ölkələrinin özəl şirkətləri
dəvət olundu. BP, AMOKO, Statoil, Exxon mobile, Chevron və sair
şirkətlərlə müqavilələr imzalandı. Bu, neft
sənayesinin inkişafına təsir
göstərməklə yanaşı, Azərbaycanda həm
də dövlətin gəlirlərinin artmasına və
dolayı olaraq da sahibkarlığın inkişafına
təsir göstərdi. Çünki növbəti
mərhələdə Azərbaycanda qeyri-neft sektorunun inkişaf
etdirilməsi, ölkəmizdə bu sahənin prioritetə
çevrilməsi ilə yanaşı, onun maliyyə
təminatının əldə olunması da məhz neft
sənayesinin inkişafı ilə bilavasitə bağlı idi.
Həmin
dövrdə sahibkarlığın inkişafına təsir
edən məsələlərdən biri də ölkə infrastrukturunun
inkişaf etdirilməsi idi. Yolların yenidən
çəkilməsi, bərpa edilməsi, ölkənin
qazlaşdırılması, ən ucqar yerlərin
işıqlandırılması, kommunal xidmətlərin, su, kanalizasiya
sistemlərinin təkmilləşdirilməsi, yenidən
qurulması və sair kimi tədbirlər dolayısı olaraq
sahibkarlığın inkişafına müsbət təsir
edən amillər sırasında qeyd edilməlidir.
Xüsusilə
qeyd etmək lazımdır ki, Heydər Əliyevin iqtisadi
baxımdan qüdrətli dövlət yaratmaq siyasətinin
nəticəsi olaraq Azərbaycanda artıq 1996-cı ildən sonra
sahibkarlıq sahəsində əsaslı
dirçəlişlər özünü
göstərməyə başladı. Azərbaycan
dövlət büdcəsinin kəsiri məhz həmin
dövrdə ÜDM-nin 1-2 faizi səviyyəsinə endirilmişdi.
1996-cı ildə ÜDM-nin artım faizi 1,3 faiz, 1997-ci
ildə 1,8, sonrakı dövrlərdə isə daha artıq
şəkildə artmağa başlamışdı.
Sahibkarlığın inkişafını
təmin edən institusional islahatlar
və dövlət dəstəyi
Yeni iqtisadi
münasibətlərə keçid, özəl sektorun yaradılması
və inkişaf etdirilməsi müvafiq sahədə dövlət
təsisatlarının yenidən formalaşmasını da zəruri
edirdi. Bu sahədə aparılan işlərdən biri də ondan
ibarət idi ki, 2001-ci ildə İqtisadi İnkişaf Nazirliyi
yaradıldı. Nazirliyin yaradılması sahibkarlığın
inkişafına yönəlmiş fəaliyyətlərin məhz
orada cəmlənməsinə və oradan istiqamətlənməsinə
gətirib çıxardı.
Həmçinin
sahibkarlığa əlverişli maliyyə dəstəyi verə
biləcək milli maliyyə qurumlarının yaradılması
zərurətindən ortaya çıxan Sahibkarlığa Kömək
Milli Fondunun fəaliyyəti də bu baxımdan xüsusilə
qeyd edilməlidir. Kiçik və orta biznesə dövlət büdcəsinin
vəsaiti hesabına güzəştli kreditlər verən bu
maliyyə qurumunun sahibkarlar üçün dövlətin maddi
və təşkilati dəstəyini təcəssüm etdirməsi
böyük önəm kəsb edirdi. Fondun yaradılması artıq
dövlətin sahibkarlığın inkişafına maliyyə
yardımı etməsi mexanizminin formalaşması idi. Kiçik
və orta sahibkarlığın inkişaf etdirilməsində
başlıca amillərdən biri onların investisiya təminatıdır.
Bu investisiya təminatında daxili investisiya mənbələrinin
irəliyə çəkilməsi və onun yerli sahibkarlara təqdim
olunması bu sahədə həyata keçirilən önəmli
işlərdən biri idi. Hazırda Sahibkarlığa Kömək
Milli Fondu artıq kiçik və orta sahibkarlığın əsas
maliyyə mənbələrindən birinə çevrilib. Bu sahədə
aparılan işlər sırasında sahibkarlığın institusional
dayaqlarının, onun hüquqi bazasının formalaşdırılması,
məhkəmə sistemində bu sahədə tənzimləmələrin
həyata keçirilməsini qeyd etmək olar.
2002-ci ildə
Heydər Əliyev tərəfindən sahibkarlığın inkişaf
məqsədlərini rəhbər tutan görüşlər
keçirildi. Bu silsilə görüşlərdə Azərbaycanda
fəaliyyət göstərən sahibkarlıq subyektləri ilə
birbaşa dövlət dialoqu formalaşdırıldı. Bu, çox
mühüm bir model idi. Bu tədbirlər birbaşa dövlət-sahibkar
dialoqunun formalaşması və sahibkarların öz problemlərini
ölkə başçısına çatdırma imkanlarının
əldə edilməsi baxımından çox önəm daşıyırdı.
Həmin toplantıda sahibkarlar qarşılaşdıqları
bir sıra problemlərlə bağlı fikir və təkliflərini
bildirmişdilər. Nəticədə Azərbaycanda o vaxt sahibkarlıqla
bağlı mövcud olan 250-dən çox lisenziya növü
30-a endirilmişdi.
Sahibkarlığın
tənzimlənməsi və inkişafı üzrə daha bir
sıra hüquqi aktlar qəbul edilmişdi. Vergi yükünün
azaldılması, vergi yığımı məsələsinin
daha da avtomatlaşdırılması istiqamətində islahatların
əsası qoyulmuşdu. Həm də 2002-ci ildə dövlət
başçısı ilə sahibkarların görüşündən
sonra ölkə Prezidenti yanında Sahibkarlar Şurası yaradılmışdı.
Bu şuranın yaradılmasında məqsəd mütəmadi
olaraq sahibkar və dövlət dialoqunun inkişaf etdirilməsini
həyata keçirmək idi. Bu dövrdə aparılan islahatlardan
biri də kiçik və orta sahibkarlığın daha çox
inkişaf etdirilməsi məsələsi idi. Bu istiqamətdə
də Azərbaycanda kiçik və orta sahibkarlığın
inkişafı ilə bağlı dövlət proqramı qəbul
edildi. Proqram 2002-2005-ci illəri nəzərdə tuturdu. Bu da xüsusən
kiçik və orta sahibkarlığın ayrıca bir sfera kimi
önə çəkilməsi mahiyyəti daşıyırdı.
Kiçik və orta sahibkarlıq bazar iqtisadiyyatında rəqabətin
işlədiyi amillərdən ən başlıcası sayılır.
Ona görə də inkişaf etmiş ölkələrdə
bu barədə olan təcrübəyə Azərbaycan da yiyələnməyə
çalışırdı. Kiçik və orta sahibkarlığın
inkişaf etdirilməsi bu baxımdan başlıca məqsədlərdən
biri kimi ortaya qoyulmuşdu.
Bütün
qeyd edilənlərdən başqa, sahibkarlığa dövlət
dəstəyini təmin etmək və bu sahəni inkişaf etmiş
ölkələrdə olan səviyyəyə çatdırmaq
üçün digər islahatların əsası qoyuldu. Sahibkarlığa
göstərilən xidmətin gələcəkdə elektronlaşdırılması,
sahibkarların qeydiyyatı məsələlərinin asanlaşdırılması,
bu funksiyanın Ədliyyə Nazirliyindən alınıb Vergilər
Nazirliyinə verilməsi, prosedurların dəyişdirilməsi
və sadələşdirilməsi həyata keçirilmişdi.
Sahibkar-işçi münasibətlərinin inkişafı, sahibkarların
maarifləndirilməsi üçün bir sıra institutlar formalaşdırılmışdı.
Belə ki, İqtisadi İnkişaf Nazirliyinin nəzdində tədris
mərkəzləri formalaşdırıldı. Həmçinin
elektron məlumatlandırma və bu məqsədlə xüsusi
saytların yaradılması önəmli idi.
Azərbaycanda
sahibkarlığın inkişafı üçün o vaxt
həyata keçirilən tədbirlər bugünkü iqtisadi
inkişafın əldə edilməsində, qeyri-neft sektorunun
inkişafında olduqca böyük önəm kəsb edirdi. Bu
gün ÜDM-dəki özəl sektorun payı 83 faiz
təşkil edir. Ümumi vergi daxilolmalarının 72 faizi
2012-ci ildə özəl sektorun payına düşüb. Hüquqi
şəxslərin sayı minlərlə ölçülür.
Azərbaycan brendləri dünya bazarlarına
çıxır və tanınır. Eləcə də daxili
bazarda başlıca rollardan birini özəl sektor
subyektlərimiz oynamağa başlayıb. Prezident İlham
Əliyev hökumətin cari ilin birinci rübünün
yekunlarına həsr olunmuş müşavirədə bildirib
ki, biz daxili bazarı rəqabət qabiliyyətli məhsullarla
təmin etməliyik ki, Azərbaycan vətəndaşları
ölkədə istehsal olunan ən yüksək keyfiyyətli
məhsullarla təmin edilsinlər.
Prezidentin bildirdiyi kimi, eyni zamanda
bu qədər sürətlə artan iqtisadiyyatımız
və qeyri-neft sektorumuz bizə xarici bazarlara
çıxışı təmin etməyi diktə edir.
İlkin Ağayev
Palitra.-2013.-17 aprel.-S.10.