Mədəniyyətimiz xarici ölkələrdə geniş təbliğ olunur

Azərbaycanın fransızlara daha yaxından tanıdılmasında Heydər Əliyev Fondunun Fransada keçirdiyi mədəni tədbirlər böyük rol oynayır

Layihə çərçivəsində təqdim etdiyimiz budəfəki yazı Heydər Əliyev Fondunun təşkilatçılığı ilə xarici ölkələrdə keçirilən tədbirlərlə bağlıdır. Həmin tədbirlərdən biri Fransada baş tutub. Belə ki, Heydər Əliyev Fondunun təşkilatçılığı və Azərbaycanın Fransadakı səfirliyinin dəstəyi ilə Miluz şəhərində müsəlman intibahının parlaq nümayəndəsi, ilk Azərbaycan şairəsi və qadın şahmatçısı Məhsəti Gəncəvinin yaradıcılığının 900 illiyinə həsr olunmuş sərgi və konsert təşkil edilib.

Miluzun Tanpl San-Etyen kilsəsində təşkil olunan konsertin aparıcısı Alen Tremoliyer Qafqazın mirvarisi olan Azərbaycanın Cənubi Qafqazda qədim İpək Yolunun üzərində, Şərq ilə Qərb arasındakı strateji qovşaqda yerləşdiyini, bəşəriyyətin beşiklərindən biri kimi dəyərləndirilən zərdüştlüyün vətəni olduğunu xatırladıb. Azərbaycanın dünya ədəbiyyatına və musiqisinə dahilər bəetdiyini diqqətə çatdıran aparıcı Şərq aləmində ilk demokratik respublikanın da ölkəmizdə qurulduğunu, 1918-ci ildə qadınlara seçki hüququnun verildiyini, müsəlman dünyasında ilk dünyəvi teatrın, operanın, baletin və milli akademiyanın yarandığını, yeraltı sərvətlərlə yanaşı, tarixi və mədəni irslə zəngin olduğunu vurğulayıb.

Bildirilib ki, Azərbaycan ilə Fransa arasında mədəni əlaqələrin özünəməxsus tarixi kökləri var. Böyük fransız yazıçısı Aleksandr Dümanın (Ata) XIX əsrin ikinci yarısında Azərbaycana səyahəti, Jorj Sandın məşhur “Koroğluepik poemasını fransız dilinə tərcümə etməsi, XX əsrin əvvəllərində ParisdəQafqaz” məcmuəsinin çap olunması, azərbaycanlı yazıçı Ümbülbanu Əsədullayevanın Fransada yaşayıb yaratması və nəhayət Fransanın ictimai-siyasi həyatında mühüm rol oynayan Prezident Şarl de Qolla Əhmədiyyə Cəbrayılovun görüşü xalqlarımız arasındakı dostluğun parlaq nümunəsidir.

Tarixən yaranan dostluq əlaqələri Heydər Əliyev Fondunun təşkilatçılığı ilə bu gün də davam edir və möhkəmlənir. Azərbaycanın fransızlara daha yaxından tanıdılması istiqamətində Fondun Fransada keçirdiyi mədəni tədbirlər təqdirəlayiq hadisədir.

Keçən ay Reymsdə, bu gün isə Miluzda Azərbaycanın görkəmli şairəsi Məhsəti Gəncəvinin yaradıcılığının 900 illiyi münasibətilə təşkil olunan sərgi və konsert Fondun Fransada həyata keçirdiyi mədəni tədbirlərin davamıdır. Daha sonra aparıcı Məhsəti Gəncəvinin Azərbaycanın ikinci böyük şəhəri qədim Gəncədə yaşayıb yaratdığını, Qafqazda ilk dəfə olaraq Gəncənin 2016-cı il üçün “Avropanın gənclər paytaxtı” seçildiyini bildirib.

 

Pyer Tilua: “Azərbaycan qədim və zəngin

mədəniyyətə malik ölkədir

 

Tədbirdə çıxış edən Yuxarı-Alzas Universitetinin ədəbiyyat fakültəsinin dekanı xanım Greta-Komur-Thilloy Məhsəti Gəncəvi yaradıcılığının əsas məziyyətlərindən danışıb, azərbaycanlı şairənin əsərlərində bəşəri ideyalardan söhbət açdığını diqqətə çatdırıb. “Xocalı-613” əsərinin bəstəkarı Pyer Tilua çıxışında Azərbaycanın qədim və zəngin mədəniyyətə malik olduğunu vurğulayıb, xalqımıza məxsus ayrı-ayrı musiqi alətləri barədə tamaşaçılara məlumat verib. Azərbaycanın Fransadakı səfiri Elçin Əmirbəyov Miluzda təşkil olunan konsert və sərginin dahi Azərbaycan şairəsi Məhsəti Gəncəvinin yaradıcılığının 900 illiyinə həsr olunduğunu diqqətə çatdırıb, Heydər Əliyev Fondunun təşkilatçılığı və səfirliyin dəstəyi ilə Fransanın müxtəlif regionlarında, o cümlədən Miluzda mədəni tədbirlərin keçirildiyini, bu konsert və sərginin 2013-cü il üçün nəzərdə tutulmuş tədbirlərdən biri olduğunu bildirib. Sonra incəsənət ustalarının ifasında Azərbaycan bəstəkarlarının əsərləri, Məhsəti Gəncəvinin sözlərinə bəstələnmiş mahnılar və xalq yaradıcılığı nümunələri səslənib.

 

Miluz şəhər meri:

İki xalq arasında dostluq əlaqələrinin inkişafında bu cür sərgi və konsertlər mühüm rol oynayır

 

Fransanın müasir tipliFundarisarayında Məhsəti Gəncəvinin yaradıcılığının 900 illiyi münasibətilə təşkil olunan sərgini açan Yuxarı-Alzas Universitetinin rektoru xanım Kristin Gangloff Ziegler Gəncədə səfərdə olduğunu və görkəmli şairənin abidəsinə baş çəkdiyini, onun öz xalqı tərəfindən yüksək hisslərlə yad edildiyini xatırladıb, rəhbərlik etdiyi ali təhsil əssisəsinin Azərbaycan Dövlət Aqrar, Gəncə Dövlət və Azərbaycan Texnologiya universitetləri ilə əməkdaşlıq perspektivlərindən və tələbə mübadiləsi imkanlarından söhbət açıb. Miluz şəhərinin meri Jan Rottner iki xalq arasında dostluq əlaqələrinin inkişafında bu cür sərgi və konsertlərin təşkilinin mühüm rol oynadığını, bu istiqamətdə Heydər Əliyev Fondunun Fransada Azərbaycanı tanıtmaq baxımından həyata keçirdiyi mədəni tədbirləri yüksək qiymətləndirib, ölkələrimiz arasında əməkdaşlıqda iqtisadi əlaqələrlə yanaşı, mədəni əlaqələrin də mühüm rol oynadığını qeyd edib.

Səfir Elçin Əmirbəyov Məhsəti Gəncəvinin Şərq intibahının böyük mədəniyyət mərkəzlərindən biri olan Azərbaycanın ikinci böyük şəhəri Gəncədə doğulduğunu və bu şəhərdə yaşayıb-yaratdığını, Gəncənin dünya mədəniyyətinə Nizami Gəncəvi kimi bir düha bə etdiyini xatırlatmış, şairənin öz fikirlərini açıq şəkildə bildirən Şərq qadınlarından biri olduğunu, yaşadığı cəmiyyətdə qadın problemini və rolunu ortaya qoyduğunu, yaradıcılığının əsas qayəsini bərabərlik, qardaşlıq və azadlıq kimi bəşəri ideyalar təşkil etdiyini vurğulayıb. M.Gəncəvinin yalnız şairə deyil, eyni zamanda, fəal bir qadın olduğunu diqqətə çatdıran səfir onun gənc qızları ətrafına toplayıb ədəbi dərnək yaratdığını, onların arasında öz dövrünün tanınmış şairələrinin də yetişdiyini bəyan edib. E.Əmirbəyov şairənin əsərlərində əks olunan ideyaların və fikirlərin səsləndiyi vaxtdan 900 il keçməsinə baxmayaraq, həmin ideyaların bu gün də öz aktuallığını itirmədiyini bildirib.

Azərbaycan Prezidenti İlham Əliyevin Məhsəti Gəncəvinin yaradıcılığının 900 illik yubileyi ilə bağlı sərəncam imzaladığını diqqətə çatdıran səfir, birinci xanım Mehriban Əliyevanın rəhbəri olduğu Heydər Əliyev Fondunun şairəni dünya ictimaiyyətinə yaxından tanıtmaq məqsədi ilə onun fars və ərəb dillərində yazdığı əsərlərin xarici dillərdə nəşr etdirməsindən danışmışdır.

E.Əmirbəyov Parisdə, Reymsdə və Miluzda təşkil olunan sərgilərdə Məhsəti Gəncəvinin yaşadığı dövrə məxsus eksponatların nümayiş olunduğunu bildirib. Konsert və sərgidə Miluz meriyasının və Alzas bölgəsinin rəsmiləri, deputatlar, senatorlar, şəhər ictimaiyyətinin nümayəndələri, Azərbaycanın və Türkiyənin diaspor təşkilatlarının təmsilçiləri iştirak ediblər. Sərgi dekabrın 20-dək davam edəcək.

Anar Miriyev

Palitra.-2013.-12 dekabr.-S.11.