Məktəbin yetirmələri xarici ölkələrdə peşəkar səviyyədə iş nümayiş etdirirlər

Musiqi məktəbinin yaradıcı kollektivi mədəniyyətimizin təbliği, yetişən yeni nəslin tərbiyəsi işində missiyasını məsuliyyətlə yerinə yetirməyə çalışır

Layihə çərçivəsində təqdim edəcəyimiz bu dəfəki yazımız respublikanın qocaman musiqi ocaqlarından biri-Rəşid Behbudov adına 2 nömrəli musiqi məktəbi ilə bağlıdır. Qocaman və çox tanınan musiqi məktəbi ölkəmizdə musiqi mədəniyyətinin inkişafında böyük rola malikdir. Respublikada musiqi təhsilinin ön sıralarında gedən Rəşid Behbudov adına 2 nömrəli onbirillik musiqi məktəbi yetişən gənc nəslin musiqi tərbiyəsində mühüm rol oynayır

Məktəbdə şagirdlərdən ibarət xalq çalğı alətləri orkestri, xor kollektivi və skripkaçılar ansamblı fəaliyyət göstərir

Son illərdə musiqi məktəbinin müəllim kollektivi yeni gənc mütəxəssislərlə, peşəkar kadrlarla zənginləşib. Gənc müəllimlər təcrübəli kadrlarla vəhdət təşkil edirlər. Bu isə məktəbin yaradıcı mühitini daha da zənginləşdirir. Hər tədris ilinin sonunda şagirdlərin yekun konsertinin keçirilməsi artıq ənənəyə çevrilib. Məktəbin şagirdləri möhtəşəm konsert salonlarında, M.Maqomayev adına Dövlət Filarmoniyasında, Kamera və Orqan musiqisi zalında və Kapellhauzda müntəzəm olaraq konsertlər verirlər. Vaxtaşırı keçirilən «Qönçə» respublika festivalında, respublika musiqi məktəbləri üzrə ifaçılıq müsabiqələrində 2 nömrəli musiqi məktəbi uğurla çıxış edərək müxtəlif mükafatlar qazanır. Respublikanın hüdudlarından kənarda keçirilən bir sıra müsabiqələrdə çıxış edən musiqi məktəbinin şagirdləri də həmişə mükafat əldə edirlər. Eyni zamanda respublika əhəmiyyətli bir çox baxış və müsabiqə, festivalların keçirilməsi zamanı musiqi məktəbi öz qapılarını tədbir iştirakçılarının üzünə açır. Məktəbdə təhsil alan şagirdlər təkcə müxtəlif musiqi alətində ifa etmək vərdişinə yiyələnməklə kifayətlənmir. Burada ixtisas və bir sıra nəzəri fənlər öyrədilməklə yanaşı, həm də uşaqların yaradıcılıqla ünsiyyətinə şərait yaradılır. Məktəbdə şagirdlərdən ibarət xalq çalğı alətləri orkestri, xor kollektivi və skripkaçılar ansamblı fəaliyyət göstərir. Şagirdlər bu kollektivlərdə fəal və böyük həvəslə çıxış edirlər.

Ötən əsrin 50-ci illərindən başlayaraq məktəbdə skripkaçılar ansamblı fəaliyyət göstərir

Hələ ötən əsrin 50-ci illərindən başlayaraq məktəbdə skripkaçılar ansamblı fəaliyyət göstərir. İlk yarandığı günlərdə bu ansambla məktəbin müəllimi, sonralar folklorşünas, sənətşünaslıq üzrə elmlər doktoru olan Ə.İsazadə rəhbərlik edib. Ansambl bir müddət Xalq artisti, dirijor T.Göyçayevin rəhbərliyi altında fəaliyyət göstərib. 2007-ci ildə V.Şpikavokun beynəlxalq xeyriyyə fondunun keçirdiyi «Moskva dostlarını qarşılayır» 4-cü beynəlxalq festivalda məktəbin Y.Rzaquliyevanın rəhbərlik etdiyi skripkaçılar ansamblı uğurla təmsil olunub. Məktəbin birləşmiş xor kollektivi daim öz nailiyyətləri ilə hamını sevindirir. S.Göyçayskayanın rəhbərlik etdiyi xor kollektivi respublikada keçirilən bir çox festival və müsabiqələrin iştirakçısı və laureatıdır. Bir məqamı qeyd edim ki, xor uşaqlardan qurulmasına baxmayaraq, çox çətin və mürəkkəb repertuarın öhdəsindən asanlıqla gəlir. Kollektiv respublika miqyasında hər növbəti müsabiqədə maraqlı və nadir hallarda ifa olunan əsərlərdən ibarət proqramla çıxış edir. Məktəbdə xalq çalğı alətləri orkestri də çıxış edir. K.Hüseynovun rəhbərlik etdiyi kollektivdə şagirdlər həvəslə yeni-yeni repertuarlar üzərində işləyirlər.

Muzeylərlə əməkdaşlıq sayəsində məktəbdə stend-sərgilər təşkil olunur

Məktəbdə təhsilin ayrılmaz bir hissəsi olan sinifdənkənar işlərə də həmişə böyük diqqət ayrılır. Dünya sənətkarlarının, Azərbaycan musiqiçilərinin yubiley tarixlərinə həsr edilmiş tematik gecələrdə şagirdlər zəngin konsert proqramı ilə çıxış edirlər. Nəzəri fənlər üzrə keçirilən ümumşəhər olimpiadalarında məktəbin şagirdləri həvəslə iştirak edirlər. Rəşid Behbudov adına 2 nömrəli onbirillik musiqi məktəbində tətbiq edilən sinifdənkənar işin bir forması da şagirdlərin muzeylərə aparılması, incəsənət əsərləri sərgilərinə baxışının təşkilidir. Muzeylərlə əməkdaşlıq sayəsində məktəbdə müxtəlif bəstəkar və ifaçıların yubiley tarixlərinə həsr olunmuş stend-sərgilər təşkil olunur. Müxtəlif tarixi, əlamətdar günlərdə məktəbdə konsert proqramı təşkil edilir, yaradıcı sənət adamları ilə görüşlər keçirilir. Eyni zamanda respublikanın mədəni həyatındakı əlamətdar tarixlər məktəbin yaradıcı mühitində də əksini tapır. Bülbülə, T.Quliyevə, R.Behbudova, A.Məlikova, V.Adıgözəlova həsr olunmuş xatirə gecələri təşkil edilir. Belə tədbirlərdə tanınmış sənətkarlarımızla yanaşı, digər peşə sahibləri, eləcə də xarici qonaqlar da iştak edir. Onlar Azərbaycan bəstəkarlarının, ifaçıların, musqiçilərin sənəti ilə yaxından tanış olurlar. Belə yaradıcılıq gecələri milli musiqi sənətimizin təbliğində böyük rol oynayır. Məktəbin kollektivi digər respublikaların, xarici ölkə nümayəndələrinin qarşısında həmişə uğurla çıxış edib.

2 nömrəli musiqi məktəbi yeni inkişaf dövrünü yaşayır

Ümumiyyətlə, məktəbin beynəlxalq əlaqələri çox genişdir. Məktəbin bir sıra yetirmələri, eləcə də vaxtilə burada çalışan müəllimlərin bir çoxu, xüsusən, pianoçu və skripkaçılar xarici ölkələrdə-ABŞ-da, Almaniyada, İsraildə fəaliyyət göstərir, peşəkar səviyyədə iş nümayiş etdirirlər. Məktəb mədəni-maarifçilik fəaliyyəti ilə bağlı üzərinə düşən işi layiqincə yerinə yetirir. Yarandığı ildən məktəb təkcə Bakıda deyil, ölkənin digər bölgələrində himayəçilik işi aparır. Şagirdlərin dünyagörüşü, bədii zövqünün inkişafında bütün bunlar mühüm rol oynayır. Uşaqlarda yaradıcı başlanğıcı gücləndirən tədbirlərdən biri də məktəbdə şagirdlərin ifasında musiqili tamaşaların hazırlanmasıdır. Ü.Hacıbəylinin «Arşın mal alan» musiqili komediyası, S.Abbasovun «Şən bahar» uşaq operası çox maraqla qarşılanır. Musiqi məktəbində tədrisin kefiyyətinə həmişə xüsusi diqqət ayrılır. Müxtəlif şöbələrdə aparılan açıq məşğələlər, onların müzakirəsi, metodik məsələlərə həsr olunmuş məruzələr və diskussiyalar, ifaçılıq tarixinə dair mühazirələr müəllimlərin öz işinə yüksək peşəkarlıqla yanaşmasını bir daha sübut edir. Məktəbdə tədris prosesini ətraflı təhlil edən pedaqoji şura ilə yanaşı, vaxtaşırı təşkilati məsələlərə həsr olunmuş toplantılar keçirilir. Məktəbdə müəllimlərin pedaqoji-metodiki işdən əlavə, həm də yaradıcılıqla məşğul olması üçün hərtərəfli şərait yaradılır. Belə ki, müəllimlər dəfələrlə Bakı Mədəniyyət və Turizm İdarəsi tərəfindən təşkil edilən musiqi məktəbi müəllimlərinin ümumşəhər konsertlərində, elmi-nəzəri konfranslarda uğurla çıxış edir, yüksək peşəkar ifaçılıq bacarığı nümayiş etdirirlər. Bir sözlə, 2 nömrəli musiqi məktəbi yeni inkişaf dövrünü yaşayır. Məktəbin zəngin kadr potensialı, gələcəyinə böyük ümid bəslənilən şagird nəsli təhsil ocağının böyük gələcəyindən xəbər verir. Məktəbdə illər boyu formalaşmış yüksək nizam-intizam, xüsusi iqlim, mənəvi ab-hava müəllim və şagirdlər arasında yaradıcılıq təması burada yaradılmış hərtərəfli şəraitin nəticəsidir. Böyük tarixə malik olan məktəb çətin sınaqlardan uğurla çıxaraq bu gün də gözəl ənənələrini və yüksək nüfuzunu qoruyub saxlayır. Yaradıcılıq qayğıları musiqi məktəbinin gündəlik həyatının mühüm tərkib hissəsidir. Məktəbin yaradıcı kollektivi mədəniyyətimizin təbliği, yetişən yeni nəslin tərbiyəsi işində öz missiyasını məsuliyyətlə yerinə yetirir.

Anar MİRİYEV

Palitra.-2013.-6 fevral.-S.11.