«Xor şöbəsi»nin
tədricən xor məktəbinə
çevrilməsi nəzərdə tutulub»
«Cövdət Hacıyev adına 3
saylı Uşaq musiqi məktəbində yüksək bədii-estetik
zövqə malik musiqiçi nəsli yetişir»
Layihə çərçivəsində
müsahibimiz Cövdət Hacıyev
adına 3 saylı Uşaq musiqi
məktəbinin direktoru Məhin
Orucovadır. Musiqi məktəbinin rəhbəri
müsahibəyə məktəb haqqında məlumat verməklə
başladı:
-Milli tariximizin,
mədəniyyətimizin, adət və ənənələrimizin
öyrənilməsi və gənc nəslə
çatdırılması, onlarda vətənpərvərlik
hissinin formalaşdırılması, təlim-tərbiyənin
meyil, maraq, istedad və qabiliyyət əsasında
qurulması, istedadlı şagirdlərin aşkara
çıxarılması ibtidai musiqi təhsili ocağı olan
uşaq musiqi məktəblərindən
öz işinə məsuliyyətli
olmağı tələb edir. Müasir dövrdə insanların şəxsiyyətinin
formalaşmasında estetik tərbiyə və
estetik mədəniyyətin rolu xeyli artıb. Məlumdur
ki, musiqi sənəti
yalnız estetik zövq
aşılamır, həmçinin insanları tərbiyələndirir,
öyrədir, kamilləşdirir. Bu deyilənlər
musiqinin cəmiyyətdə, o cümlədən yetişməkdə olan gənc nəslin hərtərəfli harmonik inkişafında, onların musiqi estetik tərbiyəsində
nə qədər böyük rol oynadığını bir
daha sübut edir. 3 saylı Uşaq musiqi məktəbi 7 sentyabr
1955-ci ildə yaradılıb. 2004-cü ildə Azərbaycan Prezidentinin “Cövdət Hacıyevin xatirəsinin
əbədiləşdirilməsi haqqında” 18 fevral 2004-cü il tarixli sərəncamının icrası ilə
əlaqədar Mədəniyyət və Turizm
Nazirliyinin müvafiq əmri
ilə məktəbə görkəmli bəstəkar, Azərbaycan
milli simfonizminin banisi Cövdət İsmayıl oğlu Hacıyevin adı verilib.
Məktəbimizdə fortepiano, xalq çalğı alətləri, nəzəriyyə,
orkestr alətləri və xor şöbələrində 20 ixtisas üzrə 300 şagird
Azərbaycan və rus dillərində təhsil
alır. 90 nəfərdən ibarət müəllim kontingenti şagirdlərin təhsili ilə məşğul
olur. Məktəbdə xalq
çalğı alətləri ansamblı, simli
alətlər ansamblı, nəfəs alətləri orkestri, qanunçalanlar, nağaraçalanlar və gitaraçalanlar
ansamblları, xor kollektivi
fəaliyyət göstərir. Tədris ili
ərzində məktəbin iş
planına uyğun olaraq
müxtəlif tədbirlər keçirilir,
ustad dərsləri və bəstəkarlarla
görüşlər təşkil edilir.
2012-ci ildə görkəmli bəstəkar C.Hacıyevin 95 illik yubileyi ilə əlaqədar
məktəbdə fortepiano
ifaçılarının məktəbdaxili müsabiqəsi keçirildi. Tədris ilinin sonunda şəhərimizin
müxtəlif konsert salonlarında hesabat konserti keçiririk. Məktəbin həmkarlar
təşkilatı tərəfindən
respublikanın görməli
yerlərinə səyahətlər
təşkil edilir, müəllimlərin yubileyləri
qeyd olunur. Məktəbin kollektivi Bakı Şəhər İcra Hakimiyyətinin təşkilatçılığı ilə ümummilli lider Heydər Əliyevin doğum günü ilə əlaqədar keçirilən
“Gül bayramı”nda iştirakına görə
bir neçə dəfə fəxri fərmanlarla təltif edilib.
- Məktəbiniz musiqi müsabiqələrində təmsil
olunurmu?
- Bəli, məktəbimizin
kollektivi müxtəlif
müsabiqələrdə iştirak
edir. Məsələn,
Q.Qarayev adına
fortepiano ifaçılarının Bakı müsabiqəsində
İlizarova Kristina 3-cü yeri
tutub, IV Respublika xor müsabiqəsində məktəbimiz fəxri fərmanla təltif edilib. Fortepianoda müşayiətlə keçirilən
müsabiqədə 3 fəxri
fərman və 1 diplomla təltif edilmişik. Ülkər Qüdrətli fleyta ilə nəfəs alətlərinin respublika müsabiqəsində həvəsləndirici
mükafat alıb. Eyni zamanda V respublika xor müsabiqəsində laureat
olmuşuq. Q.Qarayev adına fortepiano ifaçılarının
Bakı müsabiqəsində
Yusifli Gülarə və İlizarova Kristina diplomla təltif ediliblər. “Gənc ifaçılar təhlil və ifa edir”
adlı respublika müsabiqəsində Ağababayeva
Ceyran laureat olub. “Uşaqların musiqi dünyası” adlı I Bakı festivalında fəxri fərman almışıq.
Gənc pianoçuların
Q.Qarayev adına I respublika müsabiqəsində
Məmmədzadə Arzu
və Abbaslı Nəzrin diplomla təltif ediliblər. Nəfəs alətlərinin
II respublika müsabiqəsində
Əliyev Rəsul (fleyta) diplom, Bağırov Rauf (fleyta) və Məmmədov Sabir (klarnet) laureat olublar. Yəni, məktəbimizin kollektivi
müntəzəm olaraq
müsabiqələrə qatılaraq
oradan əliboş qayıtmırlar. “İlin
müəllimi” müsabiqəsinin
qalibi arasında da məktəbimizin təmsilçisi var. Belə
ki, Tofiq Əsgərov 2011-ci ildə
bu müsabiqədə
qalib olub. Fəaliyyət göstərdiyi
illər ərzində
məktəbin təxminən
2250 nəfər məzunu
olub. Həm Mədəniyyət və
Turizm Nazirliyi, həm Bakı Şəhər Mədəniyyət
və Turizm İdarəsi, eyni zamanda Səbail Rayon İcra Hakimiyyəti tərəfindən məktəbə
daim qayğı göstərilir. Məktəbin
qarmon ixtisası üzrə müəllimi
İrzaquliyeva Sonya Sadıq
qızı 2009-cu ildə
Əməkdar müəllim
fəxri adına layiq görülüb. Məktəbin müəllimləri
hər il müxtəlif ixtisaslar üzrə mədəniyyət
işçilərinin ixtisasartırma
kurslarına göndərilir.
- Məktəbdə tədris
işi necə qurulub?
- Əvvəla
onu qeyd edim ki, məktəb 2009-cu ildən Salyan rayon Q.Əsgərov
adına Uşaq incəsənət məktəbi və Bərdə
rayon 4 nömrəli Uşaq incəsənət məktəbi
ilə hamilik işi aparır. Bakı şəhərində
yerləşən musiqi məktəbləri, C.Cabbarlı
adına Azərbaycan Teatr Muzeyi, N.Hikmət adına Uşaq
kitabxanası, A.Şaiq adına Uşaq kitabxanası, 91, 49,
163 və 51 saylı orta ümumtəhsil məktəbləri və
157 nömrəli uşaq bağçası ilə əməkdaşlıq
edirik. Hər tədris ilində müxtəlif səpkili tədbirlər
keçirilir. Tədrisin səviyyəsini yüksəltmək,
düzgün metodiki iş aparmaq, yeniliklər tətbiq etmək,
yeni iş metodlarından istifadə etmək məqsədilə
məktəbdə metodiki kabinə yaradılıb. Nəfəs
və simli alətlərin tədrisinə daha ciddi nəzarət
olunur. Metodiki işlərin aparılmasına ciddi fikir verilir.
Mənim müəllifi olduğum ”Azərbaycan xalq
mahnılarının xor işləmələri” adlı məcmuə
Mədəniyyətşünaslıq üzrə Elmi-Metodiki Mərkəzin
uşaq musiqi məktəbləri üçün tərtib
etdiyi xor fənni üzrə tədris proqramına daxil edilib.
Sona İrzaquliyeva “Qarmon məktəbi” dərsliyinin müəllifidir.
İradə Kamilova isə “Qanun məktəbi” dərsliyini
hazırlayıb və müzakirə olunmaq üçün
Elmi-Metodiki Mərkəzə təqdim edib. Bütün
ixtisaslar üzrə şagirdlərin texniki cəhətdən
inkişaf etdirilməsi məqsədilə hər tədris
ilinin əvvəlində “Ev
tapşırığı-etüdlər” adı altında
dinləmələr keçirilir. Məktəbdə fəaliyyət
göstərən ”Renessans” xor kollektivinin fəaliyyətini
xüsusilə qeyd etmək istərdim. Bu kollektiv dəfələrlə
respublika xor müsabiqələrinin laureatı olub, Mədəniyyət
və Turizm Nazirliyinin diplom və fəxri fərmanları ilə
təltif edilib. 2011-ci ildə keçirilən VII respublika xor
müsabiqəsində I dərəcəli diploma layiq
görülüb. Təsadüfi deyil ki, Nazirlər Kabinetinin
2008-ci il 27 avqust tarixli sərəncamı ilə təsdiq
edilmiş “2009-2013-cü illər üçün Azərbaycan
Respublikasında Uşaq musiqi, incəsənət və rəssamlıq
məktəblərinin fəaliyyətinin
yaxşılaşdırılması üzrə
İnkişaf Proqramı” na əsasən Mədəniyyət
və Turizm Nazirliyinin müvafiq əmri ilə 2012/2013-cü tədris
ilindən məktəbdə “xor şöbəsi”
açılıb və tədricən xor məktəbinə
çevrilməsi nəzərdə tutulub. 2012-ci il məktəb
üçün ən uğurlu illərdən biri olub. 1955-ci
ildən acınacaqlı şəraitdə fəaliyyət
göstərən ibtidai musiqi təhsili ocağında Mədəniyyət
və Turizm Nazirliyi tərəfindən aparılmış təmir-tikinti
işləri başa çatdırılıb və 2013-
cü ilin yanvar ayında şagird və müəllimlərin
istifadəsinə verilib. 2012-ci ildə məktəbimizin
kollektivi «Eurovision» mahnı müsabiqəsi ilə əlaqədar
Bakı Şəhər Mədəniyyət və Turizm idarəsinin
Filarmoniya bağında keçirdiyi “Musiqi və Xalq Sənəti”
həftəsində və ümummilli liderin doğum
günü münasibətilə Bakı Şəhər
İcra Hakimiyyətinin təşkili etdiyi «Gül
bayramı»nda çıxışlarına görə fərqlənmə
diplomu ilə təltif edilib. Məktəbimiz böyüməkdə
olan nəslin mənəvi, estetik tərbiyəsini gücləndirmək
məqsədilə Səbail rayonunda yerləşən
ümumtəhsil məktəbləri ilə daim təmasda olur.
O cümlədən Səbail rayonunda yerləşən muzey və
kitabxanalarda tədbirlər təşkil edirik. Xeyriyyə məqsədilə
Xəzər rayonunda yerləşən internat məktəblərində
əlil uşaqlarla görüşlər də təşkil
edilir. Məktəbin kollektivi uşaqların musiqi təhsilinə
yiyələnməsi, onların bədii-estetik
zövqünün formalaşması və Azərbaycanımıza
layiq musiqiçilər kimi yetişməsi yolunda var qüvvəsi
ilə bundan sonra da çalışacaq.
Anar MIRIYEV
Palitra.2013.-28 fevral.-S.11.