“Bu yerlərdən böyük zövq aldım”

Yeganə Axundova: “Qəbələ festivalı böyük incəsənət bayramıdır”

Janna Qondolko: “Festival Azərbaycanın zəngin klassik musiqisi ilə yaxından tanışlığa imkan yaradır”

“Qəbələ Beynəlxalq Musiqi Festivalı böyük incəsənət bayramıdır”. Bu sözləri Heydər Əliyev Fondunun təşkilatçılığı ilə keçirilən V Qəbələ Beynəlxalq Musiqi Festivalının iştirakçısı, tanınmış pianoçu, Xalq artisti Yeganə Axundova jurnalistlərə müsahibəsində deyib. O, festivalın ərsəyə gəlməsində misilsiz xidmətləri olanHeydər Əliyev Fondunun prezidenti Mehriban Əliyevaya minnətdarlığını bildirib. Xalq artisti Qəbələ Beynəlxalq Musiqi Festivalında dünya şöhrətli musiqiçilərin, orkestrlərin və digər kollektivlərin iştirakını bu mötəbər incəsənət bayramına beynəlxalq miqyasda marağın artması kimi qiymətləndirib.

İndiyədək bir sıra nüfuzlu beynəlxalq müsabiqələrə qatıldığını söyləyən Yeganə Axundova, Qəbələ Beynəlxalq Musiqi Festivalının özü üçün tamaşaçılar qarşısında illik hesabat olduğunu vurğulayaraq deyib: “Mən hər il bu festivalı səbirsizliklə gözləyirəm. Bu mötəbər tədbirdə iştirak etmək həm yeni ifaçılarla tanışlıq, həm də mədəniyyətimizin təbliğində mühüm addımdır. Ümumiyyətlə, Azərbaycan klassik musiqisi son illər Avropa və dünyanın digər dövlətlərində də tanınmağa başlanıb.

“Qəbələ Beynəlxalq Musiqi Festivalı qeyri-adi musiqi bayramıdır. Dağların qoynunda, təbiətin əhatəsində tamaşaçılar qarşısında çıxış etmək insana zövq verir. Klassik musiqi insanın qəlbini saflaşdırır. Bu sənət bayramının tərbiyəvi əhəmiyyəti böyükdür. Eyni zamanda, Qəbələ festivalının ölkəmizin musiqisinin dünyada tanıdılmasında əvəzolunmaz yeri var”. Yerusəlim Simfonik Orkestrinin üzvü, skripkaçı Janna Qondolko isə bildirib ki, Qəbələ festivalı şəhərə gələn qonaqlara Azərbaycanın zəngin klassik musiqisi ilə yaxından tanış olmaq imkanı yaradır. Təbiətin qoynunda keçirilən bu möhtəşəm ənənəvi beynəlxalq musiqi festivalı Azərbaycanın musiqi tarixində yenilikdir.

Janna Qondolko Qəbələyə toplaşan dünyanın görkəmli musiqi xadimlərinin konsertlərinin böyük tamaşaçı auditoriyasına əsl musiqi bayramı yaşatdığını xüsusilə vurğulayıb. O, sıx meşələrlə əhatə olunmuş kiçik əyalət şəhərində gözəl təbiətin qoynunda keçirilən bu mötəbər sənət bayramının vaxtilə iştirakçısı olmaq arzusunu səmimiyyətlə dilə gətirib. Festivalın çox yüksək səviyyədə keçirildiyini deyən skripkaçı xanım bu mötəbər tədbirin təşkilatçılarına minnətdarlığını bildirib: “Bu yerlərdən böyük zövq aldım. Ümumiyyətlə, Azərbaycan Şərq və Qərb memarlıq nümunələrinin elementlərini özündə birləşdirir. Qəbələnin qədim, həm də müasir arxitekturası məni valeh etdi”. Janna Qondolko Azərbaycan xalçaları ilə xüsusilə maraqlandığını, vətəninə dönərkən xalçalarımızdan dostlarına hədiyyə aparacağını diqqətə çatdırıb.

Xəyalə

Palitra.-2012.-31 iyul.-S.13.