“Gənclərə böyük imkanlar və şanslar verilib”

Ramil Süleymanov: “Hər bir regionda gənclər üçün xüsusi treninq mərkəzləri, disput klubları yaratmaq lazımdır”

Demokratik Gənclər İctimai Birliyinin sədri Ramil Süleymanovla müsahibəni təqdim edirik

- Hazırda dövlətin apardığı gənclər siyasətini necə qiymətləndirirsiniz?

- Belə bir aksiom var ki, hər bir cəmiyyət gəncləri öz mədəniyyəti ruhunda tərbiyə edir. Məsələn, qədim Spartada gənclər nizam-intizam, qəhrəmanlıq və cəsarət ruhunda tərbiyə edilirdi. Amerikalılar öz övladlarını sahibkarlıq bacarığı və rəqabət ruhunda böyüdürlər. Çinlilər loyallıq, yaponlar isə əməkdaşlıq təlqin edirlər. Tarixən imperiyaların və sivilizasiyaların qovuşduğu məkanda yaşayan Azərbaycan xalqının həyat qaydası olan mübarizlik ruhu onun xarakterinə və düşüncəsinə hopub. Min illər öncə bu torpaqlarda yaranmış zərdüştlük-xeyirlə şərin əbədi mübarizəsi və xeyirin şər üzərində qələbəsi ideyası bütün dünya xalqlarının fəlsəfi fikrinə dərin təsir edib. Muğanda yaşayan maqların dini-fəlsəfi fikrindən bəhrələnən yunan filosofları "hər şeyin mübarizə vasitəsilə zərurətdən yarandığını" söyləyiblər. Düşmənlərlə mübarizə həyat tərzi olan xalqımızın söz sənəti də qəhrəmanlıq tərənnüm edən dastan və poemalarla zəngindir. Bəli, Azərbaycan gənci daim döyüş meydanlarında, zəfərlərdə böyüyüb, inkişaf edib. Azərbaycan gənci böyük elmi ixtiraları, kəşfləri ilə dünya sivilizasiyasının yaranmasında öz möhürünü vurub. Bu gün böyük iftixarla demək olar ki, müasir Azərbaycan gəncliyi də bu tarixi kökdən, bu gendən gələn milli-mənəvi dəyərlərimizi, doğma ana dilimizi, ata-babalardan miras qalan gözəl adət-ənənələrimizi göz bəbəyi kimi qoruyub yaşadır. Azərbaycan tarixinin hər bir mərhələsində aparıcı sosial-siyasi qüvvəyə çevrilən gənclər müstəqilliyin qorunub saxlanması, möhkəmləndirilməsi və dövlətçiliyin inkişaf etdirilməsi prosesində də yaxından iştirak edərək tarixi nailiyyətlər qazanıblar. Azərbaycan gənci öz həyatını qurarkən öncə müstəqil Azərbaycanın bu günü və gələcəyi haqqında düşünür, öz fəaliyyətində yüksək vətəndaşlıq hisslərinə malik olduğunu nümayiş etdirir. Buna gənclərin yüksək potensialı, əldə etdikləri elmi bilikləri, güclü vətənpərvərlik hissləri tam imkan verir.

- Dövlətin tutduğu gənclər siyasəti kursu gənclərə öz potensialını üzə çıxarmağa hansı imkanlar verir?

- Əslində böyük imkanlar və şanslar verilib. Bu gün Azərbaycanda gənclər siyasəti dövlət siyasətinin mühüm tərkib hissəsidir. Azərbaycan gəncliyi ictimai həyatın bütün sferalarında aktiv fəaliyyəti ilə seçilir və siyasi, iqtisadi, humanitar, sosial tədbirlərin həyata keçirilməsində mühüm rol oynayır. Dövlətin gənclərin fəaliyyəti üçün yaratdığı geniş imkanlar nəticəsində bu təbəqə cəmiyyətin avanqard qüvvəsinə çevrilib.

Hazırda ölkədə 200-ə yaxın gənclər təşkilatı, 20-dən artıq ali məktəbdə fəaliyyət göstərən tələbə-gənclər təşkilatları var. Onların əhatə etdikləri məsələlər də kifayət qədər genişdir: gənclərin vətənpərvər ruhda tərbiyəsi, məlumatlandırılması, işsizliyin azaldılması, gənclərin sağlamlığı, təhsili, fəal vətəndaş mövqeyi, mədəniyyətin geniş kütlələr arasında təbliği və s. məsələlər kifayət qədər aktualdır.

Bakıda Gənclər Mərkəzinin, regionlarda isə “Gənclər Evi”nin inşa edilməsi üçün müvafiq addımlar atılıb. Artıq 12 rayonda gənclər evləri fəaliyyət göstərir. Bakı şəhəri və ətraf qəsəbələrinin sosial-iqtisadi inkişafı proqramı çərçivəsində paytaxtın 5 rayonunda gənclər evi tikilməsi üçün layihələr təsdiq olunub və bu ildən etibarən inşasına başlanılacaq, yaxın 2-3 ildə isə15 gənclər evi inşa olunacaq.

- Gənclər ictimai-siyasi işlərdə hansı fəallıq göstərirlər?

- Gənclər əslində bütün ictimai-siyasi işlərdə fəallıq göstərirlər. Müxtəlif dövlət, qeyri-dövlət qurumlarında gənclər olduqca aktiv şəkildə təmsil olunurlar. Hətta bu aktivlik nəinki ölkə daxilində, hətta ölkə xaricində də öz əksini tapmış olur. Müxtəlif qeyri-hökumət təşkilatlarında təmsil olunan gənclər, ölkə rəhbərinin yürütdüyü dövlətçilik ənənələrini daim yüksəklərə doğru aparmağa çalışırlar.

- Demək olarmı, müxalifət bir qrup gənci öz çirkablarına bulayıb?

- Buna belə bir qiymət vermək olar. Əfsuslar olsun ki, bəzi gənclər bu gün getdiyi yolu və içində olduğu oyunları hələ tam şəkildə dərk etmir. Bilirsinizmi, bir çox hallarda biz bir qrup məmurun süründürməçiliyi və yaxud başqa-başqa özbaşınalıqları haqqında eşidirik. Hətta belə məmur özbaşınalıqlarından bu yaxınlarda cənab Prezident özü də keçirdiyi iclasda dövlət məmurlarına sonuncu xəbardarlığını etdi. Məhz bu hadisələri əllərində bayraq edən bir qrup adını “müxalifət” qoymuş siyasi-partiya rəhbərləri xaricdəki havadarlarından aldıqları tapşırıq və pullar vasitəsilə belə gəncləri öz ətraflarına toplamağa başlayırlar. Bundan sonra öz məkrli siyasətlərini işə salaraq, gənclərdə antidövlət əhvali-ruhiyyəsi yaratmış olurlar. Əgər fikir verirsinizsə, gənclərin bu cür üsyankar davranışları əsasən Azərbaycanda keçiriləcək seçkilər ərəfəsində özünü büruzə vermiş olur.

- Müxtəlif antimilli qrupların təsiri altına düşmüş gənclərə bu yoldan qayıtması üçün nə deyərdiniz?

- Belə qrupların təsir dairəsinə düşmüş gənclərə belə demək istərdim. Əgər hər hansı bir məsələni bəyənmirsinizsə, meydanlara çıxıb qışqırmaq lazım deyil. Sadəcə sakit bir tərzdə problemdən çıxış yolunu göstərmək üçün, dövlət qurumlarına düzgün saydığınız təklifləri vermək lazımdır. Bu gün əfsuslar olsun ki, belə təsir əhatəsinə düşmüş gənclərin əksəriyyəti ali təhsil almış gənclərdir. Burdan belə bir sual meydana çıxır. Məgər Mirzə Cəlil, Əli bəy Hüseynzadə, Mirzə Fətəli Axundov, Mirzə Ələkbər Sabir və digər Azərbaycan maarifçiləri hər hansı bir qanun pozuntusu ilə bağlı meydanlara çıxıb “Rədd olsun dövlət! Camaaat!.... üsyan eləmək lazımdır” və sair bunun kimi digər şüarlar irəli sürürdülərmi? Əlbəttə ki, yox. İnsanlara öz hüquqlarımızı, qanunları bilməyimizi öyrədirdilər. Əgər gündəlik mətbuatı və baş verən hadisələri dərindən izləmiş olsanız, görərsiniz ki, heç bir haqsızlıq cəzasız qalmır. Onu da məsləhət görərdim ki, bu gənclər Azərbaycan Respublikası Prezidenti yanında Azərbaycan Gənclər Fondunun hər il mütəmadi olaraq elan etdiyi gənclər siyasəti ilə bağlı qrant layihələrində iştirak etsinlər. Piket, mitinq və lazımsız iclaslara həsr etdikləri enerjilərini gənc nəslin maariflənməsinə həsr etsinlər. Bu zaman özlərində olan müsbət dəyişiklikləri görmüş olacaqlar və keçmişə qayıdıb baxanda peşman olacaq və sevinəcəklər ki, yaxşı ki düz yola qayıda bildik. Əziz gənclər! Mən sizlərə təklif edərdim ki, bu cəmiyyətdə görmək istədiyiniz dəyişiklikləri ağıllı təkliflər şəklinə salaraq, onları öz həmkarlarınızla bölüşəsiniz. Sosial şəbəkələrdə xalqın gələcəyinə köklənmiş, qanunvericilikdə gənclərə verilən hüquqları əsas gətirərək, maraqlı bir konsepsiya hazırlayıb onu müzakirə edəsiniz.

- Dövlətin gənclərə diqqət və qayğısından nə dərəcədə razısınız?

- Dövlətin həyata keçirdiyi siyasət gənc nəslin hərtərəfli inkişafına, problemlərinin həllinə, onların dövlət idarəçiliyində, ictimai həyatda, cəmiyyətdə gedən proseslərdə fəal iştirakına, vətənpərvər, öz dövlətinin və xalqının təəssübünü çəkən vətəndaş kimi formalaşmasına tam şərait yaradır. Cənab Prezident həmişə gənclərlə görüşür, onlarla fikir mübadiləsi aparır, problemləri ilə maraqlanır və bu problemlərin həlli məqsədilə müvafiq fərman və sərəncamlar imzalayır, tapşırıqlar verir. Əsası ümummilli lider Heydər Əliyev tərəfindən qoyulmuş dövlət gənclər siyasətini daha da inkişaf etdirmək, gənclərin menecment sahəsində fəal iştirakına şərait yaratmaq, gənc mütəxəssislərin işlə təminatı və digər sosial-iqtisadi problemlərinin həllini təmin etmək məqsədilə qəbul olunmuş “Azərbaycan gəncliyi 2011-2015-ci illərdə” Dövlət Proqramı və bu sənəd çərçivəsində həyata keçirilən tədbirlər cənab İlham Əliyevin gəncliyimizə diqqət və qayğısının bariz nümunəsidir. 2012-ci ildə yaradılmış Gənclər Fondu gənclər təşkilatlarının müxtəlif layihələrinin maliyyələşməsini təmin etməklə onların fəallığını artırır, müxtəlif sahələrdə potensiallarının daha geniş realizə olunması üçün əlavə stimul yaradır.

- Bu gün gənclərin Prezidentin ətrafında toplaşması ilə bağlı fikirlərinizi bilmək istərdik.

- Son 20 ilin təcrübəsi göstərir ki, Azərbaycan vətəndaşları öz intellekti, böyük dövlət xadimi qabiliyyəti, idarəçilikdə yenilikçiliyi ilə seçilən və müasir beynəlxalq siyasətin bütün nüanslarını bilən lider ətrafında birləşiblər. Prezident İlham Əliyev milli liderə xas bütün keyfiyyətlərə malikdir. Ötən 10 ildə onun rəhbərliyi ilə həyata keçirilən siyasət Azərbaycanın hərtərəfli və dinamik inkişafını, cəmiyyətimizin rifahını, ölkəmizin milli maraqlarını və beynəlxalq nüfuzunun yüksəlməsini təmin edib. Cənab Prezident ümummilli lider Heydər Əliyevin siyasi kursunu dönmədən davam etdirib, xalqın etimadına və dəstəyinə arxalanaraq bütün qüvvəsini və hakim komandanın potensialını səfərbər etməyi bacarıb, bugünkü inkişafa nail olub. Buna görə də xalqımız birmənalı şəkildə cənab İlham Əliyevin həyata keçirdiyi siyasi kursu dəstəkləyir, onun gələcəkdə də davam etdirilməsini zəruri sayır, bu gün ölkədə ona alternativ görmür. Azərbaycan gəncliyi ölkə Prezidentinin ətrafında sıx toplaşmalıdır. Onun yürütdüyü uğurlu xarici və daxili siyasətini dəstəkləməlidir.

- Sizcə, gənclərin daha da maariflənməsi və ictimai fəallığının artırılması istiqamətində hansı tədbirlər görülməlidir?

- Demokratik cəmiyyət quruculuğunda gənclərin fəallığının artırılması üçün öncə regionlarda gənclərlə işləyən QHT-lərlə, gənclərlə işləyən dövlət qurumları arasında əlaqələri gücləndirmək lazımdır. Bu əlaqələri daha da artırmaq məqsədi ilə müxtəlif səpkili tədbirlər hazırlamaq lazımdır. Bu tədbirlər əsasən özündə təqvim xarakterli tədbirləri əks etdirməməlidir. Bu tədbirlər daha çox müasir gəncliyin istək və arzularına həsr olunmalıdır. Hər bir regionda gənclər üçün xüsusi treninq mərkəzləri, disput klubları yaratmaq lazımdır. Xüsusilə qeyd etmək istərdim ki, bu mərkəzlər orta, orta ixtisas, peşə və ali təhsil ocaqları nəzdində də yaradılsa, biz bu gün istədiyimizə nail ola bilərik. Bu mərkəzlərdə artıq gənclər və yetişməkdə olan gənc nəsil gələcəyə inamla baxaraq, yaşadığı cəmiyyətdə öz missiyasını dərk etmiş olacaq. Yaradılan treninq mərkəzlərində qeyri-formal təhsil, insan hüquqları, ictimai fəallığın artırılması, ritorika istiqamətlərində təlimlər keçmək lazımdır.

Demokratik Gənclər İB olaraq biz də Azərbaycan gəncliyinin, Prezidentin gənclər siyasətinin inkişafında öz xidmətlərimizi verməkdə davam edirik. Birliyimiz yarandığı ilk gündən, gənclərin ictimai-siyasi fəallığının artırılması yolunda maraqlı və əsasən də nəticəyə köklənmiş layihələr həyata keçirib. Bu vaxta kimi Demokratik Gənclər İB tərəfindən 13 layihə keçirilib. Əgər hər hansı bir gəncə bizim köməyimiz lazımsa, Demokratik Gənclər İctimai Birliyi olaraq hər zaman kömək etməyə hazırıq.

Fuad HÜSEYNZADƏ

Palitra.-2013.-16 mart.-S.7.