“Gənclər bütün sahələrdə təmsil olunurlar”

Ramiq Vəliyev: “Milli-mənəvi dəyərlərin qorunmasını hədəfləyən təşkilatımızın üzvləri gənc nəslə daim örnək olmağa çalışır”

Layihə çərçivəsində Gənclərin Mənəvi İnkişafı İctimai Birliyinin sədri Ramiq Vəliyevlə müsahibəni təqdim edirik

- Rəhbəri olduğunuz QHT nə vaxt yaradılıb və fəaliyyət istiqamətləri hansılardır?

- Hər bir vətəndaşın qarşısında dövlətçiliyimizin keşiyində durmaq, onun suverenliyini qorumaq, etibarlı və təminatlı gələcəyimizin qurulmasında iştirak etmək kimi məsuliyyətli vəzifələr durur. Bu vəzifələrin böyük bir hissəsinin cəmiyyətin bütün təbəqələrində təmsil olunan gəncliyin üzərinə düşdüyünü nəzərə alaraq 2007-ci ildə Gənclərin Mənəvi İnkişafı İctimai Birliyi adında gənclər təşkilatı qurduq. Prezident İlham Əliyevin gənclər siyasətini tam dəstəkləyən təşkilatımız bu istiqamətdə öz töhfələrini vermək üçün qarşısına aşağıdakı vəzifələri qoyub: bütün istiqamətlərdə dövlətimizə yaxından dəstək olmaq, xüsusilə dövlətin və xalqın inkişafını və bütövlüyünü təmin edən milli-mənəvi dəyərləri qorumaq, ümummilli lider Heydər Əliyevin dövlətçilik prinsiplərinə qəlbən bağlı, inanc üçün azad iradəni təmin edən və məcburiyyəti rədd edən dünyəvi dövlət quruluşunu və demokratiyanın inkişafını müdafiə edən müasir və bilikli nəsillərin yetişdirilməsində iştirak etmək.

Təşkilatımız müxtəlif ixtisas və peşə sahələrini (ekologiya, sitologiya, biofizika, riyaziyyat, jurnalistika, tibb, kompyuter texnologiyası və s.) təmsil edən, Vətəninə, dövlətinə, millətinə, bayrağına sadiq könüllülük prinsipi ilə heç bir maddi maraq güdmədən fəaliyyət göstərən ali təhsilli və hazırda ali təhsil alan gənclərdən ibarətdir.

- Milli-mənəvi dəyərlərin qorunması və yaşadılması ölkənin ümumi inkişafının təmin olunması baxımından nə dərəcədə əhəmiyyətlidir?

- Azərbaycan əhalisi demək olar, gəncdir. Son məlumatlara görə, ölkə əhalisinin 31 faizini, yəni təxminən 2,8 milyon nəfəri təşkil edən gəncliyimizin nümunəvi, milli-mənəvi dəyərlərə malik gənclik olması hər birimizin arzusudur. Nümunəvi gəncliyin cəmiyyətdə dominantlığını təmin etmək baxımdan gənclərimizi həqiqi dəyərləri və həyatın mənasını tapmaları üçün doğru hədəflərə istiqamətləndirmək zəruridir. Bu hədəflərə yetişməsi üçün yol göstərməyin çox böyük əhəmiyyəti var. Dövlətimizin gənclər siyasətinin aparıcı istiqaməti əhalimizin aparıcı təbəqəsini təşkil edən gəncliyin vətəndaş cəmiyyətinin qurulmasında, onun inkişafında, bir sözlə, dövlətin və cəmiyyətin sosial-iqtisadi, ictimai-siyasi və mədəni həyatında iştirakının təmin edilməsidir. Hər zaman dövlətin yanında olmağa çalışan təşkilatımız da bu istiqamətdə potensialından maksimum istifadə etməyi qarşısına məqsəd qoyub.

Müşahidələrim əsasında, o cümlədən təşkilatımızın timsalında deyərdim ki, gəncliyimiz bütün sahələrdə təmsil olunur, cəmiyyətin inkişafında özünəməxsus və əvəzedilməz rol oynayır. Ümumi qənaətim budur ki, yalnız milli-mənəvi dəyərlərə malik gəncliyə daha çox güvənmək, etibar etmək olar.

- Milli-mənəvi dəyərlərin qorunması istiqamətində hansı layihələr keçiribsiniz?

- Yarandığı 2007-ci ildən indiyədək Vətəninə, dövlətinə, millətinə, bayrağına sadiq, dövlətimizin unitar, dünyəvi quruluşunu və milli-mənəvi dəyərlərini qoruyan, elmli, müasir və inanclı gəncliyin yetişməsində dövlətimizə yaxından dəstək olmağa çalışan könüllülüərdən ibarət təşkilatımız bir çox tədbirlər təşkil edib.

Həmin tədbirlərdən dövlət və dövlətçilik konsepsiyasından, dövlətçiliyin mühafizəsində mənəvi dəyərlərin müstəsna rolundan bəhs olunduğu, Heydər Əliyevin dövlətçilik prinsiplərinin vurğulandığı “Heydər Əliyev irsi və dövlətçiliyin qorunmasında mənəvi dəyərlərin rolu”, gənclərimizin radikal axınların və təlqinlərin təsiri altına düşməsinin qarşısının alınması məqsədilə “İslam terroru lənətləyir”, problemlərin effektli həlli üçün dövlətə bağlılığın əhəmiyyətindən, dövlətə və dövlətçiliyə qarşı çıxan, onun nüfuzunun zəiflədilməsinə yönələn bir sıra zərərli ideologiyaların gizli tərəflərinin göstərildiyi “Sosial problemlərin həlli yolları”, dini istismar edərək insanları xurafata sürükləyən zehniyyətlərin gənclərə təsirinin qarşısının alınmasını hədəfləyən, İslam dininin xurafata qarşı olduğunu və bu dinin insanları elmə təşviq etdiyini diqqətə çatdıran “Quran” elmə yol göstərir” mövzusunda keçirilmiş konfransları qeyd edə bilərəm. Ən son tədbirimiz bu il 8 Mart-Beynəlxalq Qadınlar Günü münasibətilə təşkil olunub. “Quran” əxlaqında qadın dəyərlidir” adlı bu konfransda gender bərabərliyinin təmin olunmasının zəruriliyi və qadınların cəmiyyətdə rolu barəsində söhbət açılıb. 300-400 nəfərin iştirak etdiyi konfranslar müxtəlif kütləvi informasiya vasitələri tərəfindən (“AzTV”, “İTV” telekanalları, “Respublika” qəzeti, qhtxeber.az saytı və s.) işıqlandırılıb.

Bunlarla yanaşı, dövlətə bağlılığın əhəmiyyətini cəmiyyətə daha da qabarıq göstərmək üçün “www.dovletebagliliq.org” saytını qurmuşuq.

- Hazırda bu istiqamətdə hansı işlər görürsünüz?

- Hazırda yeni layihələr üzərində işləyirik, əyani vəsaitlər hazırlayırıq. Yay tətili yaxınlaşdığından bu layihələrin tətildən sonra başa çatdırılacağını düşünürük.

- Bu işlərin həyata keçirilməsində dövlət və QHT-lərlə əməkdaşlıq edirsinizmi?

- Hər bir tədbirimiz dövlətlə sıx əməkdaşlıq şəraitində keçir. Aidiyyəti dövlət təşkilatlarının nümayəndələri, millət vəkilləri tədbirlərimizə dəvət edilir. Dövlətimizi təmsil edən nümayəndələrin təkliflərini və tövsiyələrini daim diqqətdə saxlayırıq.

Azərbaycan Respublikasının Prezidenti İlham Əliyevin təşəbbüsü ilə 2010-cu ilin “Ekologiya ili” elan edilməsindən başlayaraq, təşkilatımızın nümayəndələri Azərbaycan Dövlət Neft Şirkətinin Ekologiya İdarəsi və “İrəli” İctimai Birliyinin birgə təşkil etdiyi “Planetimizi tanıyaq” adlı layihədə ölkəmizin aparıcı ali təhsil ocaqlarında daimi mühazirəçi olaraq iştirak ediblər. Mühazirələr ekoloji mövzularda olub. Gənclərimizdə yaşadığımız planet haqqında daha geniş təsəvvürlərin formalaşması üçün Yer kürəsinin tanıdılması, planetimizdəki həssas tarazlıqların və ekosistemin öyrənilməsi, ətraf mühit problemləri, biotexnologiya, biomühəndisliyin faydaları haqqında ətraflı məlumatlar verilib.

Layihənin uğurlu olması səbəbindən fəaliyyətlərimiz yalnız Bakı şəhəri ilə məhdudlaşmamış, regionlarda da (Gəncə, Mingəçevir, Qax və Şəki şəhərində) müvafiq maarifləndirici tədbirlər təşkil edilib.

Təşkilatımızın nümayəndələri təhsil sahəsindəki daha bir layihədə iştirak edib. “Məktəb Parlamenti” adlı layihə çərçivəsində bir sıra orta məktəbdə “Mavi planet Yer kürəsi və ekosfera”, “Təbiət və səmərəli texnologiya” kimi mövzularda keçirilən seminarlarda mühazirələr və hər həftə “İTV”nin efirində nümayiş etdirilən “Məktəb gündəliyi” verilişində ekosfera, biotexnologiya kimi mövzularda dərslər keçilib.

- Gənc nəslin bu sahəyə marağı necədir?

- Cəmiyyətin monolit olmaması səbəbindən gənclik hər yerdədir-siyasətdə, elmdə, incəsənətdə, idmanda, biznesdə, dövlət qulluğunda, güc strukturlarında, bir sözlə, cəmiyyətin bütün təbəqələrində təmsil olunur. Təşkilatımız bunu nəzərə alaraq tədbirlərində hər dəfə fərqli mövzulara toxunur, müxtəlif sahələri təmsil edən gəncliyi maraqlandıran məqamları dilə gətirməyə səy göstərir.

Qeyd edim ki, milli-mənəvi dəyərlərin qorunmasını, müasir və bilikli gəncliyin yetişdirilməsini hədəfləyən təşkilatımızın gənc üzvləri gənc nəslə daim örnək olmağa çalışır. Bunun üçün nümayəndələrimiz həyata keçirilən tədbirlərin yüksək səviyyədə keçirilməsini və iştirakçılar tərəfindən mövzuların daha dərindən mənimsənilməsini təmin etmək məqsədilə ən son texnologiyalardan, əyani vəsaitlərdən istifadə edilməsini daim diqqətdə saxlamaqla hər bir tədbirə xüsusi yanaşırlar. Bu da gənc nəslin xüsusi marağına səbəb olur, layihələrimizin uğurla və keyfiyyətlə həyata keçirilməsini təmin edir.

- QHT olaraq gənclərin təhsilə, elmə marağının artmasına nə kimi kömək edirsiniz?

- Statistik məlumatlara görə, müasir Azərbaycan gəncliyində ali təhsillilərin payı 60 faizdən çoxdur. Təbii ki, biz bununla qane ola bilmərik. Buna görə də təşkilatımızın təşkil etdiyi seminarlar, dəyirmi masalar, konfranslarda gəncliyin milli-mənəvi dəyərlərə sadiq qalması ilə yanaşı, yüksək təhsilə, elmə, müasirliyə yönəlməsi daim vurğulanır. Yuxarıda qeyd etdiyim təhsil sahəsindəki bir sıra layihələrdəki iştirakımızı gənclərin təhsilə, elmə marağının artmasına yönəlmiş fəaliyyət kimi də qiymətləndirərdim. Bununla kifayətlənməyərək bu istiqamətdə internet imkanlarından da yararlanmağa çalışırıq. Məhz bu məqsədlə də elmi təşviq edən bir sıra internet saytları qurmuşuq.

- Milli-mənəvi dəyərlərin qorunması üçün nələr edilməlidir?

- Savadlı, geniş dünyagörüşlü, modern, vətənpərvər, milli-mənəvi dəyərlərə sadiq imanlı gənclik millətin ümidli gələcəyini təmin edən təbəqədir. Cəmiyyətdə müxtəliflik amili olduğundan gənclər heç də hamısı yuxarıda sadaladığım nümunəvi, görmək istədiyimiz kimi deyillər. Məlumdur ki, gənclər arasında narkomaniya, alkoqolizmə mübtəla olmuş, cinayətarlığa, əxlaqsızlığa, terrorizmə sürüklənmiş, hətta meyilli olan gənclik də var. Bu neqativ hallar son onilliklərdə xeyli artıb və bu hallar istər inkişaf etmiş, istərsə də inkişaf etməkdə olan bütün ölkələrdə artıb, yəni sırf milli problem deyil. Mənəvi, psixi boşluq belə neqativ halların sığındığı yerdir. Bunu xüsusi qeyd edim ki, “Mənəvi boşluq” problemi adətən gözdən yayınır. Xüsusi narahatçılıq mütəmadi olaraq gənclərin intihar etmələri xəbərlərinin gəlməsidir. Bu xəbərlər az qala gündəmi zəbt edib. İntiharların baş verməsində insanları ağlına görə deyil, hisslərinə, hirslərinə görə yaşamağa sürükləyən və həyatın bir-birindən çox fərqli sahələrində, çox fərqli şəraitdə qarşıya çıxa bilən romantizmin xüsusi çəkisi var. Amma çox maraqlıdır ki, insanların böyük əksəriyyəti bunu bir təhlükə olaraq görmür və sanki qabardılmamaqda maraqlı görünürlər. Hətta romantizm təhlükəsi bir təhlükə və səhv olaraq deyil, təqdir edilməsi və yaşanması lazım olan bir üstünlük kimi qələmə verməyə çalışılır. Bunun da nəticəsində gənclər düşdüyü sıxıntıdan heç olmasa müvəqqəti azad olmaq üçün radikal və öldürücü üsullara əl atırlar. Ölümlə nəticələnən, ən yaxşı halda sağlamlığa ağır zərbə vuran bu tip neqativ halların qarşısının alınmasında, gənclərimizin bu istiqamətdə maarifləndirilməsində öz töhfəmizi vermək üçün gələcək tədbirlərimizdə bu mövzulara-romantizm təhlükəsinə, gəncliyi “mənəvi boşluğa” düşürən səbəblərə də toxunulmasını nəzərdə tutmuşuq. Bu məsələlərdə biz də daim dövlətin yanında olmalıyıq, hər bir şəxs, ümumiyyətlə, cəmiyyətimiz də laqeyd qalmamalıdır, hər birimiz məsuliyyət daşımalıyıq.

Fuad HÜSEYNZADƏ

Palitra.-2013.-8 may.-s.11.