“Azərbaycan dövləti gənclərin xaricdə təhsil alması üçün lazım olan bütün şəraiti yaradır”

Orxan Tağıyev: “Düşünürəm ki, xaricə təhsil almağa gedən hər bir şəxsin, gəncin əsas vəzifəsi təhsil almaqla yanaşı öz ölkəsini orada layiqincə təmsil etmək, Azərbaycan həqiqətlərinin müvafiq ölkədə yayılması üçün çalışmaq olmalıdır”

-Özünüzü təqdim edin və fəaliyyətiniz haqqında məlumat verin

-Mən Orxan Tağıyev Almaniya Fedarativ Respublikasının Bonn şəhərində yerləşən Frederik Vilyam adına Bonn Universitetində hüquq fakültəsinin tələbəsiyəm. Hazirda universitetdə magistratura pilləsində təhsilimi davam etdirirəm. Eyni zamanda bu universitetin tələbəsi olaraq Almaniya Federativ Respublikasında fəaliyyət göstərən diasporumuzda hüquq məsləhətçisi kimi fəaliyyət göstərirəm.

-Xarici təhsilin üstünlükləri barədə nə deyərdiniz?

-Xaricdə təhsil alan tələbə kimi deyə bilərəm ki, xarici ökədə təhsil almağın bir çox üstünlükləri vardır. İlk növbədə bu müvafiq şəxsdə geniş dünyagörüşün formalaşmasında böyük rol oynayır. Digər dövlətdə yaşamaq, orada beynəlxaq bir kollektiv içində olmaq və təhsil almaq həm tam yeni bir biliklərə yiyələnməkdir, həm də həmin dövlətin vətəndaşları ilə ünsiyyətdə olmaq, həmin cəmiyyətin mədəniyyəti ilə yaxından tanış olmaq deməkdir. Bu həm də öz vətənini orada təmsil etmək və tanıtmaq baxımdan mühüm əhəmiyyət kəsb edir. Hesab edirəm ki, hər bir şəxs tələbə olması və ya olmaması halından asılı olmayaraq xaricdə olan zaman öz ölkəsinin tanıdılması, ölkəsinin pozitiv imicinin yaradılması üçün çalımalıdır. Xaricdə təhsil almağın digər bir üstünlüyü orada müvafiq sahə, ixtisas üzrə qiymətli təcrübənin toplanması və sonra bu təcrübənin vətəndə davamlı inkişaf naminə tətbiq edilməsi imkanıdır. İnkarolunmaz faktdır ki, xaricdə təhsil və diaspor təşkilatlarında fəaliyyət gənclərin gələcək karyera yüksəlişinə də böyük təsir göstərir. Nəzərə almaq lazımdır ki, yad, digər cəmiyyətdə təhsil almaq, orada müxtəlif sosial təsisatlarla sıx işləmək əvəzolunmaz bir təcrübədir.

-Azərbaycan dövlətinin xaricdə təhsil üçün yaratdığı şəraiti necə qiymətləndirirsiniz?

-Təqdirəlayiq haldır ki, bu gün Azərbaycan dövləti, azərbaycanlı tələbələrə xaricdə təhsil almaq üçün lazım olan bütün şəraiti yaradır. Bu gün istənilən gənc müvafiq qaydalar əsasında dövlət proqramı ilə xarici dövlətlərin ən nüfuzlu universitetlərinə daxil ola və orada təhsil ala bilər. “2007-2015-ci illər Azərbaycan gənclərinin xaricdə təhsili üzrə Dövlət Proqramı” azərbaycanlı gənclərin xarici dövlətlərin ən nüfuzlu universitetlərində təhsil almasını və sonra ölkəyə qayıdaraq Azərbaycan naminə çalışmalarını nəzərdə tutur. Bu proqram gənclərimiz qarşısında böyük imkanlar açır. Onların müvafiq ixtisaslar üzrə yüksək səviyyəli peşəkar olmasına kömək edir. Bundan başqa öz təşəbbüsləri əsasında xarici dövlətlərin müxtəlif universitetlərində təhsil alan minlərlə tələbələrimiz var ki, onlarda ölkəyə qayıdaraq ölkəmizin daha da inkişaf etməsi naminə işləməlidirlər. Eyni zamanda həmin tələbələr yaddan çıxarmalı deyillər ki, onlar Azərbaycan mədəniyyətinin daşıyıcılarıdırlar. Bu mənada onlar böyük tarixi kökü olan mədəniyyətimizin dünyanın ən müxtəlif ölkələrində tanıdılması üçün çalışmalıdırlar. Həmçinin Ermənistan-Azərbaycan Dağlıq-Qarabağ münaqişəsi və Azərbaycanın dünya ictimaiyyəti və beynəlxalq təşkilatlar tərəfindən qəbul edilən haqlı mövqeyinin təbliği və Ermənsitanın Azərbaycana qarşı işğalçı siyasətinin müvafiq ölkənin ictimaiyyətinə çatdırılması üçün də gənclər məqsədyönlü fəaliyyət göstərməlidirlər.

-Azərbaycandan kənarda təhsil alan tələbə gənclərin Azərbaycan mənafeyi naminə təşkilatlanması və diasporun formalaşmasında rolunu necə görürsünüz?

-Bu gün xaricdə təhsil alan bütün gənclər müvafiq diaspor təşkilatlarında birləşməli və ölkəmizin xarici dövlətlərdə pozitiv imicinin yaradılması üçün əllərindən gələni etməlidirlər. Qeyd etmək lazımdır ki, son illər diaspor quruculuğunda böyük işlər görülüb. Xaricdə təhsil alan və eləcə də müxtəlif ölkələrdə işləyən və yaşayan gənclərin-azərbaycanlıların təşkilatlanması istiqamətində ardıcıl işlər aparılır. Düşünürəm ki, xaricə təhsil almağa gedən hər bir şəxsin, gəncin əsas vəzifəsi təhsil almaqla yanaşı öz ölkəsini orada layiqincə təmsil etmək, azərbaycan həqiqətlərinin müvafiq ökədə yayılması üçün çalışmaq olmalıdır. Gənclər diaspor təşkilatlarında birləşməli, yerləşmə ölkəsində diaspor təşkilatları və eləcə də həmin ölkədə akkreditasiya edilmiş səfirliyimizlə sıx işləməli və Azərbaycan həqiqətlərini dünyaya çatdırmalı və müvafiq lobbiçilik fəaliyyəti üçün mümkün resurslardan istifadə etməlidirlər. Nəzərə almaq lazımdır ki, xaricdə təhsil alan hər bir gənc Azərbaycanın qeyri-rəsmi səfiridir.

-Bu sahədə rast gəlinən çətinliklər və maneələr hansılardır?

-Ümumiyyətlə bu sahədə, yəni gənclərin diaspor quruculuğuna cəlb edilməsi sahəsində mənim fikrimcə, ciddi bir problem mövcud deyil. Xaricdə təhsil alan, orada yaşayan fəal azərbaycanlılar diaspor təşkilatlarında birləşir və Azərbaycanın mədəniyyətinin, adət-ənənəsinin, ən əsası isə Ermənistanın Azərbaycana təcavüzü nəticəsində 20 faiz torpaqlarımızın işğal faktının daha geniş kütlələrə çatdırılması üçün çalışırlar. Bu gün gənclərin diaspora quruculuğu işində fəaliyyəti təqdirolunandır. Harda yaşamasından asılı olmayaraq hər bir gənc müstəqil azərbaycanla fəxr edir və ölkəsinin yaşadığı, təhsil aldığı yerdə tanıdılması üçün çalışır. Hesab edirəm ki, xaricdə təhsil kimi proqramlar Azərbaycanın güclənməsi, ölkəmizdə intellektual potensialın yaradılması və neft kapitalının insan kapitalına çevrilməsi üçün vacibdir. Təqdirəlayiq haldır ki, savadlı, geniş dünyagörüşlü, bir neçə xarici dil bilən gənc azərbaycanlılar bu gün diaspor təşkilatlarımızda üstünlük təşkil edirlər. Bu insan kapitalı ölkəmizin tanıdılması üçün vacib faktordur.

İlkin Ağayev

Palitra.-2013.-8 oktyabr.-S.11.