“Yeni mərhələdə internet klublarında vaxtlarını itirən gənclər üçün səmərəli layihələr olmalıdır”

Şahin İsmayılov : “2013-cü ildə gənclər daha geniş əhatədə layihələrə cəlb ediləcək”

Gənclər sahəsində baş verən yeniliklər, həyata keçirilən layihələrlə bağlı olaraq müsahibimiz Azərbaycan Tələbə-Gənclər Təşkilatları İttifaqının (ATGTİ)sədri Şahin İsmayılovdur.

-Ölkədə həyata keçirilən gənclər siyasəti nəticəsində əldə edfilən dəyişiklikləri necə ifadə edərdiniz?

- Hələ 1994-cü ildəki çətin vaxtlarda, yəni dövlət qurumlarının yenicə formalaşmağa başladığı zamanlarda gənclərlə bağlı ayrıca nazirliyin yaradılması bu sahəyə ayrılan diqqətin nəticəsi idi. O ki qaldı son zamanlar həyata keçirilən gənclər siyasətinə, mən qeyd etmək istəyirəm ki, 2011-ci ildə qəbul edilən “Azərbaycan gəncliyi 2011-2015-ci illərdə” Dövlət Proqramı bu məqamda xüsusi önə çəkilməlidir. Gənclər fəaliyyətinin bütün istiqamətləri bu proqramda dəstəklənir. Bu dövlət proqramının ən böyük və üstün cəhəti ondan ibarətdir ki, ora düşən və orada əksini tapan bütün təkliflər gənclər tərəfindən gəlib. Gənclərlə bağlı bu dövlət proqramının hazırlanması ərəfəsində müəyyən qurumlar tərəfindən də etiraf edilirdi ki, heç vaxt bu qədər rezonans doğuran və diqqətə səbəb olan, gənclərin böyük ordusunu əhatə edən proqram olmayıb. Çünki gənclər özü də aktiv surətdə həmin proqramın hazırlanmasında iştirak etdilər. Çox əhatəli və mükəmməl bir proqram ərsəyə gəldi. Bundan başqa proqramın hazırlanması ilə bağlı yaradılan dövlət komissiyasının tərkibinə dövlət qurumları ilə yanaşı qeyri-hökumət gənclər təşkilatlarının rəhbərləri də cəlb olundu. Hər cür şərait yaradılmışdı ki, gənclər həmin proqramın hazırlanması üçün öz töhfələrini verə bilsinlər. Bundan başqa son dövrlərdə proqramla bağlı olan tədbirlərin həyata keçirilməyə başlaması gənclər sahəsində keyfiyyətcə yeni mərhələnin formalaşmasını təmin etdi. Eyni zamanda regionlarda gənclər mərkəzlərinin yaradılması, Azərbaycan Gənclər Fondunun yaradılması kimi çox effektli və davamlı layihələr həyata keçirildi. İstər Gənclər və İdman Nazirliyi, istərsə də Gənclər Fondu çərçivəsində həyata keçirilən gənclər təşkilatları layihələrindən başqa, Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası çərçivəsində də gənclər təşkilatlarının aktivliyini və gənclərə yönəlik layihələrin intensivliyini görmək mümkündür. Həmçinin istedadlı gənclərin, tələbələrin dəstəklənməsi, Azərbaycan gənclərinin xaricdə təhsil almasının dövlət hesabına həyata keçirilməsi və sair proqramlar var ki, çoxsaylı gənclər ordusunun öz inkişafı üçün bunlardan tam şəkildə bəhrələndiyini demək olar. Bütün qısaca qeyd etdiklərim onu deməyə əsas verir ki, Azərbaycanda həyata keçirilən gənclər siyasəti gənclərin intensiv inkişafını təmin edib və bu sahədə çox ciddi nümunələr yaradıb. Bu isə eyni zamanda digər dövlətlərin də Azərbaycan gənclər siyasətindən nümunə kimi yararlanmasına gətirib çıxarıb. Bu gün digər ölkə nümayəndələri, müvafiq sahədə fəaliyyət göstərən qurumların təmsilçiləri bizim gənclər siyasəti və onun bəhrələri ilə yaxından maraqlanmağa başlayıblar. Bir sözlə, Azərbaycan gəncləri özlərini şanslı hesab etməlidirlər ki, gənclər siyasətindən, onlar üçün yaradılmış imkan və fürsətlərdən bu dərəcədə bəhrələnə bilirlər.

-Gənclər proqramından gənclərin kütləvi şəkildə bəhrələnməsi ilə bağlı konkret misal çəkmənizi istərdik.

-Bu barədə çoxlu misallar çəkmək olar, çünki proqram çoxcəhətli və geniş əhatəlidir. Məsələn, Azərbaycan tələbə kartları barədə bildirim. Bu kartlar bütün Azərbaycan tələbələrinə dövlət tərəfindən pulsuz verilən kartlar oldu. Bu kartlarla tələbələrə müxtəlif güzəştlər, endirimlər edilməsi nəzərdə tutulub. Bu kartlar nəinki Azərbaycanda, Avropa məkanında da əldə oluna bilər. Amma Avropa məkanında bu kartları əldə etmək üçün müəyyən ödənişər etmək lazımdır, Azərbaycanda isə kartlar pulsuz paylanır. Həmçinin bayaq Azərbaycan Gənclər Fondunun, regionlarda gənclər mərkəzlərinin yaradılması, idman kompleksləri və sair məşğuliyyət mərkəzlərinin tikilməsi kimi misalları da təfərrüatı ilə qeyd etmək və bunlar barədə danışmaq olar. Ölkədə həyata keçirilən gənclər siyasətinin ən mühüm cəhəti ondan ibarətdir ki, gənclərin fikirləri öyrənilir, təşəbbüsləri dəyərləndirilir və həmin təşəbbüslər əsasında müəyyən normativ hüquqi sənədlər hazırlanır. Gənclərlə bağlı qurumların nümayəndələrinin gənclərlə bağlı hansısa dövlət proqramının hazırlanmasından söhbət getmir. Bu prosesdə gənclərin rəyi və onların istəkləri əsasdır, yalnız bunun əsasında həmin proqramlar ərsəyə gəlir. Yəni bu proqramlar sosial sifarişin nəticəsi olaraq yaranır və reallaşdırılır. Ona görə də gənclər ordusuna əsaslanır və əksəriyyəti əhatə edir. Gənclərin ideyaları əsasında proqramlar hazırlanır və həyata keçirilir. Düşünürəm ki, gənclərlə bağlı proqramların uğurlu olmasının ən əsas səbəbi də bununla bağlıdır. Burada bir məqama da diqqət çəkmək istərdim. 2011-ci ildə ölkə Prezidenti ölkədə bir qrup aktiv gənclə görüşü zamanı belə bir məsələ ortaya qoydu ki, hazırlanacaq dövlət proqramı konseptual olmalı və real fəaliyyətlər ortaya qoyulmalıdır. Həmin proqram məhz bu prinsiplərlə həyata keçirildiyi üçün bu gün gənclər və bütün Azərbaycan cəmiyyəti onun bəhrələrini bariz şəkildə görür.

-Gənclik həmişə bir qədər maksimalist olması və dinamikliyə, dəyişikliklərə meyilliliyi ilə fərqlənir. Bu baxımdan gənclərin bu cür axtarış meyillərini, tələbatlarını qarşılamaq üçün gənc olaraq nələri təklif edərdiniz?

- Çox doğru qeyd etdiniz ki, gənclər həmişə dinamizmə və dəyişikliklərə, axtarışlara meyillidir. Bu baxımdan öncədən cəlbedici və maraqlı görünən layihələr az keçmiş gənclərə bir o qədər də maraqlı görünmür. Ona görə ki, gənclər yeni axtarışlara başlayırlar. Yaxud gənclərimiz var ki, gününün çoxunu internet klublarında, internetdə keçirir. Halbuki bilirik ki, 270-dən yuxarı gənclər təşkilatımız fəaliyyət göstərir. Eyni zamanda, digər təşkilatların da gənclərlə bağlı effektli layihələri var. Regionlarda da gənclər təşkilatları aktivdir və kifayət qədər gəncləri ətrafına toplaya bilir. Bundan başqa universitetlərdə tələbə gənclər təşkilatları fəaliyyət göstərir ki, gənclər vaxtlarını səmərəli keçirə bilsinlər. Burada düşünmək lazımdır ki, necə etmək olar ki, internet klublarında vaxtlarını boş yerə keçirən gənclər də onlar üçün ayrılmış şəraitdən, imtiyazlardan bəhrələnə bilsinlər. Növbəti mərhələlərdə təbii ki, biz həmin gəncləri əhatə etməliyik və ən azından həmin gənclər məlumatlı olmalıdırlar ki, onlar layihələrdə aktiv iştirak etməklə nələr əldə edə bilərlər. Yaxud da onlar götür-qoy etməlidirlər ki, internetdə boş yerə oturmaqla nələri itirirlər. Növbəti mərhələlərdə biz çalışmalıyıq ki, bu barədə optimal seçim yollarını gənclərə çatdıraq. Onlar ilkin mərhələdə heç olmasa dolğun bilgiləndirilməlidirlər ki, gənclərlə bağlı layihələrdə iştirak etməklə, dövlətin onlar üçün yaratdığı imkanlardan istifadə edərək Azərbaycan gəncliyinin avanqard hissəsində yer ala bilərlər. Sizi inandırım ki, 3 il ərzində Azərbaycan Tələbə Gənclər Təşkilatları İttifaqı olaraq təqribən 414 layihə həyata keçirə bilmişik. Bu layihələrdə 100 mindən yuxarı tələbə iştirak edib. Bu cür layihələr 2013-cü ildə daha aktiv şəkildə davam edəcək. Gənclər daha geniş əhatədə həmin layihələrə cəlb ediləcək. Bütün kateqoriyadan olan gəncləri bu cür təşəbbüsləri dəstəkləməyə və onlarda iştirak etməyə çağırıram. Bu gün gənclərin bu sahədə üzərinə düşən əsas məsələlərdən biri təşəbbüskar olmaq, yeni ideyalarla çıxış etməkdir. Burada ən əsas məqam isə odur ki, istənilən ideyada dövlətçiliyimizi qorumalı, millətimizin mənafeyindən çıxış etməyi bacarmalıyıq. Çünki ölkənin gələcəyi biz gənclərin üzərində qurulacaq. Buna görə də gələcəyin məsuliyyətini indidən öz üzərimizdə hiss etməliyik.

İlkin AĞAYEV

Palitra.-2013.-15 yanvar.-S.7.