“Çexiyada musiqi üzrə təhsil alan ilk azərbaycanlıyam”

Günel Ələkbərova: “Bizim estrada janrlı musiqilərimizi Avropada kifayət qədər tanıyırlar”

Bu həyatda insan üçün vacib olan ən mühüm amillərdən biri də peşəsi ilə xoşbəxt olma sevincidir. Müsahibimlə söhbətdə bu sevinci onun gözlərindən, mimikalarından, sözlərindən anlamaq çətin deyildi. Layihə çərçivəsində növbəti müsahibim Azərbaycan Dövlət Akademik Opera və Balet Teatrının solisti, həmçinin Mədəniyyət və İncəsənət Universitetin vokal ixtisası üzrə baş müəllimi Günel Ələkbərovadır. Onunla keçən səmimi söhbəti sizə təqdim edirik.

“Valideynlərim mənim musiqiçi olmağımı istəmirdilər”

- Kiçik yaşlarımdan musiqiyə böyük həvəsim olub. Hətta deyilənə görə 6 aylığımda musiqi səsi eşidən kimi ağlamağımı kəsirdim. Bizim ailədə incəsənətin müxtəlif sahələri ilə məşğul olanlar olub. Dayım xalq rəssamıdır, böyük qardaşım dirijor olub, indi müəyyən səbəblərə görə musiqidən ayrı düşüb. Balaca qardaşım rəssamdır. Amma valideynlərim mənim musiqiçi olmamı istəmirdilər. Onlar mənim həkim olmamın tərəfdarı idilər. Ona görə mən bütün fənləri yaxşı oxuyurdum, məktəbi də əlaçı kimi bitirdim. Universitetə imtahanda da 600 baldan çox topladım. Hətta bu balla vokalı seçən insan kimi tarixə də düşə bilərəm. Anamdan xəbərsiz ixtisas seçimində Bakı Musiqi Akademiyasının opera üzrə solo oxuma ixtisasını qeyd etdim. Oranı müvəffəqiyyətlə bitirib, magistr olmaq üçün xaricə getdim. Praqa Dövlət Musiqi Akademiyasının vokal şöbəsinin-opera ifaçısı bölümünə qəbul olundum.

“İfa etdiyim musiqilər mənim özümdür”

-Bilirsiniz, hər bir sənətin öz çətinliyi olduğu kimi vokal sənətinin də çətinliyi istisna deyil. Bu sənəti seçən adamın həm aktyorluq qabiliyyəti, həm də Allah tərəfindən səsi olmalıdır. Vokalçıda aktyorluq istedadı olmayanda tamaşaçını cəlb etmək, diqqətini çəkmək çətin olur. Yəni, onlar operada sevgini, kədəri, itkini ifadə etməkdə çox çətinlik çəkirlər. Bir vokalçı üçün operada ifa etdiyin partiyanı tamaşaçıya çatdırmaq çox böyük xoşbəxtlikdir. Elə vokalistlər var, gözəl səsləri olmasına baxmayaraq, aktyorluq qabiliyyətləri yüksək səviyyədə deyil. Bu baxımdan çox çətin sənətdir. Amma artıq qəti olaraq bilirəm ki, mən yüz dəfə də bu dünyaya gəlsəm, yenə də musiqiçi-vokalçı olaram. Çünki bu sənət məni yaşadır, xoşbəxt edir, ifa etdiyim musiqilər mənim özümdür, mənim abu-havamdır, əhvalımdır.

“Ora gedəndə Azərbaycan üçün, Azərbaycana gələndə isə Çexiya üçün darıxıram”

Buna qərar verməm çətin olmadı. Çünki xarici təhsil çox güclüdür, bundan başqa Çexiyada imkanlar daha çox idi. Orda təhsil alarkən, ifaçılıq edərkən, mənim ifam təkcə Praqa şəhəri ilə çərçivələnmirdi. Biz demək olar ki, hər həftə Avstriyada, Almaniyada konsert proqramları ilə çıxış edirdik. Yəni, bütün Avropa dairəsini gəzib ifamızı təqdim edirdik. Bundan başqa görüşlər, seminarlar keçirirdik. Beləcə, bir ifaçı başqa ölkərlərlə, onların musiqi təhsili ilə yaxından tanış olma şansına malik olur. Orada mübadilə çox geniş yayılıb. Amma Azərbaycanda öz təcrübəmə əsasən deyirəm, Musiqi Akademiyasında vokalda oxuyarkən ancaq Bakı ilə kifayətlənməli olursan. Öz vəsaitin olmasa xaricə çıxa bilmirsən, bu mənada, Azərbaycanda imkanlar çox məhduddur. Çexiyada Praqa Dövlət Musiqi Akademiyasının “Vokal və nəzəriyyə üzrə ixtisasca “ doktorantura elmi dərəcəsinə, YUNESKO diplomuna layiq görüldüm. Amma tək bununla bitmirdi, çoxlu sayda xarici ölkələrdə seminarların və çıxışların müəllifi olmuşam. Həm xarici ölkələrdə, həm də doğma Azərbaycanda tez-tez musiqi festivallarında çıxış edirəm. Xarici ölkələrdə çıxışlarıma gəlincə, Praqa, Plzen, Bratislava, Vena, Salzburq, Drezden, Berlin, Budapeşt kimi şəhərlərdə saysız hesabsız konsertlər vermişəm. Amma məni narahat edən məsələ iki ölkə arasında musiqi mübadiləsinin çox zəif olmasıdır. Mən ora gedəndə Azərbaycanın Çexiyada səfirliyi belə yox idi. Çexiyada musiqi üzrə təhsil alan ilk azərbaycanlıyam. İndi artıq Azərbaycandayam və burda çalışacam. Həmişə elə bilirəm ki, mənim iki vətənim var. Azərbaycan və Çexiyanı heç vaxt bölmürəm. Bir insan üçün ata-ana eyni dərəcədə necə əzizdirsə, mənə iki ölkə elə əzizdir. Ora gedəndə Azərbaycan üçün, AzərbaycanA gələndə isə Çexiya üçün darıxıram.

Çexiyalıların bizim musiqimizlə tanışlığı

- 7 il bundan əvvəl mən Praqa Dövlət Musiqi Akademiyasının “Sal- Martin” zalında bizim bəstəkarlarımızın klassik bəstələrindən ibarət konsertlə çıxış etmişdim. Bu, ilk dəfə idi ki, onlar bizim klassik musiqimizlə tanış olurdular. Çexiyalılar çox bəyənmişdilər. Amma ümumilikdə götürsək, bu gün musiqimizi dünyada tanıtmaq üçün dövlətimiz çox mühüm işlər görür. Heydər Əliyev Fondunun rəhbəri Mehriban xanım Əliyeva bu istiqamətdə çox çalışır. Ən adi bir misal çəkim, “Avroviziya” yarışmasının Azərbaycanda keçirilməsi, hər il beynəlxalq səviyyədə təşkil olunan “Qəbələ” musiqi festivalını buna misal göstərmək olar. Belə tədbirlər vasitəsilə xaricilər bura gəlir, bizim musiqimizlə yaxından tanış olur. Onu da qeyd edim ki, bizim estrada janrlı musiqilərimizi Avropada kifayət qədər tanıyırlar. Amma əlbəttə, çalışmaq lazımdır ki, bundan da çox tanınaq. Və mən əminəm ki, çox tezliklə Azərbaycan dünya ölkələri arasında ilk sıralarda olacaq. Çünki həqiqətən musiqimiz buna layiqdir. Bizim necə gözəl muğamlarımız var, hamısı ayrılıqda möcuzədir. Düzdür, mən heç vaxt muğam ifa etməmişəm. Mən ya bir şeyi gözəl edirəm, ya da heç etmirəm. Amma bizim bəstəkarlardan çox romanslar ifa etmişəm. Misal üçün, muğamımızı sistemləşdirən, bütün dünyaya tanıdan Üzeyir Hacıbəyli, Tofiq Quliyev, Fikrət Əmirov, Ramiz Mirişli, Faiq Sücəddinov, Azər Rzayev, Asəf Zeynallının adlarını çəkə bilərəm. Opera ifaçısı olduğumdan daha çox operalar ifa edirəm. Operalardan Verdi, Bize, Puçininin operalarını, qədim romanslardan Gendel, Bax, müasir çex bəstəkarlarından Yan Viçar, Milan Slavidski və başqalarının əsərlərinə tez-tez müraciət edirəm.

“Vətənimdə konsert verərkən çox xoşbəxt oluram”

Azərbaycanda bu zamana qədər dörd konsert proqramı ilə çıxış etmişəm. Sonuncu konsertdə Gendel, Baxın romansları, qədim çex bəstəkarı Antonin Dvorjakın yeddi romans silsiləsi olan “Qaraçı melodiyası”, eləcə də Yan Viçarın bəstələrindən ifa etdim. Azərbaycanda ilk dəfə müasir çex musiqisinin premyerası mən eləmişəm. Bu dəfə də Yan Viçarın dörd silsilə romansını tamaşaçılara təqdim etdim. Deyilənə görə çox bəyənildi. Vətənimdə konsert verərkən çox xoşbəxt oluram. Bir ona görə çox xoşbəxtəm ki, Mədəniyyət və İncəsənət Universitetində dərs deyirəm. Sentyabr ayından müəllimlik fəaliyyətinə başladım. Sevinirəm ki, müəllim və tələbə kollektivimiz yaxşıdır. Ona görə çox məmnun və razıyam. Tələbələr müxtəlifdir, içərilərində vokala həvəsi olan da var, olmayan da. Amma bir müsbət keyfiyyətləri var, tələbələr onlara göstərilən qayğını hiss edəndə dərslərə məsuliyyətlə yanaşırlar. Hər dərsimə gəlirlər, səylə çalışırlar. Artıq oxumayan tələbələr də oxuyurlar. Bu məni sevindirir. Hər bir uşağın uğuru dünyanın bütün nemətindən daha əzizdir. Bundan başqa dərs demədiyim çox sayda gənclər var ki, onlara müəllimlik etməmi istəyirlər. Mən də bacardığım köməyi edirəm. Bu dünyadan hamımız köçəçəyik, ona görə gərək hamımız paylaşaq, bölüşək bildiklərimizi. Mütləq davamçılar yetişdirmək lazımdır, bunu canla-başla edirəm. Azərbaycan millətinə qulluq etmək istəyirəm, ona görə mən ölkəmə qayıtdım.

Nərmin MURADOVA

Palitra.-2013.-19 yanvar.-S.11.