“Avropa gəncləri bir çox sahələrdə Azərbaycan gəncliyindən nümunə götürə bilər”

Fərhad Vəliyev: “Azərbaycanın hər sahədə nömrə bir olduğunu bütün dünyaya sübut eləmək həvəsi ilə addımlayıram”

Azərbaycan gənci harada yaşamağından asılı olmayaraq daimi mənəvi inkişafı üçün çalışır. Müsahibimiz Fərhad Vəliyev də belə gənclərimizdəndir. Qeyd edək ki, F. Vəliyev 2012-ci ildə Litvada yaradılan Baltikyanı Azərbaycanlı Gənclər Assosiasiyasının sədridir. Budan başqa Baltikyanı Azərbaycanlıların Şurasının təsisçilərindəndir. O, eyni zamanda Dünya Azərbaycanlı Gənclər Birliyinin Litva təmsilçisidir.

- Özünüzü oxucularımıza təqdim edin.

-1989-cu ildə Belçikanın Çarleroi şəhərində anadan olmuşam. Bir yaşında Bakıya ailəmlə dönmüşəm. Bakıda Yasamal rayonuda 175 nömrəli məktəbin 5-ci sinfinədək orta təhsilimi natamam bitirib, daha sonra 10 yaşından Belçika Krallığında orta təhsilimi davam etdirmişəm. 2005-ci ildə Charleroi biznes məktəbini (business school) bitirmişəm. Valideynlərimlə Belçikada yaşayırıq. Ailənin tək övladıyam.

2006-cı ilin iyulunda İordaniya Universitetinin ərəb və ingilis dillərində İnformasiya Kommunikasiya Texnologiyaları fakültəsinin bakalavr üzrə məzunu olmuşam. 2008-ci ildə Bakı Telefon Rabitəsi İstehsalat Birliyinin Yasamal Telefon Qovşağında İnternet xidməti şöbəsinin rəis müavini vəzifəsində çalışmışam. Rabitə sahəsində bir sıra təltiflərim olub. 2009-cu ildən Yeni Azərbaycan Partiyasının üzvüyəm. Daha sonra bir çox dövlət strukturlarında dövlət qulluğu vəzifələrində çalışmışam. 4 ildən çox iş təcrübəm var. Ümumdünya ikinci beynəlxalq "İKT telekomunikasiya" sahəsi üzrə konkursunun qalibiyəm.

2009-cu ildə indiki Rabitə və Yüksək Texnologiyalar Nazirliyinin Təhsil şöbəsindən "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində xaricdə təhsil almağa layiq görüldüm. 2010-cu illər ərəfəsində Azərbaycan Respublikasına "praktikaya" ezam olundum və rabitə sahəsi üzrə təcrübə keçdim. Rabitə və yüksək texnologiyaları naziri, akademik Əli Abbasovun əmri ilə Litvanın Kaunas Texnoloji Universitetinə təcrübəyə göndərildim. Bu dövr ərzində Bakıda keçirilən bir sıra beynəlxalq forum və konfranslara qatıldım.

2011-ci ildə Şimali Kaliforniya Universitetinin (University of Northern California) İnsan resursları fakültəsini fərqlənmə diplomu ilə bitirdim. Budan əlavə Rabitə texnoloqu ixtisası üzrə bakalavr diplomuna layiq görülmüşəm.

2011-ci ildə təhsilimi bitirdikdən sonra, cənab nazir Əli Abbasovun 723-cü əmr protokoluna əsasən Litvanın Kaunas şəhərində təhsilə göndərilmişəm.

Litvanın, Kaunas şəhərində fəal gənclər təşkilatı yaradılmasında böyük rolum olub. Azərbaycanı xaricdə təmsil etməklə hələ gənc vaxtlarından məşğul oluram. Azərbaycan vətəndaşıyam. Azərbaycan Respublikasının fəal diasporçusuyam.

- Xaricdəki azərbaycanlı gənclərin Vətənlə bağlılığı hansı səviyyədədir?

- Baltikyanı Azərbaycanlı Gənclər Assosiasiyasının sədri olaraq qeyd etməliyəm ki, hər il Litva, Latviya, eləcə də Estoniyaya gələn tələbələrimizin sayı günü-gündən artmaqdadır. Mən 2010-cu ildə Kaunas şəhərinə gəldikdə, əvvəllər ümumi şəhərdə on azərbaycanlı tələbə olardısa, hazırda təkcə təhsil aldığım universitetdə 18 nəfər azərbaycanlı tələbə bakalavr pilləsində təhsil alır. Ümumiyyətlə, Litvada azərbaycanlı tələbələrin sayı bu il artıq 130 nəfərdən çoxdur. Litvanın ümumi 12 universitetindən 6-sı Azərbaycan Respublikasının Təhsil Nazirliyi ilə əməkdaşlıq edir. Litvada azərbaycanlı tələbələrimiz çox aktivdirlər və mehribandırlar.

Azərbaycan milli irslərinin tarixini, həqiqətlərinin dünya ictimaiyyətinə çatdırılması üçün görülən işlər məhz gənclərimiz tərəfindən bu gün çox mühüm rol oynayır. Əgər əvvəl dünyada Azərbaycan gənclər təşkilatlarımız hər 3 ölkədən bir qonşu ölkədə fəaliyyət göstərirdisə, indi hər bir ölkədə, hətta bir ölkədə çoxlu sayda gənclər təşkilatlarımız öz fəallığı ilə seçilir. Bu isə o deməkdir ki, dünyada azərbaycanlı gənclərə məhz xaricdəki diaspor siyasəti işində və Azərbaycanın lobbiçilik fəaliyyətinə dair məsələlər müzakirə panelləri gənclərimiz üçün yol açılır.

Təqdirəlayiq bir məsələni də vurğulamalıyam ki, müvafiq iclaslar keçirilir, qurultaylar qəbul edilir və dünyanın müxtəlif ölkələrində yaşayan və fəaliyyət göstərən azərbaycanlı gəncləri mərkəz Bakıdan koordinasiya etmək və onların bir-biri ilə sıx əlaqə saxlaması üçün Dünya Azərbaycanlı Gənclər Birliyinin nizamnamələr qəbul edilir, rəhbər orqanlar seçilir. Həmçinin, azərbaycanlı gənclərin yaşadıqları cəmiyyətə inteqrasiyası məsələləri, Azərbaycan həqiqətlərinin dünya ictimaiyyətinə çatdırılmasında yeni təbliğat üsullarından istifadə və müasir informasiya texnologiyalarının tətbiqi, Azərbaycan gənclərinin lobbi quruculuğu və digər məsələlər qurultaylarda geniş müzakirə edilir. Nəticədə, sadaladığım bu məsələlər Azərbaycan gənclərinin xaricdəki uğurlu fəaliyyətlərinin qurulmasında və davamlı fəaliyyətində özünü göstərir. Bütünlüklə bunları Dünya Azərbaycanlı Gənclər Birliyinin 2 illik fəaliyyəti kimi çox uğurlu bir nəticələr əldə etdiyinin şahidi oldum. Ümumiyyətlə, Dünya Azərbaycanlı Gənclər Birliyinin təsis edilməsi Azərbaycandan kənarda təhsil alan və ya yaşayan gənclərimizin dövlətinə qayğıkeşliyinin sabahkı stimuludur, daha yaxından cəlb edilməklə onların potensialından səmərəli istifadə olunması baxımından mühüm əhəmiyyət daşıyır.

- Bir gənc olaraq xaricdə Azərbaycanın təbliği istiqamətində hansı işlər görürsünüz?

- Bu yaxınlarda "Xocalı soyqırımını" Litvanın bir neçə şəhərlərində, paytaxt Vilnüsdə, eləcə də Kaunas şəhərinin (Kaunas Technology University) Azərbaycan tələbələri və (LSMU) Tibb Universitetinin azərbaycanlı tələbələri yerli Litva əhalisinə "26 fevral 1992-ci" ilin Xocalı soyqırımı faciəsi haqqında ətraflı məlumatlar verərək "Laisves aleya" kimi mərkəzi küçələrdə foto sərgi nümayiş edərək, aksiya keçirdiblər. Bununla yanaşı, küçə boyu Xocalı faciəsini özündə təcəssüm etdirən və üzərində ingilis və litva dillərində informasiya olan fotolar nümayiş edilib.

4 il ərzində İordaniyanın bir sıra şəhərlərində təşkil olunan mədəniyyət və incəsənət gecələrinə qatılırdım və diaspor fəaliyyəti ilə yaxından tanış olurdum. Bu baxımdan Azərbaycan Respublikasının İordaniyadakı səfiri Elman Araslı bizə dəstək verirdi. 2007-ci ildə oktyabrın 18-də öyrəndiyim diaspor fəaliyyətimi kurs yoldaşlarımla birlikdə "Amman 1" televiziyasında canlı yayımda nümayiş etdirdik, Azərbaycanı təbliğ etdik. Bir sıra dövlət rəsmilərinin iştirakı ilə keçirilən proqramda xarici işlər naziri məni İordaniya Gənclər Nazirliyinin "Aktiv Gənc" sertifikatı ilə təltif etdi.

Xaricdə təhsil aldığım müddətdə Litvada keçirilən bir çox konfranslara Azərbaycandan iştirakçı kimi qatılaraq, eləcə də Belçika, İtaliya, Almaniyada Azərbaycanın milli irslərini, milli rəqs paltarlarını, və Milli bayram gecələrini nümayiş etmişəm.

Bunların arasında "Avropa Gənclər Forumu" - European Youth Forum, Beynəlxalq Tələbələrin Sammitinin üzvü olmuşam. 26-29 aprel 2013-cü ildə Türkiyənin İstanbul şəhərində, 70-dən çox ölkə və 300 təşkilat olan eləcə də 150-dən çox beynəlxalq təmsilçinin sırasında iştirak edərək Azərbaycan bayrağını 3-cü Beynəlxalq Tələblərin Sammitində təmsil edərək Qafqazda, Azərbaycanın regionda nömrə bir olduğunu Avropa gənclərinə filmlərlə nümayiş etmişəm.

- Azərbaycan gənclərinin ictimai-siyasi aktivliyi hansı səviyyədədir?

- Baxmayaraq ki, mən uşaqlıq yaşlarımdan Avropada yaşayıram, bir azərbaycanlı olduğumu qürurla hər bir ölkədə büruzə edərək Azərbaycan bayrağını təmsil etmişəm və edəcəyəm. Ona görə yox ki, Azərbaycan bu günlərdə öz vətəndaşlarının başqa ölkələrin siyasətindən tam fərqli olaraq qayğısına qalır və tələbələrə xaricdə təhsil proqramına dəstək olur. Onu da vurğulayım ki, məhz bu gün, Avropanın bir neçə böyük ölkələrini Azərbaycanla müqayisə etdikdə, Azərbaycanda gənclər arasında artım çox dinamik şəkildə baş tutur və ictimai fəaliyyəti artır, eləcə də gənclərin mənəvi və vətənpərvərlik istiqamətində bir çox layihələr baş tutur. Əlbəttə ki, bu siyasət Prezident İlham Əliyevin yalnız təhsilə ayırdığı böyük diqqətin nəticəsi ilə yetmədi, eləcə də gənclərimizə diqqətin hər zaman müşahidəsinin nəticələrinə yaxın keçmişə baxanda 2 il bundan öncə, Azərbaycan Respublikası Prezidentinin yanında Gənclər Fondunun yaranması bir daha sübut etdi ki, Gənclər onun daima diqqət mərkəzindədir. Bunu qəbul olunan xaricdə təhsil haqqında 2007-2015-ci illəri əhatə edən dövlət proqramının 2020-ci ilə kimi uzadılması da sübut edir. Bu siyasətin arxasında isə əslində bir gözlənti durur. Xaricdə yüksək keyfiyyətli təhsil alan azərbaycanlı tələbələr əldə etdikləri bilikləri məhz Vətənə qayıdaraq Azərbaycana tətbiq edib, Azərbaycan təhsilini və digər sahələri inkişaf etdirməlidirlər. Gənclərimiz də bilməlidirlər ki, onlar müstəqil Azərbaycanın gələcəyinin qurulmasında və inkişafında məsuliyyət daşıyırlar.

- Hazırda ictimai-siyasi olaraq hansı aktivlik göstərirsiniz?

-Hal-hazırda Azərbaycanda olduğuma görə Bakıda həyata keçirilən bir çox tədbirlərin iştirakçısı oluram. Lakin imkan daxilində çalışıram bütün dostlar və tələbələr tərəfindən dəvət olunduğum mərasimlərə qatılım. Son qatıldığım və bəyəndiyim tədbir 9 aprel 2014-cü tarixində Azərbaycan Respublikası Prezidenti yanında Gənclər fondundan fərdi şəxs qismində qazanılmış “Mənim Qarabağım” rəsm sərgisinin açılış mərasimidir.

Eləcə son üzərində işlədiyim layihələrim haqqında diqqətinizə qısa bir təsvir çatdırım. Bir ildən çox hazırladığım layihə artıq yaxında işıq üzü görməlidir. Bu, "Baku 2015- İlk Avropa Oyunlarının Himni" adlı layihədir. Bununla bağlı böyük tədbirlər hazırlanır. Layihə yaxın zamanlarda ictimaiyyətə təqdim olunacaq.

- Azərbaycan gəncinin mənəvi-əxlaqi vəziyyətini necə qiymətləndirirsiniz?

- Gənclərin istənilən perspektivli layihəsinə dövlətimiz dəstək verir. Ulu öndər Heydər Əliyevin dili ilə desək, gərək nəbzin Vətənin nəbzi ilə vursun. Bu gün azərbaycanlı gəncin mənəvi biliyi və ruh yüksəkliyinin daha güclü olduğuna, başqa ölkələrin gənclərindən qat-qat yüksək olduğuna əminəm. Avropada gənclərin əxlaqına bələd olduğuma görə, bir misal çəkim. Onlarda qonağa hörmət ingilis salamı ilə başlayar və alman hesabatı ilə bitər. Lakin bizim gənclər isə gözəl Azərbaycan qonaqpərvərliyimizin, milli mentalitet vəziyyətinin nəticəsində, qonaqlara Bakı şəhərini göstərdiyini, hətta lazımı gələrsə, evlərinə belə dəvət etdiklərini görəndə, bir daha Azərbaycan gənci olmağımla qürur hissi keçirirəm. Oralarda bu cür qayğı və xarici vətəndaşlara münasibətin olduğunu çox istərdim. Odur ki, bir çox sahələrdə Azərbaycan gəncliyindən Avropa gəncləri nümunəvi dərs götürə bilər.

- Bir az da gələcək planlarınızdan danışardınız…

- Gələcəkdə Bakıda yaşamağı çox istərdim. Bir çox işlər ölkənin paytaxtı ilə bağlı olduğuna görə, həm də ruhən ən sevimli şəhərim Bakıya bağlı olduğuma görə, gələcəkdə dünya miqyasında olan layihələri hazırlamaqdan heç bir dəqiqə belə geriyə çəkilmədən, durmadan işlərə başlayacağam. Azərbaycanın hər sahələrdə nömrə bir olduğunu bütün dünyaya sübut eləmək həvəsi ilə addımlayıram. Odur ki, sizlərlə gələcəkdə görüşmək ümidi ilə sağollaşıram, diqqətinizə görə bir daha təşəkkürümü bildirirəm.

Fuad Hüseynzadə

Palitra.-2014.-18 aprel.-S.11.