Şagirdlər bölgələrimizlə tanış olur

“Ölkəmizi tanıyaq” devizi ilə keçirilən maarifləndirici tur-aksiya yeniyetmələrin mənəvi inkişafına müsbət təsir edəcək

Ölkəmizin tarixinin, mədəniyyətinin, adət-ənənələrinin, müstəqillik illərində əldə edilmiş nailiyyətlərinin dərindən öyrənilməsi məqsədilə respublikamızın müxtəlif şəhər və rayonlarında yaşayan gənclərin digər bölgələrə səyahətlərinin təşkilinə dair Azərbaycan Respublikasının Prezidenti İlham Əliyevin tapşırığına əsasən, 67 şəhər və rayondan 14 minə yaxın IX-XI sinif şagirdini əhatə edəcək “Ölkəmizi tanıyaq” devizi ilə maarifləndirici tur-aksiyaların keçirilməsi nəzərdə tutulub.

Layihə çərçivəsində təqdim etdiyimiz yazıda maarifləndirici tur-aksiyanın uşaq və yeniyetmələrin mənəvi inkişafında oynadığı rola toxunacağıq.

Aksiya çərçivəsində ölkə gəncləri Naxçıvan, Gəncə, Lənkəran, Şəki, Quba, Qusar, Xaçmaz, Şamaxı, İsmayıllı, Qəbələ və digər bölgələrdə qədim tarixi, mədəniyyət abidələri, regionlarımızın müasir simasını əks etdirən Heydər Əliyev mərkəzləri, tarix-diyarşünaslıq muzeyləri, gənclər mərkəzləri, Bayraq meydanları, rəsm qalereyaları və s. obyektlərlə tanış olacaqlar. Bu gəzintilər ölkəmizin tarixini dərindən öyrənməklə yanaşı, gənclərimizə ümummilli lider Heydər Əliyevin rəhbərliyi ilə milli dövlət quruculuğu sahəsində görülmüş işlərlə, Azərbaycan Respublikasının Prezidenti İlham Əliyevin həyata keçirdiyi dinamik sosial-iqtisadi inkişafla hər bir şəhər və rayonun nümunəsində tanış olmaq imkanı yaradacaq. Dünən başlayan və sentyabrın 6-dək keçiriləcək ekskursiyaların birinci mərhələsində 53 şəhər və rayondan 2500-ə yaxın şagird iştirak edəcək. İkinci və üçüncü mərhələ isə müvafiq olaraq 2014-cü ilin noyabr və 2015-ci ilin mart aylarında təşkil olunacaq. Dünən Quba rayonunun ümumtəhsil məktəblərinin şagirdlərindən ibarət qrup İsmayıllı-Şəki-Qəbələ marşrutu üzrə maarifləndirici tur-aksiyada iştirak etmək üçün yola düşüb. Tur-aksiyada 40 şagirdlə bərabər, 5 müşayiətçi də yer alıb. Qrupun rəhbəri, rayon Təhsil Şöbəsinin təşkilatçı metodisti Mehparə Rüstəmova bildirib ki, Prezidentin tapşırığına əsasən ölkəmizin şimal-qərb bölgəsinə maarifləndirici tur-aksiyaya yola düşən qubalı şagirdlər bu səfərdən olduqca məmnundurlar. O, qeyd edib ki, adətən şagirdlər rayon daxilində, ən yaxşı halda isə qonşu rayonlara ekskursiyalara gedirlər: “Amma indi Azərbaycan Prezidentinin tapşırığına əsasən onlar üçün bütün Azərbaycanı gəzmək imkanı yaradılıb.

Dörd gün davam edəcək bu tur-aksiya müddətində 40 nəfər qubalı şagird Azərbaycanın dilbər guşələrindən olan İsmayıllı, Şəki və Qəbələ rayonlarının qədim tarixi, mədəniyyət abidələrini, turizm mərkəzlərini və başqa gəzməli-görməli yerlərini ziyarət edəcək. Prezident daim xalqımızın gələcəyi olan uşaqlara qayğı göstərir, onların savadlı, geniş dünyagörüşünə malik şəxsiyyət kimi formalaşması üçün əlindən gələni edir. Şagirdlərimiz üçün Azərbaycanın müxtəlif bölgələrinə maarifləndirici tur-aksiyaların təşkili barədə son tapşırıq da bunun bariz sübutudur”. Dünən Lənkəran şəhərindəki Heydər Əliyev parkının qarşısında böyük qələbəlik olub. “Ölkəmizi tanıyaq” maarifləndirici tur-aksiyasının Gəncə-Şəmkir-Göygöl marşrutunun iştirakçılarını yola salmaq üçün rayonun rəhbərliyi, təhsil işçiləri, valideynlər parkın qarşısındakı meydana toplaşıblar. Meydana toplaşanlar arasında aksiyanın təşkilatçılarından olan Mədəniyyət və Turizm Nazirliyinin böyük məsləhətçisi Cəfər Gərayev da olub. O, deyib ki, tur-aksiyanın birinci mərhələsində üç istiqamətdə - Gəncə-Göygöl-Şəmkir, İsmayıllı-Qəbələ- Şəki, Quba-Xaçmaz-Qusar istiqamətlərində turlar nəzərdə tutulub: “Gördüyünüz kimi, bu məkandan böyük qələbəliklə yola salınan Lənkəran məktəbliləri 4 gün ərzində Gəncə şəhərinin, Göygöl və Şəmkir rayonlarının tarixi abidələri ilə yaxından tanış olacaq, görməli yerlərini gəzəcəklər. Layihə davamlı olacaq. Gələcəkdə məktəblilərin əksəriyyəti tur-aksiyada iştirak etmək imkanı əldə edəcək”. Lənkəran şəhər 4 nömrəli humanitar təmayüllü məktəb-liseyin fizika-riyaziyyat müəllimi Məhərrəməli Mirzəyev tur-aksiya ilə bağlı fikrini belə ifadə etdi: “Tur-aksiyada məktəbimizdən mənimlə birlikdə 6 nəfər iştirak edir. Mənim fikrimcə, aksiya təkcə regionlarla tanışlıq məqsədi daşımır, səfər zamanı şagirdlər və müəllimlər həm də təcrübə mübadiləsi etmək imkanı qazanacaqlar. Bizə bu imkanı Prezident İlham Əliyev yaradıb. Dövlət başçısı təhsilin inkişafına, onun maddi-texniki bazasının möhkəmləndirilməsinə və təhsil işçilərinin sosial vəziyyətinin yaxşılaşdırılmasına böyük diqqət göstərdiyi kimi, müəllim və şagirdlərin asudə vaxtlarının səmərəli keçməsi qayğısına da qalır. Bu diqqət və qayğıya görə Prezidentimizə “Çox sağ olun!” deyirik”. Turun iştirakçısı, Lənkəran şəhər 5 nömrəli tam orta məktəbin XI sinif şagirdi Nurlan Əsgərli bu ifadələri bölüşüb: “Dörd il əvvəl Quba rayonunda təşkil olunmuş hərbi-vətənpərvərlik düşərgəsində iştirak etmişəm. Bu gün isə ölkəmizin daha bir ecazkar regionuna yola düşürük. Tur-aksiyanın proqramı ilə ətraflı tanışam. Dahi mütəfəkkir Nizami Gəncəvinin Vətənində olmaq çoxdankı arzum idi. Bu arzumun reallaşmasına mənə imkan yaradan dövlət başçısına minnətdarlığımı bildirirəm”. Çox keçmədən iştirakçıların xeyir-duası ilə Gəncə-Şəmkir-Göygöl turunun iştirakçılarını Azərbaycanın qərb bölgəsinə aparan avtobus yola düşüb. Qeyd edək ki, bu cür tədbirlərin təşkil edilməsi gənc nəslin mənəvi inkişafında müstəsna dərəcədə böyük rol oynayır. Belə ki, böyüməkdə olan gənc nəslin ölkəmizin müxtəlif bölgələrinə səyahət etməsi onların həm respublikamızın tarixi yerlərini tanıması, həm də ölkəmizdə gedən abadlıq-quruculuq işləri ilə yerində tanış olması baxımından böyük əhəmiyyət kəsb edir. Bu gün ölkəmizin hər bir bölgəsində sürətli inkişaf prosesi yaşanır. Geniş vüsət alan abadlıq-quruculuq işləri regionlarımızın simasını kökündən dəyişib. Bu gün bölgələrimiz inkişaf səviyyəsinə, müasir infrastrukturuna, müasir sosial obyektlərinə görə paytaxt Bakı ilə rəqabət aparmaq səviyyəsinə çatıblar. Gənc nəslin yaşadıqları yerlərdən kənar bölgələrdə baş verən bu inkişafı öz gözləri ilə görmələri onlarda ölkəmizdəki inkişafla bağlı daha aydın təsəvvür formalaşdıracaq. Digər tərəfdən onların bölgələrdəki tarixi məkanlara baş çəkməsi, tarix-diyarşünaslıq muzeylərində olması ölkəmizin qədim tarixinin onların gözləri qarşısında canlanmasını təmin edəcək. Muzeylərlə tanışlıq Azərbaycanın qədim tarixinin eksponatlar vasitəsilə onlara daha yaxşı çatdırılmasına imkan yaradacaq. Azərbaycanın dilbər guşələrini gəzəcək şagirdlər bölgələrdə qədim tarixi, mədəniyyət abidələri, regionlarımızın müasir simasını əks etdirən Heydər Əliyev mərkəzləri, tarix-diyarşünaslıq muzeyləri, gənclər mərkəzləri, Bayraq meydanları, rəsm qalereyaları ilə tanış olacaqlar. Bu yerlərlə tanışlıq onların Vətənimizə olan sevgisinin daha da artmasına, vətənpərvərlik ruhunda böyüməsinə təsir edəcək, onların mənəvi inkişafında müsbət rol oynayacaq. Gənc nəslin Vətənə məhəbbət, Azərbaycan xalqının tarixinə, mədəni irsinə, dövlət dilinə və rəmzlərinə, milli-mənəvi dəyərlərinə hörmət ruhunda tərbiyə olunması ölkəmizin gələcəyi üçün çox böyük əhəmiyyət kəsb edir. Vətənpərvərlik tərbiyəsi öz Vətəninə sevgi, məhəbbət hissinin, məsuliyyət hissinin, hər an öz Vətəninin, öz xalqının müdafiəsinə qalxmağa hazırlığın formalaşmasıdır. Azərbaycan Respublikasının ərazisinin 20 faizinin Ermənistan tərəfindən işğal olunduğu bir vaxtda gənclərin vətənpərvərlik tərbiyəsi daha böyük aktuallıq tələb edir. Qloballaşan dünyamızda milli-mənəvi dəyərlərin qorunmasının əhəmiyyətinin məktəblilərə aşılanmasının əhəmiyyəti daha da artır. Naxçıvan, Gəncə, Lənkəran, Şəki, Quba, Qusar, Xaçmaz, Şamaxı, İsmayıllı, Qəbələ kimi qədim tarixi olan bölgələrimizlə tanışlıq şagirdlərin mənəvi inkişafına dəstək olacaq. Bu baxımdan Azərbaycan Prezidentinin tapşırığına əsasən, 67 şəhər və rayondan 14 minə yaxın IX-XI sinif şagirdini əhatə edəcək “Ölkəmizi tanıyaq” devizli maarifləndirici tur-aksiyaların keçirilməsini alqışlamaq lazımdır. Ölkəmizdə uşaqların və yeniyetmələrin mənəvi inkişafı, cəmiyyətimizin hərtərəfli inkişaf etmiş vətəndaşları kimi formalaşması üçün bir sıra addımlar atılıb. Dövlət səviyyəsində uşaqların Azərbaycanın gələcəyi olması və cəmiyyətimizin ən zərif hissəsi olduğu prioritet kimi qəbul edilərək uşaq problemlərinin ardıcıl həlli dövlət siyasətinin əsas istiqamətlərindən biri kimi qəbul edilib. Prezidentin təşəbbüsü ilə reallaşdırılan “Ölkəmizi tanıyaq” devizli maarifləndirici tur-aksiya da bu sahəyə verilən diqqətin göstəricisidir.

Anar Miriyev

Palitra.-2014.-2 avqust.-S.11.