Gənc nəsil arasında sağlam həyat tərzi təbliğ edilməlidir

Uşaq və yeniyetmələrin fiziki-mənəvi inkişafı, sağlam ruhda tərbiyə olunması, zərərli vərdişlərdən uzaqlaşması, asudə vaxtlarında idman-sağlamlıq və yaradıcılıq fəaliyyətinə yönəlməsi vacib

məsələdir

Gələcəyimiz olan gənc nəslin fiziki-mənəvi sağlamlığı daima dövlətin diqqət mərkəzindədir. Uşaq və yeniyetmələrin istər fiziki, istərsə də mənəvi cəhətdən sağlam böyüməsi üçün bir sıra layihələr həyata keçirilir. Bu sahə dövlət siyasətinin prioritetlərindən birini təşkil edir. Xalqın, dövlətin gələcəyi üçün fiziki-mənəvi baxımdan sağlam nəslin yetişməsi son dərəcə böyük əhəmiyyət kəsb edir. Layihə çərçivəsində təqdim etdiyimiz yazıda bu istiqamətdə görülən işlərə toxunacağıq. Qeyd edək ki, yeni uşaq bağçaları və məktəblərin inşa edilməsi, regionlarda yeni idman komplekslərinin istifadəyə verilməsi bu sahəyə ayrılan diqqətin göstəricisi kimi qəbul edilə bilər. Dövlət xüsusilə sağlam nəsil yetişməsi üçün bir sıra tədbirlər həyata keçirir. Ölkə üzrə uşaqların pulsuz tibbi müayinədən keçirilməsi vacib addımdır. Proses artıq yekunlaşmaq üzrədir. Əsas məqsəd uşaqların sağlamlığını yoxlamaq, mövcud problemləri aradan qaldırmaq və gələcəyimiz üçün sağlam nəsil yetişdirməkdir. Qeyd edək ki, ötən il martın 5-də Milli Məclisdə müzakirə olunaraq, qəbul edilən və ölkə başçısının fərmanı ilə qüvvəyə minən "Uşaqların icbari dispanserizasiyası haqqında qanun"un icrasına 2014-cü ildən başlanılıb. Respublikanın bütün şəhər və rayonlarının məktəbəqədər, orta təhsil müəssisələri və uşaq poliklinikalarında icbari müayinələr həyata keçirilir. Səhiyyə Nazirliyinin açıqlamasına əsasən sentyabr ayının sonunadək respublika üzrə ümumilikdə 2 milyondan artıq uşaq icbari dispanserizasiyaya cəlb edilib. Müayinələrin ilin sonunadək yekunlaşdırılması nəzərdə tutulub. Uşaqların icbari dispanserizasiyası haqqında qanun 18 yaşadək olan ölkə vətəndaşlarının sağlamlığının qorunması və möhkəmləndirilməsi məqsədi daşıyır. Qanunun tətbiqi nəticəsində ölkə üzrə uşaqların sağlıq durumunun müəyyən edilməsi, xəstəliklərin vaxtında aşkarlanaraq müalicəsi, ümumən müayinə və müalicə işinin təşkilinin daha da yaxşılaşdırılması nəzərdə tutulub. Səhiyyə Nazirliyinin baş pediatrı Nəsib Quliyev hesab edir ki, bu qanun uşaqların sağlamlığının qorunması işində bu günə qədər aparılmış, qəbul olunmuş bütün qanun, təlimat və təlimlərin, məntiqi zirvəsi sayılır: “Çünki uşaqların icbari dispanserizasiyası haqqında qanunun qəbul edilməsi, Azərbaycan əhalisinin azı üçdə birini əhatə edir. Yəni bu çox böyük tutuma malik olan, çox humanist, çox böyük əhəmiyyəti olan bir qanundur. Qanunun icrası Səhiyyə Nazirliyinin prioritet məsələsi olaraq diqqət mərkəzində saxlanılır. Bu məqsədlə bölgələrdə uşaqların icbari müayinəsinin aparılması üçün azı üç nəfərdən ibarət komissiya yaradılıb. Bununla yanaşı hər bir şəhər, rayon və müəssisə uşaqların dispanserizasiyası haqında apardıqları hər bir işin aylıq hesabatını nazirliyə təqdim edirlər”. Gənc nəslin sağlamlığının müdafiəsi ilə bağlı məsələ Bakıda keçirilən forumda da müzakirə predmeti olub. Gənclər üçün Təhsil Mərkəzinin, Nərimanov Rayon İcra Hakimiyyətinin, “Sağlam ailə” klinikasının və Nərimanov Rayon Gənclər və İdman İdarəsinin birgə dəstəyi ilə keçirilən forum gənclərin sağlamlığı məsələlərinə diqqəti gücləndirmək, sağlam həyat tərzinin təbliğ edilməsi yolu ilə ictimai səhiyyə siyasətini dəstəkləmək, yeni təşəbbüslərin formalaşmasına və əməkdaşlığın daha da inkişaf etdirilməsinə şərait yaratmaq məqsədi daşıyıb. Gənclər üçün Təhsil Mərkəzinin icraçı direktoru Fəxrəddin Həsənzadə çıxış edərək forumun əhəmiyyətini vurğulayıb. O, Azərbaycanda həyata keçirilən gənclər siyasətindən və ictimai səhiyyənin inkişafından söz açıb. Bildirilib ki, gənclərin sağlamlığının müdafiəsi müasir dövrün aktual məsələsidir və bu problemə daha çox diqqət yetirmək lazımdır. Müvafiq strukturlar bu istiqamətdə gənclərlə əməkdaşlıq etməlidirlər. Forumda Nərimanov Rayon Gənclər və İdman İdarəsinin rəisi Nəcəf Novruzov, Azərbaycan Respublikası Prezidenti Administrasiyasının ictimai siyasi məsələlər şöbəsinin baş məsləhətçisi Vüqar Səlimov, Yeni Azərbaycan Partiyası Gənclər Birliyinin sədri Seymur Orucov, Milli Məclisin deputatları, qeyri-hökumət təşkilatlarının, beynəlxalq və respublika gənclər təşkilatlarının nümayəndələri iştirak ediblər. Çıxış edənlər vurğulayıblar ki, ictimai səhiyyənin inkişafı dövlət başçısının sosial siyasətinin bariz nümunələrindən biridir. Prezidentin təşəbbüsü və bilavasitə rəhbərliyi ilə bu sahədə əhəmiyyətli qanunvericilik aktları, dövlət proqramları və digər mühüm sənədlər qəbul edilib, tibb müəssisələrinin maddi-texniki bazası gücləndirilib. Vurğulanıb ki, hazırda ölkəmizdə gənclərin sağlamlığının müdafiəsi üzrə işlər müvəffəqiyyətlə davam etdirilir, sağlam həyat tərzinin təbliği, gənclərin sağlam ruhda tərbiyə olunması, onların siqaret, alkoqol, narkomaniya və s. zərərli vərdişlərdən uzaqlaşdırılması, asudə vaxtlarında idman-sağlamlıq və yaradıcılıq fəaliyyətinin genişləndirilməsi üzrə maarifçilik və profilaktiki tədbirlər həyata keçirilir və bu istiqamətdə fəaliyyət genişləndirilərək davam etdirilməlidir. Natiqlər bildiriblər ki, bu məsələ gənc nəslin gələcəyinə birbaşa aiddir və xalqımızın nəcib dəyərlərinin varisliyinin təmin edilməsində əhəmiyyətli amildir. Elə bir neçə gün öncə Beynəlxalq Əlillər Günü münasibətilə ölkəmizin müxtəlif guşələrində keçirilən tədbirlər uşaqlara diqqətin nə qədər vacib olduğunu ortaya qoydu. Onlardan biri də Zaqatala Rayon Mədəniyyət Evində əlil və xüsusi qayğıya ehtiyacı olan uşaqlar üçün “Dünyaya sülh bəxş edək” adlı tədbir olub. Əlil uşaqlar və onların valideynlərinin, həmçinin uşaq bağçaları və məktəblərdə təlim-tərbiyə alan uşaqların iştirak etdikləri tədbirdə ölkəmizdə əlil uşaqlara göstərilən yüksək dövlət qayğısından danışılıb. Bu qəbildən olan uşaqların cəmiyyətə inteqrasiyası, onların istedadlılıq və yaradıcılıq qabiliyyətlərinin aşkara çıxarılması üçün davamlı tədbirlərin həyata keçirildiyi bildirilib. Bu sahədə Heydər Əliyev Fondunun məqsədyönlü və səmərəli fəaliyyəti xüsusi vurğulanıb. Bildirilib ki, Fondun prezidenti Mehriban xanım Əliyevanın bir ana kimi uşaqlara göstərdiyi yüksək diqqət və qayğı, xəstə və əlil uşaqlara etdiyi yardımlar, yeni uşaq bağçalarının, məktəblərin tikintisi üçün onun rəhbərliyi ilə həyata keçirilən layihələr hamı tərəfindən böyük rəğbətlə qarşılanır. Tədbirdə vurğulanıb ki, bu gün ölkəmizdə yaşayan uşaqlar azad və xoşbəxt olsalar da, dünyanın bir sıra ölkələrinin uşaqları heç də firavan həyat sürmürlər. Bir çox ölkələrdə hələ də müharibələr gedir, qanlar axıdılır. Ölkəmizin uşaqları bütün dünya ölkələrini sülh şəraitində görməyi arzulayırlar. Tədbir rayonun uşaq bağçalarının hazırladıqları maraqlı və rəngarəng konsert proqramı ilə davam edib. Gözbarax və Mamrux kənd uşaq bağçalarının körpə fidanlarının təqdim etdikləri “Sülh nəğməsi” kompozisiyası, Yuxarı Tala kənd uşaq bağçası kollektivinin “Azərbaycan” kompozisiyası, Zaqatala şəhərindəki uşaq bağçalarının təqdim etdikləri milli rəqslər, müxtəlif rəqs kompozisiyaları, eləcə də digər uşaq bağçaları kollektivlərinin çıxışları tamaşaçılar tərəfindən böyük maraqla qarşılanıb.

Anar Miriyev

Palitra.-2014.-10 dekabr.-S.11.