Qaxın hər bir
guşəsi turistlər üçün
əsl istirahət məkanıdır
Əsrarəngiz təbiəti, mülayim və saf dağ iqlimi, zəngin fauna və florası, yeraltı və yerüstü su sərvətləri, çayları, şəlalələri, mineral bulaqları, meşələri, habelə ləziz mətbəxi və yüksək qonaqpərvərliyi ilə seçilən Qax rayonu ilin bütün fəsillərində turistləri özünə cəlb edir. Qədim tarixə, yüksək mədəniyyətə malik bu diyarın hər bir guşəsi turistlər üçün əsl istirahət məkanıdır.
Prezident İlham Əliyev Qax rayonuna səfərlərindən birində ictimaiyyət nümayəndələri ilə görüşündə deyib: “Mənim yadımdadır, keçən dəfə burada olanda “Uludağ” turizm mərkəzinə baş çəkmişdim. İndi belə yerlər çox olmalıdır və çox yaxşı olar ki, belə turizm yerləri yüksək səviyyədə olsun. Yüksək səviyyədə olsa, dünyanın istənilən yerindən buraya turistlər gələcəkdir. Çünki belə təbiət az yerlərdə var. Mən dünyanı görmüşəm, çox ölkələrdə olmuşam. Çox nadir hallarda belə gözəl təbiət, təbii iqlim, hava - yəni turizmin inkişafı üçün lazım olan bütün şərait vardır. Siz Azərbaycanın belə, ən gözəl guşələrinin birində yaşayırsınız”.
Dövlət başçısının
tapşırıq və tövsiyələrinə uyğun olaraq son illər rayonda turizm infrastrukturunun yaradılması
və genişləndirilməsi istiqamətində davamlı tədbirlər
həyata keçirilir. Hazırda rayonda 11 turizm obyekti fəaliyyət göstərir. Turizm mərkəzlərində yerlərin
sayı artırılaraq 700-ə çatdırılıb. Rayon Mədəniyyət və Turizm
Şöbəsinin məlumatına görə, 2013-cü ildə
rayona gələn turistlərin sayı 20 min nəfəri ötüb.
Cari ilin birinci yarısında isə rayona 4500 nəfərə yaxın turist gəlib. Turizm mövsümünün
yenicə başlandığını
nəzərə alsaq,
ilin sonunadək bu göstəricinin xeyli artacağını proqnozlaşdırmaq olar.
Bu rəqəmlər rəsmi statistikaya əsaslanır. Qeyri-rəsmi, yəni evlərdə qalan turistlərin sayını da bura əlavə etsək, bu göstərici daha da artacaq.
Bəs, görəsən,
bu müəssisələr
yeni turizm mövsümünə necə
hazırlaşıblar, rayona
gələn turistlər
onlara göstərilən
xidmətlərin çeşidindən
və keyfiyyətindən
razıdırlarmı, qiymətlər
onları qane edirmi?
AzərTAc-ın müxbiri bu suallara cavab tapmaq məqsədilə rayonun turizm və istirahət mərkəzlərində olub,
mövcud vəziyyətlə
maraqlanıb.
İlk ünvan
Azərbaycanın ən
dilbər guşələrindən
biri sayılan qədim İlisu kəndindəki “Uludağ”
turizm və istirahət mərkəzidir. Kəndin yuxarı
hissəsində, uca dağlarla əhatə olunmuş ərazidə yaradılan, 4 hektara yaxın ərazisi olan, 2006-cı ildə dövlətimizin başçısının
xeyir-duası ilə açılan bu mərkəz ailəvi istirahət üçün
nəzərdə tutulub.
Kompleksdə istirahətçilər üçün hər cür şəraiti olan kottec tipli
mənzillər, idman meydançaları, 3 hovuz
və çoxlu sayda əyləncələr
fəaliyyət göstərir.
Turizm və istirahət mərkəzinin direktoru Zabit Əhmədov bildirib ki, ilk mərhələdə mərkəz
yalnız 50 nəfər
turisti qəbul etmək imkanına malik idisə, hazırda yerlərin sayı artırılaraq
150-ə çatdırılıb. Yeni kotteclərin tikilməsi sayəsində yaxın illərdə istirahət mərkəzində eyni vaxtda 200 nəfərdən
artıq turistin yerləşdirilməsi mümkün
olacaqdır. Gələcəkdə obyektin ərazisində əyləncə mərkəzinin
tikintisi də nəzərdə tutulur.
Bu məqsədlə Türkiyə şirkəti
ilə ilkin razılıq əldə olunub. Mərkəzin rəhbərinin bildirdiyinə
görə, “Uludağ”ın
ən önəmli və fərqli cəhətlərindən biri
də burada müalicə əhəmiyyətli
vannaların olmasıdır.
Bu məqsədlə İlisu kəndindən 6 kilometr aralıda yerləşən Hamamçay
dərəsindən istirahət
mərkəzinə boru
kəməri ilə bir çox xəstəliklərin əlacı,
möcüzəli termal
bulaqların suyu gətirilib və radon vannaları qurulub. Mərkəzdə qiymətlər də
münasibdir. Səhər yeməyi
də daxil olmaqla, bir nəfərin
gün ərzində qalma xərci 30 manat təşkil edir.
Turistlərlə söhbətdən məlum
oldu ki, onlar yaradılmış şəraitdən, bu yerlərin havasından, iqlimindən, təbiətindən
çox razıdırlar. Bəziləri bir neçə günlük gəlsələr
də, geri qayıtmaq istəmir, qalma müddətini uzadırlar.
Kəndin girəcəyindəki “Səngər
qala” istirahət mərkəzi arxitektura baxımından turistlərin
diqqətini daha çox özünə cəlb edir. Mərkəz hələlik iaşə obyekti kimi fəaliyyət
göstərir. Bənzərsiz
arxitekturası ilə
fərqlənən bu
istirahət mərkəzində
inşa edilən 45 mənzilli, 90 yerlik, 6 mərtəbəli otel binasının tikintisi artıq tamamlanmaq üzrədir və tezliklə turistləri qəbul edəcək.
Kəndin aşağı hissəsində
fəaliyyət göstərən
“İlisu” pansionatı
bu ərazidə yaradılan ilk istirahət
mərkəzlərindəndir. İki hektar
ərazisi olan bu mərkəzdə kottec tipli 10 mənzil, habelə 3 əlavə bina yerləşir. Burada qiymətlər
olduqca münasibdir.
Gündə 3 dəfə yemək
daxil olmaqla, bir nəfərin gün ərzində qalma xərci 30 manatdır. Burada ilk dəfə istirahət etdiklərini bildirən Bakı şəhərinin
sakinləri Qüdrət
Əliyeva və Rəbiyyə Məmmədova
yaradılmış şəraitdən
ağızdolusu danışaraq
hər il
bura istirahətə gələcəklərini vurğulayırlar.
Kəndin ərazisində yerləşən “Yaşıl park” ailəvi istirahət mərkəzi də yerli və xarici turistləri daim özünə cəlb edir. Mərkəzdə 22 kottec, həmçinin hovuz, sauna, uşaq əyləncələri fəaliyyət göstərir. Digər obyektlərdə olduğu kimi, burada da bir nəfərin qalma xərci səhər yeməyi də daxil olmaqla 30 manat təşkil edir.
Kəndin ərazisində fəaliyyət göstərən “Ulu” istirahət mərkəzi isə bir aydan artıqdır ki, respublikanın müxtəlif bölgələrindən gəlmiş gənclərin ixtiyarındadır. Hazırda burada Gənclər və İdman Nazirliyinin təşkil etdiyi yay istirahət düşərgəsi fəaliyyətini uğurla davam etdirir.
2011-ci ilin noyabrında Prezident İlham Əliyevin iştirakı ilə istifadəyə verilən “El Resort” otel kompleksi də rayonda turizmin inkişafına öz mühüm töhfələrini verməkdədir. Üçmərtəbəli, 110 yerlik kompleksdə iki və dörd nəfərlik 52 lüks və VİP otaqlar fəaliyyət göstərir. Bütün otaqlar beynəlxalq standartlara cavab verir. Qonaqlar burada türk və Çin hamamlarının, nəhəng hovuzun, yaz-yay terrasının, idman meydançalarının, oyun və kino zallarının, uşaq əyləncələrinin xidmətlərindən yararlanırlar. Qiymətlər mövsümə uyğun olaraq dəyişir. Hazırda oteldə bir nəfərin qalma xərci səhər yeməyi, habelə bütün əyləncələr daxil olmaqla, orta hesabla 64 manat təşkil edir. Ərazidə inşa edilən 82 yerlik yeni korpusun tikintisi də artıq başa çatmaq üzrədir. Bu korpusun avqust-sentyabr aylarında istifadəyə verilməsi nəzərdə tutulur. Korpusun birinci mərtəbəsində boulinq mərkəzi, oyun və əyləncə otaqları, bar, 120 yerlik kafe, 240 yerlik restoran fəaliyyət göstərəcək.
Qaxa gələn turistləri təbiət gözəllikləri ilə yanaşı, qədim tarixi abidələr də özünə cəlb edir. Rayonda 2-si dünya, 18-i ölkə, 48-i yerli əhəmiyyətli olmaqla, 68 tarixi abidə mövcuddur. İlisu kəndindəki “Sumuq qala”, “Ulu körpü”, “Beş bulaq” abidələri, qədim məscid və qalalar, Ləkit kəndindəki V əsrə aid məbəd, VI-VII əsrlərə aid məbəd kompleksi və Qum kəndindəki V əsrə aid Alban məbədinin qalıqları, Ağçay kəndindəki “Oğlan qala, qız qala”, Oncallı kəndindəki Oğuz qəbiristanlığı, Qax şəhərinin “İçəribazar” məhəlləsindəki qədim tikililər, həmçinin rayon ərazisində yerləşən onlarla digər abidələr tarixilik baxımından turistlər üçün böyük əhəmiyyət kəsb edir. Turistlərin tarixi yerlərə, abidələrə səyahətlərini təşkil etmək üçün Rayon Mədəniyyət və Turizm şöbəsi tərəfindən 6 marşrut müəyyənləşdirilib. Marşrutlar üzrə ekskursiya mətnləri hazırlanıb.
Rayona gələn turistlərin arasında sadə kənd evlərində qalmağa üstünlük verənlərin sayı da ildən-ilə artır. Belə evlərdə qalanlar yerli əhali ilə sıx ünsiyyət yaradaraq rayonun, kəndin adət-ənənələri ilə, yaşayış tərzi ilə daha yaxından tanış olmaq imkanı əldə edirlər. İlisu, Ağçay, Qaşqaçay, Qum, Çinarlı və digər kəndlərdəki xüsusi evlərdə hər il yüzlərlə ailə öz istirahət mövsümünü şən və mənalı keçirir. Turizmin bu növü həm də yerli əhalinin maddi vəziyyətinin, güzəranının daha da yaxşılaşmasını təmin edir.
Bir sözlə, Qax rayonu ilin
bütün fəsillərində turistlər
üçün əsil istirahət məkanıdır.
Cavidan
Palitra.-2014.-17 iyul.-S.10.